ನವದೆಹಲಿ : ರೈಲ್ವೆ ವ್ಯವಸ್ಥೆಯಲ್ಲಿ ಪಾರದರ್ಶಕತೆ ತರಲು ಮತ್ತು ಕೊನೆಯ ಕ್ಷಣದ ಟಿಕೆಟ್ ರದ್ದತಿಯನ್ನು ತಡೆಗಟ್ಟಲು ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಅವರು ಮಂಗಳವಾರ ಐದು ಪ್ರಮುಖ ಸುಧಾರಣೆಗಳನ್ನು ಘೋಷಿಸಿದ್ದು, ತತ್ಕಾಲ್ ಬುಕಿಂಗ್‌ಗೆ ಆಧಾರ್ ಓಟಿಪಿ ಕಡ್ಡಾಯ ಸೇರಿದಂತೆ ಹಲವು ಕ್ರಾಂತಿಕಾರಕ ಬದಲಾವಣೆಗಳು ಇಂದಿನಿಂದ ಜಾರಿಗೆ ಬರಲಿವೆ.
ಹೌದು. ಭಾರತೀಯ ರೈಲ್ವೆಯು ಪ್ರಯಾಣಿಕರ ಸೇವೆ, ಟಿಕೆಟ್ ಬುಕಿಂಗ್ ಪಾರದರ್ಶಕತೆ ಮತ್ತು ಸರಕು ಸಾಗಣೆಯಲ್ಲಿ ಕ್ರಾಂತಿಕಾರಕ ಬದಲಾವಣೆಗಳನ್ನು ತರಲು ಸಜ್ಜಾಗಿದೆ. ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಅವರು ಮಂಗಳವಾರ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಐದು ಪ್ರಮುಖ ಸುಧಾರಣೆಗಳನ್ನು ಘೋಷಿಸಿದ್ದಾರೆ.
ಈ ನಿಯಮಗಳಲ್ಲಿ ಬದಲಾವಣೆ
ಟಿಕೆಟ್ ರೀಫಂಡ್ ನಿಯಮದಲ್ಲಿ ಬದಲಾವಣೆ : ಕನ್ಫರ್ಮ್ ಆದ ಟಿಕೆಟ್‌ಗಳನ್ನು ರೈಲು ಹೊರಡುವ 8 ಗಂಟೆಗಳಿಗಿಂತ ಕಡಿಮೆ ಅವಧಿಯಲ್ಲಿ ರದ್ದುಗೊಳಿಸಿದರೆ, ಯಾವುದೇ ಹಣವನ್ನು ಹಿಂತಿರುಗಿಸಲಾಗುವುದಿಲ್ಲ (No Refund). ಕೊನೆಯ ಕ್ಷಣದ ರದ್ದತಿಯನ್ನು ತಡೆಗಟ್ಟಲು ಮತ್ತು ಇತರ ಪ್ರಯಾಣಿಕರಿಗೆ ಸೀಟು ಲಭ್ಯವಾಗುವಂತೆ ಮಾಡಲು ಈ ಕ್ರಮ ಕೈಗೊಳ್ಳಲಾಗಿದೆ.
ಹೊಸ ರೀಫಂಡ್ ದರಗಳು ಮತ್ತು ದಂಡದ ವಿವರ
ರೈಲ್ವೆ ಇಲಾಖೆಯ ಹೊಸ ನೀತಿಯ ಪ್ರಕಾರ ರದ್ದತಿ ಅವಧಿಗೆ ಅನುಗುಣವಾಗಿ ಹಣ ಕಡಿತವಾಗಲಿದೆ:
- 72 ಗಂಟೆಗಳಿಗಿಂತ ಮುಂಚಿತವಾಗಿ: ಪ್ರಯಾಣದ 72 ಗಂಟೆಗಳ ಮೊದಲು ಟಿಕೆಟ್ ರದ್ದುಗೊಳಿಸಿದರೆ, ಕೇವಲ ನಿಗದಿತ ರದ್ದತಿ ಶುಲ್ಕವನ್ನು ಕಡಿತಗೊಳಿಸಿ ಉಳಿದ ಪೂರ್ಣ ಹಣವನ್ನು ಹಿಂತಿರುಗಿಸಲಾಗುತ್ತದೆ.
