ಕೊಲೆಸ್ಟ್ರಾಲ್ ಎಂದ ತಕ್ಷಣ ಹೆಚ್ಚಿನವರು ಅದನ್ನು ಕೇವಲ ಹೃದ್ರೋಗ ತರುವ ಕೆಟ್ಟ ಅಂಶ ಎಂದೇ ಭಾವಿಸುತ್ತಾರೆ. ಆದರೆ ವಾಸ್ತವವಾಗಿ, ಕೊಲೆಸ್ಟ್ರಾಲ್ ದೇಹದ ಪ್ರತಿಯೊಂದು ಜೀವಕೋಶದ ರಚನೆಗೆ, ಅಗತ್ಯ ಹಾರ್ಮೋನ್‌ಗಳ ಉತ್ಪಾದನೆಗೆ ಹಾಗೂ ಜೀರ್ಣಕ್ರಿಯೆಗೆ ನೆರವಾಗುವ ಪಿತ್ತರಸ (Bile acid) ತಯಾರಿಕೆಗೆ ಅತ್ಯಗತ್ಯ. ದೇಹಕ್ಕೆ ಬೇಕಾಗುವ ಬಹುತೇಕ ಕೊಲೆಸ್ಟ್ರಾಲ್ ಅನ್ನು ನಮ್ಮ ಯಕೃತ್ತೇ (Liver) ನೈಸರ್ಗಿಕವಾಗಿ ಉತ್ಪಾದಿಸುತ್ತದೆ. ಆದರೆ ರಕ್ತದಲ್ಲಿ ಕೆಲವು ನಿರ್ದಿಷ್ಟ ಕೊಲೆಸ್ಟ್ರಾಲ್ ಕಣಗಳು ದೀರ್ಘಕಾಲದವರೆಗೆ ಮಿತಿಮೀರಿ ಉಳಿದಾಗ ಮಾತ್ರ ಸಮಸ್ಯೆ ಆರಂಭವಾಗುತ್ತದೆ.
ರಕ್ತದಲ್ಲಿ ಕೊಲೆಸ್ಟ್ರಾಲ್ ಕರಗುವುದಿಲ್ಲವಾದ್ದರಿಂದ ಅದನ್ನು ಸಾಗಿಸಲು ‘ಲಿಪೊಪ್ರೋಟೀನ್’ ಕಣಗಳು ನೆರವಾಗುತ್ತವೆ. ಇವುಗಳಲ್ಲಿ ಪ್ರಮುಖ ವಿಧಗಳು ಮತ್ತು ಅವುಗಳ ಪರಿಣಾಮಗಳು ಇಲ್ಲಿವೆ:
-
ಎಲ್‌ಡಿಎಲ್ (LDL-C – ಕೆಟ್ಟ ಕೊಲೆಸ್ಟ್ರಾಲ್): ಇದು ರಕ್ತನಾಳಗಳ ಗೋಡೆಗಳಲ್ಲಿ ಸಂಗ್ರಹವಾಗಿ ಪ್ಲೇಕ್ (ಬ್ಲಾಕೇಜ್) ಉಂಟುಮಾಡುತ್ತದೆ. ಇದರಿಂದ ರಕ್ತ ಸಂಚಾರಕ್ಕೆ ಅಡ್ಡಿಯಾಗಿ ಹೃದಯಾಘಾತ, ಮೆದುಳಿಗೆ ಪಾರ್ಶ್ವವಾಯು (Stroke) ಅಥವಾ ಕಾಲುಗಳ ರಕ್ತನಾಳದ ಕಾಯಿಲೆಗಳಿಗೆ (PAD) ಕಾರಣವಾಗಬಹುದು.
-
ಹೆಚ್‌ಡಿಎಲ್ (HDL-C – ಒಳ್ಳೆಯ ಕೊಲೆಸ್ಟ್ರಾಲ್): ಇದು ರಕ್ತನಾಳಗಳಿಂದ ಹೆಚ್ಚುವರಿ ಕೊಲೆಸ್ಟ್ರಾಲ್ ಅನ್ನು ಹೊರಹಾಕಲು ನೆರವಾಗುತ್ತದೆ.
-
ಟ್ರೈಗ್ಲಿಸರೈಡ್ಸ್ (Triglycerides): ಇದು ಕೊಲೆಸ್ಟ್ರಾಲ್ ಅಲ್ಲದಿದ್ದರೂ ರಕ್ತದಲ್ಲಿನ ಒಂದು ಬಗೆಯ ಕೊಬ್ಬು. ಬೊಜ್ಜು, ಮಧುಮೇಹ, ಮದ್ಯಪಾನ ಹಾಗೂ ಅತಿಯಾದ ಕಾರ್ಬೋಹೈಡ್ರೇಟ್ ಸೇವನೆಯಿಂದ ಇದು ಹೆಚ್ಚುತ್ತದೆ. ಇದರ ಮಟ್ಟ 500 mg/dL ಗಿಂತ ಮೀರಿದರೆ ಮೇದೋಜೀರಕ ಗ್ರಂಥಿಯ (Pancreatitis) ಸಮಸ್ಯೆಗೆ ಕಾರಣವಾಗಬಹುದು.
