ಬೇಸಿಗೆ ಬಂತೆಂದರೆ ಸಾಕು ಎಲ್ಲರಿಗೂ ಮೊದಲು ನೆನಪಾಗುವುದೇ ಕಲ್ಲಂಗಡಿ ಹಣ್ಣು. ಬಿಸಿಲ ಬೇಗೆಗೆ ತಂಪಾದ ಈ ಹಣ್ಣನ್ನು ಸವಿಯುವುದೇ ಒಂದು ಸಂಭ್ರಮ. ಸಾಮಾನ್ಯವಾಗಿ ನಾವು ಕಲ್ಲಂಗಡಿಯನ್ನು ಹಾಗೆಯೇ ತಿನ್ನುತ್ತೇವೆ ಅಥವಾ ಜ್ಯೂಸ್ ಮಾಡಿ ಕುಡಿಯುತ್ತೇವೆ. ಆದರೆ ಅನೇಕ ಮನೆಗಳಲ್ಲಿ ಕಲ್ಲಂಗಡಿ ಹಣ್ಣಿಗೆ ಸ್ವಲ್ಪ ಉಪ್ಪು ಸೇರಿಸಿ ತಿನ್ನುವ ಹಳೆಯ ಪದ್ಧತಿಯಿದೆ. ಇದು ಕೇವಲ ರುಚಿಗಾಗಿ ಮಾಡುವ ಕೆಲಸ ಎಂದು ನೀವು ಭಾವಿಸಿದ್ದರೆ ಅದು ತಪ್ಪು. ಹಣ್ಣಿಗೆ ಉಪ್ಪು ಸೇರಿಸುವುದರ ಹಿಂದೆ ವಿಜ್ಞಾನ ಮತ್ತು ಆರೋಗ್ಯದ ಹಿತದೃಷ್ಟಿಯಿಂದ ಹಲವು ಪ್ರಮುಖ ಕಾರಣಗಳಿವೆ.
ನೈಸರ್ಗಿಕ ಸಿಹಿಯನ್ನು ಹೆಚ್ಚಿಸುತ್ತದೆ ಕಲ್ಲಂಗಡಿ ಹಣ್ಣಿಗೆ ಉಪ್ಪು ಸೇರಿಸುವುದರಿಂದ ಅದರ ನೈಸರ್ಗಿಕ ಸಿಹಿ ಮತ್ತಷ್ಟು ಹೆಚ್ಚಾಗುತ್ತದೆ. ಉಪ್ಪಿನಲ್ಲಿರುವ ಕ್ಲೋರೈಡ್ ಅಂಶವು ನಮ್ಮ ನಾಲಿಗೆಯ ಮೇಲಿರುವ ಸಿಹಿಯನ್ನು ಗುರುತಿಸುವ ಗ್ರಾಹಕಗಳನ್ನು ಸಕ್ರಿಯಗೊಳಿಸುತ್ತದೆ ಎಂದು ಸಂಶೋಧನೆಗಳು ತಿಳಿಸಿವೆ. ಅಂದರೆ ಸಕ್ಕರೆ ಸೇರಿಸದಿದ್ದರೂ ಹಣ್ಣಿನ ನೈಸರ್ಗಿಕ ಸಿಹಿಯನ್ನು ಈ ಒಂದು ಚಿಟಿಕೆ ಉಪ್ಪು ಎತ್ತಿ ತೋರಿಸುತ್ತದೆ. ಇದರಿಂದ ಪ್ರತಿ ತುತ್ತು ಕೂಡ ಹೆಚ್ಚು ರುಚಿಕರವಾಗಿ ಅನುಭವಕ್ಕೆ ಬರುತ್ತದೆ.
ದೇಹಕ್ಕೆ ಅಗತ್ಯವಾದ ಎಲೆಕ್ಟ್ರೋಲೈಟ್ ಸಮತೋಲನ ಕಲ್ಲಂಗಡಿ ಹಣ್ಣಿನಲ್ಲಿ ನೀರಿನ ಅಂಶ ಸಮೃದ್ಧವಾಗಿದೆ ನಿಜ, ಆದರೆ ಅದರಲ್ಲಿ ಸೋಡಿಯಂ ಪ್ರಮಾಣ ತೀರಾ ಕಡಿಮೆ ಇರುತ್ತದೆ. ಬೇಸಿಗೆಯಲ್ಲಿ ಬೆವರಿನ ಮೂಲಕ ನಮ್ಮ ದೇಹವು ಸೋಡಿಯಂ ಅನ್ನು ಕಳೆದುಕೊಳ್ಳುತ್ತದೆ. ಹಣ್ಣಿನ ಜೊತೆ ಸ್ವಲ್ಪ ಉಪ್ಪು ಸೇವಿಸಿದಾಗ ದೇಹಕ್ಕೆ ಅಗತ್ಯವಾದ ಸೋಡಿಯಂ ಮರಳಿ ಸಿಗುತ್ತದೆ. ಇದು ದೇಹದಲ್ಲಿ ನೀರಿನಂಶವನ್ನು ಹಿಡಿದಿಟ್ಟುಕೊಳ್ಳಲು ಅಂದರೆ ಹೈಡ್ರೇಶನ್ ಮಟ್ಟವನ್ನು ಕಾಪಾಡಿಕೊಳ್ಳಲು ಸಹಕಾರಿಯಾಗಿದೆ. ಬಿಸಿಲಿನಲ್ಲಿ ಕೆಲಸ ಮಾಡಿದ ನಂತರ ಅಥವಾ ವ್ಯಾಯಾಮದ ನಂತರ ಉಪ್ಪು ಸೇರಿಸಿದ ಕಲ್ಲಂಗಡಿ ಸೇವಿಸುವುದು ಅತ್ಯುತ್ತಮ.
