ಇಂದಿನ ಜಡ ಜೀವನಶೈಲಿಯಲ್ಲಿ ದೇಹವನ್ನು ದಂಡಿಸಲು ವಾಕಿಂಗ್ ಅತ್ಯಂತ ಸುಲಭ ಮತ್ತು ಪರಿಣಾಮಕಾರಿ ಮಾರ್ಗವಾಗಿದೆ. ದಿನಕ್ಕೆ ಇಷ್ಟು ಹೆಜ್ಜೆ ಹಾಕಬೇಕು ಎಂಬ ಗುರಿ ಇಟ್ಟುಕೊಂಡು ಅನೇಕರು ನಡೆಯುತ್ತಾರೆ. ಆದರೆ, ತಜ್ಞರ ಪ್ರಕಾರ ನೀವು ಎಷ್ಟು ದೂರ ನಡೆಯುತ್ತೀರಿ ಎಂಬುದಕ್ಕಿಂತ ಹೇಗೆ ನಡೆಯುತ್ತೀರಿ ಎಂಬುದು ಬಹಳ ಮುಖ್ಯ. ಸರಿಯಾದ ಕ್ರಮದಲ್ಲಿ ನಡೆಯದಿದ್ದರೆ ಆರೋಗ್ಯ ವೃದ್ಧಿಸುವ ಬದಲು ಬೆನ್ನು ನೋವು ಮತ್ತು ಮೊಣಕಾಲು ನೋವಿನಂತಹ ಸಮಸ್ಯೆಗಳು ಕಾಡಬಹುದು. ಪುಣೆಯ ಸಹ್ಯಾದ್ರಿ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆಯ ಮೂಳೆ ತಜ್ಞರಾದ ಡಾ. ಅಭಿಜಿತ್ ಅಗಾಶೆ ಅವರು ವಾಕಿಂಗ್ ಮಾಡುವಾಗ ನಾವು ಮಾಡುವ ಸಾಮಾನ್ಯ ತಪ್ಪುಗಳನ್ನು ಪಟ್ಟಿ ಮಾಡಿದ್ದಾರೆ.
1. ಬಾಗಿ ನಡೆಯುವುದು (ತಪ್ಪು ಭಂಗಿ) ನಡೆಯುವಾಗ ಬೆನ್ನು ಬಾಗಿಸುವುದು ಅಥವಾ ಭುಜಗಳನ್ನು ಕೆಳಕ್ಕೆ ಬಿಟ್ಟು ನಡೆಯುವುದು ಅತ್ಯಂತ ಅಪಾಯಕಾರಿ. ಇತ್ತೀಚಿನ ದಿನಗಳಲ್ಲಿ ಮೊಬೈಲ್ ಅತಿಯಾದ ಬಳಕೆಯಿಂದಾಗಿ ಹೆಚ್ಚಿನವರು ತಲೆ ತಗ್ಗಿಸಿ ನಡೆಯುವ ಅಭ್ಯಾಸ ಮಾಡಿಕೊಂಡಿದ್ದಾರೆ. ಇದರಿಂದ ಬೆನ್ನುಮೂಳೆಯ ಮೇಲೆ ಅತಿಯಾದ ಒತ್ತಡ ಬಿದ್ದು ಬೆನ್ನು ನೋವು ಕಾಣಿಸಿಕೊಳ್ಳುತ್ತದೆ. ಯಾವಾಗಲೂ ತಲೆ ನೇರವಾಗಿರಲಿ, ಭುಜಗಳು ಸಡಿಲವಾಗಿರಲಿ ಮತ್ತು ಬೆನ್ನುಮೂಳೆ ನೆಟ್ಟಗಿರಲಿ.
2. ಅತಿ ಉದ್ದದ ಹೆಜ್ಜೆಗಳನ್ನು ಹಾಕುವುದು ಹೆಚ್ಚು ಕ್ಯಾಲೊರಿ ಕರಗುತ್ತದೆ ಎಂಬ ಭ್ರಮೆಯಿಂದ ಅನೇಕರು ಬಹಳ ಉದ್ದದ ಹೆಜ್ಜೆಗಳನ್ನು ಹಾಕುತ್ತಾರೆ. ಆದರೆ, ಹೀಗೆ ಮಾಡುವುದರಿಂದ ಪಾದದ ಹಿಮ್ಮಡಿಯು ನೆಲಕ್ಕೆ ಬಲವಾಗಿ ಅಪ್ಪಳಿಸುತ್ತದೆ. ಆ ಹೊಡೆತವು ಮೊಣಕಾಲು ಮತ್ತು ಬೆನ್ನಿನ ಭಾಗಕ್ಕೆ ನೇರವಾಗಿ ತಲುಪುತ್ತದೆ. ಇದರಿಂದ ಕಾಲಕ್ರಮೇಣ ಮೊಣಕಾಲು ನೋವು ಪ್ರಾರಂಭವಾಗುತ್ತದೆ. ನಿಮ್ಮ ದೇಹಕ್ಕೆ ಒಗ್ಗುವಂತಹ ಸಣ್ಣ ಮತ್ತು ನೈಸರ್ಗಿಕ ಹೆಜ್ಜೆಗಳನ್ನೇ ಇರಿಸಿ.
