ನಾವೆಲ್ಲರೂ ರುಚಿಗೆ ಮಾರುಹೋಗಿ ಪಿಜ್ಜಾ, ಬರ್ಗರ್, ಸಂಸ್ಕರಿಸಿದ ತಿಂಡಿಗಳು ಅಥವಾ ಅತಿಯಾದ ಸಿಹಿಯಂತಹ ಜಂಕ್ ಫುಡ್ಗಳನ್ನು ಸೇವಿಸುತ್ತೇವೆ. ಇವು ಆರೋಗ್ಯಕ್ಕೆ ಒಳ್ಳೆಯದಲ್ಲ ಎಂಬುದು ತಿಳಿದಿದ್ದರೂ, ನಾಲಿಗೆಯ ರುಚಿಗಾಗಿ ಇವುಗಳನ್ನು ಬಿಡಲು ಮನಸ್ಸು ಮಾಡುವುದಿಲ್ಲ. ಆದರೆ, ಕೇವಲ 60 ದಿನಗಳ ಕಾಲ ಅಂದರೆ ಎರಡು ತಿಂಗಳು ಸಂಪೂರ್ಣವಾಗಿ ಈ ಜಂಕ್ ಫುಡ್ಗಳಿಂದ ದೂರವಿದ್ದರೆ ನಿಮ್ಮ ದೇಹದ ಒಳಗಿನ ವ್ಯವಸ್ಥೆಯಲ್ಲಿ ಅಚ್ಚರಿಯ ಬದಲಾವಣೆಗಳು ಕಂಡುಬರುತ್ತವೆ ಎಂದು ಇತ್ತೀಚಿನ ವೈಜ್ಞಾನಿಕ ಸಂಶೋಧನೆಗಳು ತಿಳಿಸಿವೆ.
ಜಂಕ್ ಫುಡ್ ತ್ಯಜಿಸಿದಾಗ ದೇಹವು ತನ್ನ ಆಂತರಿಕ ಅಂಗಾಂಗಗಳನ್ನು ಹೇಗೆ ಪುನರುಜ್ಜೀವನಗೊಳಿಸಿಕೊಳ್ಳುತ್ತದೆ ಎಂಬ ಮಾಹಿತಿ ಇಲ್ಲಿದೆ.
ಹಸಿವಿನ ಮೇಲೆ ನಿಯಂತ್ರಣ ಜಂಕ್ ಫುಡ್ ಸೇವನೆಯಿಂದ ನಮ್ಮ ದೇಹದಲ್ಲಿ ಹಸಿವನ್ನು ನಿಯಂತ್ರಿಸುವ ಹಾರ್ಮೋನ್ಗಳ ಏರುಪೇರಾಗುತ್ತದೆ. ಸಂಶೋಧನೆಗಳ ಪ್ರಕಾರ, ಕೇವಲ ಎರಡು ತಿಂಗಳು ಇವುಗಳಿಂದ ದೂರವಿದ್ದರೆ ‘ಲೆಪ್ಟಿನ್’ ಮತ್ತು ‘ಗ್ರೆಲಿನ್’ ಎಂಬ ಹಾರ್ಮೋನ್ಗಳು ಸಮತೋಲನಕ್ಕೆ ಬರುತ್ತವೆ. ಇದರಿಂದಾಗಿ ಅತಿಯಾಗಿ ತಿನ್ನುವ ಅಭ್ಯಾಸ ಕಡಿಮೆಯಾಗಿ, ಹೊಟ್ಟೆ ತುಂಬಿದ ತಕ್ಷಣ ದೇಹಕ್ಕೆ ಸಂಕೇತ ತಲುಪುತ್ತದೆ.
ತೂಕ ಇಳಿಕೆ ಮತ್ತು ಹೆಚ್ಚಿನ ಶಕ್ತಿ ಅಲ್ಟ್ರಾ ಪ್ರೊಸೆಸ್ಡ್ ಆಹಾರಗಳನ್ನು ಕಡಿತಗೊಳಿಸುವುದರಿಂದ ಪ್ರತಿದಿನ ಸರಾಸರಿ 600 ಕ್ಯಾಲೋರಿಗಳಷ್ಟು ಉಳಿತಾಯವಾಗುತ್ತದೆ ಎಂದು 2024ರ ಅಧ್ಯಯನವೊಂದು ತಿಳಿಸಿದೆ. ಇದರಿಂದಾಗಿ ತೂಕ ಇಳಿಕೆಯಾಗುವುದಲ್ಲದೆ, ದಿನವಿಡೀ ರಕ್ತದಲ್ಲಿನ ಸಕ್ಕರೆ ಪ್ರಮಾಣ ಸ್ಥಿರವಾಗಿರುತ್ತದೆ. ಇದು ನಿಮ್ಮನ್ನು ಸುಸ್ತು ಮಾಡದೆ ದಿನವಿಡೀ ಚಟುವಟಿಕೆಯಿಂದ ಇರುವಂತೆ ಮಾಡುತ್ತದೆ.
