ಮುಂಬೈ: ದೇಶದ ವಾಣಿಜ್ಯ ನಗರಿ ಮುಂಬೈನ ಐಷಾರಾಮಿ ಮನೆಗಳ ಬಾಡಿಗೆ ಮಾರುಕಟ್ಟೆಯಲ್ಲಿ ಮತ್ತೊಂದು ದುಬಾರಿ ವ್ಯವಹಾರ ನಡೆದಿದೆ. ಡಿಮಾರ್ಟ್ ಸಂಸ್ಥಾಪಕ ಹಾಗೂ ಕೋಟ್ಯಧಿಪತಿ ಹೂಡಿಕೆದಾರ ರಾಧಾಕಿಶನ್ ದಮಾನಿ ಅವರ ಕುಟುಂಬ ಕಚೇರಿಗೆ ಸಂಬಂಧಿಸಿದ ಸಂಸ್ಥೆಯೊಂದು ವರ್ಲಿಯ ‘ಥ್ರೀ ಸಿಕ್ಸ್ಟಿ ವೆಸ್ಟ್’ನಲ್ಲಿರುವ 6,831 ಚದರ ಅಡಿ ಐಷಾರಾಮಿ ಫ್ಲ್ಯಾಟ್‌ ಅನ್ನು ತಿಂಗಳಿಗೆ ₹28.5 ಲಕ್ಷ ಆರಂಭಿಕ ಬಾಡಿಗೆಗೆ ಗುತ್ತಿಗೆಗೆ ನೀಡಿದೆ.
ಝ್ಯಾಪ್‌ಕೀ ಮೂಲಕ ಲಭ್ಯವಾಗಿರುವ ಆಸ್ತಿ ನೋಂದಣಿ ದಾಖಲೆಗಳ ಪ್ರಕಾರ, ಸೆಪ್ಟೆಂಬರ್ 28, 2026ರಂದು ಈ ಬಾಡಿಗೆ ಒಪ್ಪಂದ ನೋಂದಣಿಯಾಗಿದೆ. ಡೆರೈವ್ ಟ್ರೇಡಿಂಗ್ ಅಂಡ್ ರೆಸಾರ್ಟ್ಸ್ ಪ್ರೈವೇಟ್ ಲಿಮಿಟೆಡ್
ಸಂಸ್ಥೆ ಫ್ಲ್ಯಾಟ್‌ನ ಮಾಲೀಕರಾಗಿದ್ದು, ಐವಿಎಲ್ ಧುನ್ಸೆರಿ ಪೆಟ್ರೋಕೆಮ್ ಇಂಡಸ್ಟ್ರೀಸ್ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆ ಬಾಡಿಗೆದಾರನಾಗಿದೆ.
36 ತಿಂಗಳ ಬಾಡಿಗೆ ಒಪ್ಪಂದ
ಡಾ. ಆ್ಯನಿ ಬೆಸೆಂಟ್‌ ರಸ್ತೆಯಲ್ಲಿರುವ 360 Westನ ಟವರ್‌ ಬಿ 19ನೇ ಮಹಡಿಯಲ್ಲಿ ಈ ಅಪಾರ್ಟ್‌ಮೆಂಟ್‌ ಇದೆ. 36 ತಿಂಗಳ ಅವಧಿಗೆ ಫ್ಲ್ಯಾಟ್‌ ಅನ್ನು ಬಾಡಿಗೆಗೆ ನೀಡಲಾಗಿದ್ದು, ಮೊದಲ ವರ್ಷ ತಿಂಗಳಿಗೆ ₹28.5 ಲಕ್ಷ ಬಾಡಿಗೆ ನಿಗದಿಯಾಗಿದೆ.
ಎರಡನೇ ವರ್ಷದಲ್ಲಿ ಮಾಸಿಕ ಬಾಡಿಗೆ ₹29.925 ಲಕ್ಷಕ್ಕೆ ಏರಿಕೆಯಾಗಲಿದೆ. ಮೂರನೇ ವರ್ಷದಲ್ಲಿ ₹31.42125 ಲಕ್ಷಕ್ಕೆ ಹೆಚ್ಚಳವಾಗಲಿದೆ. ಮೂರು ವರ್ಷಗಳ ಅವಧಿಯಲ್ಲಿ ಒಟ್ಟು ಬಾಡಿಗೆ ಮೊತ್ತ ಸುಮಾರು ₹10.78 ಕೋಟಿ ಆಗಲಿದೆ.