-
ಲಿಪೊಪ್ರೋಟೀನ್-ಎ [Lp(a)]: ಇದು ಅನುವಂಶಿಕವಾಗಿ ಬರುವ ಅಪಾಯಕಾರಿ ಕೊಬ್ಬಿನ ಕಣವಾಗಿದ್ದು, ಹೃದ್ರೋಗದ ಅಪಾಯವನ್ನು ತೀವ್ರಗೊಳಿಸುತ್ತದೆ.
ಮೆಟಬಾಲಿಕ್ ಸಿಂಡ್ರೋಮ್ ಎಚ್ಚರಿಕೆ: ಹೊಟ್ಟೆಯ ಸುತ್ತ ಬೊಜ್ಜು ಹೆಚ್ಚಾಗುವುದು, ರಕ್ತದೊತ್ತಡ (BP), ಮಧುಮೇಹ, ಅಧಿಕ ಟ್ರೈಗ್ಲಿಸರೈಡ್ಸ್ ಮತ್ತು ಕಡಿಮೆ ಹೆಚ್‌ಡಿಎಲ್ ಒಟ್ಟಿಗೆ ಕಾಣಿಸಿಕೊಳ್ಳುವುದನ್ನು ‘ಮೆಟಬಾಲಿಕ್ ಸಿಂಡ್ರೋಮ್’ ಎನ್ನಲಾಗುತ್ತದೆ. ಇದು ಭವಿಷ್ಯದ ಗಂಭೀರ ಹೃದ್ರೋಗಗಳಿಗೆ ಪ್ರಮುಖ ಮುನ್ಸೂಚನೆಯಾಗಿದೆ.
ಎಲ್ಲರಿಗೂ ಒಂದೇ ಅಳತೆಗೋಲು ಅನ್ವಯಿಸುವುದಿಲ್ಲ: ಕೊಲೆಸ್ಟ್ರಾಲ್ ಪ್ರಮಾಣ ಇಷ್ಟೇ ಇರಬೇಕೆಂಬ ನಿಖರ ನಿಯಮ ಪ್ರತಿಯೊಬ್ಬರಿಗೂ ಒಂದೇ ಆಗಿರುವುದಿಲ್ಲ. ಒಬ್ಬ ವ್ಯಕ್ತಿಯ ವಯಸ್ಸು, ಮಧುಮೇಹ, ಕಿಡ್ನಿ ಸಮಸ್ಯೆ, ಬಿಪಿ ಹಾಗೂ ಕೌಟುಂಬಿಕ ಹಿನ್ನೆಲೆಯನ್ನು ಆಧರಿಸಿ ಸುರಕ್ಷಿತ ಮಟ್ಟವನ್ನು ವೈದ್ಯರು ನಿರ್ಧರಿಸುತ್ತಾರೆ. ಮಹಿಳೆಯರಲ್ಲಿ ಋತುಬಂಧದ (Menopause) ನಂತರ ಹೃದ್ರೋಗದ ಅಪಾಯ ಗಣನೀಯವಾಗಿ ಹೆಚ್ಚುತ್ತದೆ.
ರಕ್ತನಾಳಗಳಲ್ಲಿ ಬ್ಲಾಕೇಜ್ ಆಗುವುದು ಯಾವುದೇ ಬಾಹ್ಯ ಲಕ್ಷಣಗಳನ್ನು ತೋರಿಸದೆ ಸದ್ದಿಲ್ಲದೆ ನಡೆಯುವ ಪ್ರಕ್ರಿಯೆ. ಆದ್ದರಿಂದ ಯಾವುದೇ ರೋಗಲಕ್ಷಣಗಳು ಕಾಣಿಸಿಕೊಳ್ಳುವವರೆಗೆ ಕಾಯದೆ, ನಿಯಮಿತವಾಗಿ ರಕ್ತ ತಪಾಸಣೆ ಮಾಡಿಸಿಕೊಳ್ಳುವುದು, ಸೊಂಟದ ಸುತ್ತಳತೆ ಮತ್ತು ತೂಕವನ್ನು ನಿಯಂತ್ರಣದಲ್ಲಿಟ್ಟುಕೊಳ್ಳುವುದು ಅತ್ಯಂತ ಅಗತ್ಯ.
