ಸುಮಾರು 10 ವರ್ಷಗಳ ಹಿಂದಿನ ಭೀಕರ ರಸ್ತೆ ಅಪಘಾತದ ಪ್ರಕರಣವೊಂದರಲ್ಲಿ ಕರ್ನಾಟಕ ಹೈಕೋರ್ಟ್ ಸಂತ್ರಸ್ತ ಕುಟುಂಬಕ್ಕೆ ದೊಡ್ಡ ಮಟ್ಟದ ನ್ಯಾಯ ಒದಗಿಸಿದೆ. ಅಪಘಾತದ ಸ್ಥಳದ ನಕ್ಷೆಯನ್ನು (Spot Sketch) ಆಧಾರವಾಗಿಟ್ಟುಕೊಂಡ ನ್ಯಾಯಾಲಯ, ವಿಮಾ ಕಂಪನಿಯ ಕುತರ್ಕವನ್ನು ತಳ್ಳಿಹಾಕಿದ್ದಲ್ಲದೆ, ಪರಿಹಾರದ ಮೊತ್ತವನ್ನು ಭರ್ಜರಿ 51.6 ಲಕ್ಷ ರೂಪಾಯಿಗೆ ಹೆಚ್ಚಿಸಿ ಆದೇಶಿಸಿದೆ.
ಏನಿದು ಪ್ರಕರಣ?
ಕಂದಾಯ ಇಲಾಖೆಯಲ್ಲಿ ಎಫ್‌ಡಿಎ (FDA) ಆಗಿದ್ದ ಶಹಾಬುದ್ದೀನ್ ಖಾನ್ ಅವರು 2016ರಲ್ಲಿ ಕುಟುಂಬ ಸಮೇತ ಬೆಂಗಳೂರಿನಿಂದ ಊಟಿಗೆ ತೆರಳುತ್ತಿದ್ದಾಗ ನಂಜನಗೂಡು-ಗುಂಡ್ಲುಪೇಟೆ ಹೆದ್ದಾರಿಯಲ್ಲಿ ಅಪಘಾತಕ್ಕೀಡಾಗಿದ್ದರು. ಎದುರುಗಡೆಯಿಂದ ಬಂದ ಕೇರಳ ನೋಂದಣಿಯ ಕಾರು ಡಿಕ್ಕಿ ಹೊಡೆದ ಪರಿಣಾಮ ಶಹಾಬುದ್ದೀನ್ ಮೃತಪಟ್ಟರೆ, ಅವರ ಪತ್ನಿ ಹಾಗೂ ಇಬ್ಬರು ಮಕ್ಕಳು ಗಾಯಗೊಂಡಿದ್ದರು.
ವಿಮಾ ಕಂಪನಿಗೆ ಹೈಕೋರ್ಟ್ ಚಾಟಿ
ಅಪಘಾತಕ್ಕೆ ಎರಡೂ ಕಾರುಗಳ ಚಾಲಕರು ಕಾರಣ (Contributory Negligence) ಎಂದು ವಾದಿಸಿದ್ದ ನ್ಯಾಷನಲ್ ಇನ್ಶೂರೆನ್ಸ್ ಕಂಪನಿಗೆ ನ್ಯಾಯಾಲಯವು ಸಾಕ್ಷ್ಯಧಾರಿತ ಪೆಟ್ಟು ನೀಡಿದೆ.
ನ್ಯಾಯಮೂರ್ತಿಗಳಾದ ಎಸ್.ಜಿ. ಪಂಡಿತ್ ಮತ್ತು ಕೆ.ವಿ. ಅರವಿಂದ್ ಅವರಿದ್ದ ಪೀಠ ಗಮನಿಸಿದ ಅಂಶಗಳು:
ಜಾಗದ ಲೆಕ್ಕಾಚಾರ: ಅಪಘಾತದ ಜಾಗದಲ್ಲಿ ಕೇರಳದ ಕಾರಿಗೆ ಎಡಭಾಗದಲ್ಲಿ 25 ಅಡಿ ಖಾಲಿ ಜಾಗವಿತ್ತು. ಆದರೆ ಮೃತರಿದ್ದ ಕಾರಿಗೆ ಇದ್ದದ್ದು ಕೇವಲ 15 ಅಡಿ ಮಾತ್ರ!
ಚಾಲಕನ ತಪ್ಪು: ಇಷ್ಟು ಜಾಗವಿದ್ದರೂ ಕೇರಳದ ಕಾರಿನ ಚಾಲಕ ಅಜಾಗರೂಕತೆಯಿಂದ ಬಲಕ್ಕೆ ನುಗ್ಗಿದ್ದೇ ಅಪಘಾತಕ್ಕೆ ನೇರ ಕಾರಣ ಎಂಬುದು ‘ಸ್ಪಾಟ್ ಸ್ಕೆಚ್’ ಮೂಲಕ ಸಾಬೀತಾಗಿದೆ.
41.5 ಲಕ್ಷದಿಂದ 51.6 ಲಕ್ಷಕ್ಕೆ ಏರಿಕೆ ಮಾಡಿದ್ದೇಕೆ?
ಈ ಹಿಂದೆ ನ್ಯಾಯಮಂಡಳಿಯು 41.5 ಲಕ್ಷ ರೂ. ಪರಿಹಾರ ನೀಡಿತ್ತು. ಆದರೆ, ಮೃತ ಶಹಾಬುದ್ದೀನ್ ಅವರು ಮಾಜಿ ಸೈನಿಕರಾಗಿದ್ದು, ಅವರು ಪಡೆಯುತ್ತಿದ್ದ ವಾರ್ಷಿಕ 2 ಲಕ್ಷ ರೂ. ಮಿಲಿಟರಿ ಪಿಂಚಣಿಯನ್ನು ಲೆಕ್ಕಕ್ಕೆ ತೆಗೆದುಕೊಳ್ಳಲು ಟ್ರಿಬ್ಯೂನಲ್ ಮರೆತಿತ್ತು. ಈ ಲೋಪವನ್ನು ಸರಿಪಡಿಸಿದ ಹೈಕೋರ್ಟ್, ಈಗ ಪರಿಹಾರವನ್ನು 51.6 ಲಕ್ಷಕ್ಕೆ ಹೆಚ್ಚಿಸಿದೆ.
