ಚೆನ್ನೈನಲ್ಲಿ ಯುವ ಬ್ಯಾಂಕ್ ಉದ್ಯೋಗಿಯೊಬ್ಬರು ಸಾಮಾಜಿಕ ಮಾಧ್ಯಮದಲ್ಲಿ ತಮ್ಮ ಮದುವೆಯ ಫೋಟೋವನ್ನು ಹಂಚಿಕೊಂಡಿದ್ದು, ಅದು ಅಚ್ಚರಿಯ ಮತ್ತು ಆಘಾತಕಾರಿ ತಿರುವುಗಳಿಗೆ ಕಾರಣವಾಗಿದೆ. ಶಿವಚಂದ್ರನ್ ಎಂಬುವರು “ಡಾಕ್ಟರ್ ನಿಶಾಂತಿ” ಎಂದು ಭಾವಿಸಿದ್ದ 32 ವರ್ಷದ ಮಹಿಳೆಯನ್ನು ಮದುವೆಯಾಗಿ ಸಂಭ್ರಮದಿಂದ ಫೋಟೋಗಳನ್ನು ಹಂಚಿಕೊಂಡಿದ್ದು, ಆದರೆ ಕಾಮೆಂಟ್ ಬಾಕ್ಸ್‌ನಲ್ಲಿನ ಪ್ರತಿಕ್ರಿಯೆ ಭಯಾನಕ ಸತ್ಯವನ್ನು ಬಹಿರಂಗಪಡಿಸಿದೆ.
ಪುತೂರಿನ ನೆಪೋಲಿಯನ್ ಎಂಬ ವ್ಯಕ್ತಿಯೊಬ್ಬರು ಫೋಟೋದಲ್ಲಿರುವ ಮಹಿಳೆ ನಿಶಾಂತಿ ಅಲ್ಲ, ತನ್ನ ಹೆಂಡತಿ ಮೀರಾ ಎಂದು ಕಾಮೆಂಟ್ ಮಾಡಿದ್ದರು. ಅವರು 2017 ರಲ್ಲಿ ಮದುವೆಯಾಗಿದ್ದು, ಒಂದು ವರ್ಷದ ನಂತರ ಬೆಲೆಬಾಳುವ ವಸ್ತುಗಳನ್ನು ಕದ್ದುಕೊಂಡು ಈಕೆ ಪರಾರಿಯಾಗಿದ್ದಳು ಎಂದು ಆರೋಪಿಸಿದ್ದಾರೆ. ಶಿವಚಂದ್ರನ್ ಈ ಆಘಾತವನ್ನು ಮರೆಯುವ ಮುನ್ನವೇ, ಕಡಲೂರಿನ ಎನ್ ರಾಜಾ ಎಂಬ ಮತ್ತೊಬ್ಬ ವ್ಯಕ್ತಿ ಕಾಮೆಂಟ್ ಮಾಡಿ, ಆ ಮಹಿಳೆ ತನ್ನ ಹೆಂಡತಿ ಎಂದು ಹೇಳಿಕೊಂಡಿದ್ದಾರೆ.
ಈ ಬಹಿರಂಗ ಸತ್ಯಗಳಿಂದ ದಿಗ್ಭ್ರಮೆಗೊಂಡ ಶಿವಚಂದ್ರನ್ ತನ್ನ “ಹೆಂಡತಿ” ಯೊಂದಿಗೆ ಪೊಲೀಸ್ ಠಾಣೆಗೆ ತೆರಳಿ ಸಾಮಾಜಿಕ ಮಾಧ್ಯಮದ ಕಾಮೆಂಟ್‌ಗಳನ್ನು ಸಾಕ್ಷಿಯಾಗಿ ಪೊಲೀಸರಿಗೆ ಸಲ್ಲಿಸಿದ್ದಾರೆ. ವಿಚಾರಣೆಯ ಸಮಯದಲ್ಲಿ, ಮಹಿಳೆ ತನ್ನ ನಿಜವಾದ ಹೆಸರು ನಿಶಾಂತಿ ಅಥವಾ ಮೀರಾ ಅಲ್ಲ, ಲಕ್ಷ್ಮಿ ಎಂದು ಒಪ್ಪಿಕೊಂಡಿದ್ದಲ್ಲದೆ, ಆಕೆ ಈ ಘಟನೆಯಲ್ಲಿ ಉಲ್ಲೇಖಿಸಲಾದ ಮೂರು ವ್ಯಕ್ತಿಗಳನ್ನು ಹೊರತುಪಡಿಸಿ ಮತ್ತೊಬ್ಬ ಪತಿಯನ್ನೂ ಹೊಂದಿದ್ದೇನೆ ಎಂದು ಪೊಲೀಸರಿಗೆ ತಿಳಿಸಿದ್ದಾಳೆ.
ತನಿಖೆಯು ಲಕ್ಷ್ಮಿಯ ಸರಣಿ ವಿವಾಹಗಳು ಮತ್ತು ವಂಚನೆಯ ಇತಿಹಾಸವನ್ನು ಬಹಿರಂಗಪಡಿಸಿದ್ದು, 2010 ರಲ್ಲಿ ಪಳೈಯೂರ್‌ನ ಸಿಲಂಬರಸನ್ ಜೊತೆಗಿನ ಆಕೆಯ ಮೊದಲ ವಿವಾಹದಲ್ಲಿ ಇಬ್ಬರು ಮಕ್ಕಳು ಜನಿಸಿದ್ದರು. ಸಿಲಂಬರಸನ್ ಕೆಲವು ವರ್ಷಗಳ ನಂತರ ನಿಧನರಾಗಿದ್ದು, ಬಳಿಕ ಲಕ್ಷ್ಮಿ ತನ್ನ ಮಕ್ಕಳೊಂದಿಗೆ ಈರೋಡ್‌ಗೆ ತೆರಳಿ, ಬೇರೆ ಗುರುತನ್ನು ಬಳಸಿ ಮತ್ತೊಮ್ಮೆ ಮದುವೆಯಾದಳು. ಆಕೆ ಮದುವೆಯಾಗಿ, ಹಣ ಕದ್ದು ಪರಾರಿಯಾಗುವ ತನ್ನ ಮಾದರಿಯನ್ನು ಪುನರಾವರ್ತಿಸಿದ್ದಾಳೆ.
ಈಗ ಲಕ್ಷ್ಮಿ (32) ಯನ್ನು ವಂಚನೆ ಆರೋಪದ ಮೇಲೆ ಮಯಿಲಾಡುತುರೈ ನ್ಯಾಯಾಲಯವು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದೆ. ಆಕೆ ಅಮಾಯಕ ಪುರುಷರನ್ನು ಗುರಿಯಾಗಿಸಿ ಮದುವೆಯಾಗಿ, ನಂತರ ಅವರನ್ನು ದೋಚುತ್ತಿದ್ದಳು ಎಂದು ಪೊಲೀಸರು ತಿಳಿಸಿದ್ದಾರೆ.
