ಪೋಷಕರ ನಿಸ್ವಾರ್ಥ ಪ್ರೀತಿ ಹಾಗೂ ಕಾಳಜಿ ಹಲವು ಬಾರಿ ಅತ್ಯಂತ ಸಣ್ಣ ವಿಚಾರಗಳಲ್ಲಿ ಎದ್ದು ಕಾಣುತ್ತದೆ. ಮಕ್ಕಳ ಸಣ್ಣ ಅಗತ್ಯತೆಗಳಿಗೂ ಅಪ್ಪ-ಅಮ್ಮ ಪಡುವ ಆತಂಕ ಮತ್ತು ತೋರುವ ಮುತುವರ್ಜಿಗೆ ಯಾವುದೇ ಮಿತಿಯಿರುವುದಿಲ್ಲ. ಉತ್ತರ ಪ್ರದೇಶದ ಜಾನ್‌ಪುರದಿಂದ ದೆಹಲಿಗೆ ಪ್ರಯಾಣಿಸುತ್ತಿದ್ದ ಯುವತಿಯೊಬ್ಬರು ತಮ್ಮ ತಂದೆಯ ಇಂತಹದ್ದೇ ಒಂದು ಅಪರೂಪದ ಪ್ರೀತಿಯ ಕ್ಷಣವನ್ನು ಹಂಚಿಕೊಂಡಿದ್ದು, ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿಷಯ ಅಪಾರ ಜನರ ಹೃದಯ ತಟ್ಟಿದೆ.
ದೆಹಲಿ ವಿಶ್ವವಿದ್ಯಾಲಯದಲ್ಲಿ ಸಂಶೋಧನಾ ವಿದ್ಯಾರ್ಥಿನಿಯಾಗಿರುವ ಆಕೃತಿ ಸಿಂಗ್ ಅವರು ತಮ್ಮ ಊರಾದ ಜಾನ್‌ಪುರದಿಂದ ರೈಲಿನಲ್ಲಿ ದೆಹಲಿಗೆ ಮರಳುತ್ತಿದ್ದ ಸಂದರ್ಭದಲ್ಲಿ ಈ ಘಟನೆ ನಡೆದಿದೆ. ಮಗಳನ್ನು ಬೀಳ್ಕೊಡಲು ರೈಲ್ವೆ ನಿಲ್ದಾಣಕ್ಕೆ ಬಂದಿದ್ದ ತಂದೆ, ರೈಲು ಬಂದು ನಿಂತಾಗ ಆಕೆಯನ್ನು ಸುರಕ್ಷಿತವಾಗಿ ಬೋಗಿಯೊಳಗೆ ಕೂರಿಸಿದ್ದಾರೆ. ರೈಲು ನಿಲ್ದಾಣದಲ್ಲಿ ಕೇವಲ 10 ನಿಮಿಷ ಮಾತ್ರ ನಿಲ್ಲುವ ಕಾರಣ, ಆ ಅವಸರದಲ್ಲಿ ನೀರು ಖರೀದಿಸುವುದನ್ನು ಇಬ್ಬರೂ ಮರೆತಿದ್ದಾರೆ. ಮಗಳು ರೈಲು ಹತ್ತಿದ್ದನ್ನು ಖಚಿತಪಡಿಸಿಕೊಂಡ ತಂದೆ, ಬೀಳ್ಕೊಟ್ಟು ನಿಲ್ದಾಣದಿಂದ ಹೊರಟು ಮನೆಗೆ ಹೆಜ್ಜೆ ಹಾಕಿದ್ದಾರೆ.
ಆದರೆ ಮಾರ್ಗಮಧ್ಯೆ ಮಗಳಿಗೆ ಕುಡಿಯಲು ನೀರಿದೆಯೋ ಇಲ್ಲವೋ ಎಂಬ ಆತಂಕ ತಂದೆಯನ್ನು ಕಾಡಿದೆ. ತಕ್ಷಣ ಮಗಳಿಗೆ ಕರೆ ಮಾಡಿದ ಅವರು, ಕುಡಿಯುವ ನೀರು ಸಿಕ್ಕಿತೇ ಎಂದು ವಿಚಾರಿಸಿದ್ದಾರೆ. ರೈಲಿನಲ್ಲೇ ನೀರಿನ ಬಾಟಲಿಗಳು ಮಾರಾಟಕ್ಕೆ ಬರುತ್ತವೆ, ತೊಂದರೆಯಾಗುವುದಿಲ್ಲ ಎಂದು ಮಗಳು ಸಮಾಧಾನಪಡಿಸಿದರೂ ತಂದೆಯ ಮನಸ್ಸು ಒಪ್ಪಲಿಲ್ಲ. ಎಲ್ಲೋ ನೀರು ಸಿಗದೆ ಮಗಳು ಪ್ರಯಾಣದುದ್ದಕ್ಕೂ ಬಾಯಾರಿಕೆಯಿಂದ ಕಷ್ಟಪಡಬಹುದೇನೋ ಎಂಬ ಚಿಂತೆ ಅವರನ್ನು ಕಾಡಿದೆ.
