ಇಂಡಿಯನ್ ಪ್ರೀಮಿಯರ್ ಲೀಗ್ ವಿಶ್ವದ ಅತಿ ಶ್ರೀಮಂತ ಫ್ರಾಂಚೈಸಿ ಕ್ರಿಕೆಟ್ ಲೀಗ್. ಕೇವಲ ಭಾರತದ ಕ್ರಿಕೆಟ್ ಅಭಿಮಾನಿಗಳು ಮಾತ್ರವಲ್ಲದೇ ವಿದೇಶದ ಹಲವಾರು ದೇಶಗಳಲ್ಲಿ ಐಪಿಎಲ್ ಅನುಯಾಯಿಗಳಿದ್ದಾರೆ.
ಇನ್ನು ಐಪಿಎಲ್ ಎಂದರೆ ಕೇವಲ ಕ್ರಿಕೆಟ್ ವೀಕ್ಷಕರಿಗೆ ಮಾತ್ರವಲ್ಲದೇ ವಿದೇಶಿ ಆಟಗಾರರಿಗೂ ಸಹ ಅಚ್ಚುಮೆಚ್ಚು. ಐಷಾರಾಮಿ ಲೀಗ್, ಹಣದ ಹೊಳೆ ಹಾಗೂ ಭದ್ರತೆಯ ವಿಷಯಗಳಿಂದ ವಿದೇಶಿ ಆಟಗಾರರನ್ನು ವಶಪಡಿಸಿಕೊಂಡಿರುವ ಐಪಿಎಲ್ ವರ್ಷದಿಂದ ವರ್ಷಕ್ಕೆ ಜನಪ್ರಿಯತೆಯನ್ನು ಹೆಚ್ಚಿಸಿಕೊಳ್ಳುತ್ತಾ ಬಂದಿದೆ. ಜತೆ ಜತೆಗೆ ಐಪಿಎಲ್ ನಿಯಮಗಳಲ್ಲೂ ಸಹ ಟೂರ್ನಿಯನ್ನು ಇನ್ನಷ್ಟು ಕುತೂಹಲಕಾರಿಯಾಗಿಸಲು ಬದಲಿಸುತ್ತಾ ಬರಲಾಗಿದೆ.
ಇದೀಗ ಮತ್ತೊಂದು ಮಹಾ ಬದಲಾವಣೆಗೆ ಮುಂದಾಗಿದ್ದು, ಲೀಗ್ ಪಂದ್ಯಗಳ ಸಂಖ್ಯೆಯಲ್ಲಿ ಹೆಚ್ಚಳ ಮಾಡಲು ತೀರ್ಮಾನಿಸಲಾಗಿದೆ. ಸದ್ಯ ಲೀಗ್ ಹಂತದಲ್ಲಿ 70 ಪಂದ್ಯಗಳು ಹಾಗೂ ಪ್ಲೇಆಫ್ ಸುತ್ತಿನಲ್ಲಿ 4 ಪಂದ್ಯಗಳು ಸೇರಿ 74 ಪಂದ್ಯಗಳು ನಡೆಯುತ್ತಿದ್ದು, 2028ರಿಂದ ಲೀಗ್ ಹಂತದಲ್ಲಿ 90 ಪಂದ್ಯಗಳು ಹಾಗೂ ಪ್ಲೇಆಫ್ ಸುತ್ತಿನಲ್ಲಿ 4 ಪಂದ್ಯಗಳು ಸೇರಿ 94 ಪಂದ್ಯಗಳು ನಡೆಯಲಿವೆ.
ಈ ಕುರಿತು ಐಪಿಎಲ್ ಅಧ್ಯಕ್ಷ ಅರುಣ್ ಧುಮಾಲ್ ಮಾತನಾಡಿದ್ದು, 2028ರಿಂದ ಐಪಿಎಲ್ ಪಂದ್ಯಗಳ ಸಂಖ್ಯೆಯನ್ನು 74ರಿಂದ 94ಕ್ಕೆ ಏರಿಸುವ ಯೋಜನೆ ಇದೆ ಎಂದಿದ್ದಾರೆ. ಲೀಗ್ ಹಂತದಲ್ಲಿ ಎಲ್ಲ ತಂಡಗಳು ಉಳಿದ ತಂಡಗಳ ಜತೆ ತಲಾ ಎರಡು ಪಂದ್ಯಗಳನ್ನು ಆಡಲಿವೆ. ಒಂದು ಪಂದ್ಯ ಹೋಮ್ ಗ್ರೌಂಡ್ನಲ್ಲಿ ಹಾಗೂ ಉಳಿದ ಪಂದ್ಯ ಎದುರಾಳಿ ಹೋಮ್ ಗ್ರೌಂಡ್ನಲ್ಲಿ ನಡೆಯಲಿದೆ ಎಂದು ತಿಳಿಸಿದ್ದಾರೆ. 2027ರಿಂದಲೇ ಈ ಬದಲಾವಣೆಯನ್ನು ತರಬೇಕಿತ್ತು. ಆದರೆ ಇತರೆ ಸರಣಿಗಳು ಈಗಾಗಲೇ ನಿರ್ಧಾರವಾಗಿರುವ ಕಾರಣ ಸಮಯದ ಸಮಸ್ಯೆ ಉಂಟಾಗಲಿದ್ದು, ಈ ಕಾರಣಕ್ಕೆ 2028ರಿಂದ ಈ ಬದಲಾವಣೆ ಜಾರಿಗೆ ಬರಲಿದೆ ಎಂದಿದ್ದಾರೆ.
