ಬೆಂಗಳೂರು: ರಾಜ್ಯದಲ್ಲಿನ ಸರ್ಕಾರಿ, ಅನುದಾನಿತ ಶಾಲೆ ಮತ್ತು ಪದವಿಪೂರ್ವ ಕಾಲೇಜುಗಳ ವಿದ್ಯಾರ್ಥಿಗಳಿಗೆ 2026-27 ನೇ ಸಾಲಿನಿಂದ ಅಂಕಪಟ್ಟಿ ಜೊತೆಗೆ ಅವರ ಹಾಜರಾತಿ, ನಡವಳಿಕೆ ಸೇರಿ ಸರ್ವತೋಮುಖ ಬೆಳವಣಿಗೆ ಬಿಂಬಿಸುವ ಸಮಗ್ರ ಪ್ರಗತಿಪತ್ರ ನೀಡಲು ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆ ನಿರ್ಧರಿಸಿದೆ.
ಎಲ್ಕೆಜಿಯಿಂದ ಪದವಿಪೂರ್ವ ಕಾಲೇಜಿನವರೆಗಿನ ಎಲ್ಲಾ ವಿದ್ಯಾರ್ಥಿಗಳಿಗೆ ಸಮಗ್ರ ಪ್ರಗತಿಪತ್ರ ನೀಡಲು ತೀರ್ಮಾನ ಕೈಗೊಳ್ಳಲಾಗಿದೆ. ಈ ಪ್ರಗತಿ ಪತ್ರ ಡಿಜಿಟಲ್ ರೂಪದಲ್ಲಿರಲಿದ್ದು, ಪೋಷಕರ ಮೊಬೈಲ್ ಅಥವಾ ಇ-ಮೇಲ್ ಗೆ ನೇರವಾಗಿ ರವಾನೆ ಮಾಡಲಾಗುವುದು.
ಈ ಹೊಸ ಮಾದರಿಯ ಪ್ರಗತಿಪತ್ರದಲ್ಲಿ ಪರೀಕ್ಷೆಯ ಅಂಕಗಳು ಮಾತ್ರವಲ್ಲದೇ ವಿದ್ಯಾರ್ಥಿಯ ನಡವಳಿಕೆ, ಹಾಜರಾತಿ, ಶಿಕ್ಷಕರ ಅಭಿಪ್ರಾಯ, ಮಗುವಿನ ಸರ್ವತೋಮುಖ ಬೆಳವಣಿಗೆಯ ಮಾಹಿತಿ ಇರಲಿದೆ. ಪ್ರತಿ ಮೂರು ತಿಂಗಳಿಗೊಮ್ಮೆ ಈ ಪ್ರಗತಿ ಪತ್ರವನ್ನು ಪೋಷಕರಿಗೆ ಕಳುಹಿಸಲಾಗುವುದು. 2026 -27ನೇ ಶೈಕ್ಷಣಿಕ ವರ್ಷದಿಂದ ಈ ಹೊಸ ವ್ಯವಸ್ಥೆ ಜಾರಿಗೆ ಬರಲಿದೆ. ಪೋಷಕರು ವಿನಂತಿಸಿದಾಗ ಅಥವಾ ವಿದ್ಯಾರ್ಥಿ ವರ್ಗಾವಣೆ ಪ್ರಮಾಣ ಪತ್ರ ಪಡೆದು ಬೇರೆ ಶಾಲೆಗೆ ಸೇರುವ ಸಂದರ್ಭದಲ್ಲಿ ಭೌತಿಕ ಪ್ರತಿಗಳನ್ನು ನೀಡಲಾಗುವುದು ಎಂದು ಹೇಳಲಾಗಿದೆ.
