ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನವು ಸಾಫ್ಟ್‌ವೇರ್ ಲೋಕದಲ್ಲಿ ಎಂತಹ ಕ್ರಾಂತಿ ಮಾಡುತ್ತಿದೆ ಎಂದರೆ, ಇನ್ನು ಮುಂದೆ ಪ್ರೋಗ್ರಾಮಿಂಗ್ ಬರೆಯುವವರ ಅವಶ್ಯಕತೆ ಇರುವುದಿಲ್ಲವೇ ಎಂಬ ಪ್ರಶ್ನೆ ಮೂಡಿದೆ. ಭಾರತದ ಪ್ರಸಿದ್ಧ ಸಾಫ್ಟ್‌ವೇರ್ ಸಂಸ್ಥೆ ‘ಝೋಹೋ’ (Zoho) ಸ್ಥಾಪಕ ಶ್ರೀಧರ್ ವೆಂಬು ಅವರು ಈ ಬಗ್ಗೆ ಗಂಭೀರ ಎಚ್ಚರಿಕೆ ನೀಡಿದ್ದು, ಕೋಡಿಂಗ್ ನಂಬಿ ಬದುಕುವವರು ಪರ್ಯಾಯ ಜೀವನೋಪಾಯದ ಬಗ್ಗೆ ಯೋಚಿಸುವುದು ಉತ್ತಮ ಎಂದು ಹೇಳಿದ್ದಾರೆ.
ಶೂನ್ಯ ಜ್ಞಾನವಿದ್ದರೂ ಆಪ್ ಸಿದ್ಧ ಅನಿಶ್ ಮೂಂಕಾ ಎಂಬುವವರು ಹಂಚಿಕೊಂಡ ಪೋಸ್ಟ್ ಒಂದಕ್ಕೆ ಪ್ರತಿಕ್ರಿಯಿಸಿದ ವೆಂಬು ಈ ಮಾತುಗಳನ್ನು ಹೇಳಿದ್ದಾರೆ. ಅನಿಶ್ ಅವರಿಗೆ ಕೋಡಿಂಗ್ ಬಗ್ಗೆ ಯಾವುದೇ ಜ್ಞಾನವಿಲ್ಲದಿದ್ದರೂ, ಕೇವಲ ಎಐ ಉಪಕರಣಗಳನ್ನು ಬಳಸಿ ’10 ಮಿನಿಟ್ ಗೀತಾ’ ಎಂಬ ಆಪ್ ಅನ್ನು ಸಿದ್ಧಪಡಿಸಿದ್ದಾರೆ. ಈ ಆಪ್ ನಿರ್ಮಿಸಲು ಅವರು ಬರೆದ ಕೋಡಿಂಗ್ ಸಾಲುಗಳ ಸಂಖ್ಯೆ ಸೊನ್ನೆ! ಕೇವಲ ಎಐ ಚಾಟ್‌ಬಾಟ್‌ಗಳ ಚಂದಾದಾರಿಕೆ ಹಣ ಪಾವತಿಸಿ, ಒಂದೇ ವಾರದಲ್ಲಿ ಅವರು ಈ ಸಾಧನೆ ಮಾಡಿದ್ದಾರೆ. ಇದು ಎಐ ತಂತ್ರಜ್ಞಾನದ ಅಗಾಧ ಶಕ್ತಿಯನ್ನು ಜಗತ್ತಿಗೆ ತೋರಿಸಿದೆ.
ಪರ್ಯಾಯ ದಾರಿಯತ್ತ ಗಮನಹರಿಸಿ ಅನಿಶ್ ಅವರ ಉದಾಹರಣೆಯನ್ನು ಉಲ್ಲೇಖಿಸಿ ಶ್ರೀಧರ್ ವೆಂಬು ಅವರು, ಕೋಡಿಂಗ್ ಉತ್ಪಾದಕತೆ ಈಗ ಎಐ ಸಹಾಯದಿಂದ ಅತಿ ವೇಗವಾಗಿ ಬೆಳೆಯುತ್ತಿದೆ ಎಂದು ಹೇಳಿದ್ದಾರೆ. ನಾನಾ ಕಂಪನಿಗಳು ಈಗ ಎಐ ಬಳಸಿ ಸಂಕೀರ್ಣವಾದ ಕಂಪೈಲರ್ ಮತ್ತು ಪ್ರೋಗ್ರಾಂಗಳನ್ನು ಸಿದ್ಧಪಡಿಸುತ್ತಿವೆ. ನಾನು ಕೂಡ ಈ ಎಚ್ಚರಿಕೆಯನ್ನು ಅನ್ವಯಿಸಿಕೊಳ್ಳುತ್ತೇನೆ. ಇದು ಗಾಬರಿಯಿಂದ ಹೇಳುತ್ತಿರುವ ಮಾತಲ್ಲ, ಬದಲಿಗೆ ಬದಲಾಗುತ್ತಿರುವ ಜಗತ್ತನ್ನು ಶಾಂತಚಿತ್ತದಿಂದ ಒಪ್ಪಿಕೊಂಡು ಮುಂದಿನ ಹಾದಿಯನ್ನು ಕಂಡುಕೊಳ್ಳಬೇಕು ಎಂದು ಅವರು ಸಲಹೆ ನೀಡಿದ್ದಾರೆ.
ಎಕನಾಮಿಕ್ ಫಿಲಾಸಫರ್ ಆಗಿ ಎಐ ಗೂಗಲ್ ಜೆಮಿನಿ ಪ್ರೊನಂತಹ ಎಐಗಳ ಜೊತೆಗಿನ ತಮ್ಮ ಚರ್ಚೆಯ ಬಗ್ಗೆ ಹಂಚಿಕೊಂಡ ವೆಂಬು, ಎಐ ಕೇವಲ ಕೋಡಿಂಗ್ ಮಾತ್ರವಲ್ಲದೆ ಒಬ್ಬ ಬುದ್ಧಿವಂತ ಅರ್ಥಶಾಸ್ತ್ರಜ್ಞನಂತೆ ಆರ್ಥಿಕ ಬದಲಾವಣೆಗಳ ಬಗ್ಗೆ ವಿಶ್ಲೇಷಣೆ ಮಾಡಬಲ್ಲದು ಎಂದು ತಿಳಿಸಿದ್ದಾರೆ. ತಂತ್ರಜ್ಞಾನವು ಇಷ್ಟೊಂದು ವೇಗವಾಗಿ ವಿಕಸನಗೊಳ್ಳುತ್ತಿರುವಾಗ, ಮಾನವ ಶಕ್ತಿಯು ತನ್ನ ಕೌಶಲಗಳನ್ನು ಬದಲಿಸಿಕೊಳ್ಳದಿದ್ದರೆ ಭವಿಷ್ಯದಲ್ಲಿ ಉದ್ಯೋಗದ ಸಮಸ್ಯೆ ಎದುರಾಗಬಹುದು ಎಂಬುದು ಅವರ ಮಾತಿನ ಸಾರಾಂಶವಾಗಿದೆ.
