ನವದೆಹಲಿ: ಡೆಲ್ಲಿ ಕ್ಯಾಪಿಟಲ್ಸ್‌ನ ಬ್ಯಾಟಿಂಗ್ ಕೋಚ್ ಆಗಿ ಯುವರಾಜ್ ಸಿಂಗ್ ನೇಮಕವಾಗಿದ್ದಾರೆ. ಭಾರತದ ಮಾಜಿ ಆಲ್‌ರೌಂಡರ್ ಯುವರಾಜ್ ಸಿಂಗ್, ಮುಂಬರುವ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಋತುವಿಗಾಗಿ ಡೆಲ್ಲಿ ಕ್ಯಾಪಿಟಲ್ಸ್‌ನ ಸಹಾಯಕ ಮತ್ತು ಬ್ಯಾಟಿಂಗ್ ಕೋಚ್ ಆಗಿ ನೇಮಕಗೊಳ್ಳುವ ಮೂಲಕ ತಮ್ಮ ಮೊದಲ ಅಧಿಕೃತ ಕೋಚಿಂಗ್ ಜವಾಬ್ದಾರಿಯನ್ನು ವಹಿಸಿಕೊಂಡಿದ್ದಾರೆ.
ಭಾರತದ 2007ರ ಟಿ20 ವಿಶ್ವಕಪ್ ಮತ್ತು 2011ರ ಏಕದಿನ ವಿಶ್ವಕಪ್ ಗೆಲುವುಗಳಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ 44 ವರ್ಷದ ಯುವರಾಜ್, ಈ ಫ್ರಾಂಚೈಸಿ ಮೂಲಕ ಐಪಿಎಲ್ ಕೋಚಿಂಗ್ ಗೆ ಪದಾರ್ಪಣೆ ಮಾಡಲಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ ಅವರು ಭಾರತದ ಅನೇಕ ಪ್ರಸಿದ್ಧ ಹಾಗೂ ಉದಯೋನ್ಮುಖ ಕ್ರಿಕೆಟಿಗರಿಗೆ ಮಾರ್ಗದರ್ಶನ ನೀಡಿದ್ದಾರೆ.
ಯುವರಾಜ್ ಗೆ ಡೆಲ್ಲಿ ಫ್ರಾಂಚೈಸಿ ಜೊತೆಗಿನ ಹಳೆಯ ನಂಟೂ ಇದೆ; ಅವರು 2015ರಲ್ಲಿ ದಾಖಲೆಯ 16 ಕೋಟಿ ರೂ.ಗೆ ‘ಡೆಲ್ಲಿ ಡೇರ್‌ಡೆವಿಲ್ಸ್’ ತಂಡವನ್ನು ಸೇರಿದ್ದರು ಮತ್ತು ಆ ಋತುವಿನ ಎಲ್ಲಾ 14 ಪಂದ್ಯಗಳಲ್ಲಿ ಆಡಿದ್ದರು.
“ಡೆಲ್ಲಿ ಕ್ಯಾಪಿಟಲ್ಸ್‌ನೊಂದಿಗೆ ನನ್ನ ಜೀವನದ ಹೊಸ ಅಧ್ಯಾಯವನ್ನು ಪ್ರಾರಂಭಿಸಲು ನಾನು ಉತ್ಸುಕನಾಗಿದ್ದೇನೆ. ಈ ಫ್ರಾಂಚೈಸಿ ಜೊತೆ ನನಗೆ ಹಳೆಯ ಒಡನಾಟವಿದೆ ಮತ್ತು ಮಾಲೀಕರು ನನಗೆ ಚೆನ್ನಾಗಿ ಪರಿಚಯವಿದ್ದಾರೆ, ಹಾಗಾಗಿ ಇದು ನನಗೆ ವಿಶೇಷ ಅವಕಾಶವಾಗಿದೆ,” ಎಂದು ಯುವರಾಜ್ ಹೇಳಿದ್ದಾರೆ.
ಸೌರವ್ ಗಂಗೂಲಿ ಮತ್ತು ಕೋಚಿಂಗ್ ಸಿಬ್ಬಂದಿಯೊಂದಿಗೆ ಕೆಲಸ ಮಾಡಲು ಎದುರು ನೋಡುತ್ತಿರುವುದಾಗಿ ಅವರು ಹೇಳಿದರು. ಯುವರಾಜ್ 132 ಐಪಿಎಲ್ ಪಂದ್ಯಗಳನ್ನು ಆಡಿದ್ದು, 2,750 ರನ್ ಗಳಿಸಿದ್ದಾರೆ ಮತ್ತು 36 ವಿಕೆಟ್‌ಗಳನ್ನು ಪಡೆದಿದ್ದಾರೆ.
