ಮನುಷ್ಯನಿಗೆ ನಾಯಿಗಿಂತ ನಿಷ್ಠಾವಂತ ಹಾಗೂ ನಂಬಿಕಸ್ಥ ಪ್ರಾಣಿ ಮತ್ತೊಂದಿಲ್ಲ ಎಂಬುದನ್ನು ನಾವೆಲ್ಲರೂ ಕೇಳಿದ್ದೇವೆ. ಆದರೆ, ಅಸಹಾಯಕ ಮಹಿಳೆಯೊಬ್ಬಳ ಮೇಲೆ ನಡುರಾತ್ರಿ ಕಾಮುಕನೊಬ್ಬ ಲೈಂಗಿಕ ದೌರ್ಜನ್ಯಕ್ಕೆ ಯತ್ನಿಸಿದಾಗ, ಕಲ್ಲು ತೂರಿ ಓಡಿಸಿದರೂ ಮರಳಿ ಬಂದು ಆತನ ಕಾಲನ್ನೇ ಕಚ್ಚಿ ಹಿಡಿದು, ಜೀವದ ಹಂಗು ತೊರೆದು ಆಕೆಯನ್ನು ರಕ್ಷಿಸಿದ ಎರಡು ಬೀದಿ ನಾಯಿಗಳ ಸಾಹಸಗಾಥೆ ತಮಿಳುನಾಡಿನ ಕೊಯಮತ್ತೂರು ಸಮೀಪದ ತುಡಿಯಲೂರ್ನಲ್ಲಿ ಬೆಳಕಿಗೆ ಬಂದಿದೆ.
ಸ್ಥಳೀಯ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿರುವ ಈ ರೋಚಕ ದೃಶ್ಯಗಳು ಪ್ರಾಣಿಗಳ ಅದ್ಭುತ ಪ್ರೀತಿ, ರಕ್ಷಣಾ ಪ್ರವೃತ್ತಿ ಮತ್ತು ನಿಷ್ಠೆಗೆ ಸಾಕ್ಷಿಯಾಗಿದ್ದು, ಸಾರ್ವಜನಿಕ ವಲಯದಲ್ಲಿ ಭಾರಿ ಮೆಚ್ಚುಗೆಗೆ ಪಾತ್ರವಾಗಿದೆ.
ಕಲ್ಲು ತೂರಿ ಓಡಿಸಿದರೂ ಹಿಂಜರಿಯದ ಮೂಕ ಜೀವಿಗಳು:
ಪೊಲೀಸ್ ಮಾಹಿತಿಯ ಪ್ರಕಾರ, ತುಡಿಯಲೂರ್ ರೈಲ್ವೆ ಮೇಲ್ಸೇತುವೆಯ ಸಮೀಪ ವಾಸವಾಗಿದ್ದ ಮಾನಸಿಕ ಅಸ್ವಸ್ಥ ಮಹಿಳೆಯೊಬ್ಬರ ಜೊತೆಯಲ್ಲಿ ಸದಾ ಎರಡು ಬೀದಿ ನಾಯಿಗಳು ಒಡನಾಡಿಯಾಗಿ ಇರುತ್ತಿದ್ದವು. ಎಂದಿನಂತೆ ತಡರಾತ್ರಿ ಆಕೆ ರಸ್ತೆಬದಿಯಲ್ಲಿ ಮಲಗಿದ್ದಾಗ ಕಾಮುಕನೊಬ್ಬ ಆಕೆಯ ಬಳಿಗೆ ಅಕ್ರಮ ಉದ್ದೇಶದಿಂದ ಬಂದಿದ್ದಾನೆ.
ಅಲ್ಲಿಯೇ ಕುಳಿತಿದ್ದ ನಾಯಿಗಳು ಆತನನ್ನು ಕಂಡು ಜೋರಾಗಿ ಬೊಗಳಲು ಆರಂಭಿಸಿದವು. ಇದರಿಂದ ಸಿಟ್ಟಿಗೆದ್ದ ಆತ, ನೆಲದ ಮೇಲಿದ್ದ ಕಲ್ಲನ್ನು ಎತ್ತಿಕೊಂಡು ನಾಯಿಗಳ ಮೇಲೆ ಎಸೆದು, ಅವುಗಳನ್ನು ಹೆದರಿಸಿ ಸ್ವಲ್ಪ ದೂರ ಓಡಿಸಿದ್ದಾನೆ. ಆದರೆ ಆ ನಾಯಿಗಳು ಅಲ್ಲಿಂದ ಪಲಾಯನ ಮಾಡಲಿಲ್ಲ; ಕೊಂಚ ದೂರ ಸರಿದು ನಿಂತು ಆತನ ಪ್ರತಿಯೊಂದು ಚಲನವಲನವನ್ನು ತೀಕ್ಷ್ಣವಾಗಿ ಗಮನಿಸುತ್ತಾ ಸತತವಾಗಿ ಬೊಗಳುತ್ತಿದ್ದವು.
ಮಹಿಳೆಯ ಮೇಲೆ ಕೈಹಾಕುತ್ತಿದ್ದಂತೆ ಮುಗಿಬಿದ್ದ ಶ್ವಾನ:
ನಾಯಿಗಳು ದೂರ ಹೋದವೆಂದು ಭಾವಿಸಿದ ಕಾಮುಕ, ರಸ್ತೆಯಲ್ಲಿ ಯಾರೂ ಇಲ್ಲದ್ದನ್ನು ಕಂಡು ಆಕೆಯ ಮೇಲೆ ಲೈಂಗಿಕ ದೌರ್ಜನ್ಯಕ್ಕೆ ಮುಂದಾಗಿದ್ದಾನೆ. ಭಯಭೀತಳಾದ ಮಹಿಳೆ ಸಹಾಯಕ್ಕಾಗಿ ಕಿರುಚಾಡಿದ್ದಾಳೆ.
