ಇರಾನ್ ಮೇಲೆ ಅಮೆರಿಕ & ಇಸ್ರೇಲ್ ಜಂಟಿ ದಾಳಿ ಭಾರತದ ಮೇಲೆ ನೇರವಾಗಿ ಪರಿಣಾಮ ಬೀರಿದೆ. ಎರಡು ಕಡೆಯ ದಾಳಿಗಳು ಆರಂಭವಾಗಿ 10 ದಿನಗಳು ಕಳೆದಿದ್ದು, ಅಗತ್ಯ ವಸ್ತುಗಳ ವಹಿವಾಟಿನ ಮೇಲೆ ಪರಿಣಾಮ ಬೀರಿದೆ.
ಮುಂಬೈ, ಬೆಂಗಳೂರು ಮತ್ತು ಪಂಜಾಬ್ನಂತಹ ನಗರಗಳಲ್ಲಿ, ವಾಣಿಜ್ಯ ಎಲ್ಪಿಜಿ ಗ್ರಾಹಕರು ಪೂರೈಕೆಯ ಕೊರತೆಯಿಂದ ಪರದಾಡುತ್ತಿದ್ದಾರೆ. ಅಮೆರಿಕ-ಇಸ್ರೇಲ್ ಮತ್ತು ಇರಾನ್ ನಡುವಿನ ಉಲ್ಬಣಗೊಂಡಿರುವ ಸಂಘರ್ಷದ ಕಾರಣ ಈ ಬಿಕ್ಕಟ್ಟು ತೀವ್ರಗೊಂಡಿದೆ.
ಇದರಿಂದಾಗಿ ಹೋಟೆಲ್ ಮಾಲೀಕರು ಹೋಟೆಲ್ ಮುಚ್ಚಬೇಕಾದ ಪರಿಸ್ಥಿತಿ ಬರಬಹುದು ಎಂದು ಎಚ್ಚರಿಕೆ ನೀಡಿದ್ದಾರೆ. ಮನೆ ಬಳಕೆಯ ಅನಿಲ ಸಿಲಿಂಡರ್ ಬುಕಿಂಗ್ಗೆ ಆದ್ಯತೆ ನೀಡಲಾಗುತ್ತಿದ್ದರೆ, ವಾಣಿಜ್ಯ ಬಳಕೆದಾರರು ಸಂಕಷ್ಟಕ್ಕೆ ಸಿಲುಕಿದ್ದಾರೆ.
ಅಮೆರಿಕ-ಇಸ್ರೇಲ್ ಮತ್ತು ಇರಾನ್ ನಡುವಿನ ಯುದ್ಧದಿಂದ ಉಂಟಾಗಿರುವ ಇಂಧನ ಪೂರೈಕೆಯ ಕೊರತೆಯ ಸಂಕಷ್ಟದ ಪರಿಸ್ಥಿತಿ ತಂದಿದೆ. ಮುಂಬೈ, ಬೆಂಗಳೂರು ಮತ್ತು ಪಂಜಾಬ್ ಸೇರಿದಂತೆ ದೇಶದ ಹಲವು ನಗರಗಳಲ್ಲಿ ವಾಣಿಜ್ಯ ಸಿಲಿಂಡರ್ ಕೊರತೆ ಎದುರಾಗಿದೆ. ಇಂಧನದ ಕೊರತೆಯಿಂದಾಗಿ ಕೆಲವು ಪ್ರದೇಶಗಳಲ್ಲಿನ ರೆಸ್ಟೋರೆಂಟ್ಗಳು ತಮ್ಮ ವ್ಯವಹಾರವನ್ನು ಮುಚ್ಚುವ ಸೂಚನೆ ಕೊಟ್ಟಿದ್ದಾರೆ.
ರೆಸ್ಟೋರೆಂಟ್ಗಳು, ಹೋಟೆಲ್ಗಳು, ಮಾಲ್ಗಳು, ಕಚೇರಿಗಳು ಮತ್ತು ಸಮುದಾಯ ಅಡುಗೆ ಮನೆಗಳು ಪ್ರಮುಖವಾಗಿ ವಾಣಿಜ್ಯ ಎಲ್ಪಿಜಿ ಬಳಕೆದಾರರಾಗಿವೆ. ಈ ಕೊರತೆಯು ದೀರ್ಘಕಾಲದವರೆಗೆ ಮುಂದುವರಿದರೆ, ರೆಸ್ಟೋರೆಂಟ್ಗಳು ತಾತ್ಕಾಲಿಕವಾಗಿ ಮುಚ್ಚಲ್ಪಡುವ ಸಾಧ್ಯತೆಯಿದೆ ಎಂದು ಹಲವು ರೆಸ್ಟೋರೆಂಟ್ ಸಂಘಟನೆಗಳು ಎಚ್ಚರಿಕೆ ನೀಡಿವೆ. ಇದು ಗ್ರಾಹಕರು, ಪ್ರವಾಸಿಗರು ಮತ್ತು ಉದ್ಯೋಗಿಗಳ ಮೇಲೆ ಪರಿಣಾಮ ಬೀರಲಿದೆ.
ಪುಣೆಯಲ್ಲಿ ಎಲ್ಪಿಜಿ ಕೊರತೆಯಿಂದಾಗಿ ಪುರಸಭೆಯು ಕೆಲವು ಶವಾಗಾರಗಳ ಕಾರ್ಯನಿರ್ವಹಣೆಗೆ ತೊಂದರೆಯುಂಟಾಗಿದೆ. ಕಾರ್ಖಾನೆಗಳಲ್ಲೂ ಸಹ ಎಲ್ಪಿಜಿ ಪೂರೈಕೆಯ ಕೊರತೆಯ ಬಗ್ಗೆ ವರದಿಗಳು ಬಂದಿವೆ.
