ಇಸ್ರೇಲ್‌ನ ದಕ್ಷಿಣ ನಗರವಾದ ನೆಟಿವೋಟ್‌ನಲ್ಲಿ ಇತ್ತೀಚೆಗೆ ಕಂಡುಬಂದ ದೈತ್ಯ ಜೇನುನೊಣಗಳ ದಂಡು ಸ್ಥಳೀಯ ನಿವಾಸಿಗಳನ್ನು ಆತಂಕಕ್ಕೆ ತಳ್ಳಿದೆ. ನಗರದ ವಾಣಿಜ್ಯ ಸಂಕೀರ್ಣವೊಂದರ ಮೇಲೆ ಏಕಾಏಕಿ ದಾಳಿಯಿಟ್ಟ ಸಾವಿರಾರು ಜೇನುನೊಣಗಳು ಇಡೀ ಪ್ರದೇಶವನ್ನು ಆವರಿಸಿಕೊಂಡಿದ್ದು, ಇದಕ್ಕೆ ಸಂಬಂಧಿಸಿದ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿವೆ.
ಜೇನುನೊಣಗಳ ಗುಂಪು ನಗರದ ಶಾಪಿಂಗ್ ಸೆಂಟರ್, ಮನೆಗಳ ಬಾಲ್ಕನಿ ಹಾಗೂ ರಸ್ತೆಯಲ್ಲಿ ನಿಲ್ಲಿಸಿದ್ದ ಕಾರುಗಳ ಮೇಲೆ ಸಂಪೂರ್ಣವಾಗಿ ಆವರಿಸಿಕೊಂಡಿದ್ದವು. ಇದರಿಂದಾಗಿ ತುರ್ತು ಕ್ರಮ ಕೈಗೊಂಡ ಸ್ಥಳೀಯ ಆಡಳಿತವು, ಪರಿಸ್ಥಿತಿ ತಿಳಿಯಾಗುವವರೆಗೆ ಜನರು ಮನೆಗಳಿಂದ ಹೊರಬರದಂತೆ ಮತ್ತು ಕಿಟಕಿ ಬಾಗಿಲುಗಳನ್ನು ಮುಚ್ಚಿಕೊಂಡಿರಲು ಸೂಚನೆ ನೀಡಿತು. ತಜ್ಞರ ತಂಡ ಸ್ಥಳಕ್ಕೆ ಆಗಮಿಸಿ ಜೇನುನೊಣಗಳನ್ನು ಸ್ಥಳಾಂತರಿಸುವ ಕಾರ್ಯಾಚರಣೆ ನಡೆಸುವವರೆಗೆ ನಗರದಲ್ಲಿ ಅಘೋಷಿತ ಬಂದ್ ವಾತಾವರಣ ನಿರ್ಮಾಣವಾಗಿತ್ತು.
ಈ ಘಟನೆ ಕೇವಲ ಸಾಮಾನ್ಯ ನೈಸರ್ಗಿಕ ಪ್ರಕ್ರಿಯೆಯಾಗಿ ಉಳಿಯದೆ, ಆನ್‌ಲೈನ್‌ನಲ್ಲಿ ನಾನಾ ರೀತಿಯ ವಿಶ್ಲೇಷಣೆಗಳಿಗೆ ಕಾರಣವಾಗಿದೆ. ಇಸ್ರೇಲ್‌ನಲ್ಲಿ ಪ್ರಸ್ತುತ ಇರುವ ಯುದ್ಧದ ವಾತಾವರಣದ ನಡುವೆಯೇ ಇಷ್ಟೊಂದು ದೊಡ್ಡ ಪ್ರಮಾಣದಲ್ಲಿ ಜೇನುನೊಣಗಳು ಕಾಣಿಸಿಕೊಂಡಿರುವುದು ದೈವಿಕ ಸಂಕೇತ ಅಥವಾ ಮುಂಬರುವ ಅನಾಹುತದ ಮುನ್ಸೂಚನೆ ಎಂದು ಹಲವರು ಅಭಿಪ್ರಾಯಪಟ್ಟಿದ್ದಾರೆ. ಬೈಬಲ್‌ನಲ್ಲಿ ಉಲ್ಲೇಖವಾಗಿರುವ ಕೀಟಗಳ ಉಪಟಳ ಮತ್ತು ಭವಿಷ್ಯವಾಣಿಯ ಮಾತುಗಳನ್ನು ನೆಟ್ಟಿಗರು ಈ ಘಟನೆಗೆ ಹೋಲಿಸುತ್ತಿದ್ದಾರೆ.
ಇದೇ ವೇಳೆ, ಜೇನುನೊಣಗಳ ಈ ದಾಳಿಯಿಂದಾಗಿ ಇಸ್ರೇಲ್ ಸೇನೆಯ ವಿಮಾನಗಳ ಹಾರಾಟಕ್ಕೂ ಅಡ್ಡಿಯಾಗಿದೆ ಎಂಬ ಅಪಪ್ರಚಾರಗಳು ಕೇಳಿಬಂದಿವೆಯಾದರೂ, ಅಧಿಕೃತವಾಗಿ ಇವುಗಳಿಗೆ ಯಾವುದೇ ಪುಷ್ಟಿ ಸಿಕ್ಕಿಲ್ಲ. ಇತ್ತೀಚೆಗಷ್ಟೇ ಟೆಲ್ ಅವೀವ್ ನಗರದ ಆಕಾಶದಲ್ಲಿ ಕಾಗೆಗಳ ಹಿಂಡು ಕಂಡುಬಂದಿದ್ದ ದೃಶ್ಯಗಳು ವೈರಲ್ ಆಗಿದ್ದವು. ಈಗ ಜೇನುನೊಣಗಳ ಸರದಿ ಬಂದಿರುವುದು ಜನರ ಮನಸ್ಸಿನಲ್ಲಿ ಭಯ ಮತ್ತು ಕುತೂಹಲ ಎರಡನ್ನೂ ಒಟ್ಟಿಗೆ ಮೂಡಿಸಿದೆ.
ವಿಜ್ಞಾನಿಗಳ ಪ್ರಕಾರ, ಹವಾಮಾನ ವೈಪರೀತ್ಯ ಅಥವಾ ಹೂವುಗಳ ಅರಳುವಿಕೆಗೆ ಅನುಗುಣವಾಗಿ ಜೇನುನೊಣಗಳು ಹಳೆಯ ಗೂಡು ಬಿಟ್ಟು ಹೊಸ ವಾಸಸ್ಥಾನ ಹುಡುಕುವುದು ಸಹಜ ಪ್ರಕ್ರಿಯೆ. ಆದರೆ ಯುದ್ಧದ ಆತಂಕದಲ್ಲಿರುವ ಇಸ್ರೇಲ್ ಜನತೆಗೆ ಇದು ಮಾತ್ರ ಯಾವುದೋ ಗೂಢಾರ್ಥದಂತೆ ಭಾಸವಾಗುತ್ತಿದೆ.
