ಕಾನ್ಪುರದ ಹೆಚ್‌ಡಿಎಫ್‌ಸಿ (HDFC) ಬ್ಯಾಂಕ್ ಶಾಖೆಯೊಂದರಲ್ಲಿ ನಡೆದ ಜಾತಿನಿಂದನೆ ಮತ್ತು ವಾಗ್ವಾದದ ವಿಡಿಯೋ ಈಗ ಮತ್ತೊಂದು ತಿರುವು ಪಡೆದಿದೆ. ‘ನಾನು ಠಾಕೂರ್’ ಎಂದು ಗರ್ಜಿಸಿದ್ದ ಬ್ಯಾಂಕ್ ಉದ್ಯೋಗಿ ಆಸ್ಥಾ ಸಿಂಗ್ ಅವರ ಹೇಳಿಕೆಗೆ ಪ್ರತಿಯಾಗಿ, ಈಗ ಮತ್ತೊಬ್ಬ ಉದ್ಯೋಗಿ ರಿತು ತ್ರಿಪಾಠಿ ಮಿಶ್ರಾ ಅವರು “ನಾನು ಬ್ರಾಹ್ಮಣಳು ಮತ್ತು ಅದಕ್ಕೆ ನನಗೆ ಹೆಮ್ಮೆಯಿದೆ” ಎಂದು ಹೇಳುವ ಮೂಲಕ ತಮ್ಮ ಸಾರಾಸಗಟು ಸ್ಪಷ್ಟನೆ ನೀಡಿದ್ದಾರೆ.
ಘಟನೆಯ ಹಿನ್ನೆಲೆ ಮತ್ತು ಆರೋಪ ಜನವರಿ 6 ರಂದು ಪಂಕಿ ಶಾಖೆಯಲ್ಲಿ ರಿತು ತ್ರಿಪಾಠಿ ಅವರ ಕೆಲಸದ ಕೊನೆಯ ದಿನವಾಗಿತ್ತು. ಕೆಲಸ ಮುಗಿಸಿ ಮನೆಗೆ ಹೊರಡುವ ಸಮಯದಲ್ಲಿ ಈ ಗಲಾಟೆ ನಡೆದಿದೆ. ರಿತು ಅವರ ಪ್ರಕಾರ, ಬ್ಯಾಂಕ್‌ನಿಂದ ಹೊರಬರುವ ಔಪಚಾರಿಕ ಪ್ರಕ್ರಿಯೆಗಳಿಗಾಗಿ ತಮ್ಮನ್ನು ಗಂಟೆಗಟ್ಟಲೆ ಕಾಯಿಸಲಾಗಿತ್ತು. ಈ ಬಗ್ಗೆ ವಿಚಾರಿಸಿದಾಗ ಆಸ್ಥಾ ಸಿಂಗ್ ಅವರು ತಮ್ಮ ಮೇಲೆ ವಿನಾಕಾರಣ ಕೂಗಾಡಿದರು, ಅವಾಚ್ಯ ಶಬ್ದಗಳಿಂದ ನಿಂದಿಸಿದರು ಮತ್ತು ಲ್ಯಾಪ್‌ಟಾಪ್ ಪುಡಿ ಮಾಡುವುದಾಗಿ ಬೆದರಿಕೆ ಹಾಕಿದರು ಎಂದು ರಿತು ಆರೋಪಿಸಿದ್ದಾರೆ.
ಜಾತಿ ಸಂಘರ್ಷಕ್ಕೆ ತಿರುಗಿದ ವಾಗ್ವಾದ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದ 45 ಸೆಕೆಂಡುಗಳ ವಿಡಿಯೋದಲ್ಲಿ ಆಸ್ಥಾ ಸಿಂಗ್ “ನಾನು ಠಾಕೂರ್” ಎಂದು ಹೇಳುವುದು ಕಂಡುಬಂದಿತ್ತು. ಇದಕ್ಕೆ ಸ್ಪಷ್ಟನೆ ನೀಡಿದ್ದ ಆಸ್ಥಾ, ರಿತು ಅವರ ಪತಿ ರಿಶು ಮಿಶ್ರಾ ನನ್ನ ಜಾತಿ ಕೇಳಿ ಅವಮಾನಿಸಿದ್ದಕ್ಕೆ ನಾನು ಹಾಗೆ ಪ್ರತಿಕ್ರಿಯಿಸಿದೆ ಎಂದು ಹೇಳಿದ್ದರು. ಆದರೆ ಈ ವಾದವನ್ನು ತಳ್ಳಿಹಾಕಿರುವ ರಿಶು ಮಿಶ್ರಾ, “ನನ್ನ ಪತ್ನಿಯ ಜೊತೆ ಕೆಲಸ ಮಾಡುವವರ ಜಾತಿ ಕೇಳುವ ಅಗತ್ಯ ನನಗೇನಿದೆ? ಸಣ್ಣ ವಿಷಯಕ್ಕೆ ಆಸ್ಥಾ ಅವರು ತಾವೊಬ್ಬ ಠಾಕೂರ್ ಎಂದು ಜಗಜಟ್ಟಿಗಳಂತೆ ಕೂಗಾಡಿದರು” ಎಂದು ಕಿಡಿಕಾರಿದ್ದಾರೆ.
ಇಬ್ಬರ ನಡುವೆ ಕಾನೂನು ಸಮರ ಈ ಪ್ರಕರಣದಲ್ಲಿ ರಿತು ತ್ರಿಪಾಠಿ ಮಿಶ್ರಾ ಅವರು ತಮಗೆ ನ್ಯಾಯ ಬೇಕು ಮತ್ತು ಸಾರ್ವಜನಿಕರು ತಮ್ಮ ಬೆಂಬಲಕ್ಕೆ ನಿಲ್ಲಬೇಕು ಎಂದು ಮನವಿ ಮಾಡಿದ್ದಾರೆ. ಮತ್ತೊಂದೆಡೆ, ಆಸ್ಥಾ ಸಿಂಗ್ ಅವರು ತಮಗೆ ವಿಡಿಯೋ ವೈರಲ್ ಆದಾಗಿನಿಂದ ಅತ್ಯಾಚಾರದ ಬೆದರಿಕೆಗಳು ಬರುತ್ತಿವೆ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ. ಪೂರ್ಣ ಪ್ರಮಾಣದ ಸಿಸಿಟಿವಿ ದೃಶ್ಯಾವಳಿಗಳನ್ನು ಬಿಡುಗಡೆ ಮಾಡಬೇಕು ಎಂದು ಒತ್ತಾಯಿಸಿರುವ ಅವರು, ಕಾನೂನು ಹೋರಾಟ ಮುಂದುವರಿಸುವುದಾಗಿ ತಿಳಿಸಿದ್ದಾರೆ.
ಒಟ್ಟಿನಲ್ಲಿ ಬ್ಯಾಂಕ್‌ನ ಆಂತರಿಕ ಕೆಲಸದ ಒತ್ತಡ ಮತ್ತು ವೈಯಕ್ತಿಕ ಭಿನ್ನಾಭಿಪ್ರಾಯಗಳು ಈಗ ಜಾತಿ ಬಣ್ಣ ಪಡೆದುಕೊಂಡು ಸಾರ್ವಜನಿಕ ಚರ್ಚೆಗೆ ಕಾರಣವಾಗಿವೆ.