ಪಶ್ಚಿಮ ಏಷ್ಯಾದ ಸಂಘರ್ಷದಿಂದಾಗಿ ಪೂರೈಕೆಯಲ್ಲಿ ವ್ಯತ್ಯಯವಾಗಬಹುದು ಎಂಬ ಭಯದಿಂದ, ಗ್ರಾಹಕರು ಮುಗಿಬಿದ್ದು ಅಡುಗೆ ಅನಿಲವನ್ನು ಸಂಗ್ರಹಿಸಲು ಮುಂದಾದ ಹಿನ್ನೆಲೆಯಲ್ಲಿ, ಗೃಹಬಳಕೆಯ ಸಿಲಿಂಡರ್ಗಳ ಬುಕಿಂಗ್ನಲ್ಲಿ ಭಾರೀ ಏರಿಕೆ ಕಂಡುಬಂದಿದೆ ಎಂದು ಎಲ್ಪಿಜಿ ವಿತರಕರು ತಿಳಿಸಿದ್ದಾರೆ. ಅನೇಕ ಗ್ರಾಹಕರು ಮುನ್ನೆಚ್ಚರಿಕೆ ಕ್ರಮವಾಗಿ ತಮ್ಮ ಖಾಲಿ ಸಿಲಿಂಡರ್ಗಳನ್ನು ತುರ್ತಾಗಿ ರೀಫಿಲ್ ಮಾಡಿಸಿಕೊಂಡಿದ್ದಾರೆ.
ಅಧಿಕಾರಿಗಳ ಪ್ರಕಾರ, “ಯುದ್ಧದಿಂದಾಗಿ ಎಲ್ಪಿಜಿಯ ಒಟ್ಟಾರೆ ಲಭ್ಯತೆಯ ಮೇಲೆ ಹೊಡೆತ ಬಿದ್ದಿರುವ ಕಾರಣ, ಗೃಹಬಳಕೆಯ ಪೂರೈಕೆಗೆ ಆದ್ಯತೆ ನೀಡಲಾಗಿದೆ. ಇದು ವಾಣಿಜ್ಯ ಗ್ರಾಹಕರ ಮೇಲೆ ಪರಿಣಾಮ ಬೀರುತ್ತಿದೆ”.
ಗೃಹಬಳಕೆಯ ಎಲ್ಪಿಜಿ ಗ್ರಾಹಕರು ಈಗ 2 ಸಿಲಿಂಡರ್ಗಳ ಬುಕಿಂಗ್ ನಡುವೆ 25 ದಿನಗಳ ಅಂತರವನ್ನು ಕಾಯ್ದುಕೊಳ್ಳಬೇಕಾಗುತ್ತದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಹಿಂದೆ ಈ ಅವಧಿ 21 ದಿನಗಳಾಗಿತ್ತು.
ಭಾರತವು ತನ್ನ ಬಳಕೆಯ ಸುಮಾರು ಮೂರನೇ ಎರಡರಷ್ಟು ಎಲ್ಪಿಜಿಯನ್ನು ಆಮದು ಮಾಡಿಕೊಳ್ಳುವುದರಿಂದ, ಇಂಧನಗಳ ಪೈಕಿ ಎಲ್ಪಿಜಿ ವಿಷಯದಲ್ಲಿ ಭಾರತವು ಹೆಚ್ಚು ದುರ್ಬಲವಾಗಿದೆ. ಈ ಆಮದಿನ ಸುಮಾರು 90% ಗಲ್ಫ್ ದೇಶಗಳಿಂದ ಬರುತ್ತದೆ, ಆದರೆ ಆ ಪ್ರದೇಶದಿಂದ ಪೂರೈಕೆಯು ಸಂಪೂರ್ಣವಾಗಿ ಸ್ಥಗಿತಗೊಂಡಿದೆ.
ಭಾರತದ ಎಲ್ಪಿಜಿ ಅಗತ್ಯಗಳಲ್ಲಿ ಸುಮಾರು 10% ಪೂರೈಸುವ ಅಮೆರಿಕದಿಂದ ಪರ್ಯಾಯ ಮೂಲಗಳನ್ನು ಪಡೆಯಲು ಪ್ರಯತ್ನಗಳು ನಡೆಯುತ್ತಿವೆ. ಆದಾಗ್ಯೂ, ಗಲ್ಫ್ ದೇಶಗಳಿಂದ ಒಂದು ವಾರಕ್ಕಿಂತ ಕಡಿಮೆ ಅವಧಿಯಲ್ಲಿ ತಲುಪುವ ಸರಕು ಅಮೆರಿಕದಿಂದ ಭಾರತಕ್ಕೆ ತಲುಪಲು ಸುಮಾರು 45 ದಿನಗಳು ಬೇಕಾಗುತ್ತದೆ.
ಸರ್ಕಾರವು ಸಂಸ್ಕರಣಾಗಾರಗಳಿಗೆ ಎಲ್ಪಿಜಿ ಉತ್ಪಾದನೆಯನ್ನು ಹೆಚ್ಚಿಸುವಂತೆ ಕೇಳಿದೆ ಮತ್ತು ಅವರು ಸಂಸ್ಕರಿಸುವ ಅನಿಲದಿಂದ ಸಾಧ್ಯವಾದಷ್ಟು ಎಲ್ಪಿಜಿಯನ್ನು ಹೊರತೆಗೆಯುವಂತೆ GAIL ಮತ್ತು ONGC ಗೆ ನಿರ್ದೇಶನ ನೀಡಿದೆ.
