ಭಿಲ್ವಾರಾ: ರಾಜಸ್ಥಾನದ ಭಿಲ್ವಾರಾ ಜಿಲ್ಲೆಯ ಅರ್ವಾಡ್ ಪ್ರದೇಶದ ಕೊಠಿಯಾ ಗ್ರಾಮದಲ್ಲಿ ಬುಧವಾರ ರಾತ್ರಿ ಇಡೀ ಪ್ರದೇಶವನ್ನೇ ಬೆಚ್ಚಿಬೀಳಿಸುವ ಘಟನೆಯೊಂದು ನಡೆದಿದೆ. ಬೆಳ್ಳಿಯ ಆಭರಣಗಳನ್ನು ದೋಚುವ ಉದ್ದೇಶದಿಂದ ಕಳ್ಳರು 90 ವರ್ಷದ ವೃದ್ಧೆಯನ್ನು ಮಂಚದ ಸಮೇತ ಹೊತ್ತುಕೊಂಡು ಹೊಲಕ್ಕೆ ಕೊಂಡೊಯ್ದಿದ್ದಾರೆ. ಅದೃಷ್ಟವಶಾತ್ ಕುಟುಂಬಸ್ಥರು ಮತ್ತು ಗ್ರಾಮಸ್ಥರ ಜಾಗರೂಕತೆಯಿಂದ ವೃದ್ಧೆಯ ಜೀವ ಉಳಿದಿದೆ.
ಮಾಜಿ ಸರ್ಪಂಚ್ ನಥಿ ದೇವಿ ಮಾಲಿ ಅವರ ಮನೆಯಲ್ಲಿ ಕುಟುಂಬದ ಸದಸ್ಯರೆಲ್ಲರೂ ಮಲಗಿದ್ದಾಗ ಈ ಕೃತ್ಯ ನಡೆದಿದೆ. ಕಳ್ಳರು ಮೊದಲು ಇಡೀ ಮನೆಯನ್ನು ಪರಿಶೀಲಿಸಿ ನಂತರ ಒಳ ನುಗ್ಗಿದ್ದಾರೆ. ಯಾರೂ ಕೂಗಾಡದಂತೆ ತಡೆಯಲು ಕುಟುಂಬದ ಉಳಿದ ಸದಸ್ಯರಿದ್ದ ಕೊಠಡಿಗಳ ಬಾಗಿಲನ್ನು ಹೊರಗಿನಿಂದ ಲಾಕ್ ಮಾಡಿದ್ದಾರೆ.
ಮಂಚದ ಸಮೇತ ಅಪಹರಣ
ಮನೆಯ ವರಾಂಡದಲ್ಲಿ ನಥಿ ದೇವಿಯವರ ಅತ್ತೆ ಛೋಟಿ ದೇವಿ (90) ಮಂಚದ ಮೇಲೆ ಮಲಗಿದ್ದರು. ಅವರು ಧರಿಸಿದ್ದ ಸುಮಾರು ಒಂದೂವರೆ ಕೆಜಿ ತೂಕದ ಸಾಂಪ್ರದಾಯಿಕ ಬೆಳ್ಳಿಯ ಆಭರಣಗಳ ಮೇಲೆ ಕಳ್ಳರ ಕಣ್ಣು ಬಿದ್ದಿದೆ. ವೃದ್ಧೆಯ ಬಾಯಿ ಮುಚ್ಚಿದ ಕಳ್ಳರು, ಆಕೆ ಮಲಗಿದ್ದ ಮಂಚವನ್ನೇ ಎತ್ತಿಕೊಂಡು ಹತ್ತಿರದ ಹೊಲಕ್ಕೆ ಓಡಿದ್ದಾರೆ.
ಹೊಲದಲ್ಲಿ ಕೈಕಾಲು ಕಟ್ಟಿ ಪರಾರಿ
ಹೊಲಕ್ಕೆ ತಲುಪಿದ ಕಳ್ಳರು ಛೋಟಿ ದೇವಿಯವರ ಕೈಕಾಲುಗಳನ್ನು ಕಟ್ಟಿಹಾಕಿ ಅಲ್ಲಿಯೇ ಬಿಟ್ಟಿದ್ದಾರೆ. ಕಳ್ಳತನ ಮಾಡುವ ಧಾವಂತದಲ್ಲಿದ್ದ ಕಳ್ಳರು, ಯಾರೋ ಬರುತ್ತಿರುವ ಸುಳಿವು ಸಿಗುತ್ತಿದ್ದಂತೆ ಅಥವಾ ಸಿಕ್ಕಿಬೀಳುವ ಭಯದಿಂದ ಆಭರಣಗಳನ್ನು ಬಿಚ್ಚಲು ಸಾಧ್ಯವಾಗದೆ ಅಲ್ಲಿಂದ ಪರಾರಿಯಾಗಿದ್ದಾರೆ.ಕೆಲ ಹೊತ್ತಿನ ನಂತರ ಮನೆಯೊಳಗೆ ಲಾಕ್ ಆಗಿದ್ದ ಕುಟುಂಬದ ಸದಸ್ಯರಿಗೆ ಅನುಮಾನ ಬಂದು ಜೋರಾಗಿ ಕಿರುಚಾಡಿದ್ದಾರೆ. ಅವರ ಕೂಗಾಟ ಕೇಳಿ ಗ್ರಾಮಸ್ಥರು ಓಡಿ ಬಂದು ಬಾಗಿಲುಗಳನ್ನು ತೆರೆದಿದ್ದಾರೆ. ಮನೆಯಲ್ಲಿ ಛೋಟಿ ದೇವಿ ಕಾಣದಿದ್ದಾಗ ತಕ್ಷಣ ಹುಡುಕಾಟ ಆರಂಭಿಸಲಾಯಿತು. ಕೊನೆಗೆ ಹೊಲದಲ್ಲಿ ಕೈಕಾಲು ಕಟ್ಟಲ್ಪಟ್ಟ ಸ್ಥಿತಿಯಲ್ಲಿ ವೃದ್ಧೆ ಪತ್ತೆಯಾಗಿದ್ದಾರೆ.
ಇತ್ತೀಚೆಗಷ್ಟೇ ಸವಾಯಿ ಮಾಧೋಪುರ ಜಿಲ್ಲೆಯ ಕೊಡೈ ಗ್ರಾಮದಲ್ಲಿ ಬೆಳ್ಳಿಯ ಆಭರಣಕ್ಕಾಗಿ ಮಹಿಳೆಯೊಬ್ಬರನ್ನು ಹತ್ಯೆ ಮಾಡಲಾಗಿತ್ತು. ಈ ಘಟನೆಯ ಬೆನ್ನಲ್ಲೇ ಈ ಕೃತ್ಯ ನಡೆದಿದ್ದು, ಗ್ರಾಮೀಣ ಭಾಗದ ವೃದ್ಧೆಯರ ಸುರಕ್ಷತೆಯ ಬಗ್ಗೆ ಆತಂಕ ಮೂಡಿಸಿದೆ. ಬೆಳ್ಳಿಯ ಬೆಲೆ ಏರಿಕೆಯಾಗುತ್ತಿರುವ ಕಾರಣ, ಸಾಂಪ್ರದಾಯಿಕ ಆಭರಣ ಧರಿಸುವ ವೃದ್ಧೆಯರೇ ಕಳ್ಳರ ಪ್ರಮುಖ ಗುರಿಯಾಗುತ್ತಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.ಸದ್ಯ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಶೋಧ ಕಾರ್ಯ ಆರಂಭಿಸಿದ್ದಾರೆ.
