ಇತ್ತೀಚಿನ ದಿನಗಳಲ್ಲಿ ಡಿಜಿಟಲ್ ಬ್ಯಾಂಕಿಂಗ್ ಎಷ್ಟೇ ಮುಂದುವರಿದಿದ್ದರೂ ಎಟಿಎಂ (ATM) ಯಂತ್ರಗಳ ಎಡವಟ್ಟು ಮಾತ್ರ ನಿಲ್ಲುತ್ತಿಲ್ಲ. ಯುಪಿಐ ಮೂಲಕ ಎಟಿಎಂನಿಂದ ನಗದು ಡ್ರಾ ಮಾಡಲು ಹೋದ ಗ್ರಾಹಕನೊಬ್ಬನಿಗೆ ಎಟಿಎಂ ಯಂತ್ರವೇ ಬರೋಬ್ಬರಿ 600 ರೂಪಾಯಿಗಳ ದಂಡ ಹಾಕಿದ ಆಘಾತಕಾರಿ ಘಟನೆಯೊಂದು ಮುಂಬೈ ಸೌತ್‌ನ ನಲಸೋಪಾರಾದಲ್ಲಿ ನಡೆದಿದೆ.
ಹಿಟಾಚಿ (Hitachi) ಕಂಪನಿ ನಿರ್ವಹಿಸುವ ಯುಪಿಐ ಕ್ಯಾಶ್ ವಿದ್‌ಡ್ರಾವಲ್ ಎಟಿಎಂ ಯಂತ್ರವೊಂದು, ಗ್ರಾಹಕ ಕೇಳಿದ ಹಣಕ್ಕಿಂತ ಕಡಿಮೆ ದುಡ್ಡು ನೀಡಿ ವಂಚಿಸಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ ಗಾಯದ ಮೇಲೆ ಬರೆ ಎಳೆದಂತೆ ಬಂದ ಅಲ್ಪಸ್ವಲ್ಪ ಹಣದಲ್ಲೂ ಒಂದು ಹರಿದ ನೋಟು ಪ್ರತ್ಯಕ್ಷವಾಗಿದ್ದು, ಈಗ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ಸದ್ದು ಮಾಡುತ್ತಿದೆ.
₹4,000 ಕೇಳಿದ್ರೆ ಸಿಕ್ಕಿದ್ದು ಬರೀ ₹3,600
ನಲಸೋಪಾರಾದ ಗಾಲಾ ನಗರ್ ಪ್ರದೇಶದಲ್ಲಿರುವ ಹಿಟಾಚಿ ಎಟಿಎಂ ಕಿಯೋಸ್ಕ್‌ನಲ್ಲಿ ಈ ಘಟನೆ ನಡೆದಿದೆ. ಗ್ರಾಹಕನೊಬ್ಬ ಎಟಿಎಂನ ಹೊಸ ತಂತ್ರಜ್ಞಾನವಾದ ‘UPI Cash Withdrawal’ ಸೌಲಭ್ಯ ಬಳಸಿ 4,000 ರೂಪಾಯಿ ಡ್ರಾ ಮಾಡಲು ಪ್ರಕ್ರಿಯೆ ಆರಂಭಿಸಿದ್ದಾನೆ. ಮೊಬೈಲ್‌ನಿಂದ ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಿ ಹಣ ಡ್ರಾ ಮಾಡಿದ ನಂತರ ಯಂತ್ರದಿಂದ ಬಂದ ಕ್ಯಾಶ್ ಎಣಿಸಿದಾಗ ಆತನಿಗೆ ತಲೆತಿರುಗಿದಂತಾಗಿದೆ
ಹಣದ ಕೊರತೆ: ಎಟಿಎಂ ಯಂತ್ರ 4,000 ರೂ. ಬದಲಿಗೆ ಕೇವಲ 3,600 ರೂಪಾಯಿಗಳನ್ನು ಮಾತ್ರ ಹೊರಹಾಕಿತ್ತು ಅಂದರೆ ನೇರವಾಗಿ 400 ರೂ. ನಷ್ಟವಾಗಿದೆ.
ಹರಿದ ನೋಟು: ಬಂದಿದ್ದ 3,600 ರೂಪಾಯಿಗಳ ಪೈಕಿ 200 ರೂಪಾಯಿಯ ಒಂದು ನೋಟು ಸಂಪೂರ್ಣವಾಗಿ ಹರಿದು ಹೋಗಿತ್ತು ಹೀಗೆ ಕಡಿಮೆ ಬಂದ 400 ರೂಪಾಯಿ ಹಾಗೂ ಕೈ ಸೇರಿದ 200 ರೂಪಾಯಿಯ ಹರಿದ ನೋಟು ಸೇರಿ ಗ್ರಾಹಕನಿಗೆ ಒಟ್ಟು 600 ರೂಪಾಯಿಗಳ ಭಾರಿ ನಷ್ಟ ಉಂಟಾಗಿದೆ
ಬ್ಯಾಂಕ್‌ಗೆ ಪ್ರೂಫ್ ನೀಡಲು ಸಿಸಿಟಿವಿ (CCTV) ಮುಂದೆಯೇ ವಿಡಿಯೋ ರೆಕಾರ್ಡ್
ಎಟಿಎಂ ಯಂತ್ರ ತನಗಿಂತ ಬುದ್ಧಿವಂತಿಕೆ ಪ್ರದರ್ಶಿಸಿದ್ದನ್ನು ಕಂಡ ಗ್ರಾಹಕ ತಕ್ಷಣವೇ ಅಲರ್ಟ್ ಆಗಿದ್ದಾನೆ. ತನಗೆ ನ್ಯಾಯ ಬೇಕು ಮತ್ತು ಬ್ಯಾಂಕ್ ಆಡಳಿತ ಮಂಡಳಿ ಹಾಗೂ ಹಿಟಾಚಿ ಕಂಪನಿಗೆ ಸಾಕ್ಷಿ ಒದಗಿಸಬೇಕು ಎಂದು ನಿರ್ಧರಿಸಿದ ಆತ, ಎಟಿಎಂ ಸೆಂಟರ್ ಒಳಗಿದ್ದ CCTV ಕ್ಯಾಮೆರಾದ ಮುಖಾಮುಖಿ ನಿಂತು ತನ್ನ ಮೊಬೈಲ್‌ನಲ್ಲಿ ಇಡೀ ಘಟನೆಯನ್ನು ಲೈವ್ ಆಗಿ ವಿಡಿಯೋ ರೆಕಾರ್ಡ್ ಮಾಡಿಕೊಂಡಿದ್ದಾನೆ.
