ಇಂದು ಜಗತ್ತೇ ಮೆಚ್ಚುವ ‘ಸೂಪರ್‌ಸ್ಟಾರ್’ ರಜನಿಕಾಂತ್ ಅವರ ಯಶಸ್ಸಿನ ಹಿಂದೆ ಒಬ್ಬ ನಿಗೂಢ ಯುವತಿಯ ತ್ಯಾಗ ಮತ್ತು ಪ್ರೋತ್ಸಾಹವಿದೆ ಎಂಬ ಸತ್ಯ ಅನೇಕರಿಗೆ ತಿಳಿದಿಲ್ಲ. ಶಿವಾಜಿ ರಾವ್ ಗಾಯಕ್ವಾಡ್ ಎಂಬ ಸಾಮಾನ್ಯ ಬಸ್ ಕಂಡಕ್ಟರ್ ಅಂದು ಸಿನಿಮಾ ಎಂಬ ಕನಸಿನ ಲೋಕಕ್ಕೆ ಕಾಲಿಡಲು ಕಾರಣವಾಗಿದ್ದು ಅವರು ಪ್ರೀತಿಸಿದ್ದ ನಿರ್ಮಲಾ ಎಂಬ ಯುವತಿ. ಆದರೆ, ಆಕೆ ರಜನಿಕಾಂತ್ ಬದುಕಿನಿಂದ ಮಾಯವಾದ ಕಥೆ ಯಾವುದೇ ಸಿನಿಮಾಗಿಂತಲೂ ಕಡಿಮೆ ಇಲ್ಲ.
ಬಸ್‌ನಲ್ಲಿ ಶುರುವಾದ ಪ್ರೇಮಕಥೆ: ಮಲಯಾಳಂ ನಟ ಶ್ರೀನಿವಾಸನ್ ಮತ್ತು ದೇವನ್ ಅವರು ಹಂಚಿಕೊಂಡಿರುವ ಮಾಹಿತಿಯ ಪ್ರಕಾರ, ಬೆಂಗಳೂರಿನಲ್ಲಿ ಬಿಟಿಎಸ್ ಕಂಡಕ್ಟರ್ ಆಗಿದ್ದಾಗ ಶಿವಾಜಿ ರಾವ್ ಅವರಿಗೆ ನಿರ್ಮಲಾ ಎಂಬ ಎಂಬಿಬಿಎಸ್ (MBBS) ವಿದ್ಯಾರ್ಥಿನಿಯ ಪರಿಚಯವಾಯಿತು. ಬಸ್ಸಿನ ಹಿಂದಿನ ಬಾಗಿಲಿನಿಂದ ಹತ್ತಲು ಹೋದಾಗ ಶಿವಾಜಿ ರಾವ್ ಅವರು ಗದರಿಸಿದ್ದರಿಂದ ಶುರುವಾದ ಜಗಳ, ಮುಂದೆ ಪ್ರೇಮಕ್ಕೆ ತಿರುಗಿತು.
ನಟನೆಯ ಕನಸಿಗೆ ರೆಕ್ಕೆ ಕೊಟ್ಟ 500 ರೂಪಾಯಿ: ಶಿವಾಜಿ ರಾವ್ ಅವರ ನಾಟಕವೊಂದನ್ನು ನೋಡಿದ ನಿರ್ಮಲಾ, ಅವರ ಪ್ರತಿಭೆಯನ್ನು ಗುರುತಿಸಿ “ನೀನು ಇಲ್ಲಿ ಕಂಡಕ್ಟರ್ ಆಗಿರಬೇಕಾದವನಲ್ಲ, ಮದ್ರಾಸ್ ಫಿಲ್ಮ್ ಇನ್ಸ್‌ಟಿಟ್ಯೂಟ್ ಸೇರಿ ನಟನೆ ಕಲಿ” ಎಂದು ಒತ್ತಾಯಿಸಿದರು. ಹಣದ ಕೊರತೆಯಿಂದ ಶಿವಾಜಿ ರಾವ್ ನಿರಾಕರಿಸಿದಾಗ, ನಿರ್ಮಲಾ ತನ್ನ ಬಳಿ ಇದ್ದ 500 ರೂಪಾಯಿ ಹಣವನ್ನು ನೀಡಿ ಅವರ ಕನಸಿಗೆ ಬಲ ತುಂಬಿದರು. ಆ 500 ರೂಪಾಯಿ ಹಿಡಿದೇ ರಜನಿಕಾಂತ್ ಅಂದು ಮದ್ರಾಸ್‌ಗೆ ಪ್ರಯಾಣ ಬೆಳೆಸಿದ್ದರು.
