ಮನುಷ್ಯನ ಮೃತ ದೇಹವನ್ನು ಎಷ್ಟು ಹೊತ್ತು ಇಡುವುದು ಶ್ರೇಷ್ಠ ? ಗರುಡ ಪುರಾಣ ಏನು ಹೇಳುತ್ತದೆ ತಿಳಿಯಿರಿ.!

ಯಾರಾದರೂ ಮರಣ ಹೊಂದಿದಾಗ, ಅವರ ಪಾರ್ಥಿವ ಶರೀರಕ್ಕೆ ತಕ್ಷಣ ದಹನ ಸಂಸ್ಕಾರ ಮಾಡದೆ, ದೂರದ ಸಂಬಂಧಿಕರು ಅಥವಾ ಮಕ್ಕಳು ಬರಲಿ ಎಂದು ಕಾಯುವುದು ಇಂದಿನ ದಿನಗಳಲ್ಲಿ ಸಾಮಾನ್ಯವಾಗಿದೆ. ಆದರೆ ಹೀಗೆ ಮಾಡಬಹುದೇ? ಗರುಡ ಪುರಾಣ ಈ ಬಗ್ಗೆ ಏನು ಹೇಳುತ್ತದೆ?

ಗರುಡ ಪುರಾಣದ ಪ್ರಕಾರ, ಮನುಷ್ಯನ ಮರಣದ ನಂತರ ಅಂತ್ಯಸಂಸ್ಕಾರವನ್ನು ಯಾವಾಗ ಮಾಡಬೇಕು ಮತ್ತು ಮೃತ ದೇಹವನ್ನು ಎಷ್ಟು ಸಮಯದವರೆಗೆ ಇಡಬಹುದು ಎಂಬ ಬಗ್ಗೆ ಸ್ಪಷ್ಟವಾದ ನಿಯಮಗಳಿವೆ. ಈ ಆಚರಣೆಗಳು ಕೇವಲ ಸಂಪ್ರದಾಯವಲ್ಲ, ಆತ್ಮದ ಮುಂದಿನ ಪ್ರಯಾಣಕ್ಕೆ ಪೂರಕವಾದ ಕ್ರಮಗಳೆಂದು ನಂಬಲಾಗಿದೆ. ಸಾಮಾನ್ಯ ನಿಯಮದಂತೆ, ವ್ಯಕ್ತಿ ಮರಣ ಹೊಂದಿದ ನಂತರ ಸಾಧ್ಯವಾದಷ್ಟು ಬೇಗ ಅಂತ್ಯಸಂಸ್ಕಾರ ಮಾಡಬೇಕು. ಸೂರ್ಯೋದಯದಿಂದ ಸೂರ್ಯಾಸ್ತದ ಒಳಗೆ ಸಂಸ್ಕಾರ ನಡೆಯುವುದು ಶ್ರೇಷ್ಠ. ಈ ಬಗ್ಗೆ ಇಲ್ಲಿದೆ ವರದಿ.

ಗರುಡ ಪುರಾಣದ ಶ್ಲೋಕ

ಯಾವನ್ನ ದಹ್ಯತೇ ದೇಹಸ್ತಾವನ್ಮುಕ್ತಿರ್ನ ವಿದ್ಯತೇ | ಪ್ರೇತತ್ವೇನೈವ ತಿಷ್ಠೇದ್ಧಿ ಯಾವತ್ಪಿಂಡಂ ನ ದೀಯತೇ ||

ಅರ್ಥ: ಮರಣ ಹೊಂದಿದ ವ್ಯಕ್ತಿಯ ದೇಹವು ಸಂಪೂರ್ಣವಾಗಿ ದಹನವಾಗುವವರೆಗೆ ಆ ಆತ್ಮಕ್ಕೆ ಮುಕ್ತಿ ಸಿಗುವುದಿಲ್ಲ. ದೇಹವು ಸುಟ್ಟು ಹೋಗುವವರೆಗೂ ಅದು ‘ಪ್ರೇತ’ ರೂಪದಲ್ಲಿಯೇ ಇರುತ್ತದೆ. ಹಸಿವು ಮತ್ತು ಬಾಯಾರಿಕೆಯಿಂದ ಬಳಲುತ್ತದೆ. ದಹನದ ನಂತರವೂ ಮಕ್ಕಳು ಅಥವಾ ಸಂಬಂಧಿಕರು ಪಿಂಡ ಪ್ರದಾನ, ತರ್ಪಣ ಮತ್ತು ಕರ್ಮಗಳನ್ನು ಮಾಡದಿದ್ದರೆ ಆ ಜೀವಿಯು ಪ್ರೇತ ಸ್ಥಿತಿಯಲ್ಲಿಯೇ ಉಳಿಯುತ್ತದೆ. ಇದು ಅತ್ಯಂತ ದುಃಖಕರ ಸ್ಥಿತಿ. ದಹನ ಸಂಸ್ಕಾರ ಮುಗಿದ ನಂತರವೇ ಆ ಜೀವಿಯು ಪಿತೃಲೋಕದ ಪ್ರಯಾಣಕ್ಕೆ ಅರ್ಹತೆ ಪಡೆಯುತ್ತದೆ.

