ಕುಂಬಳಕಾಯಿ ಬೀಜಗಳು ನೋಡಲು ಸಣ್ಣದಾಗಿದ್ದರೂ, ಅವುಗಳಲ್ಲಿ ಪ್ರೋಟೀನ್, ಆರೋಗ್ಯಕರ ಕೊಬ್ಬು ಮತ್ತು ಅಗತ್ಯ ಖನಿಜಾಂಶಗಳ ದೊಡ್ಡ ಭಂಡಾರವೇ ಅಡಗಿದೆ. ಅನೇಕರು ಇದನ್ನು ಸಂಜೆಯ ಸ್ನ್ಯಾಕ್ಸ್ ಆಗಿ ಇಷ್ಟಪಟ್ಟು ತಿನ್ನುತ್ತಾರೆ. ಆದರೆ, ಯಾವುದೇ ಪದಾರ್ಥವಾದರೂ ಮಿತಿಯಲ್ಲಿದ್ದರೆ ಮಾತ್ರ ಅದು ಅಮೃತ. ಕುಂಬಳಕಾಯಿ ಬೀಜಗಳನ್ನು ಅತಿಯಾಗಿ ಸೇವಿಸುವುದರಿಂದ ದೇಹದ ಮೇಲೆ ಕೆಲವು ಅಹಿತಕರ ಪರಿಣಾಮಗಳು ಉಂಟಾಗಬಹುದು ಎಂಬುದು ನಿಮಗೆ ತಿಳಿದಿದೆಯೇ?
ಜೀರ್ಣಕ್ರಿಯೆಯಲ್ಲಿ ಏರುಪೇರು: ಕುಂಬಳಕಾಯಿ ಬೀಜಗಳಲ್ಲಿ ನಾರಿನಂಶ (ಫೈಬರ್) ಹೇರಳವಾಗಿದೆ. ಇದು ಜೀರ್ಣಕ್ರಿಯೆಗೆ ಸಹಕಾರಿಯಾಗಿದ್ದರೂ, ಅತಿಯಾದಾಗ ಹೊಟ್ಟೆ ಉಬ್ಬರ, ಗ್ಯಾಸ್ ಮತ್ತು ಹೊಟ್ಟೆ ನೋವಿಗೆ ಕಾರಣವಾಗಬಹುದು. ಅತಿಯಾದ ನಾರಿನಂಶವು ಕರುಳಿನ ಮೇಲೆ ಒತ್ತಡ ಹೇರುವುದರಿಂದ ಅತಿಸಾರ ಅಥವಾ ಮಲಬದ್ಧತೆಯಂತಹ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು. ವಿಶೇಷವಾಗಿ ದೈಹಿಕವಾಗಿ ಹೈಡ್ರೇಟ್ ಆಗಿರದಿದ್ದಾಗ (ಕಡಿಮೆ ನೀರು ಕುಡಿದಾಗ) ಈ ಸಮಸ್ಯೆಗಳು ಮತ್ತಷ್ಟು ಉಲ್ಬಣಗೊಳ್ಳುತ್ತವೆ.
ಹೆಚ್ಚುವರಿ ಕ್ಯಾಲೋರಿ ಮತ್ತು ತೂಕ ಹೆಚ್ಚಳ: ಕುಂಬಳಕಾಯಿ ಬೀಜಗಳು ಪೌಷ್ಟಿಕಾಂಶದ ಜೊತೆಗೆ ಹೆಚ್ಚಿನ ಕ್ಯಾಲೋರಿಗಳನ್ನು ಸಹ ಹೊಂದಿರುತ್ತವೆ. ಒಂದು ಕಪ್ ಹುರಿದ ಬೀಜಗಳಲ್ಲಿ ಸುಮಾರು 285 ಕ್ಯಾಲೋರಿಗಳಿರುತ್ತವೆ. ಹೀಗಾಗಿ, ಸುಮ್ಮನೆ ಕುಳಿತಾಗ ಕೈಗೆ ಸಿಕ್ಕಷ್ಟು ಬೀಜಗಳನ್ನು ತಿನ್ನುವ ಅಭ್ಯಾಸವಿದ್ದರೆ, ಅದು ತಿಳಿಯದೆಯೇ ನಿಮ್ಮ ದೇಹದ ತೂಕ ಹೆಚ್ಚಾಗಲು ಕಾರಣವಾಗಬಹುದು.
ಉಪ್ಪಿನಂಶದ ಅಪಾಯ: ಮಾರುಕಟ್ಟೆಯಲ್ಲಿ ಸಿಗುವ ಹೆಚ್ಚಿನ ಕುಂಬಳಕಾಯಿ ಬೀಜಗಳು ಉಪ್ಪಿನಿಂದ ಕೂಡಿರುತ್ತವೆ. ಇವುಗಳನ್ನು ಅತಿಯಾಗಿ ತಿನ್ನುವುದರಿಂದ ದೇಹದಲ್ಲಿ ಸೋಡಿಯಂ ಮಟ್ಟ ಹೆಚ್ಚಾಗಿ ರಕ್ತದೊತ್ತಡ ಏರಿಕೆಯಾಗುವ ಸಾಧ್ಯತೆ ಇರುತ್ತದೆ. ಅಲ್ಲದೆ, ಇವುಗಳಲ್ಲಿ ಸತು (ಜಿಂಕ್) ಮತ್ತು ಮೆಗ್ನೀಸಿಯಮ್ ಅಧಿಕವಾಗಿರುವುದರಿಂದ, ಅತಿಯಾದ ಸೇವನೆಯು ದೇಹದಲ್ಲಿ ಇತರ ಖನಿಜಗಳ ಸಮತೋಲನವನ್ನು ತಪ್ಪಿಸಬಹುದು.
ದಿನಕ್ಕೆ ಎಷ್ಟು ತಿನ್ನಬೇಕು?: ಆರೋಗ್ಯ ತಜ್ಞರ ಪ್ರಕಾರ, ದಿನಕ್ಕೆ ಸುಮಾರು 30 ಗ್ರಾಂ ಅಥವಾ ಕಾಲು ಕಪ್ನಷ್ಟು ಕುಂಬಳಕಾಯಿ ಬೀಜಗಳನ್ನು ಸೇವಿಸುವುದು ಸೂಕ್ತ. ಸೂಕ್ಷ್ಮ ಹೊಟ್ಟೆಯುಳ್ಳವರು ಈ ಬೀಜಗಳನ್ನು ಸ್ವಲ್ಪ ನೆನೆಸಿ ಅಥವಾ ಲಘುವಾಗಿ ಹುರಿದು ತಿನ್ನುವುದರಿಂದ ಜೀರ್ಣಿಸಿಕೊಳ್ಳಲು ಸುಲಭವಾಗುತ್ತದೆ.
