ಬೆಂಗಳೂರು: ಬೆಂಗಳೂರಿನ ರಸ್ತೆ ಮೂಲಸೌಕರ್ಯದ ದುಸ್ಥಿತಿಯನ್ನು ಕೃತಕ ಬುದ್ಧಿಮತ್ತೆ (AI) ಆಧಾರಿತ ಸಮೀಕ್ಷೆಯೊಂದು ಬಯಲಿಗೆಳೆದಿದೆ. AI ಆಧಾರಿತ ರಸ್ತೆ ಗುಪ್ತಚರ ಸಂಸ್ಥೆ AIR-Ai ನಡೆಸಿದ ಸಮೀಕ್ಷೆಯಲ್ಲಿ ನಗರದ ಬೈಟರಾಯನಪುರ ವಿಧಾನಸಭಾ ಕ್ಷೇತ್ರದ 14 ವಾರ್ಡ್‌ಗಳಲ್ಲಿ 823.5 ಕಿ.ಮೀ. ರಸ್ತೆಗಳನ್ನು ಪರಿಶೀಲಿಸಲಾಗಿದ್ದು, ಬರೋಬ್ಬರಿ 5,964 ಗುಂಡಿಗಳು ಪತ್ತೆಯಾಗಿವೆ.
ರಸ್ತೆಗಳ ಸ್ಥಿತಿಗತಿ ಕುರಿತು ಸಮಗ್ರ ಅಧ್ಯಯನ ನಡೆಸಿರುವ AIR-Ai, ಕೃತಕ ಬುದ್ಧಿಮತ್ತೆ, ಕಂಪ್ಯೂಟರ್ ವಿಷನ್ ಹಾಗೂ ಜಿಯೋಸ್ಪೇಷಿಯಲ್ ಮ್ಯಾಪಿಂಗ್ ತಂತ್ರಜ್ಞಾನ ಬಳಸಿ ರಸ್ತೆ ದೋಷಗಳನ್ನು ಗುರುತಿಸಿದೆ. ಈ ಮಾಹಿತಿಯನ್ನು ಬೆಂಗಳೂರಿನ ಅಭಿವೃದ್ಧಿ ಸಚಿವ ಕೃಷ್ಣ ಬೈರೇಗೌಡ ಅವರಿಗೆ ಸಲ್ಲಿಸಲು ಸಂಸ್ಥೆ ಮುಂದಾಗಿದೆ.
ಪ್ರತಿ ಕಿ.ಮೀ.ಗೆ ಸರಾಸರಿ 7.2 ಗುಂಡಿಗಳು
AIR-Ai ಹಂಚಿಕೊಂಡಿರುವ ಮಾಹಿತಿಯ ಪ್ರಕಾರ, ಬೈಟರಾಯನಪುರ ವ್ಯಾಪ್ತಿಯಲ್ಲಿ ಪರಿಶೀಲಿಸಿದ ರಸ್ತೆಗಳಲ್ಲಿನ ಪ್ರತಿ ಕಿಲೋಮೀಟರ್‌ಗೆ ಸರಾಸರಿ 7.2 ಗುಂಡಿಗಳು ಪತ್ತೆಯಾಗಿವೆ. ಇದು ಬೆಂಗಳೂರಿನಾದ್ಯಂತ ದಾಖಲಾಗಿರುವ ಸರಾಸರಿ 5.8 ಗುಂಡಿ ಪ್ರತಿ ಕಿ.ಮೀ.ಗಿಂತಲೂ ಹೆಚ್ಚಾಗಿದೆ.
ಸಮೀಕ್ಷೆಯಲ್ಲಿ ಗುಂಡಿಗಳಷ್ಟೇ ಅಲ್ಲದೆ, 4,756 ಕಡೆಗಳಲ್ಲಿ ಯುಟಿಲಿಟಿ ಕಾಮಗಾರಿಗಳಿಗಾಗಿ ರಸ್ತೆಗಳನ್ನು ಅಗೆದಿರುವುದು ಹಾಗೂ ನಿರ್ಮಾಣ ಕಾಮಗಾರಿಗಳ ಬಳಿಕ ಉಳಿದಿರುವ 501 ಉದ್ದನೆಯ ಹೊಂಡಗಳು ಕೂಡ ಪತ್ತೆಯಾಗಿವೆ.
