ಇಂದಿನ ಡಿಜಿಟಲ್ ಯುಗದಲ್ಲಿ PhonePe, Google Pay, Paytm ನಂತಹ UPI ಆಪ್ಗಳನ್ನು ಬಳಸುವವರಿಗೆ ಒಂದು ಪ್ರಮುಖ ಮಾಹಿತಿ ಇದೆ. ಸಾಮಾನ್ಯವಾಗಿ ನಾವು ಒಟಿಟಿ (OTT) ಚಂದಾದಾರಿಕೆಗಳು, ಎಸ್ಐಪಿ (SIP), ವಿಮೆ ಅಥವಾ ಇತರ ಸೇವೆಗಳಿಗಾಗಿ ‘ಯೂಪಿಐ ಆಟೋ-ಪೇ’ (UPI Auto-pay) ಸೆಟ್ ಮಾಡಿರುತ್ತೇವೆ. ಆದರೆ ಕಾಲಾನಂತರದಲ್ಲಿ ಇವುಗಳನ್ನು ರದ್ದುಗೊಳಿಸಲು ಮರೆತುಬಿಡುತ್ತೇವೆ. ಇದರಿಂದಾಗಿ ನಮ್ಮ ಗಮನಕ್ಕೆ ಬಾರದೆಯೇ ಹಣ ಕಟ್ ಆಗುತ್ತಿರುತ್ತದೆ.
ಅಸಲಿ ಸಮಸ್ಯೆ ಏನು?
ಅನೇಕ ಬಾರಿ ನಾವು ಕೆಲವು ಸೇವೆಗಳಿಗಾಗಿ ಆಟೋ-ಪೇ ಸೆಟ್ ಮಾಡಿಕೊಂಡಿರುತ್ತೇವೆ. ಆದರೆ ಆ ಸೇವೆಯ ಅವಶ್ಯಕತೆ ಮುಗಿದ ನಂತರವೂ ಅದನ್ನು ಕ್ಯಾನ್ಸಲ್ ಮಾಡಲು ಮರೆಯುತ್ತೇವೆ. ಇದರಿಂದ ಪ್ರತಿ ತಿಂಗಳು ಅಥವಾ ವರ್ಷಕ್ಕೊಮ್ಮೆ ನಮ್ಮ ಅನುಮತಿ ಇಲ್ಲದೆಯೇ ಅಕೌಂಟ್ನಿಂದ ಹಣ ಕಟ್ ಆಗುತ್ತಿರುತ್ತದೆ. ಈಗ ಎಲ್ಲಾ UPI ಆಪ್ಗಳಲ್ಲಿ ನೀವು ಸೆಟ್ ಮಾಡಿರುವ ಆಟೋ-ಪೇ ಮ್ಯಾಂಡೇಟ್ಗಳನ್ನು (Auto-pay Mandates) ಒಂದೇ ಕಡೆ ನೋಡಿ, ಅವುಗಳನ್ನು ರದ್ದುಗೊಳಿಸಲು ಅವಕಾಶವಿದೆ.
ಆಟೋ-ಪೇ ರದ್ದುಗೊಳಿಸುವುದು ಹೇಗೆ?
ಇದಕ್ಕಾಗಿ ಈ ಕೆಳಗಿನ ಹಂತಗಳನ್ನು ಅನುಸರಿಸಿ:
- ಮೊದಲಿಗೆ ಅಧಿಕೃತ UPI ವೆಬ್ಸೈಟ್ upihelp.npci.org.in ಓಪನ್ ಮಾಡಿ.
- ನಿಮ್ಮ ಮೊಬೈಲ್ ಸಂಖ್ಯೆ ಮತ್ತು ಕ್ಯಾಪ್ಚಾ ಕೋಡ್ ನಮೂದಿಸಿ.
- ನಿಮ್ಮ ಮೊಬೈಲ್ಗೆ ಬರುವ ಓಟಿಪಿ (OTP) ನಮೂದಿಸಿ ಲಾಗಿನ್ ಆಗಿ.
- ಅಲ್ಲಿ ‘Show My Auto-pay Mandates’ ಎಂಬ ಆಯ್ಕೆ ಕಾಣಿಸುತ್ತದೆ, ಅದರ ಮೇಲೆ ಕ್ಲಿಕ್ ಮಾಡಿ.
- ಈಗ ನಿಮ್ಮ UPI ಐಡಿಗೆ ಲಿಂಕ್ ಆಗಿರುವ ಎಲ್ಲಾ ಆಟೋ-ಪೇ ಲಿಸ್ಟ್ಗಳು ಕಾಣಿಸುತ್ತವೆ.
- ನಿಮಗೆ ಅಗತ್ಯವಿಲ್ಲದವುಗಳನ್ನು ನೀವು ‘Pause’ (ತಾತ್ಕಾಲಿಕ ತಡೆ) ಮಾಡಬಹುದು ಅಥವಾ ‘Revoke’ (ರದ್ದು) ಮಾಡಬಹುದು.
ಇದರಿಂದ ಆಗುವ ಪ್ರಯೋಜನವೇನು ?
ಹೀಗೆ ಅನಗತ್ಯ ಆಟೋ ಪೇಮೆಂಟ್ಗಳನ್ನು ರದ್ದುಗೊಳಿಸುವುದರಿಂದ ನಿಮ್ಮ ಹಣ ಉಳಿತಾಯವಾಗುತ್ತದೆ. ಅಕೌಂಟ್ನಲ್ಲಿರುವ ಬ್ಯಾಲೆನ್ಸ್ ನಿಮ್ಮ ಅರಿವಿಲ್ಲದೆ ಕಡಿಮೆಯಾಗುವುದನ್ನು ತಪ್ಪಿಸಬಹುದು.