ಮಗಳ ಮಾತು ಕೇಳಿಯೂ ಸಮಾಧಾನಗೊಳ್ಳದ ತಂದೆ, ಅರ್ಧ ದಾರಿಯಿಂದಲೇ ವಾಪಸ್ ರೈಲ್ವೆ ನಿಲ್ದಾಣಕ್ಕೆ ಧಾವಿಸಿ, ನೀರಿನ ಬಾಟಲಿ ಖರೀದಿಸಿ ರೈಲು ಹೊರಡುವಷ್ಟರಲ್ಲಿ ಓಡೋಡಿ ಬಂದು ಮಗಳ ಕೈಗಿಟ್ಟಿದ್ದಾರೆ. ತಂದೆಯ ಈ ಅಪಾರ ಕಾಳಜಿ ಹಾಗೂ ಕಳಕಳಿಯನ್ನು ಕಂಡು ಆಕೃತಿ ಸಿಂಗ್ ಭಾವುಕರಾಗಿದ್ದಾರೆ. ಭಾರತೀಯ ತಂದೆಯಂದಿರು ತಮ್ಮ ಪ್ರೀತಿಯನ್ನು ದೊಡ್ಡ ಮಾತುಗಳಲ್ಲಿ ಹೇಳಿಕೊಳ್ಳುವುದಿಲ್ಲ, ಆದರೆ ಇಂತಹ ಸಣ್ಣಪುಟ್ಟ ಕಾಳಜಿಗಳ ಮೂಲಕವೇ ತಮ್ಮ ಮಕ್ಕಳ ಮೇಲಿನ ಮಮತೆಯನ್ನು ತೋರ್ಪಡಿಸುತ್ತಾರೆ ಎಂದು ಅವರು ಕಣ್ಣೀರಾಗಿದ್ದಾರೆ.
ತಂದೆಯ ಈ ಮುಗ್ಧ ಪ್ರೀತಿಯನ್ನು ವಿಡಿಯೋ ಮಾಡಿ ಹಂಚಿಕೊಂಡಿರುವ ಆಕೃತಿ, ಇಂತಹ ತಂದೆ ಹೆಮ್ಮೆಪಡುವಂತೆ ಬದುಕಿ ತೋರಿಸುವುದೇ ನನ್ನ ಜೀವನದ ಗುರಿ ಎಂದು ಭಾವನಾತ್ಮಕವಾಗಿ ಬರೆದುಕೊಂಡಿದ್ದಾರೆ. ಈ ವಿಡಿಯೋ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದಂತೆ ಲಕ್ಷಾಂತರ ಜನರು ಮೆಚ್ಚುಗೆ ವ್ಯಕ್ತಪಡಿಸಿದ್ದು, ಭಾರತೀಯ ತಂದೆಯಂದಿರ ಮೂಕ ಪ್ರೀತಿಗೆ ಯಾವುದೇ ಸಾಟಿಯಿಲ್ಲ ಎಂದು ಹಲವರು ತಮ್ಮ ಜೀವನದ ಅನುಭವಗಳನ್ನು ನೆನಪಿಸಿಕೊಂಡಿದ್ದಾರೆ. ಸಣ್ಣ ನೀರಿನ ಬಾಟಲಿಯ ಹಿಂದೆ ಅಡಗಿದ್ದ ತಂದೆಯ ಅಪಾರ ವಾತ್ಸಲ್ಯ ಪ್ರತಿಯೊಬ್ಬ ಹೆಣ್ಣುಮಕ್ಕಳ ಹೃದಯವನ್ನು ಕಲಕುವಂತೆ ಮಾಡಿದೆ.
