ಗರುಡ ಪುರಾಣ ಎಂದರೆ ಕೇವಲ ಮರಣಾನಂತರದ ಕಥೆಯಲ್ಲ, ಅದು ಬದುಕಿರುವಾಗ ನೆಮ್ಮದಿಯಿಂದ ಇರಲು ದಾರಿದೀಪ ಎಂಬುದು ಅನೇಕರಿಗೆ ತಿಳಿದಿಲ್ಲ. ನಾವು ಮಾಡುವ ಕೆಲವು ಸಣ್ಣ ತಪ್ಪುಗಳು ಅಥವಾ ಅರಿವಿಲ್ಲದೆ ಮಾಡುವ ಪಾಪಗಳು ನಮ್ಮ ಜೀವನದ ಸುಖ-ಶಾಂತಿಯನ್ನು ಹೇಗೆ ಕಸಿದುಕೊಳ್ಳುತ್ತವೆ ಮತ್ತು ಸದಾ ಆರ್ಥಿಕ ಸಂಕಷ್ಟ ಹಾಗೂ ಕೌಟುಂಬಿಕ ಕಲಹಗಳಿಗೆ ಕಾರಣವಾಗುತ್ತವೆ ಎಂಬುದನ್ನು ಈ ಪುರಾಣ ಸವಿಸ್ತಾರವಾಗಿ ವಿವರಿಸುತ್ತದೆ. ಮನುಷ್ಯನ ಸರ್ವತೋಮುಖ ಏಳಿಗೆಗಾಗಿ ಗರುಡ ಪುರಾಣ ಸೂಚಿಸಿರುವ ಆ 5 ಪ್ರಮುಖ ಜೀವನ ಸತ್ಯಗಳ ಮಾಹಿತಿ ಇಲ್ಲಿದೆ.
ಮನುಷ್ಯನ ಜೀವನ ಹೇಗಿರಬೇಕು? ಯಾವ ಕೆಲಸಗಳು ಪುಣ್ಯ ತರುತ್ತವೆ ಮತ್ತು ಯಾವುದರಿಂದ ದೂರವಿರಬೇಕು ಎಂಬ ಬಗ್ಗೆ ಪುರಾಣಗಳು ಸ್ಪಷ್ಟವಾಗಿ ತಿಳಿಸುತ್ತವೆ. ಅದರಲ್ಲಿ ಗರುಡ ಪುರಾಣವು ಅತ್ಯಂತ ಪ್ರಮುಖವಾದುದು. ಗರುಡ ಪುರಾಣದ ಪ್ರಕಾರ, ನಾವು ಮಾಡುವ ಕೆಲವು ತಪ್ಪುಗಳು ನಮಗೆ ಅರಿವಿಲ್ಲದೆಯೇ ಜೀವನದಲ್ಲಿ ಸಮಸ್ಯೆಗಳನ್ನು ತಂದೊಡ್ಡುತ್ತವೆ. ವಿಶೇಷವಾಗಿ ಈ ಕೆಳಗಿನ ಐದು ವಿಷಯಗಳ ಬಗ್ಗೆ ಆಧ್ಯಾತ್ಮಿಕ ಪಂಡಿತರು ಎಚ್ಚರಿಸಿದ್ದಾರೆ:
1. ಸ್ತ್ರೀಯರಿಗೆ ಗೌರವ ನೀಡುವುದು
ಕುಟುಂಬದಲ್ಲಾಗಲಿ ಅಥವಾ ಸಮಾಜದಲ್ಲಾಗಲಿ ಮಹಿಳೆಯರನ್ನು ಅವಮಾನಿಸುವುದು ದೊಡ್ಡ ತಪ್ಪು ಎಂದು ಪರಿಗಣಿಸಲಾಗಿದೆ. ಸ್ತ್ರೀಯರನ್ನು ಗೌರವಿಸದ ಮನೆಯಲ್ಲಿ ಶಾಂತಿ ನೆಲೆಸುವುದಿಲ್ಲ ಮತ್ತು ಸಂಬಂಧಗಳು ದುರ್ಬಲಗೊಳ್ಳುತ್ತವೆ. ಕುಟುಂಬದ ಸೌಖ್ಯಕ್ಕಾಗಿ ಮಹಿಳೆಯರಿಗೆ ಗೌರವ ನೀಡುವುದು ಅತ್ಯಗತ್ಯ.
2. ಪರಧನಕ್ಕೆ ಆಸೆಪಡಬಾರದು
ಇತರರ ಆಸ್ತಿ ಅಥವಾ ಸಂಪತ್ತಿನ ಮೇಲೆ ಕಣ್ಣು ಹಾಕುವುದು ಮನುಷ್ಯನನ್ನು ತಪ್ಪು ದಾರಿಗೆ ಎಳೆಯುತ್ತದೆ. ಅಧರ್ಮದಿಂದ ಅಥವಾ ವಂಚನೆಯಿಂದ ಸಂಪಾದಿಸಿದ ಹಣವು ತಾತ್ಕಾಲಿಕವಾಗಿ ಲಾಭ ನೀಡಿದಂತೆ ಕಂಡರೂ, ದೀರ್ಘಕಾಲದಲ್ಲಿ ಅದು ಸಂಕಷ್ಟಗಳನ್ನೇ ತರುತ್ತದೆ. ಕಷ್ಟಪಟ್ಟು ಪ್ರಾಮಾಣಿಕವಾಗಿ ಗಳಿಸಿದ ಸಂಪತ್ತಿಗೆ ಮಾತ್ರ ನಿಜವಾದ ಬೆಲೆ ಇರುತ್ತದೆ.
