ವಾಟ್ಸಾಪ್ ಬ್ಯುಸಿನೆಸ್ ಬಳಕೆದಾರರಿಗೆ ಬಿಗ್ ಶಾಕ್; ನಾಳೆಯಿಂದ ಮೆಸೇಜ್’ಗಳಿಗೆ ಶುಲ್ಕ.!

ವಾಟ್ಸಾಪ್ ಬಿಸಿನೆಸ್ ಬಳಸುವ ಸಂಸ್ಥೆಗಳಿಗೆ ಮೆಟಾ ಮಹತ್ವದ ಬದಲಾವಣೆ ತಂದಿದೆ. ಇದುವರೆಗೆ ಉಚಿತವಾಗಿ ಲಭ್ಯವಿದ್ದ ಕೆಲವು ಸರ್ವೀಸ್ ಮೆಸೇಜ್‌ಗಳಿಗೆ ಅಕ್ಟೋಬರ್ 1, 2026ರಿಂದ ಶುಲ್ಕ ವಿಧಿಸಲು ಮೆಟಾ ನಿರ್ಧರಿಸಿದೆ.

ಅಂದರೆ, ವಾಟ್ಸಾಪ್ ಬಿಸಿನೆಸ್ ಪ್ಲಾಟ್‌ಫಾರ್ಮ್ ಮೂಲಕ ಗ್ರಾಹಕರಿಗೆ ಕಳುಹಿಸುವ ಕೆಲವು ಸಂದೇಶಗಳಿಗೆ ಇನ್ನು ಮುಂದೆ ವ್ಯವಹಾರ ಸಂಸ್ಥೆಗಳು ಪ್ರತಿ ಮೆಸೇಜ್‌ಗೆ ಹಣ ಪಾವತಿಸಬೇಕಾಗುತ್ತದೆ.

ಈಗಾಗಲೇ ಮಾರ್ಕೆಟಿಂಗ್, ಯುಟಿಲಿಟಿ ಹಾಗೂ ಆಥೆಂಟಿಕೇಶನ್ ಟೆಂಪ್ಲೇಟ್ ಮೆಸೇಜ್‌ಗಳಿಗೆ ಮೆಟಾ ಶುಲ್ಕ ವಿಧಿಸುತ್ತಿದೆ. ಆದರೆ ಟೆಂಪ್ಲೇಟ್ ಅಗತ್ಯವಿಲ್ಲದ ಸರ್ವೀಸ್ ಮೆಸೇಜ್‌ಗಳನ್ನು 2024ರ ನವೆಂಬರ್ 1ರಿಂದ ಉಚಿತವಾಗಿ ನೀಡಲಾಗುತ್ತಿತ್ತು. ಇದೀಗ ಈ ಉಚಿತ ಸೇವೆಯೂ ಅಕ್ಟೋಬರ್ 1ರಿಂದ ಪೇಯ್ಡ್ ಸೇವೆಯಾಗಲಿದೆ.

ಇದರ ಜೊತೆಗೆ, ಗ್ರಾಹಕರೊಂದಿಗೆ 24 ಗಂಟೆಗಳ ಕಸ್ಟಮರ್ ಸರ್ವೀಸ್ ವಿಂಡೋ ತೆರೆದಿರುವ ಸಂದರ್ಭದಲ್ಲಿ ಕಳುಹಿಸುವ ಕೆಲವು ಯುಟಿಲಿಟಿ ಮೆಸೇಜ್‌ಗಳಿಗೂ ಇನ್ನು ಮುಂದೆ ಶುಲ್ಕ ಅನ್ವಯಿಸಲಿದೆ. ಈ ಹಿಂದೆ ಇಂತಹ ಕೆಲವು ಸಂದೇಶಗಳಿಗೆ ಶುಲ್ಕ ಇರಲಿಲ್ಲ.

ಸರ್ವೀಸ್ ಮೆಸೇಜ್ ಎಂದರೇನು?

ಗ್ರಾಹಕರೊಂದಿಗೆ 24 ಗಂಟೆಗಳ ಸರ್ವೀಸ್ ವಿಂಡೋ ತೆರೆದಿರುವಾಗ ವ್ಯವಹಾರ ಸಂಸ್ಥೆಯ ಪರವಾಗಿ ಕಳುಹಿಸುವ ಟೆಂಪ್ಲೇಟ್ ಅಲ್ಲದ ಪ್ರತಿಕ್ರಿಯೆಗಳನ್ನು ಸರ್ವೀಸ್ ಮೆಸೇಜ್‌ಗಳು ಎಂದು ಕರೆಯಲಾಗುತ್ತದೆ.