ಭಾರತೀಯ ಸ್ಟಾರ್ ಆಟಗಾರರಿಗೆ ಮಾರ್ಗದರ್ಶನ ನೀಡಿದ ಯುವರಾಜ್ ಅವರ ಅನುಭವ
ಡೆಲ್ಲಿ ಕ್ಯಾಪಿಟಲ್ಸ್‌ನಲ್ಲಿನ ನೇಮಕಾತಿಯು ಯುವರಾಜ್ ಸಿಂಗ್ ಅವರ ಮೊದಲ ಅಧಿಕೃತ ಕೋಚಿಂಗ್ ಪಾತ್ರವಾಗಿದ್ದರೂ, ಅವರು ಈಗಾಗಲೇ ಉದಯೋನ್ಮುಖ ಭಾರತೀಯ ಕ್ರಿಕೆಟಿಗರಿಗೆ ಮಾರ್ಗದರ್ಶನ ನೀಡುವಲ್ಲಿ ಸಾಕಷ್ಟು ಸಮಯವನ್ನು ಕಳೆದಿದ್ದಾರೆ. ಈ ಮಾಜಿ ಆಲ್-ರೌಂಡರ್ ಅಭಿಷೇಕ್ ಶರ್ಮಾ ಮತ್ತು ಶುಭಮನ್ ಗಿಲ್ ಅವರಂತಹ ಆಟಗಾರರೊಂದಿಗೆ ನಿಕಟವಾಗಿ ಕೆಲಸ ಮಾಡಿದ್ದಾರೆ. ಇವರಿಬ್ಬರೂ ಈಗ ಭಾರತೀಯ ತಂಡದ ಪ್ರಮುಖ ಆಧಾರಸ್ತಂಭಗಳಾಗಿದ್ದು, ಯುವರಾಜ್ ತಮ್ಮ ಅನುಭವವನ್ನು ಹಂಚಿಕೊಳ್ಳುವ ಮೂಲಕ ಅವರ ಆಟದ ಕೌಶಲವನ್ನು ವೃದ್ಧಿಸಲು ನೆರವಾಗಿದ್ದಾರೆ.
ಯುವರಾಜ್ ಇತರ ಹಲವು ಆಟಗಾರರ ಬೆಳವಣಿಗೆಯಲ್ಲೂ ಪಾತ್ರ ವಹಿಸಿದ್ದು, ಬ್ಯಾಟಿಂಗ್ ತಂತ್ರ, ಮಾನಸಿಕ ದೃಢತೆ ಮತ್ತು ಉನ್ನತ ಮಟ್ಟದ ಕ್ರಿಕೆಟ್‌ನ ಅಗತ್ಯತೆಗಳ ಕುರಿತು ಮಾರ್ಗದರ್ಶನ ನೀಡಿದ್ದಾರೆ. ವಿಶೇಷವಾಗಿ ಅಭಿಷೇಕ್ ಅವರೊಂದಿಗಿನ ಅವರ ಒಡನಾಟ ಗಮನಾರ್ಹವಾಗಿದೆ; ಈ ಎಡಗೈ ಬ್ಯಾಟರ್ ಭಾರತದ ಅತ್ಯಂತ ಸ್ಫೋಟಕ ಟಿ20 ಬ್ಯಾಟರ್ ಗಳಲ್ಲಿ ಒಬ್ಬರಾಗಿ ತಮ್ಮನ್ನು ತಾವು ಗುರುತಿಸಿಕೊಂಡಿದ್ದಾರೆ.
2007ರ ಟಿ20 ವಿಶ್ವಕಪ್ ಮತ್ತು 2011ರ ಏಕದಿನ ವಿಶ್ವಕಪ್ ಗೆದ್ದ ಅವರ ಅನುಭವವು ಡೆಲ್ಲಿ ಕ್ಯಾಪಿಟಲ್ಸ್‌ನ ತರಬೇತಿ ವಿಭಾಗಕ್ಕೆ ಅಮೂಲ್ಯವಾದ ಕೊಡುಗೆಯಾಗಲಿದೆ. ಹಲವು ವರ್ಷಗಳಿಂದ ಅನೇಕ ಯುವ ಭಾರತೀಯ ಆಟಗಾರರಿಗೆ ಮಾರ್ಗದರ್ಶನ ನೀಡಿದ ನಂತರ, ಇದೀಗ ಯುವರಾಜ್ ತಮ್ಮ ಮೊದಲ ಅಧಿಕೃತ ತರಬೇತುದಾರರ ಜವಾಬ್ದಾರಿಯನ್ನು ವಹಿಸಿಕೊಳ್ಳುತ್ತಿದ್ದಾರೆ; ತಮ್ಮ ಚೊಚ್ಚಲ ಐಪಿಎಲ್ ಪ್ರಶಸ್ತಿಯ ನಿರೀಕ್ಷೆಯನ್ನು ಪೂರೈಸಲು ಫ್ರಾಂಚೈಸಿ ಸಜ್ಜಾಗುತ್ತಿರುವ ಹೊತ್ತಿನಲ್ಲಿ ಈ ಬೆಳವಣಿಗೆ ನಡೆದಿದೆ.
