ಭಾರತದ ಎಲ್ಪಿಜಿ ಕೊರತೆಯ ಬಿಕ್ಕಟ್ಟು ಶಮನವಾಗುತ್ತಿರುವಂತೆ ಕಾಣುತ್ತಿದೆ. ಹೌದು ಬೇಡಿಕೆಯನ್ನು ಪೂರೈಸಲು ಟ್ಯಾಂಕರ್ಗಳು ಆಗಮಿಸುತ್ತಿವೆ ಮತ್ತು ದೇಶೀಯ ಉತ್ಪಾದನೆಯನ್ನು ಹೆಚ್ಚಿಸಲಾಗಿದೆ.
ಹಡಗು ಟ್ರ್ಯಾಕಿಂಗ್ ದತ್ತಾಂಶದ ಪ್ರಕಾರ ಎಲ್ಪಿಜಿ ಹೊತ್ತೊಯ್ಯುತ್ತಿರುವ ಇನ್ನೂ ಎರಡು ಭಾರತೀಯ ಧ್ವಜದ ಹಡಗುಗಳು ಪ್ರಸ್ತುತ ಹಾರ್ಮುಜ್ ಜಲಸಂಧಿಯ ಮೂಲಕ ಸಂಚರಿಸುತ್ತಿವೆ.
ಈ ಹಡಗುಗಳು ಇರಾನ್ನ ಕರಾವಳಿಗೆ ಸಮೀಪವಿರುವ ಮತ್ತು ಈ ಹಿಂದೆ ಇರಾನ್ನಿಂದ ಅನುಮತಿ ಪಡೆದ ನೌಕೆಗಳು ಬಳಸಿದ ಮಾರ್ಗವನ್ನೇ ಅನುಸರಿಸುತ್ತಿವೆ. ಶೀಘ್ರವೇ ಇವು ದೇಶಕ್ಕೆ ಆಗಮಿಸುವ ನಿರೀಕ್ಷೆ ಇದ್ದು, ಜನರಿಗೆ ಅನುಕೂಲವಾಗಲಿದೆ.
ಬ್ಲೂಮ್ಬರ್ಗ್ ವರದಿಯಲ್ಲಿ ಉಲ್ಲೇಖಿಸಿದಂತೆ ಜಗ್ ವಸಂತ್ ಮತ್ತು ಪೈನ್ ಗ್ಯಾಸ್ ಎಂಬ ಹೆಸರಿನ ಈ ಎರಡೂ ಬೃಹತ್ ಅನಿಲ ವಾಹಕ ನೌಕೆಗಳು ಸೋಮವಾರ ಮುಂಜಾನೆ ಯುಎಇ ಕರಾವಳಿಯಿಂದ ಇರಾನ್ನ ಕೇಶ್ಮ್ ಮತ್ತು ಲಾರಾಕ್ ದ್ವೀಪಗಳ ಕಡೆಗೆ ಉತ್ತರಕ್ಕೆ ಚಲಿಸಿವೆ.
ಪರ್ಷಿಯನ್ ಕೊಲ್ಲಿಯ ತೈಲ ಮತ್ತು ಅನಿಲ ಉತ್ಪಾದಕರನ್ನು ಜಾಗತಿಕ ಮಾರುಕಟ್ಟೆಗಳೊಂದಿಗೆ ಸಂಪರ್ಕಿಸುವ ಪ್ರಮುಖ ಮಾರ್ಗವಾದ ಹಾರ್ಮುಜ್ ಜಲಸಂಧಿಯು ಇರಾನ್ ಮೇಲೆ ಅಮೆರಿಕ ಮತ್ತು ಇಸ್ರೇಲ್ ದಾಳಿಗಳು ಪ್ರಾರಂಭವಾದಾಗಿನಿಂದ ಬಹುತೇಕ ಬಂದ್ ಆಗಿದೆ.