ಇವುಗಳನ್ನು ಸಾಮಾನ್ಯವಾಗಿ ಕಸ್ಟಮರ್ ಸರ್ವೀಸ್ ಪ್ರತಿನಿಧಿ ಅಥವಾ ಥರ್ಡ್-ಪಾರ್ಟಿ ಎಐ ಸಿಸ್ಟಮ್ ಮೂಲಕ ಕಳುಹಿಸಬಹುದು. ಆದರೆ ವ್ಯವಹಾರ ಸಂಸ್ಥೆಗಳು ತಮ್ಮಿಂದಲೇ ಹೊಸ ಸಂಭಾಷಣೆಯನ್ನು ಆರಂಭಿಸಲು ಈ ಮೆಸೇಜ್‌ಗಳನ್ನು ಬಳಸಲು ಸಾಧ್ಯವಿಲ್ಲ.

ಅಕ್ಟೋಬರ್ 1ರಿಂದ ಶುಲ್ಕ ಜಾರಿಗೆ ಬರಲಿರುವ ಹಿನ್ನೆಲೆಯಲ್ಲಿ, ವ್ಯವಹಾರಗಳು ಸೆಪ್ಟೆಂಬರ್ 30ರೊಳಗೆ ತಮ್ಮ ಖಾತೆಯಲ್ಲಿ ಪೇಮೆಂಟ್ ಮೆಥಡ್ ಅನ್ನು ನೋಂದಾಯಿಸಿಕೊಳ್ಳಬೇಕು ಎಂದು ಮೆಟಾ ತಿಳಿಸಿದೆ. ಹಾಗೆ ಮಾಡದ ಸೊಲ್ಯೂಷನ್ ಪ್ರೊವೈಡರ್‌ಗಳು ಅಥವಾ ನೇರವಾಗಿ ಇಂಟಿಗ್ರೇಟ್ ಆಗಿರುವ ವ್ಯವಹಾರಗಳ ಸರ್ವೀಸ್ ಮೆಸೇಜ್‌ಗಳನ್ನು ಅಕ್ಟೋಬರ್ 1ರಿಂದ ಡೆಲಿವರ್ ಮಾಡುವುದಿಲ್ಲ ಎಂದು ಕಂಪನಿ ಎಚ್ಚರಿಸಿದೆ.

ಭಾರತದಲ್ಲಿ ಎಷ್ಟು ಶುಲ್ಕ?

ಸರ್ವೀಸ್ ಮೆಸೇಜ್‌ಗಳ ದರವು ಪ್ರತಿ ಮಾರುಕಟ್ಟೆಗೆ ಅನುಗುಣವಾಗಿ ಬದಲಾಗುತ್ತದೆ. ಭಾರತದಲ್ಲಿ ಸರ್ವೀಸ್ ಮೆಸೇಜ್‌ಗಳಿಗೆ ವಿಧಿಸುವ ದರವು ಯುಟಿಲಿಟಿ ಮತ್ತು ಆಥೆಂಟಿಕೇಶನ್ ಮೆಸೇಜ್‌ಗಳ ದರಕ್ಕೆ ಸಮನಾಗಿರುತ್ತದೆ ಎಂದು ಮೆಟಾ ತಿಳಿಸಿದೆ.

ಭಾರತದಲ್ಲಿ ಮೆಟಾ ಬಿಸಿನೆಸ್ ಏಜೆಂಟ್ ಖಾತೆಗಳಿಗೆ ಬಿಲ್ಲಿಂಗ್ ಕರೆನ್ಸಿಯಾಗಿ ಭಾರತೀಯ ರೂಪಾಯಿ (INR) ಬಳಸಲಾಗುತ್ತದೆ.

