ಮೂತ್ರಪಿಂಡಗಳು (ಕಿಡ್ನಿಗಳು) ಸರಿಯಾಗಿ ಕೆಲಸ ಮಾಡದಿದ್ದರೆ, ದೇಹದಲ್ಲಿನ ಹೆಚ್ಚುವರಿ ದ್ರವಗಳು ಹೊರಗೆ ಹೋಗದೆ ಒಳಗೇ ಉಳಿದುಕೊಳ್ಳುತ್ತವೆ. ಇದರಿಂದಾಗಿ ಬೆಳಿಗ್ಗೆ ನಿದ್ರೆಯಿಂದ ಎದ್ದ ತಕ್ಷಣ ಕಣ್ಣುಗಳ ಸುತ್ತ ಅಥವಾ ಮುಖದ ಮೇಲೆ ಬಾವು (ಊತ) ಕಾಣಿಸಿಕೊಳ್ಳಬಹುದು.
ಬಹಳಷ್ಟು ಜನರು ಇದನ್ನು ಸಾಮಾನ್ಯ ಆಯಾಸ ಎಂದು ನಿರ್ಲಕ್ಷಿಸುತ್ತಾರೆ. ಆದರೆ ಇದು ಕಿಡ್ನಿ ಸಮಸ್ಯೆಗಳ ಆರಂಭಿಕ ಲಕ್ಷಣವಾಗಿರಬಹುದು.
1. ನಿರಂತರ ಆಯಾಸ ಮತ್ತು ದೌರ್ಬಲ್ಯ
ರಾತ್ರಿಯಿಡೀ ಚೆನ್ನಾಗಿ ನಿದ್ರೆ ಮಾಡಿದರೂ ಬೆಳಿಗ್ಗೆ ಎದ್ದ ತಕ್ಷಣ ನಿಶ್ಯಕ್ತಿ ಅಥವಾ ಆಯಾಸ ಅನಿಸಿದರೆ ಎಚ್ಚರದಿಂದಿರಿ. ದೇಹದಲ್ಲಿನ ಕಲ್ಮಶಗಳನ್ನು ಕಿಡ್ನಿಗಳು ಸಂಪೂರ್ಣವಾಗಿ ಹೊರಹಾಕಲು ವಿಫಲವಾದಾಗ, ಆ ಟಾಕ್ಸಿನ್ಗಳು (ವಿಷಕಾರಿ ಅಂಶಗಳು) ದೇಹದಲ್ಲೇ ಸಂಗ್ರಹವಾಗುತ್ತವೆ. ಇದರ ಪರಿಣಾಮವಾಗಿ ದೇಹದ ಶಕ್ತಿ ಕಡಿಮೆಯಾಗುತ್ತದೆ.
2. ಮೂತ್ರದಲ್ಲಿ ಬದಲಾವಣೆಗಳು
ಬೆಳಗಿನ ಮೊದಲ ಮೂತ್ರ ವಿಸರ್ಜನೆಯ ಸಮಯದಲ್ಲಿ ಅತಿಯಾಗಿ ನೊರೆ ಬರುವುದು, ಮೂತ್ರದ ಬಣ್ಣ ಗಾಢವಾಗಿರುವುದು, ಮೂತ್ರ ತುಂಬಾ ಕಡಿಮೆ ಅಥವಾ ಅತಿಯಾಗಿ ಬರುವುದು ಕಿಡ್ನಿ ಸಮಸ್ಯೆಯ ಸಂಕೇತಗಳಾಗಿರಬಹುದು. ಮುಖ್ಯವಾಗಿ ಮೂತ್ರದಲ್ಲಿ ರಕ್ತದ ಅಂಶ ಕಂಡುಬಂದರೆ ತಕ್ಷಣವೇ ವೈದ್ಯರನ್ನು ಸಂಪರ್ಕಿಸಬೇಕು.
3. ಬಾಯಿ ಒಣಗುವುದು ಮತ್ತು ದುರ್ವಾಸನೆ
ಬೆಳ್ಳಂಬೆಳಗ್ಗೆ ಬಾಯಿ ಅತಿಯಾಗಿ ಒಣಗುವುದು ಮತ್ತು ದುರ್ವಾಸನೆ ಬರುವುದು ಇನ್ನೊಂದು ಲಕ್ಷಣ. ಕಿಡ್ನಿಗಳು ಸರಿಯಾಗಿ ಕೆಲಸ ಮಾಡದಿದ್ದಾಗ ದೇಹದಲ್ಲಿ ಕಲ್ಮಶಗಳು ಹೆಚ್ಚಾಗಿ, ಅವು ಬಾಯಿಯ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತವೆ.