ಅಂದಿನಿಂದ ಇರಾನ್ ಸರಣಿ ದಾಳಿಗಳು ಮತ್ತು ಎಚ್ಚರಿಕೆಗಳ ಮೂಲಕ ಸಮುದ್ರದಲ್ಲಿ ಹಡಗುಗಳ ಸಂಚಾರವನ್ನು ಗಣನೀಯವಾಗಿ ನಿರ್ಬಂಧಿಸಿದೆ. ಇದರಿಂದಾಗಿ ಭಾರತ ಸೇರಿದಂತೆ ವಿವಿಧ ದೇಶಗಳಲ್ಲಿ ಎಲ್ಪಿಜಿ, ತೈಲದ ಕೊರತೆ ಎದುರಾಗಿದೆ.
ಭಾರತಕ್ಕೆ ಎರಡು ಹಡಗುಗಳು: ಈ ಎರಡೂ ಹಡಗುಗಳು ತಮ್ಮ ನಿರ್ದಿಷ್ಟ ಗುರಿಯನ್ನು ಸೂಚಿಸುವ ಬದಲಾಗಿ ಟ್ರಾನ್ಸ್ಪಾಂಡರ್ಗಳ ಮೂಲಕ ತಮ್ಮ ಭಾರತೀಯ ಗುರುತನ್ನು ಪ್ರಸಾರ ಮಾಡುತ್ತಿವೆ. ಈ ಮಾರ್ಗದಲ್ಲಿ ಸಂಚರಿಸುವ ಇತರ ನೌಕೆಗಳು ಸಹ ಇದೇ ರೀತಿಯ ಮುನ್ನೆಚ್ಚರಿಕೆ ಕ್ರಮವನ್ನು ಅನುಸರಿಸುತ್ತಿವೆ.
ಅಡುಗೆಗೆ ಪ್ರಮುಖವಾಗಿ ಬಳಸಲಾಗುವ ಇಂಧನ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗಿರುವ ಹಿನ್ನೆಲೆಯಲ್ಲಿ ಇಂಧನ ಭದ್ರತೆಗಾಗಿ ಇರಾನ್ ಜೊತೆ ಮಾತುಕತೆ ನಡೆಸುತ್ತಿರುವ ಭಾರತದತ್ತಲೇ ಈ ಹಡಗುಗಳು ಬರುತ್ತಿರುವ ಸಾಧ್ಯತೆಯಿದೆ.
ಈ ತಿಂಗಳ ಆರಂಭದಲ್ಲಿ ಭಾರತೀಯ ಧ್ವಜದ ಇತರ ಎರಡು ಎಲ್ಪಿಜಿ ನೌಕೆಗಳು ಇದೇ ಮಾರ್ಗದ ಮೂಲಕ ಯಶಸ್ವಿಯಾಗಿ ಸಂಚರಿಸಿದ್ದವು. ಹಾರ್ಮುಜ್ ಜಲಸಂಧಿಯನ್ನು ದಾಟಲು ಸಾಮಾನ್ಯವಾಗಿ 14 ಗಂಟೆಗಳ ಸಮಯ ಬೇಕಾಗುತ್ತದೆ. ಒಂದು ವೇಳೆ ಜಗ್ ವಸಂತ್ ಮತ್ತು ಪೈನ್ ಗ್ಯಾಸ್ ಹಡಗುಗಳು ಯಾವುದೇ ಅಡೆತಡೆಯಿಲ್ಲದೆ ತಮ್ಮ ಪ್ರಸ್ತುತ ಹಾದಿಯಲ್ಲೇ ಮುಂದುವರಿದರೆ, ಸೋಮವಾರ ಸಂಜೆಯ ವೇಳೆಗೆ ಓಮನ್ ಕೊಲ್ಲಿಯನ್ನು ಪ್ರವೇಶಿಸುವ ನಿರೀಕ್ಷೆಯಿದೆ.