3. ಅತಿಯಾದ ವೇಗ ಮತ್ತು ನಿಯಂತ್ರಣವಿಲ್ಲದ ನಡಿಗೆ ವೇಗವಾಗಿ ನಡೆಯುವುದು ಒಳ್ಳೆಯದೇ ಆದರೂ, ಅದು ನಿಮ್ಮ ದೇಹದ ಸಾಮರ್ಥ್ಯಕ್ಕೆ ಅನುಗುಣವಾಗಿರಬೇಕು. ಉಸಿರು ಕಟ್ಟುವಂತೆ ಅಥವಾ ಸುಸ್ತಾಗುವಂತೆ ವೇಗವಾಗಿ ನಡೆಯುವುದು ಮೊಣಕಾಲುಗಳ ಮೇಲೆ ಒತ್ತಡ ಹೇರುತ್ತದೆ. ನಡೆಯುವಾಗ ನೀವು ಸುಲಭವಾಗಿ ಮಾತನಾಡಬಲ್ಲಷ್ಟು ವೇಗವಿದ್ದರೆ ಸಾಕು, ಅತಿಯಾದ ಆತುರ ಬೇಡ ಎನ್ನುತ್ತಾರೆ ವೈದ್ಯರು.
4. ತಪ್ಪು ಪಾದರಕ್ಷೆಗಳ ಬಳಕೆ ವಾಕಿಂಗ್ ಮಾಡುವಾಗ ಯಾವ ರೀತಿಯ ಚಪ್ಪಲಿ ಅಥವಾ ಶೂ ಧರಿಸುತ್ತೀರಿ ಎಂಬುದು ಬಹಳ ಮುಖ್ಯ. ಸಪಾಟಾದ (Flat) ಪಾದರಕ್ಷೆಗಳು ಅಥವಾ ಮೆತ್ತನೆಯ ಸೌಲಭ್ಯವಿಲ್ಲದ ಶೂಗಳು ನೆಲದ ಆಘಾತವನ್ನು ಹೀರಿಕೊಳ್ಳುವುದಿಲ್ಲ. ಇದು ಪಾದದ ನೋವಿನಿಂದ ಹಿಡಿದು ಬೆನ್ನು ನೋವಿನವರೆಗೂ ತಲುಪಬಹುದು. ಯಾವಾಗಲೂ ಪಾದಗಳಿಗೆ ಉತ್ತಮ ಬೆಂಬಲ ನೀಡುವ ಮತ್ತು ಮೆತ್ತಗಿರುವ ಕಂಫರ್ಟ್ ಶೂಗಳನ್ನು ಬಳಸಿ.
5. ನೋವನ್ನು ನಿರ್ಲಕ್ಷಿಸುವುದು ವಾಕಿಂಗ್ ಮಾಡುವಾಗ ಬೆನ್ನು ಅಥವಾ ಕಾಲುಗಳಲ್ಲಿ ಸಣ್ಣ ನೋವು ಕಾಣಿಸಿಕೊಂಡರೂ ಅದನ್ನು ನಿರ್ಲಕ್ಷಿಸಬೇಡಿ. ನೋವು ಎನ್ನುವುದು ದೇಹವು ನೀಡುವ ಎಚ್ಚರಿಕೆಯ ಸಂಕೇತವಾಗಿದೆ. ನೋವಿನ ನಡುವೆಯೂ ವಾಕಿಂಗ್ ಮುಂದುವರಿಸಿದರೆ ಸಮಸ್ಯೆ ಉಲ್ಬಣಿಸಬಹುದು. ಅಂತಹ ಸಮಯದಲ್ಲಿ ವಿಶ್ರಾಂತಿ ತೆಗೆದುಕೊಳ್ಳಿ ಮತ್ತು ನೋವು ಕಡಿಮೆಯಾಗದಿದ್ದರೆ ತಕ್ಷಣ ವೈದ್ಯರನ್ನು ಸಂಪರ್ಕಿಸಿ.