3. ಗುರು ಮತ್ತುಜ್ಞಾನಕ್ಕೆ ಅವಮಾನ ಮಾಡದಿರುವುದು
ವಿದ್ಯೆ ಕಲಿಸಿದ ಗುರುಗಳನ್ನು ಮತ್ತು ಜ್ಞಾನ ನೀಡುವ ಗ್ರಂಥಗಳನ್ನು ಕೀಳಾಗಿ ಕಾಣುವುದು ಮನುಷ್ಯನ ಆಲೋಚನಾ ಶಕ್ತಿಯನ್ನು ಕುಂದಿಸುತ್ತದೆ. ಇದರಿಂದ ಜೀವನದಲ್ಲಿ ಸರಿಯಾದ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಸಾಮರ್ಥ್ಯ ಕಡಿಮೆಯಾಗಿ, ಪದೇ ಪದೇ ತಪ್ಪುಗಳು ಸಂಭವಿಸುತ್ತವೆ ಎಂದು ಆಧ್ಯಾತ್ಮಿಕ ಗ್ರಂಥಗಳು ಎಚ್ಚರಿಸುತ್ತವೆ.
4. ಪ್ರಾಣಿ ಹಿಂಸೆ ಮಹಾಪಾಪ
ಮೂಕ ಪ್ರಾಣಿಗಳ ಮೇಲೆ ಕ್ರೌರ್ಯ ತೋರುವುದು ಮನುಷ್ಯನ ಮಾನವೀಯತೆಯನ್ನು ನಾಶಪಡಿಸುತ್ತದೆ. ಪ್ರಾಣಿಗಳ ಪ್ರತಿ ಕರುಣೆ ತೋರುವುದರಿಂದ ನಮ್ಮಲ್ಲಿ ಸದ್ಗುಣಗಳು ಬೆಳೆಯುತ್ತವೆ ಮತ್ತು ಸಮಾಜದಲ್ಲಿ ಸಹಾನುಭೂತಿ ಹೆಚ್ಚುತ್ತದೆ. ಪ್ರಾಣಿಗಳನ್ನು ಹಿಂಸಿಸುವುದು ಪತನಕ್ಕೆ ದಾರಿಯಾಗುತ್ತದೆ.
5. ಅಹಂಕಾರ ಮತ್ತುಅಧರ್ಮದ ಹಾದಿ
‘ನಾನೇ ಶ್ರೇಷ್ಠ’ ಎಂಬ ಅಹಂಕಾರ ಮತ್ತು ನ್ಯಾಯಕ್ಕೆ ವಿರುದ್ಧವಾಗಿ ನಡೆಯುವ ಗುಣವು ಮನುಷ್ಯನ ವಿನಾಶಕ್ಕೆ ಕಾರಣವಾಗುತ್ತದೆ. ಅಧರ್ಮದ ಹಾದಿಯಲ್ಲಿ ತಾತ್ಕಾಲಿಕ ಯಶಸ್ಸು ಸಿಗಬಹುದು, ಆದರೆ ವಿನಯ ಮತ್ತು ಧರ್ಮಬದ್ಧ ಜೀವನ ಮಾತ್ರ ಸ್ಥಿರವಾದ ಸುಖ ಮತ್ತು ಶಾಂತಿಯನ್ನು ನೀಡುತ್ತದೆ.
ಸಲಹೆ: ಜೀವನವನ್ನು ಸುಗಮಗೊಳಿಸಲು ದಾನಧರ್ಮಗಳಿಗೆ ಪ್ರಾಮುಖ್ಯತೆ ನೀಡಿ. ಹಸಿದವರಿಗೆ ಅನ್ನ ನೀಡುವುದು ಮತ್ತು ಸಂಕಷ್ಟದಲ್ಲಿರುವವರಿಗೆ ಸಹಾಯ ಮಾಡುವುದು ಮನಸ್ಸಿಗೆ ನೆಮ್ಮದಿ ನೀಡುವ ಜೊತೆಗೆ ಸಮಾಜದಲ್ಲಿ ಉತ್ತಮ ವಾತಾವರಣ ನಿರ್ಮಿಸುತ್ತದೆ
ಗಮನಿಸಿ: ಈ ಲೇಖನದಲ್ಲಿರುವ ಅಂಶಗಳು ಆಧ್ಯಾತ್ಮಿಕ ಗ್ರಂಥಗಳ ಆಧಾರದ ಮೇಲೆ ನೀಡಲಾಗಿದೆ. ಇವುಗಳನ್ನು ಅನುಸರಿಸುವುದು ವೈಯಕ್ತಿಕ ನಂಬಿಕೆಗೆ ಸಂಬಂಧಿಸಿರುತ್ತದೆ.