ಎಐ ಮೆಸೇಜ್‌ಗಳಿಗೂ ಪ್ರತ್ಯೇಕ ಶುಲ್ಕ

ಮೆಟಾ ಬಿಸಿನೆಸ್ ಏಜೆಂಟ್ ಮೆಸೇಜ್‌ಗಳಿಗೆ ಈಗಾಗಲೇ ಶುಲ್ಕ ಜಾರಿಯಲ್ಲಿದೆ. ಆಗಸ್ಟ್ 1ರಿಂದ ಇವುಗಳಿಗೆ ಟೋಕನ್ ಆಧಾರಿತ ಶುಲ್ಕ ವಿಧಿಸುವ ವ್ಯವಸ್ಥೆಯನ್ನು ಮೆಟಾ ಆರಂಭಿಸಿದೆ.

ಇದರಲ್ಲಿ ಎಐ ಪ್ರೊಸೆಸಿಂಗ್ ಮತ್ತು ಮೆಸೇಜ್ ಡೆಲಿವರಿ ಎರಡನ್ನೂ ಒಳಗೊಂಡಂತೆ ಶುಲ್ಕ ವಿಧಿಸಲಾಗುತ್ತದೆ. ಮೆಟಾ ಪ್ರಕಾರ, ಜಾಗತಿಕ ದರ 10 ಲಕ್ಷ ಟೋಕನ್‌ಗಳಿಗೆ 2 ಡಾಲರ್ ಆಗಿದೆ.

ಸಾಮಾನ್ಯವಾಗಿ ಒಂದು ಮೆಸೇಜ್‌ಗೆ ಸುಮಾರು 20,000ರಿಂದ 25,000 ಟೋಕನ್‌ಗಳು ಬಳಕೆಯಾಗಬಹುದು. ಇದರ ಆಧಾರದ ಮೇಲೆ ಒಂದು ಮೆಸೇಜ್‌ಗೆ ಸುಮಾರು 4ರಿಂದ 5 ಸೆಂಟ್‌ಗಳವರೆಗೆ ವೆಚ್ಚವಾಗಬಹುದು. ಹೆಚ್ಚು ಸಂಕೀರ್ಣವಾದ ಎಐ ಸಂಭಾಷಣೆಗಳಿಗೆ ಹೆಚ್ಚಿನ ಟೋಕನ್‌ಗಳು ಬೇಕಾಗುವುದರಿಂದ ವೆಚ್ಚವೂ ಹೆಚ್ಚಾಗಬಹುದು.

ಒಂದೇ ಮೆಸೇಜ್‌ಗೆ ಎರಡು ಬಾರಿ ಶುಲ್ಕವಿಲ್ಲ

ಅಕ್ಟೋಬರ್ 1ರಿಂದ ಪ್ರತಿ ಟೆಂಪ್ಲೇಟ್ ಅಲ್ಲದ ಬಿಸಿನೆಸ್ ಮೆಸೇಜ್ ಸರ್ವೀಸ್ ಅಥವಾ ಮೆಟಾ ಬಿಸಿನೆಸ್ ಏಜೆಂಟ್ ವಿಭಾಗಕ್ಕೆ ಸೇರಲಿದೆ.

ಮಾನವ ಪ್ರತಿನಿಧಿ ಅಥವಾ ಥರ್ಡ್-ಪಾರ್ಟಿ ಎಐ ಸಿಸ್ಟಮ್ ನೀಡುವ ಪ್ರತಿಕ್ರಿಯೆಯನ್ನು ಸರ್ವೀಸ್ ಮೆಸೇಜ್ ಎಂದು ಪರಿಗಣಿಸಿ ಪ್ರತಿ ಮೆಸೇಜ್‌ಗೆ ಶುಲ್ಕ ವಿಧಿಸಲಾಗುತ್ತದೆ. ಮೆಟಾ ಬಿಸಿನೆಸ್ ಏಜೆಂಟ್ ಮೂಲಕ ಕಳುಹಿಸಲಾದ ಪ್ರತಿಕ್ರಿಯೆಗಳಿಗೆ ಟೋಕನ್ ಆಧಾರಿತ ಶುಲ್ಕ ಅನ್ವಯಿಸುತ್ತದೆ.

ಆದರೆ ಒಂದೇ ಮೆಸೇಜ್‌ಗೆ ಎರಡು ವಿಧದ ಶುಲ್ಕವನ್ನು ವಿಧಿಸುವುದಿಲ್ಲ ಎಂದು ಮೆಟಾ ಸ್ಪಷ್ಟಪಡಿಸಿದೆ.