ಹಾರ್ಮುಜ್ ಜಲಸಂಧಿಯನ್ನು ಯಶಸ್ವಿಯಾಗಿ ದಾಟಿದ ಹಲವಾರು ನೌಕೆಗಳು ಇರಾನ್ ಕರಾವಳಿಯನ್ನು ಅಂಟಿಕೊಂಡೇ ಸಾಗಿವೆ. ಇದು ಟೆಹ್ರಾನ್ ಜಾರಿಗೊಳಿಸಿರುವ ಸಂಚಾರ ನಿರ್ವಹಣಾ ವ್ಯವಸ್ಥೆಯ ಅಸ್ತಿತ್ವವನ್ನು ಸೂಚಿಸುತ್ತದೆ. ಸಾಮಾನ್ಯ ಪರಿಸ್ಥಿತಿಯಲ್ಲಿ, ಕೊಲ್ಲಿಯಿಂದ ನಿರ್ಗಮಿಸುವ ಹಡಗುಗಳು ಸಾಮಾನ್ಯವಾಗಿ ಓಮನ್ ಕರಾವಳಿಗೆ ಹತ್ತಿರವಾಗಿ ಸಂಚರಿಸುತ್ತವೆ. ಆದರೆ, ಈ ತಿಂಗಳ ಆರಂಭದಲ್ಲಿ ಈ ಸಾಂಪ್ರದಾಯಿಕ ಮಾರ್ಗದಲ್ಲಿ ಸಾಗಲು ಪ್ರಯತ್ನಿಸಿದ ಹಡಗಿನ ಮೇಲೆ ದಾಳಿ ನಡೆದಿತ್ತು.
ಇರಾನ್ ಜೊತೆಗಿನ ಒಪ್ಪಂದದ ನಂತರ ಭಾರತದ ಇತ್ತೀಚಿನ ಎರಡು ಎಲ್ಪಿಜಿ ವಾಹಕ ನೌಕೆಗಳಿಗೆ ಸುರಕ್ಷಿತವಾಗಿ ಸಾಗಲು ಅವಕಾಶ ನೀಡಲಾಗಿದೆ. ಅಷ್ಟೇ ಅಲ್ಲದೆ, ಈ ಟ್ಯಾಂಕರ್ಗಳಲ್ಲಿ ಒಂದಕ್ಕೆ ಇರಾನ್ ನೌಕಾಪಡೆಯು ಬೆಂಗಾವಲಾಗಿ ಬಂದಿತ್ತು ಎಂದು ಹಡಗಿನಲ್ಲಿದ್ದ ಹಿರಿಯ ಅಧಿಕಾರಿಯೊಬ್ಬರು ಬ್ಲೂಮ್ಬರ್ಗ್ ನ್ಯೂಸ್ಗೆ ತಿಳಿಸಿದ್ದಾರೆ.
ಹಡಗು ಟ್ರ್ಯಾಕಿಂಗ್ ಪ್ರಕಾರ ಜಗ್ ವಸಂತ್ ಫೆಬ್ರವರಿ 26 ರಂದು ಹಾರ್ಮುಜ್ ಜಲಸಂಧಿಯ ಮೂಲಕ ಪರ್ಷಿಯನ್ ಕೊಲ್ಲಿಯನ್ನು ಪ್ರವೇಶಿಸಿತ್ತು. ಫೆಬ್ರವರಿ 28 ರಂದು ಸಂಘರ್ಷ ಆರಂಭವಾಗುವ ಕೆಲವೇ ಗಂಟೆಗಳ ಮೊದಲು ಕುವೈತ್ನಿಂದ ಎಲ್ಪಿಜಿಯನ್ನು ತುಂಬಿಸಿಕೊಂಡಿತ್ತು, ನಂತರ ಅದು ಅಲ್ಲಿಯೇ ಸಿಲುಕಿಕೊಂಡಿತ್ತು. ಪೈನ್ ಗ್ಯಾಸ್ ಕೂಡ ಅದೇ ದಿನ ಕೊಲ್ಲಿಯನ್ನು ಪ್ರವೇಶಿಸಿ ಯುಎಇಯ ರುವಾಯ್ಸ್ನಿಂದ ಸಂಪೂರ್ಣ ಸರಕನ್ನು ಹೊತ್ತುಕೊಂಡಿತ್ತು.
