ಹೈದರಾಬಾದ್‌ನಲ್ಲಿ ನಡೆದ ಭಾರತ ಹಾಗೂ ವೆಸ್ಟ್ ಇಂಡೀಸ್ ನಡುವಿನ 4ನೇ ಟಿ20 ಪಂದ್ಯದ ವೇಳೆ ರೋಚಕ ಹೋರಾಟದ ಜೊತೆಗೆ ಕ್ರೀಡಾಸ್ಪೂರ್ತಿಯ ಬಗ್ಗೆ ದೊಡ್ಡ ಮಟ್ಟದ ಚರ್ಚೆ ಹುಟ್ಟುಹಾಕಿದೆ. ಭಾರತದ ವೇಗದ ಬೌಲರ್ ಅರ್ಷ್‌ದೀಪ್ ಸಿಂಗ್ ಅವರ ಗಾಯಗೊಂಡ ಭುಜದ ಮೇಲೆಯೇ ಪದೇಪದೆ ಬೌನ್ಸರ್ ಎಸೆತಗಳನ್ನು ಹಾಕುವ ಮೂಲಕ ಅಪಾಯಕಾರಿ ರೀತಿಯಲ್ಲಿ ವರ್ತಿಸಿದ ವೆಸ್ಟ್ ಇಂಡೀಸ್ ವೇಗಿ ಶಮರ್ ಜೋಸೆಫ್ ಅವರ ನಡೆಗೆ ಭಾರತದ ದಿಗ್ಗಜ ಕ್ರಿಕೆಟಿಗೆ ಸುನಿಲ್ ಗಾವಸ್ಕರ್ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಪಂದ್ಯದ ನಿರ್ಣಾಯಕ ಹಂತದಲ್ಲಿ ಬ್ಯಾಟಿಂಗ್ ಮಾಡುತ್ತಿದ್ದ ಅರ್ಷ್‌ದೀಪ್ ಸಿಂಗ್ ಅವರ ಬೈಸೆಪ್ಸ್ ಹಾಗೂ ಭುಜದ ಭಾಗಕ್ಕೆ ಶಮರ್ ಜೋಸೆಫ್ ಎಸೆದ ಕಠಿಣ ಬೌನ್ಸರ್ ಬಲವಾಗಿ ತಗುಲಿತ್ತು. ಇದರಿಂದ ತೀವ್ರ ನೋವಿನಲ್ಲಿದ್ದರೂ ತಂಡಕ್ಕಾಗಿ ಕ್ರೀಡಾಂಗಣದಲ್ಲೇ ಉಳಿದುಕೊಂಡ ಅರ್ಷ್‌ದೀಪ್‌ಗೆ ಸ್ವತಃ ಭಾರತ ತಂಡದ ನಾಯಕ ಶ್ರೇಯಸ್ ಅಯ್ಯರ್ ಕೂಡ ಮುನ್ನೆಚ್ಚರಿಕೆ ಕ್ರಮವಾಗಿ ಮೈದಾನದಿಂದ ಹೊರನಡೆಯುವಂತೆ ಸೂಚಿಸಿದ್ದರು. ಆದರೆ ಗಾಯವನ್ನು ಲೆಕ್ಕಿಸದೆ ಆಟ ಮುಂದುವರಿಸಿದ ಅರ್ಷ್‌ದೀಪ್ ಮೇಲೆ ಜೋಸೆಫ್ ಮತ್ತೊಮ್ಮೆ ಶಾರ್ಟ್ ಪಿಚ್ ಎಸೆತಗಳನ್ನು ಪ್ರಯೋಗಿಸಿದರು.
ಬ್ಯಾಟರ್‌ನ ವಿಕೆಟ್ ಕಾಯುವ ಬದಲು ನೇರವಾಗಿ ಆಟಗಾರನ ದೇಹದ ಮೇಲೆಯೇ ಗುರಿ ಇಟ್ಟು ಬೌಲಿಂಗ್ ಮಾಡಿದ ಶಮರ್ ಜೋಸೆಫ್ ಕ್ರಮವನ್ನು ಕಾಮೆಂಟರಿ ಬಾಕ್ಸ್‌ನಲ್ಲಿದ್ದ ಸುನಿಲ್ ಗಾವಸ್ಕರ್ ಕಟುವಾಗಿ ಟೀಕಿಸಿದರು. ಸ್ಟಂಪ್ಸ್‌ಗಳು ನೇರವಾಗಿ ಕಣ್ಣಮುಂದೆ ಇದ್ದರೂ ಗಾಯಗೊಂಡ ಆಟಗಾರನನ್ನು ಗುರಿಯಾಗಿಸಿ ಆಕ್ರಮಣಕಾರಿ ಧೋರಣೆ ತೋರುವುದು ಯಾವ ರೀತಿಯ ಕ್ರೀಡಾಸ್ಪೂರ್ತಿ ಎಂದು ಗಾವಸ್ಕರ್ ಪ್ರಶ್ನಿಸಿದರು. ಅಂತಿಮವಾಗಿ ಮತ್ತೊಮ್ಮೆ ಅಪಾಯದಿಂದ ಕೂದಲೆಳೆSಯಲ್ಲಿ ಪಾರಾದ ಅರ್ಷ್‌ದೀಪ್ ನೋವು ಹೆಚ್ಚಾದ ಕಾರಣ ರಿಟೈರ್ ಹರ್ಟ್ ಆಗಿ ಮೈದಾನ ತೊರೆಯಬೇಕಾಯಿತು. ಈ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ತಂಡವು 24 ರನ್‌ಗಳಿಂದ ಗೆಲುವು ಸಾಧಿಸುವುದರೊಂದಿಗೆ ಐದು ಪಂದ್ಯಗಳ ಸರಣಿಯು 2-2 ಸಮಬಲಗೊಂಡಿದೆ.