ಇನ್ನು ಮುಂದೆ ಸಂಭಾಷಣೆ ವೆಚ್ಚ ಹೆಚ್ಚಾಗುವ ಸಾಧ್ಯತೆ

ಮೆಟಾ ನೀಡಿರುವ ಉದಾಹರಣೆಯ ಪ್ರಕಾರ, ಒಂದು ಗ್ರಾಹಕರ ಸಂಭಾಷಣೆಯಲ್ಲಿ ಒಂದು ಮಾರ್ಕೆಟಿಂಗ್ ಮೆಸೇಜ್, ಎರಡು ಮೆಟಾ ಬಿಸಿನೆಸ್ ಏಜೆಂಟ್ ರಿಪ್ಲೈಗಳು, ಒಂದು ಸರ್ವೀಸ್ ರಿಪ್ಲೈ ಮತ್ತು ಒಂದು ಯುಟಿಲಿಟಿ ಮೆಸೇಜ್ ಇದ್ದರೆ, ಅಕ್ಟೋಬರ್ 1ರಿಂದ ಒಟ್ಟು ಐದು ಶುಲ್ಕಗಳು ಅನ್ವಯಿಸಬಹುದು.

ಈ ಹಿಂದಿನ ವ್ಯವಸ್ಥೆಯಲ್ಲಿ ಇದೇ ಸಂಭಾಷಣೆಯಲ್ಲಿ ಕೇವಲ ಮಾರ್ಕೆಟಿಂಗ್ ಮೆಸೇಜ್‌ಗೆ ಮಾತ್ರ ಶುಲ್ಕ ವಿಧಿಸಲಾಗುತ್ತಿತ್ತು.ಹೀಗಾಗಿ ಗ್ರಾಹಕ ಸೇವೆಗಾಗಿ ವಾಟ್ಸಾಪ್ ಬಿಸಿನೆಸ್ ಅನ್ನು ಹೆಚ್ಚಾಗಿ ಬಳಸುವ ಸಂಸ್ಥೆಗಳು ಇನ್ನು ಮುಂದೆ ತಮ್ಮ ಮೆಸೇಜಿಂಗ್ ವೆಚ್ಚವನ್ನೂ ಬಜೆಟ್‌ನಲ್ಲಿ ಪರಿಗಣಿಸಬೇಕಾಗುತ್ತದೆ.

WhatsApp Business Platform ಎಂದರೇನು? ಯಾರಿಗೆ ಅನ್ವಯ?

WhatsApp Business Platform ಎನ್ನುವುದು ದೊಡ್ಡ ಪ್ರಮಾಣದಲ್ಲಿ ಗ್ರಾಹಕರೊಂದಿಗೆ ಸಂವಹನ ನಡೆಸಬೇಕಾದ ಕಂಪನಿಗಳಿಗಾಗಿ ವಿನ್ಯಾಸಗೊಳಿಸಲಾದ WhatsApp ವ್ಯವಸ್ಥೆಯಾಗಿದೆ.

ವ್ಯವಹಾರಗಳು ತಮ್ಮದೇ ಸಿಸ್ಟಮ್‌ಗಳು, ಕಸ್ಟಮರ್ ಸಪೋರ್ಟ್ ಪ್ಲಾಟ್‌ಫಾರ್ಮ್‌ಗಳು ಅಥವಾ ಥರ್ಡ್-ಪಾರ್ಟಿ ಸರ್ವೀಸ್ ಪ್ರೊವೈಡರ್‌ಗಳನ್ನು ಈ ಪ್ಲಾಟ್‌ಫಾರ್ಮ್‌ಗೆ ಸಂಪರ್ಕಿಸಿ ಸ್ವಯಂಚಾಲಿತವಾಗಿ ಅಥವಾ ಕಸ್ಟಮರ್ ಸಪೋರ್ಟ್ ತಂಡಗಳ ಮೂಲಕ ಮೆಸೇಜ್‌ಗಳನ್ನು ಕಳುಹಿಸಬಹುದು ಮತ್ತು ಸ್ವೀಕರಿಸಬಹುದು.

