ನಿಸರ್ಗ ಎನ್ನುವುದು ಸದಾ ವಿಸ್ಮಯಗಳ ಗೂಡು. ಸಾಮಾನ್ಯವಾಗಿ ಪ್ರಾಣಿಗಳನ್ನು ನಾವು ಎರಡು ಗುಂಪುಗಳಾಗಿ ವಿಂಗಡಿಸುತ್ತೇವೆ. ಮೊಟ್ಟೆಯಿಡುವ ಪಕ್ಷಿಗಳು ಅಥವಾ ಸರಿಸೃಪಗಳು ಮತ್ತು ನೇರವಾಗಿ ಮರಿಗಳಿಗೆ ಜನ್ಮ ನೀಡಿ ಹಾಲುಣಿಸುವ ಸಸ್ತನಿಗಳು. ಆದರೆ, ಈ ಎರಡೂ ಗುಂಪುಗಳಿಗೆ ಸೇರದ, ಪ್ರಕೃತಿಯ ನಿಯಮವನ್ನೇ ಮೀರಿ ನಿಲ್ಲುವ ಕೆಲವು ವಿಚಿತ್ರ ಪ್ರಾಣಿಗಳು ನಮ್ಮ ಭೂಮಿಯ ಮೇಲಿವೆ. ಅವು ಮೊಟ್ಟೆಯನ್ನೂ ಇಡುತ್ತವೆ ಮತ್ತು ಮರಿಗಳಿಗೆ ಹಾಲನ್ನೂ ಉಣಿಸುತ್ತವೆ.
ವಿಸ್ಮಯಕಾರಿ ಪ್ಲಾಟಿಪಸ್
ಈ ಪಟ್ಟಿಯಲ್ಲಿ ಮೊದಲಿಗೆ ಕೇಳಿಬರುವ ಹೆಸರು ಪ್ಲಾಟಿಪಸ್. ಆಸ್ಟ್ರೇಲಿಯಾದಲ್ಲಿ ಕಂಡುಬರುವ ಈ ಪ್ರಾಣಿ ನೋಡಲು ಅತ್ಯಂತ ವಿಚಿತ್ರವಾಗಿದೆ. ಇದಕ್ಕೆ ಬಾತುಕೋಳಿಯಂತಹ ಕೊಕ್ಕು, ಬೀವರ್ ಪ್ರಾಣಿಯಂತಹ ಬಾಲ ಮತ್ತು ನೀರುನಾಯಿಯಂತಹ ಮೃದುವಾದ ಚರ್ಮವಿದೆ. ಇದು ನೀರಿನಲ್ಲಿ ವಾಸಿಸುವ ಮಾಂಸಾಹಾರಿ ಜೀವಿಯಾಗಿದ್ದು, ಸಸ್ತನಿ ಜಾತಿಗೆ ಸೇರಿದರೂ ಸಹ ಮೊಟ್ಟೆ ಇಡುತ್ತದೆ. ಹತ್ತು ದಿನಗಳ ನಂತರ ಮೊಟ್ಟೆಯಿಂದ ಹೊರಬರುವ ಮರಿಗಳಿಗೆ ಇದು ಹಾಲುಣಿಸುತ್ತದೆ.
ವಿಶೇಷವೆಂದರೆ, ಈ ಪ್ರಾಣಿಗೆ ಹಾಲನ್ನು ನೀಡಲು ತೊಟ್ಟುಗಳಿರುವುದಿಲ್ಲ. ಬದಲಾಗಿ ಇದರ ಹೊಟ್ಟೆಯ ಭಾಗದಲ್ಲಿರುವ ಸಣ್ಣ ರಂಧ್ರಗಳ ಮೂಲಕ ಹಾಲು ಬೆವರಿನಂತೆ ಹೊರಬರುತ್ತದೆ. ಮರಿಗಳು ತಾಯಿಯ ಚರ್ಮದ ಮೇಲಿರುವ ಹಾಲನ್ನು ನೆಕ್ಕುವ ಮೂಲಕ ಆಹಾರ ಪಡೆಯುತ್ತವೆ. ಇನ್ನು ಗಂಡು ಪ್ಲಾಟಿಪಸ್ಗಳು ವಿಷಕಾರಿ ಶಕ್ತಿಯನ್ನು ಹೊಂದಿದ್ದು, ಸಣ್ಣ ಪ್ರಾಣಿಗಳನ್ನು ಕೊಲ್ಲಬಲ್ಲವು.
ಮತ್ತೊಂದು ಜೀವಿ ಎಕಿಡ್ನಾ
ಪ್ಲಾಟಿಪಸ್ ಹೊರತುಪಡಿಸಿದರೆ ಮೊಟ್ಟೆಯಿಟ್ಟು ಹಾಲುಣಿಸುವ ಮತ್ತೊಂದು ಪ್ರಾಣಿ ಎಕಿಡ್ನಾ. ಇದನ್ನು ಮುಳ್ಳುಹಂದಿಯಂತೆ ಕಾಣುವ ಇರುವೆಯ ಭಕ್ಷಕ ಎಂದೂ ಕರೆಯುತ್ತಾರೆ. ಹೆಣ್ಣು ಎಕಿಡ್ನಾ ತನ್ನ ಚೀಲದಲ್ಲಿ ಒಂದು ಮೊಟ್ಟೆಯನ್ನಿಡುತ್ತದೆ. ಹತ್ತು ದಿನಗಳ ನಂತರ ಮರಿ ಹೊರಬಂದ ಮೇಲೆ, ಅದು ತಾಯಿಯ ಚೀಲದೊಳಗಿನ ಹಾಲಿನ ಗ್ರಂಥಿಗಳಿಂದ ಹಾಲನ್ನು ಕುಡಿಯುತ್ತಾ ಬೆಳೆಯುತ್ತದೆ.
ಇತರೆ ಸ್ವಾರಸ್ಯಕರ ಸಂಗತಿಗಳು
ಪ್ಲಾಟಿಪಸ್ ಮತ್ತು ಎಕಿಡ್ನಾಗಳನ್ನು ‘ಲಿವಿಂಗ್ ಫಾಸಿಲ್ಸ್’ ಅಥವಾ ಜೀವಂತ ಪಳೆಯುಳಿಕೆಗಳು ಎಂದು ಕರೆಯಲಾಗುತ್ತದೆ. ಏಕೆಂದರೆ ಇವು ಲಕ್ಷಾಂತರ ವರ್ಷಗಳಿಂದ ತಮ್ಮ ರೂಪವನ್ನು ಬದಲಿಸಿಕೊಳ್ಳದೆ ಹಾಗೆಯೇ ಉಳಿದುಕೊಂಡಿವೆ. ಇನ್ನು ಕೆಲವು ಹಾವು ಮತ್ತು ಹಲ್ಲಿಗಳು ಮೊಟ್ಟೆಯನ್ನು ಹೊಟ್ಟೆಯೊಳಗೇ ಇಟ್ಟುಕೊಂಡು ಮರಿಗಳಿಗೆ ಜನ್ಮ ನೀಡುವ ವಿಚಿತ್ರ ಗುಣವನ್ನು ಹೊಂದಿವೆ. ಇಂತಹ ಪ್ರಕೃತಿಯ ಸೋಜಿಗಗಳು ಜೀವವೈವಿಧ್ಯತೆಯ ಶ್ರೀಮಂತಿಕೆಯನ್ನು ನಮಗೆ ಪರಿಚಯಿಸುತ್ತವೆ.
