ಬಾಲಿವುಡ್ ಸ್ಟಾರ್ ನಟ ಹೃತಿಕ್ ರೋಷನ್ ಅವರ ಸಹೋದರಿ ಸುನೈನಾ ರೋಷನ್ ಅವರು ತಾವು ಅನುಭವಿಸಿದ ಮದ್ಯವ್ಯಸನ ಮತ್ತು ಜಂಕ್ ಫುಡ್ ಚಟದಿಂದ ಹೊರಬಂದ ಕಠಿಣ ಹಾದಿಯ ಬಗ್ಗೆ ಮೊದಲ ಬಾರಿಗೆ ಮನಬಿಚ್ಚಿ ಮಾತನಾಡಿದ್ದಾರೆ. ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋವೊಂದನ್ನು ಹಂಚಿಕೊಂಡಿರುವ ಅವರು, ವ್ಯಸನ ಎನ್ನುವುದು ಮನುಷ್ಯನ ಜೀವನವನ್ನು ಹೇಗೆ ಹೈರಾಣಾಗಿಸುತ್ತದೆ ಎಂಬುದನ್ನು ವಿವರಿಸಿದ್ದಾರೆ.
ಸುನೈನಾ ಅವರು ತಮ್ಮ ವೃತ್ತಿಜೀವನ ಮತ್ತು ವೈಯಕ್ತಿಕ ಜೀವನದಲ್ಲಿ ಹಲವು ಏರಿಳಿತಗಳನ್ನು ಕಂಡವರು. ಒಂದು ಕಾಲದಲ್ಲಿ ಅವರು ಅತಿಯಾದ ಮದ್ಯಪಾನ ಹಾಗೂ ಸಿಹಿತಿಂಡಿ ಮತ್ತು ಜಂಕ್ ಫುಡ್ಗೆ ದಾಸರಾಗಿದ್ದರಂತೆ. ಈ ಬಗ್ಗೆ ವಿಡಿಯೋದಲ್ಲಿ ಹೇಳಿಕೊಂಡಿರುವ ಅವರು, “ನನಗೆ ಒಂದು ಸಮಸ್ಯೆಯಿದೆ ಎಂದು ಒಪ್ಪಿಕೊಳ್ಳುವುದೇ ನನಗೆ ಅತಿ ದೊಡ್ಡ ಸವಾಲಾಗಿತ್ತು. ಒಮ್ಮೆ ಆ ಸತ್ಯವನ್ನು ಒಪ್ಪಿಕೊಂಡ ನಂತರ ನನ್ನ ಜೀವನ ಬದಲಾಗಲು ಶುರುವಾಯಿತು” ಎಂದು ಹೇಳಿದ್ದಾರೆ.
ಆಹಾರ, ಮದ್ಯ ಅಥವಾ ನಮ್ಮ ಅರಿವಿಲ್ಲದೆ ನಮಗೆ ಅಂಟಿಕೊಳ್ಳುವ ಕೆಲವು ಅಭ್ಯಾಸಗಳು ನಮ್ಮನ್ನು ವ್ಯಸನಿಗಳನ್ನಾಗಿ ಮಾಡುತ್ತವೆ. ಈ ಸುಳಿಯಿಂದ ಹೊರಬರುವುದು ಅಷ್ಟು ಸುಲಭವಾಗಿರಲಿಲ್ಲ. ಆದರೆ ಸರಿಯಾದ ಮನಸ್ಥಿತಿ ಮತ್ತು ಕುಟುಂಬದ ಬೆಂಬಲವಿದ್ದರೆ ಯಾವುದನ್ನೂ ಸಾಧಿಸಬಹುದು ಎಂದು ಅವರು ಕಿವಿಮಾತು ಹೇಳಿದ್ದಾರೆ. “ವ್ಯಸನ ನಿಮ್ಮನ್ನು ಗುರುತಿಸಬಾರದು, ಬದಲಾಗಿ ನೀವು ಅದನ್ನು ಎದುರಿಸಬೇಕು. ಈ ಹೋರಾಟದಲ್ಲಿ ನೀವು ಒಬ್ಬಂಟಿಯಲ್ಲ, ಯಾರಾದರೂ ಬೆಂಬಲ ನೀಡುವವರ ಸಹಾಯ ಪಡೆಯಿರಿ” ಎಂದು ಅವರು ಕಷ್ಟದಲ್ಲಿರುವವರಿಗೆ ಧೈರ್ಯ ತುಂಬಿದ್ದಾರೆ.
ಸುನೈನಾ ಅವರ ಈ ಧೈರ್ಯದ ನಡೆಯನ್ನು ಕಂಡು ಸಹೋದರ ಹೃತಿಕ್ ರೋಷನ್, ತಂದೆ ರಾಕೇಶ್ ರೋಷನ್ ಮತ್ತು ತಾಯಿ ಪಿಂಕಿ ರೋಷನ್ ಕಮೆಂಟ್ ಬಾಕ್ಸ್ನಲ್ಲಿ ಶಹಬ್ಬಾಸ್ ಎಂದಿದ್ದಾರೆ. ಈ ಹಿಂದೆ ಕ್ಯಾನ್ಸರ್ ಮತ್ತು ಮೆದುಳಿನ ಗಂಭೀರ ಕಾಯಿಲೆಯನ್ನು ಗೆದ್ದು ಬಂದಿದ್ದ ಸುನೈನಾ, ಈಗ ಕೆಟ್ಟ ಚಟಗಳನ್ನು ಸೋಲಿಸಿ ಇತರರಿಗೆ ಸ್ಫೂರ್ತಿಯಾಗಿದ್ದಾರೆ.
