ಕೇಂದ್ರ ಸರ್ಕಾರ UPI ಶುಲ್ಕಗಳಿಗೆ ಸಂಬಂಧಿಸಿದಂತೆ ಮಹತ್ವದ ನಿರ್ಧಾರ ಕೈಗೊಂಡಿದೆ. ಅಕ್ಟೋಬರ್ 15ರಿಂದ MDR ಶುಲ್ಕಗಳನ್ನು ಜಾರಿಗೆ ತರಲು ಸಿದ್ಧತೆ ನಡೆದಿದೆ. ₹2 ಸಾವಿರಕ್ಕಿಂತ ಹೆಚ್ಚಿನ ಮೊತ್ತದ ಕೆಲವು ವಹಿವಾಟುಗಳಿಗೆ UPI ಶುಲ್ಕ ವಿಧಿಸಲಾಗುತ್ತದೆ. ಯಾವುದೇ ವ್ಯಾಪಾರಿಯ ಬಳಿ ₹2 ಸಾವಿರಕ್ಕಿಂತ ಹೆಚ್ಚಿನ ಮೊತ್ತ ಪಾವತಿಸಿದರೆ ಶುಲ್ಕ ಅನ್ವಯವಾಗಲಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.
ಇದುವರೆಗೆ UPI ವಹಿವಾಟುಗಳನ್ನು ಉಚಿತವಾಗಿ ನಡೆಸಬಹುದಾಗಿತ್ತು. ಅಂದರೆ, ಗ್ರಾಹಕರು ಯಾವುದೇ ಹೆಚ್ಚುವರಿ ಶುಲ್ಕ ಪಾವತಿಸಬೇಕಾಗಿರಲಿಲ್ಲ. ಆದರೆ ಅಕ್ಟೋಬರ್ನಿಂದ ನಿಯಮಗಳಲ್ಲಿ ಬದಲಾವಣೆಯಾಗಲಿದೆ ಎಂದು ವರದಿಯಾಗಿದೆ.
ಅಕ್ಟೋಬರ್ 15ರಿಂದ ಪರ್ಸನ್-ಟು-ಮರ್ಚೆಂಟ್ (P2M) ಮೂಲಕ ನಡೆಯುವ ಕೆಲವು UPI ಪಾವತಿಗಳಿಗೆ ಶುಲ್ಕ ವಿಧಿಸುವ ಪ್ರಸ್ತಾವವಿದೆ. ವ್ಯಾಪಾರಿಗಳ ಬಳಿ ₹2 ಸಾವಿರಕ್ಕಿಂತ ಹೆಚ್ಚಿನ ಮೊತ್ತದ ವಹಿವಾಟುಗಳಿಗೆ ಶುಲ್ಕ ಅನ್ವಯವಾಗಲಿದೆ. ಈ ಶುಲ್ಕವನ್ನು ಗ್ರಾಹಕರ ಮೇಲೆ ವಿಧಿಸಲು ಅವಕಾಶ ಇರುವುದಿಲ್ಲ. ವ್ಯಾಪಾರಿಗಳೇ ತಮ್ಮ ಬ್ಯಾಂಕ್ಗಳು ಅಥವಾ ಪೇಮೆಂಟ್ ಅಗ್ರಿಗೇಟರ್ಗಳಿಗೆ ಈ ಶುಲ್ಕವನ್ನು ಪಾವತಿಸಬೇಕಾಗುತ್ತದೆ.
ಈ ಶುಲ್ಕದ ಹಣ ಕೇಂದ್ರ ಸರ್ಕಾರಕ್ಕೆ ಹೋಗುವುದಿಲ್ಲ. ಬದಲಾಗಿ UPI ಪ್ಲಾಟ್ಫಾರ್ಮ್ಗಳು ಮತ್ತು ಬ್ಯಾಂಕ್ಗಳಿಗೆ ಸೇರುತ್ತದೆ. UPI ವ್ಯವಸ್ಥೆಯನ್ನು ಮತ್ತಷ್ಟು ಸುಧಾರಿಸಲು ಈ ಹಣವನ್ನು ಬಳಸಲಾಗುತ್ತದೆ ಎಂದು ವರದಿಯಲ್ಲಿ ಹೇಳಲಾಗಿದೆ.
