ಕೊನೆಗೂ ಸಿಕ್ತು ಗ್ರೀನ್ ಸಿಗ್ನಲ್: ವಿಜಯ್ ನಟನೆಯ ಕೊನೆಯ ಸಿನಿಮಾ ‘ಜನ ನಾಯಕನ್’ ಬಿಡುಗಡೆ ದಿನಾಂಕ ಫಿಕ್ಸ್!

ತಮಿಳುನಾಡು ಮುಖ್ಯಮಂತ್ರಿ ಹಾಗೂ ಖ್ಯಾತ ನಟ ವಿಜಯ್ ಅವರ ಬಹುನಿರೀಕ್ಷಿತ ಕೊನೆಯ ಸಿನಿಮಾ ‘ಜನ ನಾಯಕನ್’ ಬಿಡುಗಡೆಗೆ ಕೊನೆಗೂ ಹಾದಿ ಸುಗಮವಾಗಿದೆ. ಈ ವರ್ಷದ ಜನವರಿ 9 ರಂದೇ ತೆರೆಗೆ ಬರಬೇಕಿದ್ದ ಈ ಚಿತ್ರವು ಸೆನ್ಸಾರ್ ಮಂಡಳಿಯ ತಡೆಯಿಂದಾಗಿ ಮುಂದೂಡಲ್ಪಟ್ಟಿತ್ತು. ಆದರೆ ಇತ್ತೀಚೆಗೆ ವಿಜಯ್ ಅವರ ಆಪ್ತ ಕಾರ್ಯದರ್ಶಿ ಜಗದೀಶ್ ಪಾಲನಿ ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ “ನಿರೀಕ್ಷೆಗಳು ನಿಜವಾಗುತ್ತಿವೆ, ಜುಲೈ 23 ಕ್ಕಾಗಿ ಕಾಯಲು ಸಾಧ್ಯವಿಲ್ಲ” ಎಂಬ ಅರ್ಥದ ಪೋಸ್ಟ್ ಹಂಚಿಕೊಳ್ಳುವ ಮೂಲಕ ಸಿನಿಮಾ ಬಿಡುಗಡೆಯ ಸುಳಿವು ನೀಡಿದ್ದಾರೆ. ಅಧಿಕೃತ ಘೋಷಣೆ ಬಾಕಿ ಇದ್ದರೂ, ಜುಲೈ 23 ಅಥವಾ 24 ರಂದು ಸಿನಿಮಾ ವಿಶ್ವದಾದ್ಯಂತ ತೆರೆಗೆ ಬರುವುದು ಬಹುತೇಕ ಖಚಿತ ಎನ್ನಲಾಗುತ್ತಿದೆ.

ಚಿತ್ರಕ್ಕೆ ಸಿಕ್ಕಿದೆ ‘A’ ಸರ್ಟಿಫಿಕೇಟ್; ರನ್‌ಟೈಮ್ ಎಷ್ಟು?

ಕೇಂದ್ರೀಯ ಚಲನಚಿತ್ರ ಪ್ರಮಾಣೀಕರಣ ಮಂಡಳಿಯು (CBFC) ಜುಲೈ 9 ರಂದು ಈ ಚಿತ್ರಕ್ಕೆ ‘A’ (ವಯಸ್ಕರಿಗೆ ಮಾತ್ರ) ಪ್ರಮಾಣಪತ್ರವನ್ನು ನೀಡಿದೆ. ಈ ಪ್ರಮಾಣಪತ್ರದ ಪ್ರಕಾರ, ‘ಜನ ನಾಯಕನ್’ ಸಿನಿಮಾ ಒಟ್ಟು 3 ಗಂಟೆ 3 ನಿಮಿಷಗಳ (183 ನಿಮಿಷ 11 ಸೆಕೆಂಡ್) ಸುದೀರ್ಘ ರನ್‌ಟೈಮ್ ಹೊಂದಿದೆ.

