ಮಿಲಾನ್ ನಗರದಲ್ಲಿ ನಡೆದ ಪ್ರತಿಷ್ಠಿತ ‘ವೋಗ್ ವರ್ಲ್ಡ್’ ಫ್ಯಾಷನ್ ಶೋನಲ್ಲಿ ಭಾರತದ ನ್ಯಾಷನಲ್ ಕ್ರಶ್, ನಟಿ ರಶ್ಮಿಕಾ ಮಂದಣ್ಣ ತಮ್ಮ ವಿಭಿನ್ನ ಶೈಲಿಯ ಉಡುಪಿನ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ. ಇದೇ ಮೊದಲ ಬಾರಿಗೆ ಈ ಜಾಗತಿಕ ವೇದಿಕೆಯಲ್ಲಿ ಕಾಣಿಸಿಕೊಂಡಿರುವ ರಶ್ಮಿಕಾ, ಭಾರತೀಯ ಶೈಲಿಯ ಮೆರುಗಿನೊಂದಿಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹೊಸ ಫ್ಯಾಷನ್ ಟ್ರೆಂಡ್ ಹುಟ್ಟುಹಾಕಿದ್ದಾರೆ.
ಪ್ರಸಿದ್ಧ ಭಾರತೀಯ ವಿನ್ಯಾಸಕಿ ಅನಾಮಿಕಾ ಖನ್ನಾ ವಿನ್ಯಾಸಗೊಳಿಸಿದ ಕಪ್ಪು ಬಣ್ಣದ ಗೌನ್ ಧರಿಸಿ ರಶ್ಮಿಕಾ ಮಿಂಚಿದ್ದಾರೆ. ಹೈದರಾಬಾದ್‌ನ ಫಲಕ್ ನುಮಾ ಪ್ಯಾಲೇಸ್‌ನಲ್ಲಿ ನಡೆದ ಇಂಡಿಯಾ ಕೌಚರ್ ವೀಕ್‌ನಲ್ಲಿ ಪ್ರದರ್ಶನಗೊಂಡಿದ್ದ ‘ಮೂನ್‌ಲಿಟ್ ಪ್ಯಾಲೇಸ್’ ಸರಣಿಯ ಉಡುಪು ಇದಾಗಿದೆ. ಸಂಪೂರ್ಣ ಕಪ್ಪು ಲೇಸ್ ಎಂಬ್ರಾಯ್ಡರಿ, ಜಾಲರಿ ವಿನ್ಯಾಸ ಹಾಗೂ ಸೊಂಟದ ಭಾಗದಲ್ಲಿ ಬೆಳ್ಳಿಯ ಕಸೂತಿ ಕೆಲಸಗಳನ್ನು ಹೊಂದಿರುವ ಈ ಗೌನ್ ರಶ್ಮಿಕಾ ಅವರಿಗೆ ಅತ್ಯಂತ ಸುಂದರವಾಗಿ ಒಪ್ಪುತ್ತಿತ್ತು.
ವಿಶೇಷವೆಂದರೆ ಈ ಸುಂದರ ಗೌನ್ ಸಿದ್ಧಪಡಿಸಲು ಅನಾಮಿಕಾ ಖನ್ನಾ ಅವರ ತಂಡ ಬರೋಬ್ಬರಿ 350 ಗಂಟೆಗಳ ಕಾಲ ಶ್ರಮಿಸಿದೆ. ಉಡುಪಿನ ಮೇಲಿನ ಕೈಕೆಲಸ, ಲೇಸ್ ವಿನ್ಯಾಸ ಮತ್ತು ಕಸೂತಿ ಕೆಲಸಗಳೇ ಇದಕ್ಕೆ ಪ್ರಮುಖ ಕಾರಣ.
ಈ ಉಡುಪಿಗೆ ತಕ್ಕಂತೆ ರಶ್ಮಿಕಾ ತಮ್ಮ ಆಭರಣಗಳ ಆಯ್ಕೆಯಲ್ಲೂ ಜಾಗರೂಕತೆ ವಹಿಸಿದ್ದರು. ಪ್ರಸಿದ್ಧ ಸ್ಟೈಲಿಸ್ಟ್ ಪ್ರಿಯಾಂಕಾ ಕಪಾಡಿಯಾ ಅವರ ನಿರ್ದೇಶನದಂತೆ ಸ್ವರೋವ್ಸ್ಕಿ ಬ್ರ್ಯಾಂಡ್‌ನ ಆಕರ್ಷಕ ಉಂಗುರಗಳು ಮತ್ತು ವಿಯೆನ್ನಾ ಇಯರ್ ಕಫ್ ಧರಿಸಿದ್ದರು. ಇದರೊಂದಿಗೆ ಗೂಚಿ ಬ್ರ್ಯಾಂಡ್‌ನ ಹ್ಯಾಂಡ್‌ಬ್ಯಾಗ್ ಹಾಗೂ ಆಕ್ವಾಜುರಾ ಹೀಲ್ಸ್ ಬಳಸಿ ತಮ್ಮ ಸೌಂದರ್ಯವನ್ನು ಮತ್ತಷ್ಟು ಹೆಚ್ಚಿಸಿಕೊಂಡಿದ್ದರು.
ಮುಖದ ಸೌಂದರ್ಯಕ್ಕೆ ಸಾಂಪ್ರದಾಯಿಕ ಹಾಗೂ ನೈಸರ್ಗಿಕ ಸ್ಪರ್ಶ ನೀಡಿದ್ದ ರಶ್ಮಿಕಾ, ತೆರೆದ ಕೇಶರಾಶಿಯೊಂದಿಗೆ ಕಣ್ಣಿನ ಮೇಕಪ್‌ಗೆ ಹೆಚ್ಚು ಒತ್ತು ನೀಡಿದ್ದರು. ಜಾಗತಿಕ ಫ್ಯಾಷನ್ ವೇದಿಕೆಯಲ್ಲಿ ರಶ್ಮಿಕಾ ಅವರ ಈ ಹೊಸ ಲುಕ್ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡುತ್ತಿದೆ.
