ಬೆಂಗಳೂರು: ಪ್ರತಿ ವರ್ಷದಂತೆ ಈ ಬಾರಿಯೂ ಮಹಾ ಶಿವರಾತ್ರಿ ಹಬ್ಬದ ದಿನಾಂಕದ ಬಗ್ಗೆ ಭಕ್ತರಲ್ಲಿ ಗೊಂದಲ ಉಂಟಾಗಿದೆ. ಕೆಲವು ಕ್ಯಾಲೆಂಡರ್‌ಗಳಲ್ಲಿ ಫೆಬ್ರವರಿ 15 ಎಂತಿದ್ದರೆ, ಇನ್ನು ಕೆಲವು ಕಡೆ ಫೆಬ್ರವರಿ 16 ಎಂದು ನಮೂದಿಸಲಾಗಿದೆ. ಈ ಗೊಂದಲಕ್ಕೆ ಜ್ಯೋತಿಷಿಗಳು ಶಾಸ್ತ್ರೋಕ್ತವಾಗಿ ಉತ್ತರ ನೀಡಿದ್ದಾರೆ.
ಹಿಂದೂ ಪಂಚಾಂಗದ ಪ್ರಕಾರ, ಮಾಘ ಮಾಸದ ಕೃಷ್ಣ ಪಕ್ಷದ ಚತುರ್ದಶಿ ತಿಥಿಯಂದು ಮಹಾ ಶಿವರಾತ್ರಿಯನ್ನು ಆಚರಿಸಲಾಗುತ್ತದೆ. 2026ರಲ್ಲಿ ಈ ಚತುರ್ದಶಿ ತಿಥಿಯು ಎರಡು ದಿನಗಳ ಕಾಲ ಹರಡಿಕೊಂಡಿದೆ:
- ಚತುರ್ದಶಿ ಆರಂಭ: ಫೆಬ್ರವರಿ 15, 2026ರ ಸಂಜೆ 5:04ಕ್ಕೆ.
- ಚತುರ್ದಶಿ ಅಂತ್ಯ: ಫೆಬ್ರವರಿ 16, 2026ರ ಸಂಜೆ 5:34ಕ್ಕೆ.
ಜ್ಯೋತಿಷಿಗಳು ಹೇಳೋದು ಫೆಬ್ರವರಿ 15 ಸರಿಯಾದ ದಿನಾಂಕ!
ಶಿವರಾತ್ರಿ ಎಂದರೆ ‘ಶಿವನ ರಾತ್ರಿ’. ಶಾಸ್ತ್ರಗಳ ಪ್ರಕಾರ, ಯಾವ ದಿನದಂದು ಅರ್ಧರಾತ್ರಿಯಲ್ಲಿ (ನಿಶಿತ ಕಾಲ) ಚತುರ್ದಶಿ ತಿಥಿ ಇರುತ್ತದೆಯೋ, ಆ ದಿನವೇ ಮಹಾ ಶಿವರಾತ್ರಿಯನ್ನು ಆಚರಿಸಬೇಕು.
- ಫೆಬ್ರವರಿ 15ರ ಮಧ್ಯರಾತ್ರಿ ಚತುರ್ದಶಿ ತಿಥಿ ಇರುವುದರಿಂದ, ಅಂದೇ ಮಹಾ ಶಿವರಾತ್ರಿ ಜಾಗರಣೆ ಮತ್ತು ಪೂಜೆ ಮಾಡುವುದು ಪ್ರಶಸ್ತ.
- ಫೆಬ್ರವರಿ 16ರಂದು ಸಂಜೆ ವೇಳೆಗೆ ಚತುರ್ದಶಿ ಮುಕ್ತಾಯವಾಗುವುದರಿಂದ, ಅಂದು ರಾತ್ರಿ ಪೂಜೆಗೆ ಅವಕಾಶವಿರುವುದಿಲ್ಲ.
ಮುಖ್ಯ ಮುಹೂರ್ತಗಳು (ಬೆಂಗಳೂರು ಸಮಯ):
- ಮಹಾ ಶಿವರಾತ್ರಿ ದಿನಾಂಕ: ಫೆಬ್ರವರಿ 15, 2026 (ಭಾನುವಾರ).
- ನಿಶಿತ ಕಾಲ ಪೂಜೆ (ಮಧ್ಯರಾತ್ರಿ): 12:09 AM ರಿಂದ 01:01 AM ವರೆಗೆ (ಫೆಬ್ರವರಿ 16ರ ಮುಂಜಾನೆ).
- ಪಾರಣೆ (ಉಪವಾಸ ಬಿಡುವ ಸಮಯ): ಫೆಬ್ರವರಿ 16ರ ಬೆಳಗ್ಗೆ 06:42 ರಿಂದ ಸಂಜೆ 03:30ರ ಒಳಗೆ.
ನಾಲ್ಕು ಪ್ರಹರಗಳ ಪೂಜೆ ಸಮಯ:
- ಮೊದಲ ಪ್ರಹರ: ಸಂಜೆ 06:26 ರಿಂದ ರಾತ್ರಿ 09:30.
- ಎರಡನೇ ಪ್ರಹರ: ರಾತ್ರಿ 09:30 ರಿಂದ ಮಧ್ಯರಾತ್ರಿ 12:34.
- ಮೂರನೇ ಪ್ರಹರ: ಮಧ್ಯರಾತ್ರಿ 12:34 ರಿಂದ ಮುಂಜಾನೆ 03:38.
- ನಾಲ್ಕನೇ ಪ್ರಹರ: ಮುಂಜಾನೆ 03:38 ರಿಂದ ಬೆಳಗ್ಗೆ 06:42.
ನೀವು ಮಹಾ ಶಿವರಾತ್ರಿಯ ಉಪವಾಸ ಮತ್ತು ಜಾಗರಣೆಯನ್ನು ಮಾಡುವುದಾದರೆ ಫೆಬ್ರವರಿ 15, ಭಾನುವಾರ ಆಚರಿಸುವುದು ಶಾಸ್ತ್ರಬದ್ಧವಾಗಿದೆ.