ಜಕ್ಕೂರುನಲ್ಲಿ ಅತಿ ಹೆಚ್ಚು ಗುಂಡಿಗಳು
ಸಮೀಕ್ಷೆ ನಡೆಸಿದ ವಾರ್ಡ್‌ಗಳ ಪೈಕಿ ಜಕ್ಕೂರು ವಾರ್ಡ್‌ನಲ್ಲಿ ಅತಿ ಹೆಚ್ಚು 939 ಗುಂಡಿಗಳು ಪತ್ತೆಯಾಗಿವೆ. ಇದು ಬೈಟರಾಯನಪುರ ವಿಭಾಗದಲ್ಲಿ ಗುರುತಿಸಲಾದ ಒಟ್ಟು ಗುಂಡಿಗಳ ಪೈಕಿ ಸುಮಾರು ಶೇ.16ರಷ್ಟಾಗಿದೆ.
ಇನ್ನು ಸಿಂಗಾಪುರ ವಾರ್ಡ್‌ನಲ್ಲಿ ಪ್ರತಿ ಕಿ.ಮೀ.ಗೆ 11.2 ಗುಂಡಿಗಳು ಪತ್ತೆಯಾಗಿದ್ದು, ಗುಂಡಿಗಳ ಸಾಂದ್ರತೆಯಲ್ಲಿ ಇದು ಅಗ್ರಸ್ಥಾನದಲ್ಲಿದೆ.
ಕೇವಲ ಶೇ.56.7ರಷ್ಟು ರಸ್ತೆಗಳು ಉತ್ತಮ ಸ್ಥಿತಿಯಲ್ಲಿ
AIR-Ai ನಡೆಸಿದ ರಸ್ತೆ ಸ್ಥಿತಿ ಅಧ್ಯಯನದಲ್ಲಿ ಪರಿಶೀಲಿಸಲಾದ ರಸ್ತೆ ಜಾಲದ ಕೇವಲ ಶೇ.56.7ರಷ್ಟು ಭಾಗ ಮಾತ್ರ ಉತ್ತಮ ಸ್ಥಿತಿಯಲ್ಲಿದೆ ಎಂದು ತಿಳಿದುಬಂದಿದೆ.
ಉಳಿದ ರಸ್ತೆಗಳಲ್ಲಿ ರಚನಾತ್ಮಕ ಹಾನಿ, ಯುಟಿಲಿಟಿ ಕಾಮಗಾರಿಗಳಿಂದ ಉಂಟಾದ ಹಾನಿ ಅಥವಾ ರಸ್ತೆ ಇನ್ನೂ ಅಭಿವೃದ್ಧಿಯಾಗದಿರುವುದು ಕಂಡುಬಂದಿದೆ.
ಸುಮಾರು ಶೇ.22.2ರಷ್ಟು ರಸ್ತೆಗಳಲ್ಲಿ ಸಣ್ಣ ಪ್ರಮಾಣದ ಮೇಲ್ಮೈ ಹಾನಿ ಕಂಡುಬಂದಿದೆ. ಉಳಿದ ಭಾಗಗಳಲ್ಲಿ ರಸ್ತೆಗಳು ಇನ್ನೂ ಪೂರ್ಣವಾಗಿ ಅಭಿವೃದ್ಧಿಯಾಗದ ಸ್ಥಿತಿಯಲ್ಲಿವೆ.
AI ಮೂಲಕ ರಸ್ತೆ ದೋಷಗಳ ಪತ್ತೆ
AIR-Ai ತನ್ನನ್ನು ರಸ್ತೆ ಗುಪ್ತಚರ ಮತ್ತು ಮೂಲಸೌಕರ್ಯ ನಿರ್ವಹಣಾ ವೇದಿಕೆಯಾಗಿ ಗುರುತಿಸಿಕೊಂಡಿದೆ. AI, ಕಂಪ್ಯೂಟರ್ ವಿಷನ್ ಮತ್ತು ಜಿಯೋಸ್ಪೇಷಿಯಲ್ ಮ್ಯಾಪಿಂಗ್ ತಂತ್ರಜ್ಞಾನಗಳ ಮೂಲಕ ರಸ್ತೆಗಳ ಸ್ಥಿತಿಯನ್ನು ಪರಿಶೀಲಿಸಲಾಗುತ್ತದೆ.
ಸಾಂಪ್ರದಾಯಿಕವಾಗಿ ನಡೆಯುವ ಕೈಯಾರೆ ರಸ್ತೆ ಪರಿಶೀಲನೆಗೆ ಬದಲಾಗಿ, ಸಂಸ್ಥೆಯು ರಸ್ತೆ ಚಿತ್ರಗಳು ಮತ್ತು ಸಂಬಂಧಿತ ಡೇಟಾವನ್ನು ಸಂಗ್ರಹಿಸಿ ಗುಂಡಿಗಳು, ಬಿರುಕುಗಳು, ಹೊಂಡಗಳು ಹಾಗೂ ಹಾನಿಗೊಳಗಾದ ರಸ್ತೆ ಭಾಗಗಳನ್ನು ಸ್ವಯಂಚಾಲಿತವಾಗಿ ಗುರುತಿಸುತ್ತದೆ. ನಂತರ ಅವುಗಳನ್ನು ಸ್ಥಳ ಆಧಾರಿತ ಮಾಹಿತಿಯಾಗಿ ಪರಿವರ್ತಿಸಲಾಗುತ್ತದೆ.