₹25 ಸಾವಿರ ಪಾವತಿಸಿದರೆ ಎಷ್ಟು ಶುಲ್ಕ?
ಉದಾಹರಣೆಗೆ, ಗ್ರಾಹಕರೊಬ್ಬರು ಅಂಗಡಿಯಲ್ಲಿ ₹10 ಸಾವಿರ ಮೌಲ್ಯದ ವಸ್ತುವನ್ನು ಖರೀದಿಸಿ UPI ಮೂಲಕ ಪಾವತಿಸಿದರೆ, 0.4% ದರದಂತೆ ವ್ಯಾಪಾರಿಗೆ ₹40 ಶುಲ್ಕ ಬೀಳುತ್ತದೆ.ಅದೇ ರೀತಿ ₹25 ಸಾವಿರ ಪಾವತಿಸಿದರೆ 0.4% ದರದಂತೆ ₹100 ಶುಲ್ಕ ಅನ್ವಯಿಸುತ್ತದೆ. ₹50 ಸಾವಿರ ಪಾವತಿಸಿದರೆ ₹200 ಶುಲ್ಕ ಬೀಳುತ್ತದೆ.₹75 ಸಾವಿರ ಅಥವಾ ಅದಕ್ಕಿಂತ ಹೆಚ್ಚಿನ ಮೊತ್ತದ ವಹಿವಾಟು ಮಾಡಿದರೂ ಗರಿಷ್ಠ ಶುಲ್ಕ ₹300ಕ್ಕೆ ಸೀಮಿತವಾಗಿರುತ್ತದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.
ಇನ್ನು ₹2 ಸಾವಿರ ಅಥವಾ ಅದಕ್ಕಿಂತ ಕಡಿಮೆ ಮೊತ್ತದ ವಹಿವಾಟುಗಳಿಗೆ ಯಾವುದೇ MDR ಶುಲ್ಕ ಇರುವುದಿಲ್ಲ ಎಂದು ಹೇಳಲಾಗಿದೆ.
ರೈಲ್ವೆ ಟಿಕೆಟ್ ಬುಕ್ ಮಾಡಿದರೆ MDR ಶುಲ್ಕ ಬೀಳುತ್ತದೆಯೇ?
ನೀವು ರೈಲು ಟಿಕೆಟ್ಗಾಗಿ ₹3 ಸಾವಿರ ಪಾವತಿಸಿದ್ದೀರಿ ಎಂದುಕೊಳ್ಳಿ. ರೈಲು ಟಿಕೆಟ್ ಬುಕ್ಕಿಂಗ್ಗೆ ಫ್ಲಾಟ್ ₹5 MDR ಶುಲ್ಕ ನಿಗದಿಪಡಿಸಲಾಗಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.ಅಂದರೆ, ಟಿಕೆಟ್ನ ₹3 ಸಾವಿರ ಮೊತ್ತಕ್ಕೆ ಹೆಚ್ಚುವರಿಯಾಗಿ ₹5 ಶುಲ್ಕ ಅನ್ವಯವಾಗಬಹುದು. ಆದರೆ ಈ ₹5 ಶುಲ್ಕವನ್ನು ವ್ಯಾಪಾರಿಯೇ ಭರಿಸಬೇಕಾಗುತ್ತದೆ. ಹೀಗಾಗಿ ಗ್ರಾಹಕರು ಟಿಕೆಟ್ಗೆ ₹3 ಸಾವಿರವನ್ನೇ ಪಾವತಿಸಬೇಕಾಗುತ್ತದೆ.
ಅದೇ ರೀತಿ ₹10 ಸಾವಿರ ಮೌಲ್ಯದ ರೈಲು ಟಿಕೆಟ್ ಬುಕ್ ಮಾಡಿದರೂ MDR ಶುಲ್ಕ ₹5ರಷ್ಟೇ ಇರಲಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ.UPI ಶುಲ್ಕವನ್ನು ಗ್ರಾಹಕರ ಮೇಲೆ ವ್ಯಾಪಾರಿಗಳು ಹಾಕದಂತೆ ನೋಡಿಕೊಳ್ಳುವ ಜವಾಬ್ದಾರಿಯನ್ನು ಬ್ಯಾಂಕ್ಗಳಿಗೆ ಕೇಂದ್ರ ಸರ್ಕಾರ ನೀಡಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.