ಶರೀರ ಅಗ್ನಿಯಲ್ಲಿ ಸೇರಿದಾಗಲೇ ಮುಕ್ತಿ

ಗರುಡ ಪುರಾಣದ ಪ್ರಕಾರ, ಶರೀರವು ಅಗ್ನಿಯಲ್ಲಿ ವಿಲೀನವಾದಾಗ ಮಾತ್ರ ಆ ಜೀವಿಗೆ ವಾಯು ರೂಪದಲ್ಲಿ ಮುಂದೆ ಸಾಗಲು ಅನುಮತಿ ಸಿಗುತ್ತದೆ. ಶರೀರವು ಕಣ್ಣ ಮುಂದೆ ಇರುವವರೆಗೆ, ಆ ಜೀವಿಯು ತನ್ನ ಸಂಬಂಧಿಕರನ್ನು ಕೂಗುತ್ತಾ, ಅವರ ಮಾತುಗಳನ್ನು ಕೇಳುತ್ತಾ, ಮತ್ತೆ ತನ್ನ ದೇಹವನ್ನು ಪ್ರವೇಶಿಸಲು ಹಂಬಲಿಸಿ ವಿಲಪಿಸುತ್ತದೆ.

ಧರ್ಮಶಾಸ್ತ್ರಗಳ ಪ್ರಕಾರ, ಪಾರ್ಥಿವ ಶರೀರಕ್ಕೆ ಆದಷ್ಟು ಬೇಗ ಅಂತ್ಯಕ್ರಿಯೆ ನಡೆಸಬೇಕು. ದೇಹವಿರುವವರೆಗೆ ಲೌಕಿಕ ಬಂಧನ ಕಳಚುವುದಿಲ್ಲ. ದಹನ ವಿಳಂಬವಾದಷ್ಟೂ ಆ ಜೀವಿಯ ಪಿತೃಲೋಕದ ಪ್ರಯಾಣಕ್ಕೆ ಅಡೆತಡೆಗಳು ಹೆಚ್ಚಾಗುತ್ತವೆ.

ಅಂತ್ಯಕ್ರಿಯೆಯ ಪ್ರಮುಖ ನಿಯಮಗಳು:

• ಸಮಯ: ಮರಣ ಹೊಂದಿದ ನಂತರ ಸೂರ್ಯಾಸ್ತದ ಒಳಗಾಗಿ ದಹನ ಸಂಸ್ಕಾರ ಪೂರೈಸಬೇಕು.
• ರಾತ್ರಿ ಮರಣ ಸಂಭವಿಸಿದರೆ: ಒಂದು ವೇಳೆ ಸೂರ್ಯಾಸ್ತದ ನಂತರ ಮರಣ ಸಂಭವಿಸಿದರೆ, ಮರುದಿನ ಸೂರ್ಯೋದಯದ ನಂತರವೇ ಸಂಸ್ಕಾರ ಮಾಡಬೇಕು. ಸೂರ್ಯಾಸ್ತದ ನಂತರ ದಹನ ಮಾಡಬಾರದು.
• ನಕಾರಾತ್ಮಕ ಶಕ್ತಿ: ಪ್ರಾಣ ಹೋದ ನಂತರ ಪಂಚಭೂತಗಳಿಂದಾದ ಶರೀರವು ಕೊಳೆಯಲು ಆರಂಭಿಸುತ್ತದೆ. ಎಷ್ಟೇ ಕೃತಕ ವಿಧಾನಗಳಲ್ಲಿ (ಫ್ರೀಜರ್ ಬಾಕ್ಸ್) ಇಟ್ಟರೂ ಆ ದೇಹದಿಂದ ಹೊರಹೊಮ್ಮುವ ನಕಾರಾತ್ಮಕ ಶಕ್ತಿಯನ್ನು ತಡೆಯಲು ಸಾಧ್ಯವಿಲ್ಲ. ಅಲ್ಲದೆ ಶವ ಕಣ್ಣ ಮುಂದಿರುವವರೆಗೆ ಕುಟುಂಬದವರಲ್ಲಿ ಶೋಕ ಮತ್ತು ಆವೇದನೆ ಹೆಚ್ಚುತ್ತಲೇ ಇರುತ್ತದೆ.

