ಮಲಯಾಳಂ ಚಿತ್ರರಂಗದ ಖ್ಯಾತ ನಟಿ ಸಂಯುಕ್ತಾ ವರ್ಮಾ ಅವರು ನಟ ಬಿಜು ಮೆನನ್ ಅವರನ್ನು ವಿವಾಹವಾದ ನಂತರ ಅಭಿನಯದಿಂದ ದೂರ ಉಳಿದಿದ್ದರು. ಆದರೆ ಇತ್ತೀಚೆಗೆ ಸೋಶಿಯಲ್ ಮೀಡಿಯಾದಲ್ಲಿ ಸಕ್ರಿಯರಾಗಿರುವ ಅವರು, ತಮ್ಮ ಹಳೆಯ ಸಿನಿಮಾಗಳು ಮತ್ತು ತಾವು ಎದುರಿಸಿದ ಟೀಕೆಗಳ ಬಗ್ಗೆ ಮನಬಿಚ್ಚಿ ಮಾತನಾಡಿದ್ದಾರೆ. ವಿಶೇಷವಾಗಿ ಅವರು ನಟಿಸಿದ್ದ ‘ಮಳೆ’ (Mazha) ಚಿತ್ರದ ಪಾತ್ರವೊಂದು ಕೇರಳದ ಪ್ರೇಕ್ಷಕರಲ್ಲಿ ದೊಡ್ಡ ಸಂಚಲನ ಮೂಡಿಸಿತ್ತು.
ಏನಿದು ವಿವಾದಾತ್ಮಕ ದೃಶ್ಯ? ಖ್ಯಾತ ಲೇಖಕಿ ಮಾಧವಿಕುಟ್ಟಿ ಅವರ ಕಥೆಯನ್ನು ಆಧರಿಸಿ ಸಿದ್ಧವಾಗಿದ್ದ ‘ಮಳೆ’ ಸಿನಿಮಾದಲ್ಲಿ ಸಂಯುಕ್ತಾ ಅವರು ವಿವಾಹಿತ ಮಹಿಳೆಯ ಪಾತ್ರ ಮಾಡಿದ್ದರು. ಸಿನಿಮಾದ ಒಂದು ದೃಶ್ಯದಲ್ಲಿ ಪತಿ ಮರಣ ಹೊಂದಿದ ತಕ್ಷಣವೇ ಆಕೆ ತನ್ನ ಪ್ರಿಯಕರನನ್ನು ಭೇಟಿ ಮಾಡಲು ಹೋಗುತ್ತಾಳೆ. ಈ ದೃಶ್ಯ ಮಲಯಾಳಂ ಪ್ರೇಕ್ಷಕರಿಗೆ ಅರಗಿಸಿಕೊಳ್ಳಲು ಸಾಧ್ಯವಾಗಲಿಲ್ಲ. ಪತಿ ಸತ್ತ ತಕ್ಷಣ ಮಹಿಳೆ ಹೀಗೆ ಮಾಡುವುದು ಸಮಾಜಕ್ಕೆ ವಿರುದ್ಧವಾದದ್ದು ಎಂದು ಅನೇಕರು ನಟಿಯನ್ನು ಪ್ರಶ್ನಿಸಿದ್ದರು.
ಟೀಕೆಗಳಿಗೆ ಸಂಯುಕ್ತಾ ನೀಡಿದ ಖಡಕ್ ಉತ್ತರ ಈ ಬಗ್ಗೆ ಹಳೆಯ ಸಂದರ್ಶನವೊಂದರಲ್ಲಿ ಮಾತನಾಡಿರುವ ಸಂಯುಕ್ತಾ, “ಮಲಯಾಳಂ ಪ್ರೇಕ್ಷಕರಿಗೆ ಕೆಲವು ವಿಷಯಗಳು ಇಂದಿಗೂ ನಿಷೇಧಿತ ಪ್ರದೇಶಗಳಿದ್ದಂತೆ. ಸಿನಿಮಾ ಅಲ್ಲಿಗೆ ಹೋಗಬಾರದು ಎಂದು ಅವರು ಬಯಸುತ್ತಾರೆ. ನನ್ನ ‘ಮೇಘಮಲ್ಹಾರ್’ ಚಿತ್ರದ ಪಾತ್ರಕ್ಕೂ ಇಂತಹದ್ದೇ ಟೀಕೆಗಳು ಬಂದಿದ್ದವು. ಅನೇಕರು ನನ್ನನ್ನು ವೈಯಕ್ತಿಕವಾಗಿ ಪ್ರಶ್ನಿಸಿದ್ದರು. ಆದರೆ ಅವರಿಗೆ ನಾನು ಹೇಳುವುದು ಇಷ್ಟೇ, ನಾನು ಸಂಯುಕ್ತಾ ವರ್ಮಾ, ತೆರೆಯ ಮೇಲೆ ನೀವು ನೋಡುವ ಪಾತ್ರ ನಾನಲ್ಲ. ನಮ್ಮ ಸುತ್ತಮುತ್ತ ಇಂತಹ ಹತ್ತಾರು ಮಹಿಳೆಯರು ಇರುತ್ತಾರೆ, ನಾನು ಕೇವಲ ಅಂತಹ ಒಂದು ಪಾತ್ರಕ್ಕೆ ಜೀವ ತುಂಬಿದ್ದೆ ಅಷ್ಟೇ” ಎಂದು ಹೇಳಿದ್ದಾರೆ.
ಸಂಯುಕ್ತಾ ಅವರು ತಮ್ಮ ಸಿನಿಮಾಗಳ ಮೂಲಕ ಮಹಿಳೆಯರ ಸಂಕೀರ್ಣ ಭಾವನೆಗಳನ್ನು ಪ್ರತಿಬಿಂಬಿಸಲು ಪ್ರಯತ್ನಿಸಿದ್ದರು. ಆದರೆ ಅಂದಿನ ಕಾಲಘಟ್ಟದಲ್ಲಿ ಅಂತಹ ಬೋಲ್ಡ್ ಪಾತ್ರಗಳನ್ನು ಒಪ್ಪಿಕೊಳ್ಳುವುದು ಸಮಾಜಕ್ಕೆ ಕಷ್ಟವಾಗಿತ್ತು ಎಂಬುದನ್ನು ಅವರು ನೆನಪಿಸಿಕೊಂಡಿದ್ದಾರೆ.
