30ರ ನಂತರ ಗರ್ಭಧಾರಣೆ: ಮಹಿಳೆಯರು ತಿಳಿದುಕೊಳ್ಳಬೇಕಾದ ಪ್ರಮುಖ ವಿಷಯಗಳಿವು

ವೃತ್ತಿಜೀವನ, ಆರ್ಥಿಕ ಸ್ಥಿರತೆ ಹಾಗೂ ವೈಯಕ್ತಿಕ ಆದ್ಯತೆಗಳಂತಹ ಹಲವು ಕಾರಣಗಳಿಂದ ಅನೇಕ ಮಹಿಳೆಯರು 30 ವರ್ಷಗಳ ನಂತರ ಕುಟುಂಬ ಆರಂಭಿಸಲು ನಿರ್ಧರಿಸುತ್ತಿದ್ದಾರೆ. 30ರ ನಂತರವೂ ಆರೋಗ್ಯಕರ ಗರ್ಭಧಾರಣೆ ಸಾಧ್ಯ. ಆದರೆ ವಯಸ್ಸು ಹೆಚ್ಚಾದಂತೆ ಫಲವತ್ತತೆಯಲ್ಲಿ ಸಹಜವಾಗಿ ಕೆಲವು ಬದಲಾವಣೆಗಳು ಉಂಟಾಗಬಹುದು. ಈ ಬಗ್ಗೆ ಮೊದಲೇ ತಿಳಿದುಕೊಂಡರೆ ಅನಗತ್ಯ ಆತಂಕವಿಲ್ಲದೆ ಸೂಕ್ತ ನಿರ್ಧಾರಗಳನ್ನು ತೆಗೆದುಕೊಳ್ಳಬಹುದು.

30ರ ನಂತರ ಫಲವತ್ತತೆಯಲ್ಲಿ ಏನೆಲ್ಲ ಬದಲಾವಣೆ?

ಮಹಿಳೆಯರು ಸೀಮಿತ ಸಂಖ್ಯೆಯ ಅಂಡಾಣುಗಳೊಂದಿಗೆ ಜನಿಸುತ್ತಾರೆ. ವಯಸ್ಸು ಹೆಚ್ಚಾದಂತೆ ಅಂಡಾಣುಗಳ ಸಂಖ್ಯೆ ಮಾತ್ರವಲ್ಲದೆ ಅವುಗಳ ಗುಣಮಟ್ಟವೂ ಕ್ರಮೇಣ ಕಡಿಮೆಯಾಗುತ್ತದೆ. 30 ವರ್ಷ ದಾಟಿದ ತಕ್ಷಣವೇ ಫಲವತ್ತತೆ ಏಕಾಏಕಿ ಕುಸಿಯುವುದಿಲ್ಲ. ಆದರೆ 30ರ ಮಧ್ಯಭಾಗದ ನಂತರ ಈ ಬದಲಾವಣೆಗಳು ಹೆಚ್ಚು ಸ್ಪಷ್ಟವಾಗಬಹುದು.

ಅಂಡಾಣುಗಳ ಗುಣಮಟ್ಟ ಕಡಿಮೆಯಾಗುವುದರಿಂದ ಗರ್ಭಧಾರಣೆಯ ಸಾಧ್ಯತೆ ಕುಗ್ಗಬಹುದು. ಅಲ್ಲದೆ, ವಯಸ್ಸಿನೊಂದಿಗೆ ಗರ್ಭಪಾತ ಹಾಗೂ ಕ್ರೋಮೋಸೋಮ್‌ಗಳಿಗೆ ಸಂಬಂಧಿಸಿದ ಕೆಲವು ಅಸಹಜತೆಗಳ ಅಪಾಯವೂ ಹೆಚ್ಚಾಗಬಹುದು.

ಆದರೆ ಗರ್ಭಧಾರಣೆಯ ಸಾಧ್ಯತೆಯನ್ನು ನಿರ್ಧರಿಸುವುದು ವಯಸ್ಸು ಮಾತ್ರವಲ್ಲ. ಅಂಡೋತ್ಪತ್ತಿ, ಫೆಲೋಪಿಯನ್ ಟ್ಯೂಬ್‌ಗಳ ಆರೋಗ್ಯ, ಗರ್ಭಾಶಯದ ಆರೋಗ್ಯ, ಸಂಗಾತಿಯ ವೀರ್ಯಾಣುಗಳ ಗುಣಮಟ್ಟ, ಇತರ ಆರೋಗ್ಯ ಸಮಸ್ಯೆಗಳು ಹಾಗೂ ಜೀವನಶೈಲಿಯೂ ಪ್ರಮುಖ ಪಾತ್ರ ವಹಿಸುತ್ತವೆ.