ಈ ಒಪ್ಪಂದದಲ್ಲಿ ₹1.71 ಕೋಟಿ ಭದ್ರತಾ ಠೇವಣಿ ನಿಗದಿಪಡಿಸಲಾಗಿದೆ. ಜೊತೆಗೆ ನಾಲ್ಕು ಕಾರುಗಳ ನಿಲುಗಡೆಗೆ ಸ್ಥಳಾವಕಾಶವೂ ಒಪ್ಪಂದದ ಭಾಗವಾಗಿದೆ.
ವರ್ಷಕ್ಕೆ ₹3.42 ಕೋಟಿ ಆರಂಭಿಕ ಬಾಡಿಗೆ
ತಿಂಗಳಿಗೆ ₹28.5 ಲಕ್ಷ ಬಾಡಿಗೆ ಎಂದರೆ ಆರಂಭಿಕ ಹಂತದಲ್ಲಿ ವರ್ಷಕ್ಕೆ ಸುಮಾರು ₹3.42 ಕೋಟಿ ಬಾಡಿಗೆ ಪಾವತಿಯಾಗಲಿದೆ. ಒಪ್ಪಂದದಂತೆ ಮುಂದಿನ ಎರಡು ವರ್ಷಗಳಲ್ಲಿ ಬಾಡಿಗೆ ಹೆಚ್ಚಳವಾಗುವುದರಿಂದ ಒಟ್ಟು ಮೊತ್ತ ಮತ್ತಷ್ಟು ಏರಿಕೆಯಾಗಲಿದೆ.
ಈ ವ್ಯವಹಾರದ ನೋಂದಣಿಗೆ ₹2.83 ಲಕ್ಷ ಮುದ್ರಾಂಕ ಶುಲ್ಕ ಮತ್ತು ₹1,000 ನೋಂದಣಿ ಶುಲ್ಕ ಪಾವತಿಸಲಾಗಿದೆ ಎಂದು ದಾಖಲೆಗಳು ತಿಳಿಸಿವೆ.
ದಮಾನಿ ಕುಟುಂಬಕ್ಕೆ ಸಂಬಂಧಿಸಿದ ಸಂಸ್ಥೆ
ಫ್ಲ್ಯಾಟ್‌ ಅನ್ನು ಬಾಡಿಗೆಗೆ ನೀಡಿರುವ ಡೆರೈವ್ ಟ್ರೇಡಿಂಗ್ ಅಂಡ್ ರೆಸಾರ್ಟ್ಸ್ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯು ಕೋಟ್ಯಧಿಪತಿ ಹೂಡಿಕೆದಾರ ಹಾಗೂ ಡಿಮಾರ್ಟ್ ಸಂಸ್ಥಾಪಕ ರಾಧಾಕಿಶನ್ ದಮಾನಿ ಅವರ ಕುಟುಂಬ ಕಚೇರಿಗೆ ಸಂಬಂಧಿಸಿದ ಹೂಡಿಕೆ ಸಂಸ್ಥೆಯಾಗಿದೆ ಎಂದು ವ್ಯವಹಾರ ದಾಖಲೆಗಳ ಆಧಾರದಲ್ಲಿ Zapkey ತಿಳಿಸಿದೆ.
2026ರ ಮೇ ತಿಂಗಳಲ್ಲೂ ಇದೇ 360 ವೆಸ್ಟ್ ಕಟ್ಟಡದಲ್ಲಿರುವ ಮತ್ತೊಂದು ಫ್ಲ್ಯಾಟ್‌ ಅನ್ನು Derive Trading and Resorts Private Limited ಸಂಸ್ಥೆ One SGG Ventures LLPಗೆ ತಿಂಗಳಿಗೆ ₹27.5 ಲಕ್ಷ ಬಾಡಿಗೆಗೆ ನೀಡಿತ್ತು. 1 SGG ವೆಂಚರ್ಸ್ LLP,, ಸಂಜಯ್ ಘೋಡಾವತ್‌ ಸಮೂಹಕ್ಕೆ ಸೇರಿದ ಸಂಸ್ಥೆಯಾಗಿದೆ.
