ಹೊಸದಾಗಿ ಉದ್ಯೋಗಕ್ಕೆ ಸೇರುವವರಿಗೆ ಕೇಂದ್ರ ಸರ್ಕಾರವು ಆರ್ಥಿಕ ನೆರವು ನೀಡುತ್ತಿದೆ. ಇದರ ಭಾಗವಾಗಿ ಬ್ಯಾಂಕ್ ಖಾತೆಗೆ ₹15,000 ಜಮೆ ಮಾಡುತ್ತಿದೆ. ಈ ಹಣವನ್ನು ಎರಡು ಕಂತುಗಳಲ್ಲಿ ನೀಡಲಾಗುವುದು. ವಿಶೇಷವೆಂದರೆ, ಇದಕ್ಕಾಗಿ ಯಾವುದೇ ಪ್ರತ್ಯೇಕ ಅರ್ಜಿ ಸಲ್ಲಿಸುವ ಅಗತ್ಯವಿಲ್ಲ. ಉದ್ಯೋಗಿಯು ಇಪಿಎಫ್ಒ (EPFO) ಖಾತೆಯನ್ನು ಹೊಂದಿದ್ದರೆ ಸಾಕು, ಹಣ ನೇರವಾಗಿ ಖಾತೆಗೆ ಬರುತ್ತದೆ.
ಯೋಜನೆಯ ಹೆಸರು: ಹೊಸ ಉದ್ಯೋಗಿಗಳನ್ನು ಪ್ರೋತ್ಸಾಹಿಸಲು ಕೇಂದ್ರ ಸರ್ಕಾರವು ‘ಪ್ರಧಾನ ಮಂತ್ರಿ ವಿಕಸಿತ್ ಭಾರತ್ ರೋಜ್ಗಾರ್ ಯೋಜನೆ’ (PMVBRJY) ಜಾರಿಗೆ ತಂದಿದೆ.ಉದ್ಯೋಗಿಗೆ ₹15,000 ಪ್ರೋತ್ಸಾಹಧನ ಸಿಕ್ಕರೆ, ಉದ್ಯೋಗ ನೀಡಿದ ಕಂಪನಿಗೆ ಪ್ರತಿ ಉದ್ಯೋಗಿಯ ಮೇಲೆ ತಿಂಗಳಿಗೆ ₹3,000 ವರೆಗೆ ಜಮೆ ಮಾಡಲಾಗುತ್ತದೆ.
ಬಜೆಟ್ ಘೋಷಣೆ: : 2025-26ರ ಬಜೆಟ್ನಲ್ಲಿ ಈ ಯೋಜನೆಯನ್ನು ಘೋಷಿಸಲಾಗಿದ್ದು, ಆಗಸ್ಟ್ 1 ರಿಂದ ಜಾರಿಗೆ ತರಲಾಗಿದೆ. ಹಿಂದೆ ಇದನ್ನು ‘ಎಂಪ್ಲಾಯ್ಮೆಂಟ್ ಲಿಂಕ್ಡ್ ಇನ್ಸೆಂಟಿವ್ ಸ್ಕೀಮ್’ ಅಡಿಯಲ್ಲಿ ಜಾರಿಗೊಳಿಸಲಾಗಿತ್ತು.
ಹಣಪಾವತಿ ಹೇಗೆ ?
ಉದ್ಯೋಗಕ್ಕೆ ಸೇರಿದ ನಂತರ ಎರಡು ಕಂತುಗಳಲ್ಲಿ ಕೇಂದ್ರ ಸರ್ಕಾರ ಈ ಹಣವನ್ನು ನೀಡುತ್ತದೆ:
- ಮೊದಲ ಕಂತು: 6 ತಿಂಗಳ ಕಾಲ ಉದ್ಯೋಗ ಪೂರೈಸಿದ ನಂತರ ₹7,500.
- ಎರಡನೇ ಕಂತು: ಒಂದು ವರ್ಷದ ನಂತರ ಇನ್ನುಳಿದ ₹7,500.
ಕಂಪನಿಗಳಿಗೆ ಸಿಗುವ ಲಾಭ
ಉದ್ಯೋಗಿಯ ವೇತನದ ಆಧಾರದ ಮೇಲೆ ಕಂಪನಿಗಳಿಗೆ ಪ್ರೋತ್ಸಾಹಧನ ಸಿಗಲಿದೆ (ಗರಿಷ್ಠ 2 ವರ್ಷಗಳವರೆಗೆ):
- ವೇತನ ₹10,000 ವರೆಗಿದ್ದರೆ: ಕಂಪನಿಗೆ ತಿಂಗಳಿಗೆ ₹1,000.
- ವೇತನ ₹20,000 ವರೆಗಿದ್ದರೆ: ಕಂಪನಿಗೆ ತಿಂಗಳಿಗೆ ₹2,000.
- ವೇತನ ₹1 ಲಕ್ಷದ ವರೆಗಿದ್ದರೆ: ಕಂಪನಿಗೆ ತಿಂಗಳಿಗೆ ₹3,000.
ಅರ್ಹತಾ ಮಾನದಂಡಗಳು:
- ವೇತನ ಮಿತಿ: ಉದ್ಯೋಗಿಯ ಮಾಸಿಕ ವೇತನ ₹1 ಲಕ್ಷಕ್ಕಿಂತ ಕಡಿಮೆ ಇರಬೇಕು.
- ಷರತ್ತು: ಉದ್ಯೋಗಿಯು ಕನಿಷ್ಠ 6 ತಿಂಗಳು ಒಂದೇ ಕಂಪನಿಯಲ್ಲಿ ಕೆಲಸ ಮಾಡಿರಬೇಕು.
- ಹೊಸ ಉದ್ಯೋಗಿ: ಅಭ್ಯರ್ಥಿಯು ಈ ಹಿಂದೆ ಯಾವುದೇ ಪಿಎಫ್ (PF) ಖಾತೆಯನ್ನು ಹೊಂದಿರಬಾರದು (ಮೊದಲ ಬಾರಿಗೆ ಉದ್ಯೋಗಕ್ಕೆ ಸೇರಿದವರಿಗೆ ಮಾತ್ರ).
- ಅಗತ್ಯ ದಾಖಲೆಗಳು: ಆಧಾರ್ ಕಾರ್ಡ್, ಆಧಾರ್ ಲಿಂಕ್ ಆಗಿರುವ ಬ್ಯಾಂಕ್ ಖಾತೆ, ಅಪಾಯಿಂಟ್ಮೆಂಟ್ ಲೆಟರ್ ಮತ್ತು ಇಪಿಎಫ್ಒ ಖಾತೆ ಇರಬೇಕು.
ಗಮನಿಸಿ: ನೀವು ಹೊಸದಾಗಿ ಉದ್ಯೋಗಕ್ಕೆ ಸೇರಿ ನಿಮ್ಮ ಪಿಎಫ್ ಖಾತೆ ತೆರೆದರೆ, ನೀವು ಸ್ವಯಂಚಾಲಿತವಾಗಿ ಈ ಯೋಜನೆಗೆ ಅರ್ಹರಾಗುತ್ತೀರಿ. ಸರ್ಕಾರವು ನಿಮ್ಮ ಪಿಎಫ್ ಖಾತೆಯ ಆಧಾರದ ಮೇಲೆ ನೇರವಾಗಿ ಹಣವನ್ನು ವರ್ಗಾಯಿಸುತ್ತದೆ.