ಇದರಿಂದ ನಗರ ಸ್ಥಳೀಯ ಸಂಸ್ಥೆಗಳು ದೊಡ್ಡ ಪ್ರಮಾಣದಲ್ಲಿ ರಸ್ತೆ ಸ್ಥಿತಿಯನ್ನು ಮೇಲ್ವಿಚಾರಣೆ ಮಾಡುವುದು, ಹಾನಿಯ ತೀವ್ರತೆಯ ಆಧಾರದ ಮೇಲೆ ದುರಸ್ತಿ ಕಾರ್ಯಗಳಿಗೆ ಆದ್ಯತೆ ನೀಡುವುದು ಹಾಗೂ ಡೇಟಾ ಆಧಾರಿತ ನಿರ್ವಹಣಾ ಯೋಜನೆ ರೂಪಿಸುವುದು ಸಾಧ್ಯವಾಗಲಿದೆ ಎಂದು ಸಂಸ್ಥೆ ಹೇಳಿದೆ.
ಬೆಂಗಳೂರು ಸೇರಿದಂತೆ ಹಲವು ನಗರಗಳಲ್ಲಿ ಸಮೀಕ್ಷೆ
AIR-Ai ಈಗಾಗಲೇ ಬೆಂಗಳೂರಿನ ವಿವಿಧ ಭಾಗಗಳಲ್ಲಿ ದೊಡ್ಡ ಪ್ರಮಾಣದ ರಸ್ತೆ ಮ್ಯಾಪಿಂಗ್ ಯೋಜನೆಗಳನ್ನು ಕೈಗೊಂಡಿದೆ.ಬೆಂಗಳೂರು ಪೂರ್ವ ಭಾಗದ 50 ವಾರ್ಡ್‌ಗಳಲ್ಲಿ 1,600 ಕಿ.ಮೀ. ರಸ್ತೆಗಳನ್ನು ಮ್ಯಾಪ್ ಮಾಡಲಾಗಿದ್ದು, ಸುಮಾರು 27,000 ಗುಂಡಿಗಳು ಮತ್ತು 18,000ಕ್ಕೂ ಹೆಚ್ಚು ಪರಿಶೀಲನಾ ಟಿಪ್ಪಣಿಗಳು ದಾಖಲಾಗಿವೆ.
ಅದೇ ರೀತಿ ಬೆಂಗಳೂರು ಉತ್ತರದ 72 ವಾರ್ಡ್‌ಗಳಲ್ಲಿ 2,494 ಕಿ.ಮೀ. ರಸ್ತೆಗಳ ಸಮೀಕ್ಷೆ ನಡೆಸಲಾಗಿದ್ದು, ಸುಮಾರು 14,000 ಗುಂಡಿಗಳು ಮತ್ತು 35,000 ಪರಿಶೀಲನಾ ಟಿಪ್ಪಣಿಗಳು ಪತ್ತೆಯಾಗಿವೆ.
ಇನ್ನು ಕಲಬುರಗಿಯ 55 ವಾರ್ಡ್‌ಗಳಲ್ಲಿ 802 ಕಿ.ಮೀ. ರಸ್ತೆಗಳನ್ನು ಪರಿಶೀಲಿಸಲಾಗಿದ್ದು, ಸುಮಾರು 17,000 ಗುಂಡಿಗಳು ಮತ್ತು 37,000 ಪರಿಶೀಲನಾ ಟಿಪ್ಪಣಿಗಳು ದಾಖಲಾಗಿವೆ.
AI ಆಧಾರಿತ ಈ ಮಾಹಿತಿಯು ರಸ್ತೆ ದುರಸ್ತಿ ಕಾರ್ಯಗಳಿಗೆ ಆದ್ಯತೆ ನಿಗದಿಪಡಿಸಲು ಹಾಗೂ ಸಾರ್ವಜನಿಕ ಹಣವನ್ನು ಹೆಚ್ಚು ಪರಿಣಾಮಕಾರಿಯಾಗಿ ಬಳಸಲು ನಾಗರಿಕ ಸಂಸ್ಥೆಗಳಿಗೆ ನೆರವಾಗಬಹುದು ಎಂದು AIR-Ai ತಿಳಿಸಿದೆ.
