ಮಹಿಳಾ ಪ್ರೀಮಿಯರ್ ಲೀಗ್ (WPL) 2026ರ ಕ್ರೀಡಾಂಗಣದಲ್ಲಿ ಕೇವಲ ಬೌಂಡರಿ, ಸಿಕ್ಸರ್ಗಳ ಅಬ್ಬರವಷ್ಟೇ ಇಲ್ಲ. ಮೈದಾನದ ಹೊರಗೆ ತಮ್ಮ ಸ್ಟೈಲ್, ಗ್ಲಾಮರ್ ಮತ್ತು ವ್ಯಕ್ತಿತ್ವದ ಮೂಲಕ ಗಮನ ಸೆಳೆಯುತ್ತಿರುವ ಕ್ರಿಕೆಟ್ ತಾರೆಯರು ಈ ಬಾರಿ ಸುದ್ದಿಯಲ್ಲಿದ್ದಾರೆ. ಕ್ರಿಕೆಟ್ ಮತ್ತು ಗ್ಲಾಮರ್ ಸಮ್ಮಿಲನದಂತಿರುವ ಈ ಸೀಸನ್ನಲ್ಲಿ ಮಿಂಚುತ್ತಿರುವ ಕೆಲವು ಪ್ರಮುಖ ಆಟಗಾರ್ತಿಯರ ವಿವರ ಇಲ್ಲಿದೆ.
ಹರ್ಲೀನ್ ಡಿಯೋಲ್ (ಯುಪಿ ವಾರಿಯರ್ಸ್) ಯುಪಿ ವಾರಿಯರ್ಸ್ ತಂಡದ ಹರ್ಲೀನ್ ಡಿಯೋಲ್ ಈ ಬಾರಿಯ ಡಬ್ಲ್ಯೂಪಿಎಲ್ನಲ್ಲಿ ಸಖತ್ ಸೌಂಡ್ ಮಾಡುತ್ತಿದ್ದಾರೆ. ದೆಹಲಿ ಕ್ಯಾಪಿಟಲ್ಸ್ ವಿರುದ್ಧದ ಪಂದ್ಯದಲ್ಲಿ ಅನಿರೀಕ್ಷಿತವಾಗಿ ‘ರಿಟೈರ್ಡ್ ಔಟ್’ ಆಗುವ ಮೂಲಕ ಸುದ್ದಿಯಾಗಿದ್ದ ಹರ್ಲೀನ್, ಮುಂಬೈ ಇಂಡಿಯನ್ಸ್ ವಿರುದ್ಧದ ಪಂದ್ಯದಲ್ಲಿ ಕೇವಲ 39 ಎಸೆತಗಳಲ್ಲಿ ಅಜೇಯ 64 ರನ್ ಚಚ್ಚುವ ಮೂಲಕ ಭರ್ಜರಿ ಕಮ್ಬ್ಯಾಕ್ ಮಾಡಿದ್ದಾರೆ. ಇವರ ಬ್ಯಾಟಿಂಗ್ ವೈಖರಿ ಮತ್ತು ಮೈದಾನದ ಹೊರಗಿನ ಫ್ಯಾಶನ್ ಸೆನ್ಸ್ ಅಭಿಮಾನಿಗಳಿಗೆ ಸಖತ್ ಇಷ್ಟವಾಗಿದೆ.
ಅಮೆಲಿಯಾ ಕೆರ್ (ಮುಂಬೈ ಇಂಡಿಯನ್ಸ್) ಮುಂಬೈ ಇಂಡಿಯನ್ಸ್ ತಂಡದ ಆಲ್ ರೌಂಡರ್ ಅಮೆಲಿಯಾ ಕೆರ್ ತಮ್ಮ ಬೌಲಿಂಗ್ ಮೂಲಕ ಮ್ಯಾಜಿಕ್ ಮಾಡುತ್ತಿದ್ದಾರೆ. ಕೇವಲ ನಾಲ್ಕು ಪಂದ್ಯಗಳಲ್ಲಿ 7 ವಿಕೆಟ್ ಕಬಳಿಸಿರುವ ಇವರು, ಎದುರಾಳಿ ಬ್ಯಾಟರ್ಗಳಿಗೆ ಸಿಂಹಸ್ವಪ್ನವಾಗಿದ್ದಾರೆ. ಮೈದಾನದಲ್ಲಿ ಶಿಸ್ತಿನ ಆಟಗಾರ್ತಿಯಾಗಿ ಕಾಣುವ ಅಮೆಲಿಯಾ, ಮೈದಾನದ ಹೊರಗೆ ತಮ್ಮ ಸರಳತೆ ಮತ್ತು ಸ್ಮೈಲ್ ಮೂಲಕ ಅಪಾರ ಅಭಿಮಾನಿಗಳನ್ನು ಗಳಿಸಿದ್ದಾರೆ.
