ಟೆಸ್ಟ್ ಹಾಗೂ ಟಿ20 ಅಂತಾರಾಷ್ಟ್ರೀಯ ಪಂದ್ಯಗಳಿಗೆ ಈಗಾಗಲೇ ವಿದಾಯ ಹೇಳಿರುವ ಭಾರತ ಕ್ರಿಕೆಟ್ ತಂಡದ ಅನುಭವಿ ಆಟಗಾರ ರೋಹಿತ್ ಶರ್ಮಾ, ಪ್ರಸ್ತುತ ಏಕದಿನ ಮಾದರಿಯಲ್ಲಿ ಮಾತ್ರ ಸಕ್ರಿಯರಾಗಿದ್ದಾರೆ. 2027ರ ಅಕ್ಟೋಬರ್ ಮತ್ತು ನವೆಂಬರ್ನಲ್ಲಿ ನಡೆಯಲಿರುವ ಮುಂದಿನ 50 ಓವರ್ಗಳ ವಿಶ್ವಕಪ್ ಆಡುವ ಇಚ್ಛೆಯನ್ನು ಅವರು ವ್ಯಕ್ತಪಡಿಸಿದ್ದರೂ, ಆ ಸಮಯಕ್ಕೆ ಅವರಿಗೆ 40 ವರ್ಷ ತುಂಬಲಿರುವುದು ಅವರ ಆಯ್ಕೆಯ ಬಗ್ಗೆ ಹಲವು ಅನುಮಾನಗಳನ್ನು ಹುಟ್ಟುಹಾಕಿದೆ. ಈ ವಯಸ್ಸಿನಲ್ಲಿ ಆಟಗಾರರ ಫಾರ್ಮ್ಗಿಂತ ದೈಹಿಕ ಫಿಟ್ನೆಸ್ ಅತ್ಯಂತ ಮುಖ್ಯವಾದ ಅಂಶವಾಗಲಿದೆ.
ಈ ವಿಷಯದ ಕುರಿತು ಮಾತನಾಡಿರುವ ಆಸ್ಟ್ರೇಲಿಯಾ ಕ್ರಿಕೆಟ್ ತಂಡದ ಮಾಜಿ ನಾಯಕ ಸ್ಟೀವ್ ವಾ, ರೋಹಿತ್ ಶರ್ಮಾ ಅವರು ಪೂರ್ಣ ಪ್ರಮಾಣದ ಸಿದ್ಧತೆ ಮತ್ತು ಶೇಕಡಾ ನೂರರಷ್ಟು ಸಮರ್ಪಣಾಭಾವ ತೋರಿಸದಿದ್ದರೆ ವಿಶ್ವಕಪ್ ತಂಡದಲ್ಲಿ ಸ್ಥಾನ ಪಡೆಯುವುದು ಕಷ್ಟ ಎಂದು ಅಭಿಪ್ರಾಯಪಟ್ಟಿದ್ದಾರೆ. ರೋಹಿತ್ ಅವರಿಗೆ ಇನ್ನೂ ಕಠಿಣ ತರಬೇತಿ ಪಡೆಯುವ ಮತ್ತು ಅಗತ್ಯ ತ್ಯಾಗಗಳನ್ನು ಮಾಡುವ ಆಸಕ್ತಿ ಇದೆಯೇ ಎಂಬುದನ್ನು ಸ್ವತಃ ಅವರೇ ಸ್ಪಷ್ಟಪಡಿಸಬೇಕು ಎಂದು ಅವರು ಹೇಳಿದ್ದಾರೆ.
ಸ್ಟಾರ್ ಸ್ಪೋರ್ಟ್ಸ್ ಜೊತೆ ಮಾತನಾಡಿದ ಸ್ಟೀವ್ ವಾ, ಈ ವಯಸ್ಸಿನಲ್ಲೂ ರೋಹಿತ್ ಅವರ ಬಳಿ ಕೌಶಲ್ಯ ಮತ್ತು ಅನುಭವಕ್ಕೆ ಕೊರತೆಯಿಲ್ಲ. ಆದರೆ ಪಂದ್ಯಾವಳಿಗೆ ಬೇಕಾದ ನೂರರಷ್ಟು ಸಿದ್ಧತೆ ನಡೆಸಲು ಮತ್ತು ಪರಿಶ್ರಮ ಪಡಲು ಅವರು ಸಿದ್ಧರಿದ್ದಾರೆಯೇ ಎಂಬುದು ಮುಖ್ಯ. ಅವರಲ್ಲಿ ರನ್ ಗಳಿಸುವ ಸಾಮರ್ಥ್ಯ ಖಂಡಿತ ಇದೆ, ಆದರೆ ಸಂಪೂರ್ಣ ಕಮಿಟ್ಮೆಂಟ್ ಇಲ್ಲದಿದ್ದರೆ ಅವರು ಈ ದೊಡ್ಡ ಟೂರ್ನಿಯಲ್ಲಿ ಭಾಗವಹಿಸಲು ಸಾಧ್ಯವಿಲ್ಲ ಎಂದು ತಿಳಿಸಿದ್ದಾರೆ.
ರೋಹಿತ್ ಶರ್ಮಾ ಅವರು ಇತ್ತೀಚೆಗೆ ಇಂಗ್ಲೆಂಡ್ ವಿರುದ್ಧ ನಡೆದ ಏಕದಿನ ಸರಣಿಯಲ್ಲಿ ಕೊನೆಯ ಬಾರಿಗೆ ಭಾರತ ತಂಡವನ್ನು ಪ್ರತಿನಿಧಿಸಿದ್ದರು. ಆ ಸರಣಿಯ ಅಂತಿಮ ಪಂದ್ಯದ ವೇಳೆ ಅವರು ನಿವೃತ್ತಿ ಹೊಂದಲಿದ್ದಾರೆ ಎಂಬ ವದಂತಿಗಳು ಹರಡಿದ್ದರೂ, ಬಿಸಿಸಿಐ ಅದನ್ನು ಅಲ್ಲಗಳೆದಿತ್ತು. ಅದರ ಬೆನ್ನಲ್ಲೇ ರೋಹಿತ್ ಭರ್ಜರಿ 138 ರನ್ ಬಾರಿಸುವ ಮೂಲಕ ತಮ್ಮ ಬ್ಯಾಟಿಂಗ್ ಸಾಮರ್ಥ್ಯವನ್ನು ಮತ್ತೊಮ್ಮೆ ಸಾಬೀತುಪಡಿಸಿದ್ದರು.