ಯಾರಿಗೂ ತಿಳಿಯದಂತೆ ಮಾಯವಾದ ಪ್ರೇಯಸಿ: ರಜನಿಕಾಂತ್ ಮದ್ರಾಸ್‌ನಲ್ಲಿ ನಟನೆ ಕಲಿಯುತ್ತಿದ್ದಾಗ ಆರಂಭದಲ್ಲಿ ನಿರ್ಮಲಾ ಹಣ ಕಳುಹಿಸುತ್ತಿದ್ದರು. ಆದರೆ ಒಂದು ದಿನ ಇದ್ದಕ್ಕಿದ್ದಂತೆ ಆಕೆ ನಾಪತ್ತೆಯಾದರು. ಆಕೆಯ ವಿಳಾಸ ಹುಡುಕಿಕೊಂಡು ಬೆಂಗಳೂರಿನ ಮನೆಗೆ ಬಂದಾಗ, ಆ ಇಡೀ ಕುಟುಂಬವೇ ಮನೆ ಖಾಲಿ ಮಾಡಿ ಬೇರೆಡೆಗೆ ಹೋಗಿತ್ತು. ಒಬ್ಬ ಬಡ ವ್ಯಕ್ತಿಯನ್ನು ಪ್ರೀತಿಸಿದ್ದಕ್ಕೆ ಮನೆಯವರು ಆಕೆಯನ್ನು ಎಲ್ಲಿಗೆ ಕರೆದುಕೊಂಡು ಹೋದರು ಎಂಬುದು ಇಂದಿಗೂ ನಿಗೂಢ.
ಹಿಮಾಲಯದಿಂದ ಅಮೆರಿಕದವರೆಗೆ ಹುಡುಕಾಟ: “ಇಂದು ನಾನು ದೊಡ್ಡ ನಟನಾಗಿದ್ದೇನೆ, ಎಲ್ಲಿ ನನ್ನ ನಿಮ್ಮಿ (ನಿರ್ಮಲಾ)? ನಾನು ಹಿಮಾಲಯಕ್ಕೆ ಹೋದರೂ ಅಥವಾ ಅಮೆರಿಕಕ್ಕೆ ಹೋದರೂ ಜನರ ಗುಂಪಿನಲ್ಲಿ ಆಕೆಯ ಮುಖವನ್ನೇ ಹುಡುಕುತ್ತಿರುತ್ತೇನೆ” ಎಂದು ರಜನಿಕಾಂತ್ ಭಾವುಕರಾಗಿ ತಮ್ಮ ಆಪ್ತರಲ್ಲಿ ಹೇಳಿಕೊಂಡಿದ್ದರಂತೆ. “ನಾನು ಇಷ್ಟೆಲ್ಲಾ ಸಾಧಿಸಿದರೂ ಆಕೆ ನನ್ನನ್ನು ಯಾಕೆ ಹುಡುಕಿಕೊಂಡು ಬರಲಿಲ್ಲ?” ಎಂಬ ನೋವು ಇಂದಿಗೂ ರಜನಿಕಾಂತ್ ಅವರ ಹೃದಯದಲ್ಲಿದೆ.
ಬಹುಶಃ ತನ್ನ ಭೇಟಿಯಿಂದ ರಜನಿಕಾಂತ್ ಅವರ ಇಂದಿನ ಸಂಸಾರಕ್ಕೆ ತೊಂದರೆಯಾಗಬಹುದು ಎಂಬ ಕಾರಣಕ್ಕೆ ಆಕೆ ದೂರವೇ ಉಳಿದಿರಬಹುದು ಎಂಬುದು ಅವರ ಆಪ್ತರ ಅನಿಸಿಕೆ.