ಇದು ಸಾಮಾನ್ಯ ಬಳಕೆದಾರರು ಬಳಸುವ WhatsApp ಅಪ್ಲಿಕೇಶನ್‌ಗಿಂತ ಭಿನ್ನವಾಗಿದೆ. ಸಣ್ಣ ವ್ಯಾಪಾರಿಗಳು ಬಳಸುವ ಪ್ರತ್ಯೇಕ WhatsApp Business ಆ್ಯಪ್‌ಗೂ ಇದು ಭಿನ್ನವಾಗಿದೆ.

ಅಕ್ಟೋಬರ್ 1ರ ದರ ಬದಲಾವಣೆಗಳು ಮುಖ್ಯವಾಗಿ WhatsApp Business Platform ಬಳಸುವ ವ್ಯವಹಾರಗಳಿಗೆ ಅನ್ವಯಿಸುತ್ತವೆ.

ಚಿಲ್ಲರೆ ವ್ಯಾಪಾರಿಗಳು, ಬ್ಯಾಂಕ್‌ಗಳು, ಟ್ರಾವೆಲ್ ಕಂಪನಿಗಳು, ಇ-ಕಾಮರ್ಸ್ ಸಂಸ್ಥೆಗಳು, ಆರೋಗ್ಯ ಸೇವಾ ಸಂಸ್ಥೆಗಳು ಹಾಗೂ ಸಾವಿರಾರು WhatsApp ಸಂಭಾಷಣೆಗಳನ್ನು ನಿರ್ವಹಿಸುವ ಇತರ ಸೇವಾ ಸಂಸ್ಥೆಗಳ ಮೇಲೆ ಇದರ ಪರಿಣಾಮ ಬೀರುವ ಸಾಧ್ಯತೆಯಿದೆ.

WhatsApp Businessನಲ್ಲಿ ಈ ಹಿಂದೆ ಯಾವುದು ಉಚಿತವಾಗಿತ್ತು?

ಈ ಹಿಂದಿನ ವ್ಯವಸ್ಥೆಯ ಪ್ರಕಾರ, ಗ್ರಾಹಕರು ವ್ಯವಹಾರ ಸಂಸ್ಥೆಯನ್ನು ಸಂಪರ್ಕಿಸಿದಾಗ 24 ಗಂಟೆಗಳ ಕಸ್ಟಮರ್ ಸರ್ವೀಸ್ ವಿಂಡೋ ತೆರೆದುಕೊಳ್ಳುತ್ತಿತ್ತು.

ಈ ಅವಧಿಯಲ್ಲಿ ವ್ಯವಹಾರ ಸಂಸ್ಥೆಗಳು ಗ್ರಾಹಕರಿಗೆ ಫ್ರೀ-ಫಾರ್ಮ್ ಸರ್ವೀಸ್ ರಿಪ್ಲೈಗಳನ್ನು ಯಾವುದೇ ಪ್ರತ್ಯೇಕ ಮೆಸೇಜಿಂಗ್ ಶುಲ್ಕವಿಲ್ಲದೆ ಕಳುಹಿಸಬಹುದಾಗಿತ್ತು.

ಉದಾಹರಣೆಗೆ, ಗ್ರಾಹಕರು ರಿಟೇಲರ್ ಬಳಿ ಆರ್ಡರ್ ಬಗ್ಗೆ ವಿಚಾರಿಸಬಹುದು, ಟ್ರಾವೆಲ್ ಕಂಪನಿಯನ್ನು ಬುಕಿಂಗ್ ಕುರಿತು ಸಂಪರ್ಕಿಸಬಹುದು ಅಥವಾ ಡೆಲಿವರಿ ಸಮಸ್ಯೆ ಬಗ್ಗೆ ದೂರು ನೀಡಬಹುದು. 24 ಗಂಟೆಗಳ ವಿಂಡೋ ತೆರೆದಿರುವ ಸಂದರ್ಭದಲ್ಲಿ ಸಂಸ್ಥೆಗಳು ಯಾವುದೇ ಪ್ರತ್ಯೇಕ ಶುಲ್ಕವಿಲ್ಲದೆ ಪ್ರತಿಕ್ರಿಯಿಸಬಹುದಾಗಿತ್ತು.

