ವಿಶ್ವದ ಅತ್ಯಂತ ತಂಪಾದ ನಗರ ಯಾವುದು ಎಂಬ ಕುತೂಹಲ ನಿಮಗಿದೆಯೇ? ಭೂಮಿಯ ಮೇಲೆ ಅದೆಷ್ಟೋ ಶೀತ ಪ್ರದೇಶಗಳಿದ್ದರೂ, ರಷ್ಯಾದ ಸೈಬೀರಿಯಾ ಹೃದಯಭಾಗದಲ್ಲಿರುವ ಯಾಕುಟ್ಸ್ಕ್ ನಗರ ಮಾತ್ರ ಎಲ್ಲಕ್ಕಿಂತ ಭಿನ್ನ. ಇಲ್ಲಿನ ಚಳಿಯ ತೀವ್ರತೆ ಎಷ್ಟಿದೆಯೆಂದರೆ, ಮನುಷ್ಯನ ಸಹನಶಕ್ತಿಯನ್ನೇ ಸವಾಲು ಹಾಕುವಂತಿದೆ. ಸುಮಾರು 3.55 ಲಕ್ಷ ಜನಸಂಖ್ಯೆ ಹೊಂದಿರುವ ಈ ನಗರದಲ್ಲಿ ವರ್ಷದ ಬಹುಪಾಲು ಚಳಿಗಾಲವೇ ಇರುತ್ತದೆ.
ಫ್ರೀಜರ್ಗಿಂತಲೂ ತಣ್ಣಗಿದೆ ಇಲ್ಲಿನ ಗಾಳಿ ಇತ್ತೀಚೆಗೆ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿರುವ ವಿಡಿಯೋವೊಂದು ಈ ನಗರದ ಭೀಕರ ಚಳಿಯನ್ನು ಜಗತ್ತಿಗೆ ಪರಿಚಯಿಸಿದೆ. ಇಲ್ಲಿ ಜನವರಿ ತಿಂಗಳ ಸರಾಸರಿ ತಾಪಮಾನ ಮೈನಸ್ 42 ಡಿಗ್ರಿ ಸೆಲ್ಸಿಯಸ್ ಇರುತ್ತದೆ. 1891ರಲ್ಲಿ ಇಲ್ಲಿ ದಾಖಲಾದ ಕನಿಷ್ಠ ತಾಪಮಾನ ಮೈನಸ್ 64.4 ಡಿಗ್ರಿ ಸೆಲ್ಸಿಯಸ್. ಇಲ್ಲಿನ ವಾತಾವರಣ ಎಷ್ಟು ತಂಪಾಗಿದೆ ಎಂದರೆ, ಕುದಿಯುವ ನೀರನ್ನು ಗಾಳಿಯಲ್ಲಿ ಚಿಮ್ಮಿಸಿದರೆ ಅದು ನೆಲಕ್ಕೆ ಬೀಳುವಷ್ಟರಲ್ಲಿ ಮಂಜುಗಡ್ಡೆಯಾಗಿ ಮಾರ್ಪಡುತ್ತದೆ.
ಬಾಳೆಹಣ್ಣು ಇಲ್ಲಿ ಸುತ್ತಿಗೆಯಂತೆ ಕೆಲಸ ಮಾಡುತ್ತೆ! ವೈರಲ್ ವಿಡಿಯೋದಲ್ಲಿ ಕಂಡುಬರುವಂತೆ, ಇಲ್ಲಿ ಹಣ್ಣು ಮತ್ತು ತರಕಾರಿಗಳನ್ನು ಹೊರಗಿಟ್ಟರೆ ಕೆಲವೇ ನಿಮಿಷಗಳಲ್ಲಿ ಕಲ್ಲಿನಂತಾಗುತ್ತವೆ. ಹೊರಗಿಟ್ಟ ಬಾಳೆಹಣ್ಣನ್ನು ಸುತ್ತಿಗೆಯಂತೆ ಬಳಸಿ ಮರದ ಹಲಗೆಗೆ ಮೊಳೆ ಹೊಡೆಯಬಹುದು ಎಂದರೆ ನೀವು ನಂಬಲೇಬೇಕು. ಇಲ್ಲಿನ ಮಾರುಕಟ್ಟೆಗಳಲ್ಲಿ ಮಾಂಸ ಮತ್ತು ಮೀನುಗಳನ್ನು ಫ್ರೀಜರ್‌ನಲ್ಲಿ ಇಡುವ ಅಗತ್ಯವೇ ಇಲ್ಲ, ಯಾಕಂದರೆ ಹೊರಗಿನ ಗಾಳಿಯೇ ಫ್ರೀಜರ್‌ಗಿಂತ ಹೆಚ್ಚು ತಣ್ಣಗಿರುತ್ತದೆ.