ಆಕೆಯ ಆರ್ತನಾದ ಕೇಳಿದ ತಕ್ಷಣವೇ ಒಂದು ನಾಯಿ ಮಿಂಚಿನಂತೆ ಆತನತ್ತ ನುಗ್ಗಿ ಬಂದಿದೆ. ರೋಷಾವೇಶದಿಂದ ಬೊಗಳುತ್ತಾ ಆತನ ಕಾಲನ್ನು ಹಿಡಿದು ಕಚ್ಚಿ ಹಿಂದಕ್ಕೆ ಎಳೆದಿದೆ. ಇದರಿಂದ ಆತನಿಗೆ ಮಹಿಳೆಯ ಹತ್ತಿರ ಸುಳಿಯಲೂ ಸಾಧ್ಯವಾಗಲಿಲ್ಲ. ಅಷ್ಟರಲ್ಲೇ ಮತ್ತೊಂದು ನಾಯಿಯೂ ಸಮೀಪಕ್ಕೆ ಬಂದು ಆತನನ್ನು ಸುತ್ತುವರಿದಿದೆ. ನಾಯಿಗಳ ಈ ರಣಭೀಕರ ದಾಳಿಯಿಂದ ಕಂಗಾಲಾದ ಕಾಮುಕ, ಜೀವ ಉಳಿಸಿಕೊಳ್ಳಲು ಸ್ಥಳದಿಂದ ಕಾಲ್ಕಿತ್ತಿದ್ದಾನೆ. ಆತ ಓಡುತ್ತಿದ್ದಂತೆ ಒಂದು ಶ್ವಾನ ಆತನನ್ನು ಬೆನ್ನಟ್ಟಿ ಓಡಿಸಿದೆ.
ಬೇರೊಂದು ಕೇಸ್ ಪರಿಶೀಲನೆ ವೇಳೆ ಬಯಲಾಯ್ತು ಘಟನೆ !
ವಿಶೇಷವೆಂದರೆ, ಈ ಘಟನೆಯ ಬಗ್ಗೆ ಪೊಲೀಸರಿಗೆ ಯಾರೂ ದೂರು ನೀಡಿರಲಿಲ್ಲ. ಅದೇ ಪ್ರದೇಶದ ರಸ್ತೆಬದಿಯ ಪೆಟ್ಟಿಗೆ ಅಂಗಡಿಯೊಂದಕ್ಕೆ ಸಂಬಂಧಿಸಿದ ಬೇರೊಂದು ಸಾಮಾನ್ಯ ದೂರನ್ನು ತನಿಖೆ ಮಾಡುವ ಸಲುವಾಗಿ ತುಡಿಯಲೂರ್ ಪೊಲೀಸರು ಸುತ್ತಮುತ್ತಲಿನ ಸಿಸಿ ಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸುತ್ತಿದ್ದರು.
ಆ ವೇಳೆ, ರೈಲ್ವೆ ಸೇತುವೆಯ ಬಳಿ ಮಹಿಳೆಯ ಮೇಲೆ ನಡೆದ ಈ ಆಘಾತಕಾರಿ ದೌರ್ಜನ್ಯದ ಯತ್ನ ಮತ್ತು ನಾಯಿಗಳು ಆಕೆಯನ್ನು ಪವಾಡಸದೃಶವಾಗಿ ರಕ್ಷಿಸಿದ ವಿಡಿಯೋ ಕಂಡು ಪೊಲೀಸರೇ ದಂಗಾಗಿದ್ದಾರೆ.
ಆರೋಪಿ ಬಂಧನ, ಶ್ವಾನಗಳ ಸಾಹಸಕ್ಕೆ ಜನಮನ ಫಿದಾ:
ಸಿಸಿ ಟಿವಿ ದೃಶ್ಯಾವಳಿಗಳನ್ನು ಆಧಾರವಾಗಿಟ್ಟುಕೊಂಡು ಕ್ಷಿಪ್ರ ಕಾರ್ಯಾಚರಣೆ ನಡೆಸಿದ ಪೊಲೀಸರು, ಆರೋಪಿಯ ಮುಖಚಹರೆಯನ್ನು ಪತ್ತೆಹಚ್ಚಿ ಗಣೇಶ್ ನಗರ ಪ್ರದೇಶದಲ್ಲಿ ಆತನನ್ನು ಬಂಧಿಸಿದ್ದಾರೆ.
ಒಂದೆಡೆ ಕಾಮುಕನ ದುಷ್ಕೃತ್ಯಕ್ಕೆ ಸಾರ್ವಜನಿಕರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದರೆ, ಮತ್ತೊಂದೆಡೆ ಅಸಹಾಯಕ ಹೆಣ್ಣುಮಗಳ ಗೌರವ ಹಾಗೂ ಪ್ರಾಣ ಕಾಪಾಡಿದ ಆ ಎರಡು ಬೀದಿ ನಾಯಿಗಳನ್ನು ನಿಜವಾದ ‘ಹೀರೋ’ಗಳೆಂದು ಬಣ್ಣಿಸಿ ಜನರು ಪ್ರಶಂಸೆಯ ಸುರಿಮಳೆಗರೆಯುತ್ತಿದ್ದಾರೆ.