4. ಕಾಲು ಮತ್ತು ಪಾದಗಳ ಊತ
ಕಿಡ್ನಿಗಳು ದ್ರವ ಪದಾರ್ಥಗಳನ್ನು ಸರಿಯಾಗಿ ಫಿಲ್ಟರ್ ಮಾಡದಿದ್ದರೆ, ಕಾಲು ಹಾಗೂ ಪಾದಗಳಲ್ಲಿ ನೀರು ಸಂಗ್ರಹವಾಗುತ್ತದೆ. ಬೆಳಿಗ್ಗೆ ಎದ್ದ ತಕ್ಷಣ ಚಪ್ಪಲಿಗಳು ಟೈಟ್ ಎನಿಸುವುದು ಅಥವಾ ಪಾದಗಳು ಉಬ್ಬಿದಂತೆ ಕಾಣಿಸುವುದು ಕಿಡ್ನಿ ಹಾನಿಯಾಗುತ್ತಿರುವ ಸಂಕೇತವಾಗಿರಬಹುದು.
5. ರಕ್ತದೊತ್ತಡ (BP) ಹೆಚ್ಚಾಗುವುದು
ದೇಹದ ರಕ್ತದೊತ್ತಡವನ್ನು ನಿಯಂತ್ರಣದಲ್ಲಿಡಲು ಕಿಡ್ನಿಗಳು ಪ್ರಮುಖ ಪಾತ್ರ ವಹಿಸುತ್ತವೆ. ಆದ್ದರಿಂದ ಬೆಳಗಿನ ಸಮಯದಲ್ಲಿ ಪದೇ ಪದೇ ಬಿಪಿ ಹೆಚ್ಚಾಗುತ್ತಿದ್ದರೆ, ಅದು ಕಿಡ್ನಿ ಆರೋಗ್ಯದ ಮೇಲಾಗುತ್ತಿರುವ ದುಷ್ಪರಿಣಾಮದ ಸಂಕೇತವಾಗಿರಬಹುದು.
6. ಬೆನ್ನು ನೋವು
ಕಿಡ್ನಿಗಳು ನಮ್ಮ ದೇಹದ ಬೆನ್ನಿನ ಭಾಗಕ್ಕೆ ಹತ್ತಿರದಲ್ಲಿರುತ್ತವೆ. ಹಾಗಾಗಿ ಬೆಳಿಗ್ಗೆ ಎದ್ದ ತಕ್ಷಣ ಸೊಂಟ ಅಥವಾ ಬೆನ್ನಿನ ಒಂದು ಬದಿಯಲ್ಲಿ ನೋವು ಕಾಣಿಸಿಕೊಂಡರೆ ನಿರ್ಲಕ್ಷಿಸಬೇಡಿ. ಇದು ಕಿಡ್ನಿ ಇನ್ಫೆಕ್ಷನ್ (ಸೋಂಕು) ಅಥವಾ ಕಿಡ್ನಿಯಲ್ಲಿ ಕಲ್ಲು ಇರುವ ಸಮಸ್ಯೆಯ ಲಕ್ಷಣವಾಗಿರಬಹುದು.
ಗಮನಿಸಿ: ಕಿಡ್ನಿ ಸಮಸ್ಯೆಗಳು ಆರಂಭದಲ್ಲಿ ಅತ್ಯಂತ ಸದ್ದಿಲ್ಲದೆ (ಸೈಲೆಂಟ್ ಆಗಿ) ಮನುಷ್ಯನನ್ನು ಆವರಿಸಿಕೊಳ್ಳುತ್ತವೆ. ಮೇಲ್ನೋಟಕ್ಕೆ ದೊಡ್ಡ ಲಕ್ಷಣಗಳು ಕಾಣಿಸದಿದ್ದರೂ, ದೇಹವು ಸಣ್ಣ ಸಣ್ಣ ಸಂಕೇತಗಳನ್ನು ನೀಡುತ್ತಲೇ ಇರುತ್ತದೆ. ಆದ್ದರಿಂದ ಇಂತಹ ಲಕ್ಷಣಗಳು ಪದೇ ಪದೇ ಕಾಣಿಸಿಕೊಂಡರೆ ತಕ್ಷಣವೇ ವೈದ್ಯರನ್ನು ಸಂಪರ್ಕಿಸಿ ಸೂಕ್ತ ತಪಾಸಣೆ ಮಾಡಿಸಿಕೊಳ್ಳುವುದು ಉತ್ತಮ.