ಜೀರ್ಣಕ್ರಿಯೆ ಮತ್ತು ಕರುಳಿನ ಆರೋಗ್ಯ ಜಂಕ್ ಫುಡ್ಗಳು ಕರುಳಿನಲ್ಲಿರುವ ಒಳ್ಳೆಯ ಬ್ಯಾಕ್ಟೀರಿಯಾಗಳನ್ನು ನಾಶಮಾಡುತ್ತವೆ. 60 ದಿನಗಳ ಕಾಲ ಈ ಆಹಾರಗಳನ್ನು ಬಿಟ್ಟರೆ ಕರುಳಿನ ಪದರವು ಗುಣವಾಗಲು ಪ್ರಾರಂಭಿಸುತ್ತದೆ. ಇದರಿಂದ ಜೀರ್ಣಕ್ರಿಯೆ ಸುಧಾರಿಸುವುದಲ್ಲದೆ, ರೋಗನಿರೋಧಕ ಶಕ್ತಿ ಮತ್ತು ಮಾನಸಿಕ ನೆಮ್ಮದಿಯೂ ಹೆಚ್ಚಾಗುತ್ತದೆ.
ಮೆದುಳಿನ ಕಾರ್ಯಕ್ಷಮತೆ ಹೆಚ್ಚಳ ಅತಿಯಾದ ಸಂಸ್ಕರಿಸಿದ ಆಹಾರಗಳು ಮೆದುಳಿನ ಕಾರ್ಯವೈಖರಿಯ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತವೆ ಎಂಬುದು ತಜ್ಞರ ಅಭಿಪ್ರಾಯ. ಜಂಕ್ ಫುಡ್ ತ್ಯಜಿಸಿದ ಎರಡು ತಿಂಗಳಲ್ಲಿ ಮೆದುಳು ಇನ್ಸುಲಿನ್ ಹಾರ್ಮೋನ್ ಅನ್ನು ಸರಿಯಾಗಿ ಬಳಸಿಕೊಳ್ಳಲು ಆರಂಭಿಸುತ್ತದೆ. ಇದರಿಂದ ಏಕಾಗ್ರತೆ ಹೆಚ್ಚುತ್ತದೆ ಮತ್ತು ಪದೇ ಪದೇ ತಿನ್ನಬೇಕೆಂಬ ಹಂಬಲ (Cravings) ಕಡಿಮೆಯಾಗುತ್ತದೆ.
ಉರಿಯೂತ ಮತ್ತು ಊತದ ಇಳಿಕೆ ಜಂಕ್ ಫುಡ್ ಸೇವನೆಯಿಂದ ದೇಹದ ಒಳಗಿನ ಅಂಗಾಂಗಗಳಲ್ಲಿ ಉರಿಯೂತ ಉಂಟಾಗಿ ಹೃದಯ ಸಂಬಂಧಿ ಕಾಯಿಲೆಗಳಿಗೆ ದಾರಿಯಾಗುತ್ತದೆ. 60 ದಿನಗಳ ಈ ‘ಕ್ಲೀನ್ ಈಟಿಂಗ್’ ಅಭ್ಯಾಸದಿಂದ ದೇಹದ ಉರಿಯೂತ ಕಡಿಮೆಯಾಗುತ್ತದೆ. ಇದರ ಫಲವಾಗಿ ಮುಖದ ಚರ್ಮ ಕಾಂತಿಯುತವಾಗುವುದು, ಹೊಟ್ಟೆಯ ಉಬ್ಬರ ಕಡಿಮೆಯಾಗುವುದು ಮತ್ತು ಕೀಲು ನೋವಿನಂತಹ ಸಮಸ್ಯೆಗಳಿಂದ ಮುಕ್ತಿ ಸಿಗುತ್ತದೆ.
ಒಟ್ಟಾರೆಯಾಗಿ ಹೇಳುವುದಾದರೆ, 60 ದಿನಗಳ ಈ ಸಂಕಲ್ಪವು ಕೇವಲ ತೂಕ ಇಳಿಕೆಗಷ್ಟೇ ಸೀಮಿತವಾಗಿಲ್ಲ, ಇದು ನಿಮ್ಮ ಒಟ್ಟಾರೆ ಆರೋಗ್ಯದ ಮೇಲೆ ಹೊಸ ಚೈತನ್ಯವನ್ನು ನೀಡಬಲ್ಲದು.