ಯಾಕುಟ್ಸ್ಕ್ ನಗರದ ವಿಚಿತ್ರ ನಿಯಮಗಳು
- ಕಾರಿನ ಇಂಜಿನ್ ಆಫ್ ಮಾಡುವಂತಿಲ್ಲ: ಇಲ್ಲಿ ಜನರು ತಮ್ಮ ಕಾರಿನ ಇಂಜಿನ್‌ಗಳನ್ನು ಸದಾ ಚಾಲನೆಯಲ್ಲಿ ಇಟ್ಟಿರುತ್ತಾರೆ. ಒಂದು ವೇಳೆ ಇಂಜಿನ್ ಆಫ್ ಮಾಡಿದರೆ, ಕೆಲವೇ ನಿಮಿಷಗಳಲ್ಲಿ ಅದು ಹೆಪ್ಪುಗಟ್ಟಿ ಮತ್ತೆ ಸ್ಟಾರ್ಟ್ ಮಾಡುವುದು ಅಸಾಧ್ಯವಾಗುತ್ತದೆ.
- 22 ಪೌಂಡ್ ತೂಕದ ಬಟ್ಟೆ: ಮನೆಯಿಂದ ಹೊರಬರಬೇಕಾದರೆ ಜನರು ಸರಾಸರಿ 22 ಪೌಂಡ್ ತೂಕದ ಹಲವಾರು ಪದರಗಳ ಬಟ್ಟೆಯನ್ನು ಧರಿಸಬೇಕಾಗುತ್ತದೆ. ಕಣ್ಣಿನ ಭಾಗವೊಂದನ್ನು ಬಿಟ್ಟು ದೇಹದ ಉಳಿದೆಲ್ಲಾ ಭಾಗಗಳನ್ನು ಸಂಪೂರ್ಣವಾಗಿ ಮುಚ್ಚಿಕೊಳ್ಳುವುದು ಇಲ್ಲಿ ಅನಿವಾರ್ಯ.
- ಸ್ಮಾರ್ಟ್‌ಫೋನ್ ಬಳಕೆ ಸವಾಲು: ಅತಿಯಾದ ಚಳಿಯಿಂದಾಗಿ ಸ್ಮಾರ್ಟ್‌ಫೋನ್‌ಗಳು ಕೆಲವೇ ನಿಮಿಷಗಳಲ್ಲಿ ಸ್ವಿಚ್ ಆಫ್ ಆಗುತ್ತವೆ. ಹೀಗಾಗಿ ಎಲೆಕ್ಟ್ರಾನಿಕ್ ಉಪಕರಣಗಳ ಬಳಕೆಯಲ್ಲಿ ತೀವ್ರ ಜಾಗ್ರತೆ ವಹಿಸಲಾಗುತ್ತದೆ.
ಸಸ್ಯಹಾರಿಗಳಿಗೆ ಈ ನಗರದಲ್ಲಿ ಬದುಕುವುದು ಅಷ್ಟು ಸುಲಭವಲ್ಲ. ಯಾಕಂದರೆ ಇಲ್ಲಿ ಹಸಿರು ತರಕಾರಿಗಳ ಲಭ್ಯತೆ ತೀರಾ ಕಡಿಮೆ. ಮಾಂಸಾಹಾರವೇ ಇಲ್ಲಿನ ಜನರ ಪ್ರಮುಖ ಆಹಾರವಾಗಿದೆ. ಸದಾ ಹೆಪ್ಪುಗಟ್ಟಿದ ಭೂಮಿಯ ಮೇಲೆ (Permafrost) ಈ ನಗರ ನಿರ್ಮಾಣವಾಗಿದ್ದು, ನಿಸರ್ಗದ ವಿಸ್ಮಯಗಳ ಕೇಂದ್ರ ಬಿಂದುವಾಗಿದೆ.
