ಬೆಂಗಳೂರು: ಪ್ರತಿ ಹೊಸ ವರ್ಷದ ಆರಂಭದಲ್ಲಿ ಸೋಷಿಯಲ್ ಮೀಡಿಯಾ ಹೊಸ ವರ್ಷ–ಹೊಸ ನಾನು (New Year, New Me) ಎಂಬ ಘೋಷಣೆಗಳಿಂದ ತುಂಬಿರುತ್ತದೆ. ಜೀವನದಲ್ಲಿ ಹೊಸ ಬದಲಾವಣೆ ತರಬೇಕೆಂಬ ನಿರ್ಧಾರಗಳ ನಡುವೆ, ಅನೇಕ ದಂಪತಿಗಳು ಅನಿರೀಕ್ಷಿತವಾಗಿ ವಿಚ್ಛೇದನ ಎಂಬ ದಾರಿಯನ್ನು ಆಯ್ದುಕೊಳ್ಳುತ್ತಾರೆ. ಇದೇ ಕಾರಣಕ್ಕೆ ಕಾನೂನು ವಲಯದಲ್ಲಿ ಜನವರಿಯನ್ನು ಅನೌಪಚಾರಿಕವಾಗಿ ವಿಚ್ಛೇದನ ತಿಂಗಳು (Divorce Month) ಎಂದು ಕರೆಯಲಾಗುತ್ತದೆ.
ಒಂದೆಡೆ ಹೊಸ ಆಸೆಗಳ ಸಂಭ್ರಮ ನಡೆಯುತ್ತಿದ್ದರೆ, ಇನ್ನೊಂದೆಡೆ ಫ್ಯಾಮಿಲಿ ಕೋರ್ಟ್ಗಳು ವಿಚ್ಛೇದನ ಅರ್ಜಿಗಳಿಂದ ತುಂಬುತ್ತಿರುವುದು ಗಮನಾರ್ಹ. ಇದು ಕೇವಲ ಕಾಕತಾಳೀಯವಲ್ಲ; ಇದರ ಹಿಂದೆ ಮಾನಸಿಕ ಹಾಗೂ ಸಾಮಾಜಿಕ ಕಾರಣಗಳ ಸರಣಿಯೇ ಇದೆ. ಪ್ರತಿ ವರ್ಷ ಜನವರಿ ಬಂದಾಗ ಸಂಕ್ರಾಂತಿ ಸಂಭ್ರಮ ಮನೆಮಾಡಿದರೂ, ಇದೇ ತಿಂಗಳ ಬಗ್ಗೆ ಶಾಕಿಂಗ್ ವರದಿಗಳು ಹೊರಬರುತ್ತಿರುವುದು ಕಾನೂನು ಹಾಗೂ ಮನೋವಿಜ್ಞಾನ ವಲಯದಲ್ಲಿ ಚರ್ಚೆಗೆ ಕಾರಣವಾಗಿದೆ.
ಅಂಕಿಅಂಶಗಳು ಏನು ಹೇಳುತ್ತವೆ?
ವಾಷಿಂಗ್ಟನ್ ವಿಶ್ವವಿದ್ಯಾಲಯವು ದಶಕಗಳ ಕಾಲ ನಡೆಸಿದ ಸಂಶೋಧನೆಯ ಪ್ರಕಾರ, ಇತರ ತಿಂಗಳುಗಳಿಗೆ ಹೋಲಿಸಿದರೆ ಜನವರಿಯಲ್ಲಿ ವಿಚ್ಛೇದನ ಅರ್ಜಿಗಳ ಸಂಖ್ಯೆಯಲ್ಲಿ ಶೇ. 33 ರಷ್ಟು ಭಾರಿ ಏರಿಕೆ ಕಂಡುಬರುತ್ತದೆ. ಇಂಟರ್ನೆಟ್ ಸರ್ಚ್ ಇಂಜಿನ್ಗಳಲ್ಲೂ ‘ತ್ವರಿತ ವಿಚ್ಛೇದನ’ ಅಥವಾ ‘DIY ವಿಚ್ಛೇದನ’ ಎಂಬ ಪದಗಳ ಹುಡುಕಾಟ ಈ ಅವಧಿಯಲ್ಲಿ ಗರಿಷ್ಠ ಮಟ್ಟ ತಲುಪುತ್ತದೆ ಎಂದು ‘ರಿಚರ್ಡ್ ನೆಲ್ಸನ್ ಎಲ್ಎಲ್ಪಿ’ ಸಂಸ್ಥೆಯ ವರದಿ ತಿಳಿಸಿದೆ.
ಜನವರಿಯಲ್ಲೇ ಯಾಕೆ ಈ ನಿರ್ಧಾರ?
ಪರಿಣಿತರ ಪ್ರಕಾರ, ಈ “ಪ್ರತ್ಯೇಕತೆಯ ಟ್ರೆಂಡ್” ಗೆ ಪ್ರಮುಖ ಕಾರಣಗಳು ಇಲ್ಲಿವೆ:
1.ಹಬ್ಬದ ದಿನಗಳ ಹಳೇ ಒತ್ತಡ: ದಂಪತಿಗಳ ನಡುವೆ ಸಮಸ್ಯೆಗಳಿದ್ದರೂ, ಡಿಸೆಂಬರ್ ತಿಂಗಳ ಕ್ರಿಸ್ಮಸ್ ಮತ್ತು ಹೊಸ ವರ್ಷದ ಸಂಭ್ರಮಕ್ಕೆ ಅಡ್ಡಿಯಾಗಬಾರದು ಎಂದು ಅನೇಕರು ಸಮಾಧಾನದಿಂದಿರುತ್ತಾರೆ. ಸಂಗಾತಿಯೊಂದಿಗೆ ಇದು ನಮ್ಮ ಕೊನೆಯ ಆಚರಣೆಯಾಗಲಿ ಎಂದುಕೊಂಡೇ ರಜಾದಿನಗಳನ್ನು ಕಳೆಯುವ ದಂಪತಿಗಳ ಸಂಖ್ಯೆ ದೊಡ್ಡದಿದೆ ಎನ್ನುತ್ತಾರೆ ಮನೋವೈದ್ಯ ಡಾ. ಕರೆನ್ ಫಿಲಿಪ್ಸ್.