ಅಪಕ್ವ ಹಣ್ಣಿನ ರುಚಿಯಲ್ಲಿ ಸುಧಾರಣೆ ಕೆಲವೊಮ್ಮೆ ನಾವು ತಂದ ಕಲ್ಲಂಗಡಿ ಹಣ್ಣು ಸರಿಯಾಗಿ ಮಾಗಿರುವುದಿಲ್ಲ ಅಥವಾ ಸಪ್ಪೆಯಾಗಿರುತ್ತದೆ. ಇಂತಹ ಸಂದರ್ಭದಲ್ಲಿ ಒಂದು ಚಿಟಿಕೆ ಉಪ್ಪು ಆ ಹಣ್ಣಿನ ಸಪ್ಪೆತನವನ್ನು ಹೋಗಲಾಡಿಸಿ, ಅದರ ರುಚಿಯನ್ನು ಸಮತೋಲನಗೊಳಿಸುತ್ತದೆ. ಇದು ಹಣ್ಣಿನ ಒಟ್ಟಾರೆ ಫ್ಲೇವರ್ ಅನ್ನು ಉತ್ತಮಪಡಿಸಿ ತೃಪ್ತಿಕರವಾದ ಅನುಭವ ನೀಡುತ್ತದೆ.
ಜೀರ್ಣಕ್ರಿಯೆಗೆ ಪೂರಕ ಕಡಿಮೆ ಪ್ರಮಾಣದಲ್ಲಿ ಉಪ್ಪು ಸೇವಿಸುವುದರಿಂದ ಅದು ಜೀರ್ಣರಸಗಳ ಉತ್ಪತ್ತಿಯನ್ನು ಉತ್ತೇಜಿಸುತ್ತದೆ. ಕಲ್ಲಂಗಡಿ ಹಣ್ಣು ಜೀರ್ಣಿಸಿಕೊಳ್ಳಲು ಸುಲಭವಾದರೂ, ಉಪ್ಪಿನ ಸೇರ್ಪಡೆಯಿಂದ ದೇಹವು ಅದನ್ನು ಇನ್ನಷ್ಟು ಪರಿಣಾಮಕಾರಿಯಾಗಿ ಸಂಸ್ಕರಿಸಲು ಸಾಧ್ಯವಾಗುತ್ತದೆ. ಅಲ್ಲದೆ, ಉಪ್ಪು ಸೇರಿಸಿ ತಿನ್ನುವ ಅಭ್ಯಾಸವು ನಾವು ಆಹಾರವನ್ನು ಆತುರದಿಂದ ತಿನ್ನದೆ, ಪ್ರತಿ ತುತ್ತನ್ನು ಸವಿಯುವಂತೆ ಮಾಡುತ್ತದೆ. ಇದರಿಂದ ಅತಿಯಾಗಿ ತಿನ್ನುವುದನ್ನು ನಿಯಂತ್ರಿಸಬಹುದು.
ಗಮನಿಸಬೇಕಾದ ಅಂಶ ಕಲ್ಲಂಗಡಿ ಹಣ್ಣಿಗೆ ಉಪ್ಪು ಸೇರಿಸುವಾಗ ಅದು ಕೇವಲ ಒಂದು ಚಿಟಿಕೆಯಷ್ಟಿರಲಿ. ಅತಿಯಾದ ಉಪ್ಪು ಹಣ್ಣಿನ ಅಸಲಿ ರುಚಿಯನ್ನು ಕೆಡಿಸುವುದಲ್ಲದೆ, ದೇಹದಲ್ಲಿ ಸೋಡಿಯಂ ಮಟ್ಟವನ್ನು ಅನಗತ್ಯವಾಗಿ ಹೆಚ್ಚಿಸಬಹುದು. ಇನ್ನು ಹೆಚ್ಚಿನ ರುಚಿ ಬಯಸುವವರು ಉಪ್ಪಿನ ಜೊತೆಗೆ ಸ್ವಲ್ಪ ಕಾಳುಮೆಣಸಿನ ಪುಡಿ ಅಥವಾ ನಿಂಬೆ ರಸವನ್ನೂ ಬಳಸಬಹುದು.