- 72 ರಿಂದ 24 ಗಂಟೆಗಳ ನಡುವೆ: ಈ ಅವಧಿಯಲ್ಲಿ ರದ್ದುಗೊಳಿಸಿದರೆ, ನಿಗದಿತ ಕನಿಷ್ಠ ಶುಲ್ಕದ ಜೊತೆಗೆ ಟಿಕೆಟ್ ದರದ 25% ಹಣವನ್ನು ಕಡಿತಗೊಳಿಸಲಾಗುತ್ತದ
- 24 ರಿಂದ 8 ಗಂಟೆಗಳ ನಡುವೆ: ರೈಲು ಹೊರಡುವ 24 ಗಂಟೆಯಿಂದ 8 ಗಂಟೆಯ ಮೊದಲು ರದ್ದು ಮಾಡಿದರೆ, ಟಿಕೆಟ್ ದರದ 50% ಹಣ ಕಡಿತವಾಗಲಿದೆ.
- 8 ಗಂಟೆಗಳಿಗಿಂತ ಕಡಿಮೆ ಅವಧಿ: ರೈಲು ಹೊರಡುವ 8 ಗಂಟೆಗಳಿಗಿಂತ ಕಡಿಮೆ ಸಮಯ ಬಾಕಿ ಇರುವಾಗ ಟಿಕೆಟ್ ರದ್ದುಗೊಳಿಸಿದರೆ, ಯಾವುದೇ ಹಣ ವಾಪಸ್ ಸಿಗುವುದಿಲ್ಲ (No Refund).
ಈ ಹೊಸ ನಿಯಮಗಳನ್ನು ರೈಲ್ವೆ ಇಲಾಖೆಯು 2026ರ ಏಪ್ರಿಲ್ 1 ರಿಂದ ಏಪ್ರಿಲ್ 15ರ ನಡುವೆ ಹಂತ ಹಂತವಾಗಿ ಜಾರಿಗೆ ತರಲಿದೆ.
ಬೋರ್ಡಿಂಗ್ ಪಾಯಿಂಟ್ ಬದಲಾವಣೆ: ಪ್ರಯಾಣಿಕರಿಗೆ ಅನುಕೂಲವಾಗುವಂತೆ ರೈಲು ಹೊರಡುವ 30 ನಿಮಿಷಗಳ ಮುಂಚಿತವಾಗಿಯೂ ತಮ್ಮ ಬೋರ್ಡಿಂಗ್ ಸ್ಟೇಷನ್ (ರೈಲು ಹತ್ತುವ ನಿಲ್ದಾಣ) ಬದಲಾಯಿಸಲು ಅವಕಾಶ ನೀಡಲಾಗಿದೆ.
ತತ್ಕಾಲ್ ಬುಕಿಂಗ್‌ಗೆ ಆಧಾರ್ OTP: ತತ್ಕಾಲ್ ಟಿಕೆಟ್ ಬುಕಿಂಗ್‌ನಲ್ಲಿ ನಡೆಯುವ ಅಕ್ರಮಗಳನ್ನು ತಡೆಯಲು ಆಧಾರ್ ಆಧಾರಿತ OTP ದೃಢೀಕರಣವನ್ನು ಕಡ್ಡಾಯಗೊಳಿಸಲಾಗಿದೆ. ಇದರಿಂದ ನೈಜ ಪ್ರಯಾಣಿಕರಿಗೆ ಮಾತ್ರ ಟಿಕೆಟ್ ಸಿಗುವಂತಾಗುತ್ತದೆ.
ನಕಲಿ ಐಡಿಗಳ ವಿರುದ್ಧ ಕ್ರಮ: ಟಿಕೆಟ್ ಬುಕಿಂಗ್ ಪ್ಲಾಟ್‌ಫಾರ್ಮ್‌ನಲ್ಲಿ ಅಳವಡಿಸಲಾಗಿರುವ ‘ಆಂಟಿ-ಬೋಟ್’ (Anti-bot) ವ್ಯವಸ್ಥೆಯಿಂದಾಗಿ, ಸುಮಾರು 3 ಕೋಟಿ ಸಂಶಯಾಸ್ಪದ ಅಥವಾ ನಿಷ್ಕ್ರಿಯ ಬಳಕೆದಾರರ ಐಡಿಗಳನ್ನು ರದ್ದುಗೊಳಿಸಲಾಗಿದೆ.
ಸರಕು ಸಾಗಣೆ ಸುಧಾರಣೆ: ಉಪ್ಪು ಮತ್ತು ಆಟೋಮೊಬೈಲ್ ಸಾಗಣೆಯಲ್ಲಿ ಹೆಚ್ಚಿನ ಸುಧಾರಣೆ ತರಲು ಮತ್ತು ರೈಲ್ವೆ ನಿರ್ಮಾಣ ಯೋಜನೆಗಳ ಗುಣಮಟ್ಟವನ್ನು ಹೆಚ್ಚಿಸಲು ಹೊಸ ಕ್ರಮಗಳನ್ನು ಘೋಷಿಸಲಾಗಿದೆ.