ಮಕ್ಕಳು ದೂರವಿದ್ದಾಗ ಏನು ಮಾಡಬೇಕು?

ತಂದೆ-ತಾಯಿಗೆ ಮಗನೇ ಅಂತ್ಯಕ್ರಿಯೆ ಮಾಡಬೇಕು ಎಂಬ ನಿಯಮವಿದ್ದರೂ, ಅನಿವಾರ್ಯ ಸಂದರ್ಭಗಳಲ್ಲಿ ಕೆಲವು ವಿನಾಯಿತಿಗಳಿವೆ. ಪರಾಶರ ಸ್ಮೃತಿಯ ಪ್ರಕಾರ, ಇಂತಹ ಪರಿಸ್ಥಿತಿಯಲ್ಲೂ ಗರಿಷ್ಠ 24 ಗಂಟೆಗಳ ಕಾಲ ಮಾತ್ರ ಶವವನ್ನು ಇಡಬಹುದು, ಅದಕ್ಕಿಂತ ಹೆಚ್ಚು ಸಮಯ ಕಾಯುವುದು ಸರಿಯಲ್ಲ.

ಫ್ರೀಜರ್ ಬಾಕ್ಸ್‌ನಲ್ಲಿ ಶವವನ್ನು ಇಡುವುದರಿಂದ ದೇಹವು ಹಾಳಾಗದಂತೆ ತಡೆಯಬಹುದೇ ಹೊರತು, ಆಧ್ಯಾತ್ಮಿಕವಾಗಿ ಆ ಜೀವಿಯ ಪ್ರೇತ ಸ್ಥಿತಿಯ ಸಮಯವು ನಿಲ್ಲುವುದಿಲ್ಲ. ವಿಳಂಬವಾದ ಪ್ರತಿ ಗಂಟೆಯೂ ಆ ಜೀವಿಗೆ ಶಿಕ್ಷೆಯ ಅವಧಿಯಂತೆ ಭಾಸವಾಗುತ್ತದೆ ಎಂದು ನಾರದ ಸ್ಮೃತಿ ಹೇಳುತ್ತದೆ.

ತೀರ್ಮಾನ: ಮಕ್ಕಳು ಅಥವಾ ಬಂಧುಗಳಿಗಾಗಿ ಕಾಯುವ ಬದಲು, ಶಾಸ್ತ್ರೋಕ್ತವಾಗಿ ಸರಿಯಾದ ಸಮಯದಲ್ಲಿ ಸಂಸ್ಕಾರ ಮುಗಿಸುವುದು ಶ್ರೇಷ್ಠ. ನಂತರ ಆ ಆತ್ಮದ ಶಾಂತಿಗಾಗಿ ದಾನ-ಧರ್ಮಗಳನ್ನು ಮಾಡಿ, ಪ್ರಮುಖ ಪುಣ್ಯಕ್ಷೇತ್ರಗಳಲ್ಲಿ ಪಿಂಡ ಪ್ರದಾನ ಮಾಡುವುದರಿಂದ ಆ ಜೀವಿಗೆ ಸದ್ಗತಿ ದೊರೆಯುತ್ತದೆ.

 (ಗಮನಿಸಿ: ಈ ಮಾಹಿತಿಯು ಧಾರ್ಮಿಕ ಗ್ರಂಥಗಳು ಮತ್ತು ಪಂಡಿತರ ನಂಬಿಕೆಗಳನ್ನು ಆಧರಿಸಿದೆ. ಯಾವುದೇ ನಿರ್ಧಾರ ತೆಗೆದುಕೊಳ್ಳುವ ಮೊದಲು ವಿಷಯ ತಜ್ಞರನ್ನು ಸಂಪರ್ಕಿಸುವುದು ಸೂಕ್ತ.)