ಗ್ರಾಹಕ ಸರ್ವೀಸ್ ವಿಂಡೋ ತೆರೆದಿರುವ ಸಮಯದಲ್ಲಿ ಕೆಲವು ಯುಟಿಲಿಟಿ ಮೆಸೇಜ್‌ಗಳನ್ನು ಕೂಡ ಶುಲ್ಕವಿಲ್ಲದೆ ಕಳುಹಿಸಲು ಮೆಟಾ ಅವಕಾಶ ನೀಡಿತ್ತು. ಆರ್ಡರ್‌ಗೆ ಸಂಬಂಧಿಸಿದ ಅಪ್‌ಡೇಟ್‌ಗಳು ಮತ್ತು ಡೆಲಿವರಿ ಮಾಹಿತಿಯಂತಹ ಸಂದೇಶಗಳು ಇದರಲ್ಲಿ ಸೇರಿದ್ದವು.ಇದೀಗ ಈ ವ್ಯವಸ್ಥೆಯಲ್ಲಿ ಬದಲಾವಣೆ ಮಾಡಲಾಗಿದೆ.

ಅಕ್ಟೋಬರ್ 1, 2026ರಿಂದ ಆಗುವ ಬದಲಾವಣೆಗಳೇನು?

ಅಕ್ಟೋಬರ್ 1ರಿಂದ 24 ಗಂಟೆಗಳ ಕಸ್ಟಮರ್ ಸರ್ವೀಸ್ ವಿಂಡೋ ತೆರೆದಿರುವ ಸಮಯದಲ್ಲಿ ಕಳುಹಿಸುವ ಯುಟಿಲಿಟಿ ಮೆಸೇಜ್‌ಗಳಿಗೂ ಶುಲ್ಕ ಅನ್ವಯಿಸಲಿದೆ.ಅಂದರೆ, ಕಸ್ಟಮರ್ ಸರ್ವೀಸ್ ವಿಂಡೋ ತೆರೆದಿದೆ ಎಂಬ ಕಾರಣಕ್ಕೆ ಯಾವುದೇ ಮೆಸೇಜಿಂಗ್ ವೆಚ್ಚವಿಲ್ಲದೆ ಯುಟಿಲಿಟಿ ಮೆಸೇಜ್‌ಗಳನ್ನು ಕಳುಹಿಸಲು ಕಂಪನಿಗಳಿಗೆ ಸಾಧ್ಯವಾಗುವುದಿಲ್ಲ.

ಅದೇ ಸಮಯದಲ್ಲಿ ಸರ್ವೀಸ್ ಮೆಸೇಜ್‌ಗಳ ಸಂಪೂರ್ಣ ಉಚಿತ ವ್ಯವಸ್ಥೆಯೂ ಬದಲಾಗಲಿದೆ. ಪ್ರತಿ ಬಿಸಿನೆಸ್ ಫೋನ್ ಸಂಖ್ಯೆಗೆ ತಿಂಗಳಿಗೆ 1,000 ಉಚಿತ ಸರ್ವೀಸ್ ಮೆಸೇಜ್‌ಗಳು ದೊರೆಯಲಿವೆ.

ಈ ಮಿತಿ ಪೂರ್ಣಗೊಂಡ ನಂತರ ಕಳುಹಿಸುವ ಹೆಚ್ಚುವರಿ ಸರ್ವೀಸ್ ರಿಪ್ಲೈಗಳಿಗೆ ಅನ್ವಯಿಸುವ ದರದಂತೆ ಶುಲ್ಕ ವಿಧಿಸಲಾಗುತ್ತದೆ.

ಆದರೆ 24 ಗಂಟೆಗಳ ಕಸ್ಟಮರ್ ಸರ್ವೀಸ್ ವಿಂಡೋ ರದ್ದಾಗುವುದಿಲ್ಲ. ಈ ವಿಂಡೋ ಮುಂದುವರಿಯಲಿದೆ. ಬದಲಾಗುತ್ತಿರುವುದು ಈ ಅವಧಿಯಲ್ಲಿ ಕಳುಹಿಸುವ ಕೆಲವು ಮೆಸೇಜ್‌ಗಳಿಗೆ ಅನ್ವಯಿಸುವ ಶುಲ್ಕದ ನಿಯಮ ಮಾತ್ರ.

ಭಾರತದಲ್ಲಿ WhatsApp Business ಮೆಸೇಜ್‌ಗಳ ಶುಲ್ಕ ಎಷ್ಟು?

