ತಿರುವನಂತಪುರಂ: ರಸ್ತೆ ಅಪಘಾತಕ್ಕೆ ತುತ್ತಾಗಿದ್ದ 10 ತಿಂಗಳ ಮಗು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಫಲಿಸದೇ ‘ಬ್ರೈನ್ ಡೆಡ್’ (ಮೆದುಳು ಸಾವು) ಎಂದು ಘೋಷಿಸಲ್ಪಟ್ಟಿತು. ಈ ತೀವ್ರ ದುಃಖದ ನಡುವೆಯೂ ಮಗುವಿನ ಪೋಷಕರು ತಮ್ಮ ಮಗುವಿನ ಅಂಗಾಂಗಗಳನ್ನು ದಾನ ಮಾಡಲು ನಿರ್ಧರಿಸುವ ಮೂಲಕ ಮಾನವೀಯತೆ ಮೆರೆದಿದ್ದಾರೆ. ಇದರೊಂದಿಗೆ ಈ ಮಗು ಕೇರಳದ ಅತ್ಯಂತ ಕಿರಿಯ ವಯಸ್ಸಿನ ಅಂಗದಾನಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.
ಘಟನೆಯ ಹಿನ್ನೆಲೆ
ಪತ್ತನಂತಿಟ್ಟ ಜಿಲ್ಲೆಯ ಮಲ್ಲಪಳ್ಳಿಯ ನಿವಾಸಿಗಳಾದ ಎಲಿನ್ಶೆರಿನ್ ಅಬ್ರಹಾಂ ಎಂಬ ಪುಟ್ಟ ಮಗು ಫೆಬ್ರವರಿ 5 ರಂದು ಕೊಟ್ಟಾಯಂ ಸಮೀಪದ ಎಂಸಿ ರಸ್ತೆಯಲ್ಲಿ ನಡೆದ ಭೀಕರ ಅಪಘಾತದಲ್ಲಿ ಗಂಭೀರವಾಗಿ ಗಾಯಗೊಂಡಿತ್ತು. ಮಗು ತನ್ನ ತಾಯಿ ಮತ್ತು ಅಜ್ಜ-ಅಜ್ಜಿಯ ಜೊತೆ ಪ್ರಯಾಣಿಸುತ್ತಿದ್ದಾಗ ಈ ಅವಘಡ ಸಂಭವಿಸಿದೆ. ಮೊದಲು ಚಂಗನಾಶ್ಶೇರಿ ಮತ್ತು ತಿರುವಲ್ಲಾದ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ನೀಡಲಾಯಿತಾದರೂ, ಹೆಚ್ಚಿನ ಚಿಕಿತ್ಸೆಗಾಗಿ ಕೊಚ್ಚಿಯ ಅಮೃತ ಆಸ್ಪತ್ರೆಗೆ ದಾಖಲಿಸಲಾಯಿತು. ಆದರೆ ವೈದ್ಯರು ಮಗು ಬ್ರೈನ್ ಡೆಡ್ ಆಗಿದೆ ಎಂದು ಘೋಷಿಸಿದರು.ಪೋಷಕರ ಸಮ್ಮತಿಯ ನಂತರ, ಮಗುವಿನ ಅಂಗಗಳನ್ನು ದಾನ ಮಾಡಲಾಯಿತು.
ದಾನ ಮಾಡಲಾದ ಅಂಗಗಳು
* ಕಿಡ್ನಿಗಳು(ಮೂತ್ರಪಿಂಡ): ತಿರುವನಂತಪುರಂ ಮೆಡಿಕಲ್ ಕಾಲೇಜಿನ ಎಸ್ಎಟಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ 10 ವರ್ಷದ ಬಾಲಕನಿಗೆ ಮಗುವಿನ ಎರಡೂ ಕಿಡ್ನಿಗಳನ್ನು ಕಸಿ ಮಾಡಲಾಗುತ್ತಿದೆ.ಅಂಗಾಂಗಗಳನ್ನು ಸಕಾಲದಲ್ಲಿ ತಲುಪಿಸಲು ರಸ್ತೆ ಮಾರ್ಗದ ಮೂಲಕ ಹಸಿರು ಕಾರಿಡಾರ್ ವ್ಯವಸ್ಥೆ ಮಾಡಲಾಗಿತ್ತು.
* ಲಿವರ್(ಯಕೃತ್ತು) * ಹೃದಯದ ಕವಾಟಗಳು (Heart Valves)
ಆರೋಗ್ಯ ಸಚಿವರ ಮೆಚ್ಚುಗೆ :
ಕೇರಳದ ಆರೋಗ್ಯ ಸಚಿವೆ ವೀಣಾ ಜಾರ್ಜ್ ಅವರು ಮಗುವಿನ ಕುಟುಂಬದ ಈ ನಿರ್ಧಾರವನ್ನು ಶ್ಲಾಘಿಸಿದ್ದಾರೆ.”ಮಗುವನ್ನು ಕಳೆದುಕೊಳ್ಳುವುದು ಅತಿದೊಡ್ಡ ನೋವು. ಆದರೆ ಇಂತಹ ಕಠಿಣ ಸಮಯದಲ್ಲಿಯೂ ಇತರರ ಜೀವ ಉಳಿಸಲು ಮುಂದೆ ಬಂದ ಪೋಷಕರ ಧೈರ್ಯ ಮತ್ತು ಮಾನವೀಯತೆ ಅಪಾರವಾದುದು. ಎಲಿನ್ ಪೋಷಕರು ತಮ್ಮ ವೈಯಕ್ತಿಕ ದುಃಖವನ್ನು ಇತರ ಕುಟುಂಬಗಳ ಪಾಲಿನ ಭರವಸೆಯ ಕಿರಣವನ್ನಾಗಿ ಬದಲಿಸಿದ್ದಾರೆ,” ಎಂದು ಅವರು ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ.