2.ರಜಾದಿನಗಳ ಆರ್ಥಿಕ ಮತ್ತು ಕೌಟುಂಬಿಕ ಹೊರೆ: ಡಿಸೆಂಬರ್ನಲ್ಲಿ ಅತಿಯಾದ ಖರ್ಚು, ಕುಟುಂಬದ ಸದಸ್ಯರ ಭೇಟಿಯಿಂದ ಉಂಟಾಗುವ ಮಾನಸಿಕ ಒತ್ತಡಗಳು ಸಂಬಂಧಗಳಲ್ಲಿನ ಹಳೆಯ ಬಿರುಕುಗಳನ್ನು ಇನ್ನಷ್ಟು ದೊಡ್ಡದು ಮಾಡುತ್ತವೆ. ಈ ಹೊರೆ ಇಳಿಸಿಕೊಳ್ಳಲು ಜನವರಿ ಉತ್ತಮ ಸಮಯ ಎಂದು ಹಲವರಿಗೆ ಅನಿಸುತ್ತದೆ.
3.ಹೊಸ ವರ್ಷ-ಹೊಸ ಆರಂಭ’ದ ನಿರ್ಣಯ: ಹೊಸ ವರ್ಷವು ಹೊಸ ಆರಂಭದ ಸಂಕೇತ. ಅತೃಪ್ತ ದಾಂಪತ್ಯ ಜೀವನ ನಡೆಸುತ್ತಿರುವವರು ತಮ್ಮ ವೈಯಕ್ತಿಕ ಯೋಗಕ್ಷೇಮ ಮತ್ತು ಸಂತೋಷಕ್ಕಾಗಿ ಈ ಭಾರವಾದ ಸಂಬಂಧದಿಂದ ಮುಕ್ತಿ ಪಡೆಯಲು ಜನವರಿಯಲ್ಲೇ ನಿರ್ಧಾರ ಮಾಡುತ್ತಾರೆ.
4. ಆರ್ಥಿಕ ಮತ್ತು ಕಾನೂನು ಅನುಕೂಲ: ಜನವರಿ ಹೊಸ ಆರ್ಥಿಕ ವರ್ಷದ ಆರಂಭವನ್ನೂ ಸೂಚಿಸುವುದರಿಂದ, ತೆರಿಗೆ ಪ್ರಯೋಜನಗಳು, ಆರೋಗ್ಯ ವಿಮೆ ಮತ್ತು ಆಸ್ತಿ ಹಂಚಿಕೆಯಂತಹ ಕಾನೂನು ಪ್ರಕ್ರಿಯೆಗಳಿಗೆ ಈ ಸಮಯ ಹೆಚ್ಚು ಅನುಕೂಲಕರ ಎಂಬುದು ತಜ್ಞರ ಅಭಿಪ್ರಾಯ.
ಪರಿಹಾರವೇನು? ತಜ್ಞರ ಸಲಹೆ:
ಯಾವುದೇ ಸಮಸ್ಯೆಗೆ ವಿಚ್ಛೇದನವೇ ಅಂತಿಮ ಪರಿಹಾರವಲ್ಲ ಎಂದು ಕಾನೂನು ಮತ್ತು ಕುಟುಂಬ ಸಮಾಲೋಚಕರು (Counsellors) ಅಭಿಪ್ರಾಯಪಡುತ್ತಾರೆ.
ಪರಸ್ಪರ ಸಂವಹನ: ಗಂಡ-ಹೆಂಡತಿಯ ನಡುವೆ ಜಗಳ ಸಾಮಾನ್ಯ, ಆದರೆ ಮಾತುಕತೆಯಿಂದ ಅದನ್ನು ಬಗೆಹರಿಸಿಕೊಳ್ಳಬಹುದು.
ಸಮಾಲೋಚನೆ (Counseling): ವಿಚ್ಛೇದನದ ನಿರ್ಧಾರ ತೆಗೆದುಕೊಳ್ಳುವ ಮೊದಲು ವೃತ್ತಿಪರ ಸಮಾಲೋಚನೆ ಪಡೆಯುವುದು ಉತ್ತಮ.
ಕುಟುಂಬದ ಬೆಂಬಲ: ಕುಟುಂಬದ ಹಿರಿಯರು ದಂಪತಿಗಳನ್ನು ದೂರ ಮಾಡುವ ಬದಲು, ಅವರನ್ನು ಒಂದುಗೂಡಿಸಲು ಪ್ರಯತ್ನಿಸಬೇಕು.
ಹೊರಗಿನವರ ಹಸ್ತಕ್ಷೇಪ ಬೇಡ: ದಂಪತಿಗಳ ನಡುವೆ ಬೆಂಕಿ ಹಚ್ಚುವ ಮೂರನೇ ವ್ಯಕ್ತಿಗಳಿಂದ ದೂರವಿರುವುದು ಸಂಬಂಧಕ್ಕೆ ಒಳ್ಳೆಯದು.