ಸೆನ್ಸಾರ್ ಮಂಡಳಿ ಸೂಚಿಸಿದ ಪ್ರಮುಖ 12 ಬದಲಾವಣೆಗಳು:

ಚಿತ್ರಮಂದಿರಗಳಲ್ಲಿ ಪ್ರದರ್ಶನಗೊಳ್ಳುವ ಮುನ್ನ ಚಿತ್ರದಲ್ಲಿ ಕೆಲವು ಪ್ರಮುಖ ಕತ್ತರಿ ಹಾಗೂ ಬದಲಾವಣೆಗಳನ್ನು ಮಾಡಲು ಸೆನ್ಸಾರ್ ಮಂಡಳಿ ಸೂಚಿಸಿದೆ. ಅವುಗಳ ವಿವರ ಇಲ್ಲಿದೆ:

• ಅಂಬೇಡ್ಕರ್ ಪುಸ್ತಕದ ಕವರ್ ಮತ್ತು ಸಂಭಾಷಣೆ: ಪುಸ್ತಕದ ಕವರ್ ಪುಟದ ಮೇಲಿದ್ದ ಡಾ. ಬಿ.ಆರ್. ಅಂಬೇಡ್ಕರ್ ಅವರ ಚಿತ್ರದ ದೃಶ್ಯಗಳನ್ನು ಬದಲಾಯಿಸಲಾಗಿದೆ. ಅಲ್ಲದೆ, “ಅಂಬೇಡ್ಕರ್… ಟು… ಟಿವಿಕೆ ಸತ್ತಂ” ಎಂಬ ಸಂಭಾಷಣೆಯನ್ನು ಕೈಬಿಡಲಾಗಿದೆ.

• ‘TVK’ ಪದಕ್ಕೆ ಮ್ಯೂಟ್: ಆಡಿಯೋ ಮತ್ತು ವಿಡಿಯೋ ಎರಡರಲ್ಲೂ ಬಳಕೆಯಾಗಿದ್ದ ವಿಜಯ್ ಅವರ ರಾಜಕೀಯ ಪಕ್ಷದ ಹೆಸರಾದ ‘TVK’ (ತಮಿಳಗ ವೆಟ್ರಿ ಕಳಗಂ) ಪದವನ್ನು ಮ್ಯೂಟ್ ಹಾಗೂ ಬದಲಾವಣೆ ಮಾಡಲು ಆದೇಶಿಸಲಾಗಿದೆ.

• ರಾಷ್ಟ್ರಧ್ವಜದ ದೃಶ್ಯ ಮತ್ತು ಸಂಭಾಷಣೆಗಳು: ಒಂದು ದೃಶ್ಯದಲ್ಲಿದ್ದ ಭಾರತದ ರಾಷ್ಟ್ರಧ್ವಜದ ದೃಶ್ಯಗಳನ್ನು ತೆಗೆದುಹಾಕಲು ಸೂಚಿಸಲಾಗಿದೆ. ಅದರೊಂದಿಗೆ “ಭಾಗವತನ್”, “ರಂಗನಾಥರ್” ಹಾಗೂ ಕೆಲವು ಅಶ್ಲೀಲ ಪದಗಳನ್ನು ಮ್ಯೂಟ್ ಮಾಡಲಾಗಿದೆ.

• ದೇಶದ ಬಗೆಗಿನ ಸಂಭಾಷಣೆ: “ಇಂಡಿಯಾ ಎನ್ ಕಲ್ಲಾ ವಿಳಾ ವೈಕಾರೇನ್” ಎಂಬ ಸಾಲುಗಳನ್ನು ಹೊಂದಿದ್ದ ಸಂಭಾಷಣೆಯನ್ನು ಮ್ಯೂಟ್ ಮಾಡಲು ಸೂಚಿಸಲಾಗಿದೆ.