Egg Reserve ಎಂದರೇನು?

Egg Reserve ಅಥವಾ Ovarian Reserve ಎಂದರೆ ಅಂಡಾಶಯಗಳಲ್ಲಿ ಉಳಿದಿರುವ ಅಂಡಾಣುಗಳ ಸಂಗ್ರಹ. ಇದನ್ನು ಅಂದಾಜಿಸಲು ವೈದ್ಯರು AMH (Anti-Müllerian Hormone) ಪರೀಕ್ಷೆ ಹಾಗೂ ಅಲ್ಟ್ರಾಸೌಂಡ್ ಮೂಲಕ Antral Follicle Count ಮುಂತಾದ ಪರೀಕ್ಷೆಗಳನ್ನು ಸೂಚಿಸಬಹುದು.

ಆದರೆ ಈ ಪರೀಕ್ಷೆಗಳ ಫಲಿತಾಂಶದಿಂದ ಮಹಿಳೆ ಸಹಜವಾಗಿ ಗರ್ಭಧರಿಸಬಹುದೇ ಅಥವಾ ಇಲ್ಲವೇ ಎಂಬುದನ್ನು ನಿಖರವಾಗಿ ನಿರ್ಧರಿಸಲು ಸಾಧ್ಯವಿಲ್ಲ.

ಉದಾಹರಣೆಗೆ, AMH ಮಟ್ಟ ಕಡಿಮೆಯಿದ್ದರೂ ಗರ್ಭಧಾರಣೆಯ ಸಾಧ್ಯತೆ ಇರಬಹುದು. ಅದೇ ರೀತಿ AMH ಮಟ್ಟ ಹೆಚ್ಚಿರುವುದು ಗರ್ಭಧಾರಣೆಗೆ ಖಾತರಿಯಲ್ಲ. ಅಂಡಾಣುಗಳ ಸಂಖ್ಯೆಯ ಜೊತೆಗೆ ಅವುಗಳ ಗುಣಮಟ್ಟವೂ ಮುಖ್ಯವಾಗಿದ್ದು, ಅದರ ಮೇಲೆ ವಯಸ್ಸಿನ ಪ್ರಭಾವ ಹೆಚ್ಚು.

30ರ ನಂತರ ಗರ್ಭಧಾರಣೆ ಎಂದರೆ ಹೈರಿಸ್ಕ್‌ ಎಂದೇನಾ?

30 ವರ್ಷ ದಾಟಿದ ಮಾತ್ರಕ್ಕೆ ಪ್ರತಿಯೊಂದು ಗರ್ಭಧಾರಣೆಯನ್ನೂ ಹೈರಿಸ್ಕ್ ಪ್ರೆಗ್ನೆನ್ಸಿ ಎಂದು ಪರಿಗಣಿಸಬೇಕಿಲ್ಲ. ಈ ವಯಸ್ಸಿನಲ್ಲಿ ಅನೇಕ ಮಹಿಳೆಯರು ಆರೋಗ್ಯಕರ ಗರ್ಭಧಾರಣೆಯನ್ನು ಪೂರ್ಣಗೊಳಿಸಿ ಆರೋಗ್ಯವಂತ ಶಿಶುಗಳಿಗೆ ಜನ್ಮ ನೀಡುತ್ತಾರೆ.

ಆದರೆ ವಯಸ್ಸು ಹೆಚ್ಚಾದಂತೆ ಗರ್ಭಾವಸ್ಥೆಯ ಮಧುಮೇಹ, ಅಧಿಕ ರಕ್ತದೊತ್ತಡ ಹಾಗೂ ಕೆಲವು ಕ್ರೋಮೋಸೋಮ್ ಸಂಬಂಧಿತ ಸಮಸ್ಯೆಗಳ ಅಪಾಯ ಹೆಚ್ಚಾಗಬಹುದು. ಆದ್ದರಿಂದ ಗರ್ಭಧಾರಣೆಗೆ ಮುನ್ನ ವೈದ್ಯರನ್ನು ಸಂಪರ್ಕಿಸಿ ಆರೋಗ್ಯದ ಬಗ್ಗೆ ಪರಿಶೀಲನೆ ಮಾಡಿಸಿಕೊಳ್ಳುವುದು ಉಪಯುಕ್ತ.

