ದೇಶಾದ್ಯಂತ ಹರಡಿರುವ ಅಂಚೆ ಕಚೇರಿಗಳು (Post Offices) ಇಂದಿಗೂ ಗ್ರಾಮೀಣ ಭಾಗದ ಜನರಿಗೆ ಪ್ರಮುಖ ಬ್ಯಾಂಕಿಂಗ್ ಕೇಂದ್ರಗಳಾಗಿವೆ. ಲಕ್ಷಾಂತರ ಜನರು ಅಂಚೆ ಕಚೇರಿಗಳಲ್ಲಿ ಖಾತೆಗಳನ್ನು ಹೊಂದಿದ್ದು, ಉಳಿತಾಯ ಯೋಜನೆಗಳಲ್ಲಿ ಹೂಡಿಕೆ ಮಾಡಿದ್ದಾರೆ. ಇದೀಗ ಕೇಂದ್ರ ಸರ್ಕಾರ ಅಂಚೆ ಕಚೇರಿಯ ಬ್ಯಾಂಕಿಂಗ್ ವ್ಯವಹಾರಗಳಲ್ಲಿ ಪಾರದರ್ಶಕತೆ ತರಲು ಮಹತ್ವದ ಬದಲಾವಣೆ ಮಾಡಿದೆ.
ಪಾನ್ ಕಾರ್ಡ್ ಕಡ್ಡಾಯ: ಆದಾಯ ತೆರಿಗೆ ನಿಯಮಗಳು 2026ರ ಪ್ರಕಾರ, ಅಂಚೆ ಕಚೇರಿಗಳಲ್ಲಿ ಆರ್ಥಿಕ ವಹಿವಾಟು ನಡೆಸಲು ಗ್ರಾಹಕರು ತಮ್ಮ ಪಾನ್ (PAN) ವಿವರಗಳನ್ನು ನೀಡುವುದು ಇನ್ನು ಮುಂದೆ ಕಡ್ಡಾಯವಾಗಿದೆ. ಉಳಿತಾಯ ಖಾತೆ ತೆರೆಯುವುದು, ಡೆಪಾಸಿಟ್ ಸ್ಕೀಮ್‌ಗಳು, ನಗದು ಹಿಂಪಡೆಯುವುದು, ಟೈಮ್ ಡೆಪಾಸಿಟ್ ಹಾಗೂ ಹೂಡಿಕೆ ಯೋಜನೆಗಳಿಗೆ ಪಾನ್ ಕಾರ್ಡ್ ಸಬೂತು ನೀಡುವುದು ಅತ್ಯಗತ್ಯ. ಆದಾಯ ತೆರಿಗೆ ನಿಯಮಗಳಾದ 237, 211, 161, 160 ಮತ್ತು 159ರ ಅಡಿಯಲ್ಲಿ ಈ ಹೊಸ ನಿಬಂಧನೆಗಳನ್ನು ಜಾರಿಗೆ ತರಲಾಗಿದೆ. ಅಂಚೆ ಇಲಾಖೆಯ ಆದೇಶ ಸಂಖ್ಯೆ 02/2026ರ ಆಧಾರದ ಮೇಲೆ ಈ ಹೊಸ ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡಲಾಗಿದೆ.
ಪಾನ್ ಕಾರ್ಡ್ ಇಲ್ಲದಿದ್ದರೆ ಏನು ಮಾಡಬೇಕು? ಒಂದು ವೇಳೆ ಗ್ರಾಹಕರ ಬಳಿ ಪಾನ್ ಕಾರ್ಡ್ ಇಲ್ಲದಿದ್ದರೆ ಅಥವಾ ಮರೆತಿದ್ದರೆ, ಅವರು ಫಾರ್ಮ್ 97 (Form 97) ಅನ್ನು ಭರ್ತಿ ಮಾಡಿ ಸಲ್ಲಿಸಬೇಕಾಗುತ್ತದೆ. ಇದರಲ್ಲಿ ಹೆಸರು, ವಿಳಾಸ ಮತ್ತು ವಹಿವಾಟಿನ ಸಂಪೂರ್ಣ ವಿವರಗಳನ್ನು ನೀಡಬೇಕು. ಇದರ ಜೊತೆಗೆ ಪೂರಕ ದಾಖಲೆಗಳನ್ನು (Supporting Documents) ಒದಗಿಸಬೇಕು. ಈ ದಾಖಲೆಗಳನ್ನು ಸುರಕ್ಷಿತವಾಗಿರಿಸುವ ಜವಾಬ್ದಾರಿಯನ್ನು ಅಂಚೆ ಕಚೇರಿಗಳಿಗೆ ವಹಿಸಲಾಗಿದೆ.
TDS ವಿನಾಯಿತಿಗಾಗಿ ಹೊಸ ಫಾರ್ಮ್: ಅಂಚೆ ಕಚೇರಿ ಯೋಜನೆಗಳಲ್ಲಿನ ಬಡ್ಡಿಯ ಆದಾಯದ ಮೇಲೆ ಟಿಡಿಎಸ್ (TDS) ಕಡಿತದಿಂದ ವಿನಾಯಿತಿ ಪಡೆಯಲು ಈಗ ಫಾರ್ಮ್ 121 (Form 121) ಸಲ್ಲಿಸಬೇಕಾಗುತ್ತದೆ. ಈ ಹಿಂದೆ ಇದಕ್ಕೆ 15G ಮತ್ತು 15H ಫಾರ್ಮ್‌ಗಳನ್ನು ಬಳಸಲಾಗುತ್ತಿತ್ತು. ಈ ದಾಖಲೆಗಳನ್ನು ಅಂಚೆ ಕಚೇರಿಗಳು ಏಳು ವರ್ಷಗಳ ಕಾಲ ಸಂರಕ್ಷಿಸಿಡಬೇಕು ಎಂದು ಕೇಂದ್ರ ಸರ್ಕಾರ ಸೂಚಿಸಿದೆ.
ಹೀಗಾಗಿ, ಇನ್ನು ಮುಂದೆ ನೀವು ಅಂಚೆ ಕಚೇರಿಗೆ ಹಣಕಾಸಿನ ವ್ಯವಹಾರಗಳಿಗಾಗಿ ಹೋಗುವಾಗ ಪಾನ್ ಕಾರ್ಡ್ ಕೊಂಡೊಯ್ಯುವುದನ್ನು ಮರೆಯಬೇಡಿ. ಇಲ್ಲದಿದ್ದರೆ ವಹಿವಾಟು ನಡೆಸುವಲ್ಲಿ ತೊಂದರೆಯಾಗಬಹುದು.