• ಇತರ ಬದಲಾವಣೆಗಳು: ಮಗುವೊಂದನ್ನು ಸುಡುವ ಭಯಾನಕ ದೃಶ್ಯವನ್ನು ತೆಗೆದುಹಾಕಲಾಗಿದ್ದು, “ಶಿಲುಬೆಯಿಲ್ಲಾ” ಮತ್ತು “ಶೀಲಾ ರಾಣಿ” ಎಂಬ ಹೆಸರನ್ನು ಚಿತ್ರದಲ್ಲಿ ಬಳಸಿರುವೆಡೆಯಲ್ಲೆಲ್ಲ ಬದಲಾಯಿಸಲು ಆದೇಶಿಸಲಾಗಿದೆ.

ಒಟ್ಟಾರೆಯಾಗಿ ಚಿತ್ರದ ಒಟ್ಟು ಅವಧಿಯಲ್ಲಿ 20 ಸೆಕೆಂಡ್‌ಗಳ ದೃಶ್ಯಗಳನ್ನು ಕತ್ತರಿಸಲಾಗಿದ್ದು, 10 ಸೆಕೆಂಡ್‌ಗಳ ಪರ್ಯಾಯ ದೃಶ್ಯಗಳನ್ನು ಸೇರಿಸಲಾಗಿದೆ. ಆದಾಗ್ಯೂ ಚಿತ್ರದ ಒಟ್ಟು ರನ್‌ಟೈಮ್‌ನಲ್ಲಿ ಯಾವುದೇ ಬದಲಾವಣೆಯಾಗಿಲ್ಲ.

ಸೆನ್ಸಾರ್ ವಿವಾದ ಮತ್ತು ಲೀಕ್ ಭೀತಿ

ಎಚ್. ವಿನೋದ್ ನಿರ್ದೇಶನದ ಈ ರಾಜಕೀಯ ಆಕ್ಷನ್ ಸಿನಿಮಾ ವಿಜಯ್ ಅವರ ನಟನಾ ವೃತ್ತಿಜೀವನದ ಕೊನೆಯ ಚಿತ್ರವಾಗಿದೆ. ಕೆವಿಎನ್ ಪ್ರೊಡಕ್ಷನ್ಸ್ ಸಂಸ್ಥೆಯು ಸರಿಸುಮಾರು 500 ಕೋಟಿ ರೂ. ಬಜೆಟ್‌ನಲ್ಲಿ ಈ ಚಿತ್ರವನ್ನು ನಿರ್ಮಿಸಿದೆ. ಡಿಸೆಂಬರ್ 2025 ರಲ್ಲೇ ಸೆನ್ಸಾರ್‌ಗಾಗಿ ಅರ್ಜಿ ಸಲ್ಲಿಸಲಾಗಿದ್ದರೂ, ಮಂಡಳಿಯ ಆಕ್ಷೇಪಣೆಗಳಿಂದಾಗಿ ತಿಂಗಳುಗಟ್ಟಲೆ ಬಿಡುಗಡೆ ತಡವಾಗಿತ್ತು. ಇದರ ನಡುವೆ ಏಪ್ರಿಲ್‌ನಲ್ಲಿ ಚಿತ್ರದ ಪೂರ್ಣ ದೃಶ್ಯಗಳು ಆನ್‌ಲೈನ್‌ನಲ್ಲಿ ಸೋರಿಕೆಯಾಗಿದ್ದು ದೊಡ್ಡ ಆತಂಕ ಸೃಷ್ಟಿಸಿತ್ತು. ಇದೀಗ ಎಲ್ಲಾ ವಿಘ್ನಗಳನ್ನು ದಾಟಿ ಸಿನಿಮಾ ಅಬ್ಬರಿಸಲು ಸಜ್ಜಾಗಿದೆ. ಚಿತ್ರದಲ್ಲಿ ಪೂಜಾ ಹೆಗ್ಡೆ, ಬಾಬಿ ಡಿಯೋಲ್ ಪ್ರಮುಖ ಪಾತ್ರಗಳಲ್ಲಿದ್ದು, ಅನಿರುದ್ಧ್ ರವಿಚಂದರ್ ಸಂಗೀತ ನೀಡಿದ್ದಾರೆ.