ಗರ್ಭಧಾರಣೆಗೆ ಮುನ್ನದ ತಪಾಸಣೆಯಲ್ಲಿ ಈಗಾಗಲೇ ಇರುವ ಆರೋಗ್ಯ ಸಮಸ್ಯೆಗಳು, ಬಳಸುತ್ತಿರುವ ಔಷಧಿಗಳು, ಲಸಿಕೆಗಳ ಸ್ಥಿತಿ, ಋತುಚಕ್ರದ ಇತಿಹಾಸ ಹಾಗೂ ಜೀವನಶೈಲಿ ಮುಂತಾದವುಗಳನ್ನು ವೈದ್ಯರು ಪರಿಶೀಲಿಸಬಹುದು. ಅಗತ್ಯವಿದ್ದರೆ ಸೂಕ್ತ ಪರೀಕ್ಷೆಗಳು ಮತ್ತು ಫೋಲಿಕ್ ಆ್ಯಸಿಡ್‌ನಂತಹ ಪೂರಕಗಳನ್ನು ಶಿಫಾರಸು ಮಾಡಬಹುದು.

ಯಾವಾಗ ಫಲವತ್ತತೆ ತಜ್ಞರನ್ನು ಸಂಪರ್ಕಿಸಬೇಕು?

30 ವರ್ಷ ದಾಟಿದ ತಕ್ಷಣವೇ ಫಲವತ್ತತೆ ಚಿಕಿತ್ಸೆಯ ಅಗತ್ಯವಿದೆ ಎಂದು ಭಾವಿಸಬೇಕಿಲ್ಲ. ಸಾಮಾನ್ಯವಾಗಿ:

35 ವರ್ಷಕ್ಕಿಂತ ಕಡಿಮೆ ವಯಸ್ಸು: ಗರ್ಭನಿರೋಧಕ ಬಳಸದೆ ನಿಯಮಿತವಾಗಿ 12 ತಿಂಗಳು ಪ್ರಯತ್ನಿಸಿದರೂ ಗರ್ಭಧಾರಣೆಯಾಗದಿದ್ದರೆ ವೈದ್ಯಕೀಯ ಮೌಲ್ಯಮಾಪನ ಮಾಡಿಸಿಕೊಳ್ಳಲು ಸೂಚಿಸಲಾಗುತ್ತದೆ.

35 ವರ್ಷ ಅಥವಾ ಅದಕ್ಕಿಂತ ಹೆಚ್ಚು: 6 ತಿಂಗಳ ಕಾಲ ಪ್ರಯತ್ನಿಸಿದರೂ ಗರ್ಭಧಾರಣೆಯಾಗದಿದ್ದರೆ ವೈದ್ಯರನ್ನು ಸಂಪರ್ಕಿಸಿ ಮೌಲ್ಯಮಾಪನ ಮಾಡಿಸಿಕೊಳ್ಳುವುದು ಸೂಕ್ತ.

ಋತುಚಕ್ರ ಸರಿಯಾಗಿಲ್ಲದಿದ್ದರೆ, ಈಗಾಗಲೇ ಯಾವುದೇ ಸಂತಾನೋತ್ಪತ್ತಿ ಸಮಸ್ಯೆ ತಿಳಿದಿದ್ದರೆ ಅಥವಾ ಹಿಂದಿನ ಪೆಲ್ವಿಕ್ ಶಸ್ತ್ರಚಿಕಿತ್ಸೆಯಂತಹ ಪರಿಸ್ಥಿತಿಗಳಿದ್ದರೆ ಇನ್ನೂ ಮುಂಚಿತವಾಗಿ ವೈದ್ಯರನ್ನು ಸಂಪರ್ಕಿಸಬೇಕಾಗಬಹುದು.

ಫಲವತ್ತತೆ ಮೌಲ್ಯಮಾಪನ ಅಗತ್ಯವಿದ್ದಾಗ ಇಬ್ಬರೂ ಸಂಗಾತಿಗಳು ಪರೀಕ್ಷೆಗೆ ಒಳಗಾಗುವುದು ಮುಖ್ಯ. ಗರ್ಭಧಾರಣೆ ವಿಳಂಬವಾಗಲು ಮಹಿಳೆಯರ ಕಾರಣಗಳಷ್ಟೇ ಅಲ್ಲದೆ ಪುರುಷರ ಫಲವತ್ತತೆಗೆ ಸಂಬಂಧಿಸಿದ ಅಂಶಗಳೂ ಕಾರಣವಾಗಬಹುದು.

ಸಂತಾನೋತ್ಪತ್ತಿ ಆರೋಗ್ಯವನ್ನು ಹೇಗೆ ಕಾಪಾಡಿಕೊಳ್ಳಬೇಕು?

