ಗ್ಯಾಂಗ್ಟಕ್ : ಪಶ್ಚಿಮ ಬಂಗಾಳದ ಚುನಾವಣಾ ಪ್ರಚಾರವನ್ನು ಮುಗಿಸಿದ ಮರುದಿನವೇ ಪ್ರಧಾನಿ ನರೇಂದ್ರ ಮೋದಿ ಅವರು ಮಂಗಳವಾರ ಸಿಕ್ಕಿಂನ ಗ್ಯಾಂಗ್ಟಕ್ನಲ್ಲಿ ಯುವಕರೊಂದಿಗೆ ಫುಟ್ಬಾಲ್ ಆಡಿ ಗಮನ ಸೆಳೆದಿದ್ದಾರೆ. ಗ್ಯಾಂಗ್ಟಕ್ನ ಸುಂದರ ಮುಂಜಾನೆಯಲ್ಲಿ ಪ್ರಧಾನಿ ಮೋದಿ ಅವರು ಫುಟ್ಬಾಲ್ ಕಿಟ್ ಧರಿಸಿ ಯುವ ಆಟಗಾರರೊಂದಿಗೆ ಮೈದಾನಕ್ಕಿಳಿದರು.ಈ ಕುರಿತು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿರುವ ಅವರು, “ಸಿಕ್ಕಿಂನ ನನ್ನ ಯುವ ಸ್ನೇಹಿತರೊಂದಿಗೆ ಫುಟ್ಬಾಲ್ ಆಡಿದ್ದು ನಿಜಕ್ಕೂ ಉತ್ತೇಜನಕಾರಿಯಾಗಿತ್ತು” ಎಂದು ಬರೆದುಕೊಂಡಿದ್ದಾರೆ.
ಸಿಕ್ಕಿಂ ರಾಜ್ಯದ 50ನೇ ಸಂಸ್ಥಾಪನಾ ದಿನಾಚರಣೆಯ ಸಮಾರೋಪ ಸಮಾರಂಭದಲ್ಲಿ ಭಾಗವಹಿಸಲು ಪ್ರಧಾನಿ ಮೋದಿ ಸೋಮವಾರ ಗ್ಯಾಂಗ್ಟಕ್ ತಲುಪಿದ್ದರು.ಕ್ರೀಡೆಯ ಜೊತೆಗೆ, ಅವರು ಗ್ಯಾಂಗ್ಟಕ್ನಲ್ಲಿ ಪದ್ಮ ಪ್ರಶಸ್ತಿ ಪುರಸ್ಕೃತರು ಮತ್ತು ವಿವಿಧ ಕ್ಷೇತ್ರಗಳಲ್ಲಿ ಗಮನಾರ್ಹ ಕೊಡುಗೆ ನೀಡಿದ ಗಣ್ಯರೊಂದಿಗೆ ಸಂವಾದ ನಡೆಸಿದರು. ಪಶ್ಚಿಮ ಬಂಗಾಳದ ಬಿರುಸಿನ ಚುನಾವಣಾ ಪ್ರಚಾರದ ನಂತರ ಪ್ರಧಾನಿಯವರ ಈ ಕ್ರೀಡಾ ಆಸಕ್ತಿಯು ಎಲ್ಲರ ಗಮನ ಸೆಳೆದಿದೆ.
ಎಕ್ಸ್ (X) ಜಾಲತಾಣದಲ್ಲಿ ಚಿತ್ರಗಳನ್ನು ಹಂಚಿಕೊಂಡ ಪ್ರಧಾನಿ ಮೋದಿ, ಯುವಕರೊಂದಿಗಿನ ಈ ಫುಟ್ಬಾಲ್ ಸೆಷನ್ ಅನ್ನು “ಉತ್ತೇಜನಕಾರಿ” ಎಂದು ಬಣ್ಣಿಸಿದ್ದಾರೆ.”ಗ್ಯಾಂಗ್ಟಕ್ನ ಸುಂದರ ಮುಂಜಾನೆಯಲ್ಲಿ ಸಿಕ್ಕಿಂನ ನನ್ನ ಯುವ ಸ್ನೇಹಿತರೊಂದಿಗೆ ಫುಟ್ಬಾಲ್ ಆಡುವುದಕ್ಕಿಂತ ಮಿಗಿಲಾದದ್ದು ಯಾವುದೂ ಇಲ್ಲ!” ಎಂದು ಮೈದಾನದಲ್ಲಿ ತಾವು ಆಡುತ್ತಿರುವ ಕೆಲವು ಚಿತ್ರಗಳನ್ನು ಫೇಸ್ಬುಕ್ನಲ್ಲಿ ಹಂಚಿಕೊಳ್ಳುತ್ತಾ ಪ್ರಧಾನಿ ಮೋದಿ ಬರೆದುಕೊಂಡಿದ್ದಾರೆ.
ಈ ಚಿತ್ರಗಳಲ್ಲಿ 75 ವರ್ಷದ ಪ್ರಧಾನಿಯವರು ವಾರ್ಮ್-ಅಪ್ (Warm-up) ಮಾಡುತ್ತಿರುವುದು, ಯುವ ಆಟಗಾರರ ನಡುವೆ ಚೆಂಡನ್ನು ಡ್ರಿಬ್ಬಲ್ (Dribble) ಮಾಡುತ್ತಾ ಸಾಗುವುದು ಮತ್ತು ಮಕ್ಕಳೊಂದಿಗೆ ಲಘು ಹಾಸ್ಯದ ಕ್ಷಣಗಳನ್ನು ಹಂಚಿಕೊಳ್ಳುತ್ತಿರುವುದು ಕಂಡುಬಂದಿದೆ. ಅಲ್ಲದೆ, ಅವರು ಗೋಲ್ ಪೋಸ್ಟ್ನತ್ತ ಚೆಂಡನ್ನು ಒದೆಯುತ್ತಿರುವ (Shot at the goal) ದೃಶ್ಯಗಳೂ ಇವೆ.