ಪ್ರತಿಕಾ ರಾವಲ್ (ಯುಪಿ ವಾರಿಯರ್ಸ್) ಗಾಯದ ಕಾರಣದಿಂದಾಗಿ ಈ ಸೀಸನ್ನಲ್ಲಿ ಆಡಲು ಸಾಧ್ಯವಾಗದಿದ್ದರೂ, ಪ್ರತಿಕಾ ರಾವಲ್ ಅವರ ಚರ್ಚೆ ಮಾತ್ರ ಜೋರಾಗಿದೆ. ಕಾಲಿಗೆ ಪೆಟ್ಟಾಗಿ ಪ್ಲಾಸ್ಟರ್ ಹಾಕಿಸಿಕೊಂಡಿದ್ದರೂ ಸಹ ತಂಡದ ಡ್ರೆಸ್ಸಿಂಗ್ ರೂಮ್ನಲ್ಲಿ ಇವರ ಉಪಸ್ಥಿತಿ ತಂಡಕ್ಕೆ ಆನೆಯ ಬಲ ನೀಡುತ್ತಿದೆ. ತಮ್ಮ ಗ್ಲಾಮರಸ್ ಲುಕ್ ಮತ್ತು ನಗುಮುಖದಿಂದಾಗಿ ಇವರು ಸದಾ ಕ್ಯಾಮರಾ ಕಣ್ಣುಗಳ ಸೆಳೆತದ ಕೇಂದ್ರಬಿಂದುವಾಗಿದ್ದಾರೆ.
ಲಾರೆನ್ ಬೆಲ್ (ಆರ್ಸಿಬಿ) ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ವೇಗಿ ಲಾರೆನ್ ಬೆಲ್ ಪವರ್ ಪ್ಲೇ ಓವರ್ಗಳಲ್ಲಿ ಎದುರಾಳಿಗಳನ್ನು ಕಟ್ಟಿಹಾಕುವಲ್ಲಿ ಯಶಸ್ವಿಯಾಗಿದ್ದಾರೆ. ಇಂಗ್ಲೆಂಡ್ ಮೂಲದ ಈ ಆಟಗಾರ್ತಿ ಮೈದಾನದಲ್ಲಿ ಎದುರಾಳಿಗಳಿಗೆ ಎಷ್ಟು ಖಡಕ್ ಆಗಿ ಕಾಣುತ್ತಾರೋ, ಹೊರಗಿನ ಜಗತ್ತಿನಲ್ಲಿ ಅಷ್ಟೇ ಸ್ಟೈಲಿಶ್ ಆಗಿದ್ದಾರೆ. ಇವರ ಬೌಲಿಂಗ್ ಶಿಸ್ತು ಆರ್ಸಿಬಿ ತಂಡದ ಪ್ರಮುಖ ಅಸ್ತ್ರವಾಗಿದೆ.
ಲಾರಾ ವೊಲ್ವಾರ್ಡ್ (ದೆಹಲಿ ಕ್ಯಾಪಿಟಲ್ಸ್) ದಕ್ಷಿಣ ಆಫ್ರಿಕಾ ತಂಡದ ನಾಯಕಿ ಲಾರಾ ವೊಲ್ವಾರ್ಡ್ ದೆಹಲಿ ತಂಡಕ್ಕೆ ಹೊಸ ಚೈತನ್ಯ ನೀಡಿದ್ದಾರೆ. ಆಡಿರುವ ಮೂರು ಪಂದ್ಯಗಳಲ್ಲಿ 55.5 ಸರಾಸರಿಯೊಂದಿಗೆ 111 ರನ್ ಗಳಿಸಿರುವ ಇವರು, ಅಬ್ಬರದ ಬ್ಯಾಟಿಂಗ್ಗೆ ಹೆಸರಾಗಿದ್ದಾರೆ. ಇವರ ಶಾಂತ ಸ್ವಭಾವ ಮತ್ತು ಆಟದ ಮೇಲಿರುವ ಹಿಡಿತ ದೆಹಲಿ ಕ್ಯಾಪಿಟಲ್ಸ್ ತಂಡಕ್ಕೆ ದೊಡ್ಡ ಶಕ್ತಿಯಾಗಿದೆ.