ಕ್ಯಾಮೆರಾದ ಮುಂದೆಯೇ ನೋಟುಗಳನ್ನು ಮತ್ತೊಮ್ಮೆ ಒಂದೊಂದಾಗಿ ಎಣಿಸಿ ತನಗಾದ ಅನ್ಯಾಯವನ್ನು ವಿವರಿಸಿದ್ದಾನೆ. ಈ ವಿಡಿಯೋ ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ವೈರಲ್ ಆಗಿದ್ದು, ಎಟಿಎಂ ನಿರ್ವಹಣಾ ಸಂಸ್ಥೆಗಳ ಗುಣಮಟ್ಟದ ವಿರುದ್ಧ ಸಾರ್ವಜನಿಕರು ಆಕ್ರೋಶ ಹೊರಹಾಕುತ್ತಿದ್ದಾರೆ.
ಕಳೆದ ತಿಂಗಳು ಇದೇ ಎಟಿಎಂನಲ್ಲಿ ಉಲ್ಟಾ ಮ್ಯಾಜಿಕ್ ನಡೆದಿತ್ತು; 100 ಕೇಳಿದ್ರೆ 500 ಸಿಗ್ತಿತ್ತು
ಕುತೂಹಲಕಾರಿ ವಿಷಯ ಏನೆಂದರೆ, ಇದೇ ವಸಾಯಿ ಭಾಗದ ಗೋಲಾನಿ ನಾಕಾ ಪ್ರದೇಶದಲ್ಲಿರುವ ಹಿಟಾಚಿ ಕಂಪನಿಯ ಮತ್ತೊಂದು ಎಟಿಎಂ ಕಳೆದ ತಿಂಗಳು ವಿಭಿನ್ನ ತಾಂತ್ರಿಕ ದೋಷದಿಂದ ಸುದ್ದಿಯಾಗಿತ್ತು. ಆದರೆ ಆಗ ಗ್ರಾಹಕರಿಗೆ ನಷ್ಟವಾಗಿರಲಿಲ್ಲ, ಬದಲಿಗೆ ಬಂಪರ್ ಲಾಭವಾಗಿತ್ತು
ಕಳೆದ ತಿಂಗಳು ಎಟಿಎಂನಲ್ಲಿ ಗ್ರಾಹಕರು 100 ರೂ. ಡ್ರಾ ಮಾಡಲು ಕಮಾಂಡ್ ನೀಡಿದರೆ ಎಟಿಎಂ ಬರೋಬ್ಬರಿ 500 ರೂ. ಹೊರಹಾಕುತ್ತಿತ್ತು ಆದರೆ ಅಕೌಂಟ್‌ನಿಂದ ಕೇವಲ 100 ರೂ. ಮಾತ್ರ ಕಟ್ ಆಗುತ್ತಿತ್ತು.
ಅದೇ ರೀತಿ, 400 ರೂ. ಡ್ರಾ ಮಾಡಲು ಡಿಮ್ಯಾಂಡ್ ಇಟ್ಟರೆ ಬರೋಬ್ಬರಿ 2,000 ರೂ. ಕ್ಯಾಶ್ ಸಿಗುತ್ತಿತ್ತು
ಕಳೆದ ತಿಂಗಳು ಗ್ರಾಹಕರಿಗೆ ಜಾಸ್ತಿ ಹಣ ಲುಟಾಯಿಸಿದ್ದ ಹಿಟಾಚಿ ಎಟಿಎಂ, ಈ ತಿಂಗಳು ಮಾತ್ರ ಉಲ್ಟಾ ಬುದ್ಧಿ ತೋರಿಸಿ ಗ್ರಾಹಕರ ಜೇಬಿಗೆ ಕತ್ತರಿ ಹಾಕಿದೆ. ಎಟಿಎಂ ಯಂತ್ರಗಳ ಈ ನಿರಂತರ ತಾಂತ್ರಿಕ ಲೋಪದೋಷಗಳ ವಿರುದ್ಧ ಸೂಕ್ತ ತನಿಖೆ ನಡೆಸಿ, ಶಾಶ್ವತ ಮತ್ತು ಸ್ಥಿರವಾದ ಕ್ರಮ ಕೈಗೊಳ್ಳುವಂತೆ ಸ್ಥಳೀಯ ನಿವಾಸಿಗಳು ಹಾಗೂ ಗ್ರಾಹಕರು ಬ್ಯಾಂಕ್ ಅಧಿಕಾರಿಗಳನ್ನು ತೀವ್ರವಾಗಿ ಒತ್ತಾಯಿಸಿದ್ದಾರೆ.