ಸಂತಾನೋತ್ಪತ್ತಿ ಆರೋಗ್ಯವನ್ನು ಕಾಪಾಡಿಕೊಳ್ಳಲು ದೈನಂದಿನ ಜೀವನಶೈಲಿಯೂ ಮುಖ್ಯವಾಗಿದೆ. ಆರೋಗ್ಯಕರ ತೂಕವನ್ನು ಕಾಪಾಡಿಕೊಳ್ಳುವುದು, ಸಮತೋಲಿತ ಆಹಾರ ಸೇವಿಸುವುದು, ನಿಯಮಿತ ವ್ಯಾಯಾಮ ಮಾಡುವುದು ಹಾಗೂ ಧೂಮಪಾನ ಮತ್ತು ಮಾದಕ ವಸ್ತುಗಳಿಂದ ದೂರವಿರುವುದು ಸಹಾಯಕವಾಗಬಹುದು. ಮದ್ಯಪಾನವನ್ನು ಮಿತಿಗೊಳಿಸುವುದೂ ಮುಖ್ಯ.

ಅದೇ ರೀತಿ ಒತ್ತಡವನ್ನು ನಿಯಂತ್ರಿಸುವುದು ಮತ್ತು ಸಾಕಷ್ಟು ನಿದ್ರೆ ಪಡೆಯುವುದು ಒಟ್ಟಾರೆ ಆರೋಗ್ಯಕ್ಕೆ ಪ್ರಯೋಜನಕಾರಿ. ಥೈರಾಯ್ಡ್ ಸಮಸ್ಯೆ, ಮಧುಮೇಹ ಅಥವಾ PCOSನಂತಹ ಸಮಸ್ಯೆಗಳಿದ್ದರೆ ವೈದ್ಯರ ಸಲಹೆಯಂತೆ ಅವುಗಳನ್ನು ನಿಯಂತ್ರಣದಲ್ಲಿಟ್ಟುಕೊಳ್ಳುವುದು ಮುಖ್ಯ.

ಗರ್ಭಧಾರಣೆಗೆ ಮುನ್ನ ಆರೋಗ್ಯ, ಔಷಧಿಗಳು, ಲಸಿಕೆಗಳು, ಆಹಾರ, ವ್ಯಾಯಾಮ ಹಾಗೂ ಇತರ ಅಪಾಯಕಾರಿ ಅಂಶಗಳ ಕುರಿತು ವೈದ್ಯಕೀಯ ಸಲಹೆ ಪಡೆಯುವುದು ಪೂರ್ವಗರ್ಭಧಾರಣೆಯ ಆರೈಕೆಯ ಪ್ರಮುಖ ಭಾಗವಾಗಿದೆ.

30ರ ನಂತರ ಗರ್ಭಧಾರಣೆಯ ಬಗ್ಗೆ ಭಯಪಡುವ ಅಗತ್ಯವಿಲ್ಲ

30 ವರ್ಷಗಳ ನಂತರ ಫಲವತ್ತತೆಯಲ್ಲಿ ಕೆಲವು ಸಹಜ ಬದಲಾವಣೆಗಳು ಉಂಟಾಗಬಹುದು. ಆದರೆ ಪ್ರತಿಯೊಬ್ಬ ಮಹಿಳೆಯ ಪರಿಸ್ಥಿತಿಯೂ ಒಂದೇ ಆಗಿರುವುದಿಲ್ಲ. ವಯಸ್ಸು ಪ್ರಮುಖ ಅಂಶವಾದರೂ, ಮಹಿಳೆಯೊಬ್ಬರು ತಾಯಿಯಾಗುವ ಸಾಧ್ಯತೆಯನ್ನು ವಯಸ್ಸು ಮಾತ್ರ ನಿರ್ಧರಿಸುವುದಿಲ್ಲ.

ಆರೋಗ್ಯಕರ ಜೀವನಶೈಲಿ ಮತ್ತು ಸೂಕ್ತ ಸಮಯದಲ್ಲಿ ವೈದ್ಯಕೀಯ ಸಲಹೆ ಪಡೆಯುವ ಮೂಲಕ ಮಹಿಳೆಯರು ತಮ್ಮ ಸಂತಾನೋತ್ಪತ್ತಿ ಆರೋಗ್ಯದ ಬಗ್ಗೆ ಸ್ಪಷ್ಟ ಮಾಹಿತಿ ಪಡೆದು, ತಮ್ಮ ಪರಿಸ್ಥಿತಿಗೆ ಅನುಗುಣವಾಗಿ ನಿರ್ಧಾರಗಳನ್ನು ತೆಗೆದುಕೊಳ್ಳಬಹುದು.