ಭಾರತದಲ್ಲಿ ಅಕ್ಟೋಬರ್ 1ರಿಂದ ಯುಟಿಲಿಟಿ ಮೆಸೇಜ್‌ಗೆ ಪ್ರತಿ ಡೆಲಿವರ್ಡ್ ಮೆಸೇಜ್‌ಗೆ ₹0.115 ಶುಲ್ಕ ಅನ್ವಯಿಸಲಿದೆ ಎಂದು ಪ್ರಸ್ತುತ ಮೆಟಾ ಅಕ್ಟೋಬರ್ ದರಪಟ್ಟಿ ಆಧರಿಸಿದ ವರದಿಗಳು ತಿಳಿಸಿವೆ. ಈ ದರ GSTಗೆ ಮುನ್ನದ್ದು.

1,000 ಉಚಿತ ಸರ್ವೀಸ್ ಮೆಸೇಜ್‌ಗಳ ಮಿತಿ ಮುಗಿದ ನಂತರ ಹೆಚ್ಚುವರಿ ಸರ್ವೀಸ್ ಮೆಸೇಜ್‌ಗಳಿಗೆ ಅನ್ವಯಿಸುವ ಯುಟಿಲಿಟಿ/ಆಥೆಂಟಿಕೇಶನ್ ದರದಂತೆ ಶುಲ್ಕ ವಿಧಿಸಲಾಗುತ್ತದೆ.ಉದಾಹರಣೆಗೆ, ಭಾರತದಲ್ಲಿನ ಒಂದು ಸಂಸ್ಥೆ 1,000 ಶುಲ್ಕ ವಿಧಿಸಬಹುದಾದ ಯುಟಿಲಿಟಿ ಮೆಸೇಜ್‌ಗಳನ್ನು ಕಳುಹಿಸಿದರೆ, ಮೆಟಾ ಮೆಸೇಜಿಂಗ್ ವೆಚ್ಚ GSTಗೆ ಮುನ್ನ ₹115 ಆಗಬಹುದು.

ಅದೇ ಸಂಸ್ಥೆ 10,000 ಇಂತಹ ಮೆಸೇಜ್‌ಗಳನ್ನು ಕಳುಹಿಸಿದರೆ, GSTಗೆ ಮುನ್ನ ₹1,150 ಮೆಸೇಜಿಂಗ್ ವೆಚ್ಚವಾಗಬಹುದು. ಇದರಲ್ಲಿ ಟೆಕ್ನಾಲಜಿ ಅಥವಾ ಸೊಲ್ಯೂಷನ್ ಪ್ರೊವೈಡರ್‌ಗಳು ವಿಧಿಸುವ ಪ್ರತ್ಯೇಕ ಶುಲ್ಕಗಳು ಸೇರಿಲ್ಲ.

ಪ್ರತಿ ಮೆಸೇಜ್‌ಗೆ ವಿಧಿಸುವ ಮೊತ್ತ ಕಡಿಮೆಯಾಗಿ ಕಾಣಿಸಿದರೂ, ತಿಂಗಳಿಗೆ ಲಕ್ಷಾಂತರ ಅಥವಾ ಕೋಟ್ಯಂತರ ಗ್ರಾಹಕ ಸಂವಹನಗಳನ್ನು ನಿರ್ವಹಿಸುವ ಕಂಪನಿಗಳಿಗೆ ಒಟ್ಟಾರೆ ವೆಚ್ಚ ಗಮನಾರ್ಹವಾಗಿ ಹೆಚ್ಚಾಗಬಹುದು.

ಸೂಚನೆ: ಮೇಲಿನ ಮಾಹಿತಿಯು ಮಾಹಿತಿ ಉದ್ದೇಶಕ್ಕಾಗಿ ಮಾತ್ರ. ದರಗಳು ಮತ್ತು ಶುಲ್ಕಗಳಲ್ಲಿ ಬದಲಾವಣೆಗಳಾಗುವ ಸಾಧ್ಯತೆ ಇರುವುದರಿಂದ, ಅಂತಿಮವಾಗಿ Meta ಪ್ರಕಟಿಸುವ ಅಧಿಕೃತ ದರಪಟ್ಟಿಯನ್ನು ಪರಿಶೀಲಿಸುವುದು ಸೂಕ್ತ.