2023ರಲ್ಲಿ 28 ಐಷಾರಾಮಿ ಫ್ಲ್ಯಾಟ್‌ ಖರೀದಿ
2023ರಲ್ಲಿ ರಾಧಾಕಿಶನ್ ದಮಾನಿ, ಅವರ ಕುಟುಂಬದ ಆಪ್ತ ಸದಸ್ಯರು ಹಾಗೂ ನಿಕಟ ಸಹವರ್ತಿಗಳು ಮುಂಬೈನ ವರ್ಲಿಯ Three Sixty West ಯೋಜನೆಯಲ್ಲಿ 28 ಐಷಾರಾಮಿ ಅಪಾರ್ಟ್‌ಮೆಂಟ್‌ಗಳನ್ನು ಖರೀದಿಸಿದ್ದರು. ಈ ವ್ಯವಹಾರದ ಒಟ್ಟು ಮೌಲ್ಯ ₹1,238 ಕೋಟಿ ಎಂದು ವರದಿಯಾಗಿತ್ತು.
ಇದೀಗ ಇದೇ ಯೋಜನೆಯಲ್ಲಿರುವ 6,831 ಚದರ ಅಡಿ ಫ್ಲ್ಯಾಟ್‌ ತಿಂಗಳಿಗೆ ₹28.5 ಲಕ್ಷ ಆರಂಭಿಕ ಬಾಡಿಗೆಗೆ ನೀಡಲಾಗಿರುವುದು ಮುಂಬೈನ ದುಬಾರಿ ವಸತಿ ಬಾಡಿಗೆ ವ್ಯವಹಾರಗಳಲ್ಲಿ ಗಮನ ಸೆಳೆದಿದೆ.
IVL ಧುನ್‌ಸೇರಿ ಪೆಟ್ರೋಕೆಮ್ ಇಂಡಸ್ಟ್ರೀಸ್ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯು ಧುನ್‌ಸೇರಿ ವೆಂಚರ್ಸ್ ಮತ್ತು ಇಂಡೋರಮಾ ವೆಂಚರ್ಸ್ ಪಬ್ಲಿಕ್ ಕಂಪನಿ ಲಿಮಿಟೆಡ್ (IVL) ನಡುವಿನ ಜಂಟಿ ಉದ್ಯಮವಾಗಿದೆ. ಈ ಸಂಸ್ಥೆ ಪಾಲಿಥಿಲೀನ್ ಟೆರೆಫ್ತಲೇಟ್‌ (PET) ರಾಳ ಉತ್ಪಾದನಾ ಕ್ಷೇತ್ರದಲ್ಲಿ ಕಾರ್ಯನಿರ್ವಹಿಸುತ್ತದೆ.
ಈ ವ್ಯವಹಾರಕ್ಕೆ ಸಂಬಂಧಿಸಿದಂತೆ ಡೆರೈವ್ ಟ್ರೇಡಿಂಗ್ ಆ್ಯಂಡ್ ರೆಸಾರ್ಟ್ಸ್, ಡಿಮಾರ್ಟ್ ಮತ್ತು IVL ಧುನ್‌ಸೇರಿ ಪೆಟ್ರೋಕೆಮ್ ಇಂಡಸ್ಟ್ರೀಸ್ ಸಂಸ್ಥೆಗಳಿಗೆ ಪ್ರತಿಕ್ರಿಯೆ ಕೋರಿ ಇಮೇಲ್ ಮೂಲಕ ಸಂಪರ್ಕಿಸಲಾಗಿದೆ. ಅವರಿಂದ ಪ್ರತಿಕ್ರಿಯೆ ಬಂದರೆ, ವರದಿಯಲ್ಲಿ ಅಗತ್ಯ ತಿದ್ದುಪಡಿ ಅಥವಾ ಮಾಹಿತಿಯನ್ನು ಸೇರಿಸಲಾಗುವುದು.
