ಟೀಮ್ ಇಂಡಿಯಾದ ವೇಗಿ ಜಸ್ಪ್ರೀತ್ ಬುಮ್ರಾ ಮತ್ತು ಕ್ರೀಡಾ ನಿರೂಪಕಿ ಸಂಜನಾ ಗಣೇಶನ್ ಜೋಡಿ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಯಲ್ಲಿದೆ. ಇತ್ತೀಚೆಗೆ ಮಾಜಿ ಕ್ರಿಕೆಟಿಗ ಹರ್ಭಜನ್ ಸಿಂಗ್ ಮತ್ತು ಅವರ ಪತ್ನಿ ಗೀತಾ ಬಸ್ರಾ ಅವರೊಂದಿಗೆ ನಡೆಸಿದ ಸಂಭಾಷಣೆಯಲ್ಲಿ, ಸಂಜನಾ ಅವರು ಬುಮ್ರಾ ಜೊತೆಗಿನ ತಮ್ಮ ಮೊದಲ ಭೇಟಿಯ ಕುತೂಹಲಕಾರಿ ನೆನಪುಗಳನ್ನು ಹಂಚಿಕೊಂಡಿದ್ದಾರೆ.
ಆವತ್ತು ಬುಮ್ರಾ ನಡೆದುಕೊಂಡ ರೀತಿ ವಿಚಿತ್ರವಾಗಿತ್ತು! 2019ರಲ್ಲಿ ಈ ಇಬ್ಬರು ಮೊದಲ ಬಾರಿಗೆ ಭೇಟಿಯಾಗಿದ್ದರು. ಆ ಸಮಯದಲ್ಲಿ ಮೈದಾನದಲ್ಲಿ ಕೆಲಸ ಮಾಡುತ್ತಿದ್ದ ಸಂಜನಾ ಅವರಿಗೆ ಅಲ್ಲಿನ ಇತರ ಕ್ರಿಕೆಟಿಗರೆಲ್ಲಾ ಬಂದು ಹಾಯ್ ಹೇಳಿ ಮಾತನಾಡಿಸುತ್ತಿದ್ದರು. ಆದರೆ ಬುಮ್ರಾ ಮಾತ್ರ ಅಲ್ಲಿಯೇ ಇದ್ದರೂ ಸಂಜನಾ ಜೊತೆ ಕಣ್ಣಿಗೆ ಕಣ್ಣಿಟ್ಟು ನೋಡದೆ, ಮಾತನಾಡದೆ ದೂರ ನಿಂತಿದ್ದರಂತೆ. “ಬೇರೆ ಆಟಗಾರರು ಸಹಜವಾಗಿ ಮಾತನಾಡಿಸುತ್ತಿದ್ದರು, ಆದರೆ ಬುಮ್ರಾ ಮಾತ್ರ ಒಂದು ರೀತಿಯ ಗೋಡೆಯನ್ನು ನಿರ್ಮಿಸಿಕೊಂಡು ಸುಮ್ಮನೆ ನಿಂತಿದ್ದರು. ಅವರು ಹಾಯ್ ಎನ್ನಲಿಲ್ಲ, ಕಣ್ಣು ಕೂಡ ಸಂಪರ್ಕಿಸಲಿಲ್ಲ,” ಎಂದು ಸಂಜನಾ ನೆನಪಿಸಿಕೊಂಡಿದ್ದಾರೆ.
ಪತ್ನಿ ಅಥವಾ ಗರ್ಲ್‌ಫ್ರೆಂಡ್ ಇರಬಹುದು ಅಂದುಕೊಂಡಿದ್ದೆ! ಬುಮ್ರಾ ಈ ರೀತಿ ನಡೆದುಕೊಂಡಿದ್ದನ್ನು ನೋಡಿ ಸಂಜನಾ ಅವರು ಒಂದು ಕ್ಷಣ ಅಚ್ಚರಿಗೊಂಡಿದ್ದರಂತೆ. “ನನಗನ್ನಿಸಿತು ಬಹುಶಃ ಅವರಿಗೆ ಗರ್ಲ್‌ಫ್ರೆಂಡ್ ಇರಬಹುದು ಅಥವಾ ಪತ್ನಿ ಎಲ್ಲೋ ಕುಳಿತು ನೋಡುತ್ತಿರಬಹುದು, ಹಾಗಾಗಿ ಅವರು ನನ್ನಿಂದ ದೂರ ಇರುತ್ತಿದ್ದಾರೆ ಎಂದು ಭಾವಿಸಿದ್ದೆ. ಇಲ್ಲವೇ ನಾನು ಏನಾದರೂ ತಪ್ಪು ಮಾಡಿರಬಹುದು ಅಥವಾ ಇದು ಅವರ ಸ್ವಭಾವವೇ ಇರಬಹುದು ಎಂದು ಯೋಚಿಸಿದೆ,” ಎಂದು ಸಂಜನಾ ನಗುತ್ತಾ ಹೇಳಿದ್ದಾರೆ. ಇದೇ ಕುತೂಹಲವೇ ಮುಂದೆ ಇಬ್ಬರ ನಡುವೆ ಪ್ರೀತಿ ಚಿಗುರಲು ಕಾರಣವಾಯಿತು.
ಮನಶ್ಶಾಸ್ತ್ರಜ್ಞರು ಏನಂತಾರೆ? ಬುಮ್ರಾ ಅವರ ಈ ವರ್ತನೆಯ ಬಗ್ಗೆ ಮನಶ್ಶಾಸ್ತ್ರಜ್ಞರು ಆಸಕ್ತಿದಾಯಕ ಅಂಶಗಳನ್ನು ತಿಳಿಸಿದ್ದಾರೆ. ಒಬ್ಬ ವ್ಯಕ್ತಿ ಎಲ್ಲರಂತೆ ವರ್ತಿಸದೆ ಸ್ವಲ್ಪ ನಿಗೂಢವಾಗಿ ಅಥವಾ ಮೌನವಾಗಿ ಇದ್ದಾಗ, ಇತರರಲ್ಲಿ ಸಹಜವಾಗಿಯೇ ಅವರ ಬಗ್ಗೆ ಕುತೂಹಲ ಹೆಚ್ಚಾಗುತ್ತದೆ. ಇದನ್ನು ‘ಪ್ಯಾಟರ್ನ್ ಇಂಟರಪ್ಷನ್’ ಎಂದು ಕರೆಯಲಾಗುತ್ತದೆ. ಅತಿಯಾದ ಪ್ರಚಾರ ಇರುವ ಕ್ರೀಡಾ ಲೋಕದಲ್ಲಿ ಈ ರೀತಿ ಸ್ವಯಂ ಮಿತಿಯನ್ನು ಹಾಕಿಕೊಳ್ಳುವುದು ಅವರ ಭಾವನಾತ್ಮಕ ಬುದ್ಧಿವಂತಿಕೆಯನ್ನು ತೋರಿಸುತ್ತದೆ ಎನ್ನುತ್ತಾರೆ ತಜ್ಞರು.
ಮೊದಲ ಭೇಟಿಯ ಆ ಒಂದು ನಿಗೂಢ ಮೌನವೇ ಇಂದು ಭಾರತೀಯ ಕ್ರಿಕೆಟ್‌ನ ಅತ್ಯಂತ ಸುಂದರ ಜೋಡಿಗಳಲ್ಲಿ ಒಂದಾದ ಬುಮ್ರಾ-ಸಂಜನಾ ಅವರ ಸುದೀರ್ಘ ಬಾಂಧವ್ಯಕ್ಕೆ ಅಡಿಪಾಯ ಹಾಕಿದೆ.
