ಭಾರತೀಯ ಚಿತ್ರರಂಗದ ಇತಿಹಾಸದಲ್ಲೇ ಹೊಸ ಮೈಲಿಗಲ್ಲು ನಿರ್ಮಿಸಿದ ‘ಬಾಹುಬಲಿ’ ಸಿನಿಮಾ ಟಾಲಿವುಡ್‌ನ ಮಟ್ಟವನ್ನು ಜಾಗತಿಕ ಮಟ್ಟಕ್ಕೆ ಕೊಂಡೊಯ್ದ ಚಿತ್ರವಾಗಿದೆ. ಭಾರತೀಯ ಸಿನಿರಂಗದ ಇತಿಹಾಸ ನಿರ್ಮಿಸಿದ ‘ಬಾಹುಬಲಿ’ ಚಿತ್ರದ ಅಭಿಮಾನಿಗಳಿಗೆ ಮತ್ತೊಂದು ಸಿಹಿ ಸುದ್ದಿ ಸಿಕ್ಕಿದೆ. ‘ಬಾಹುಬಲಿ: ದಿ ಟಾರ್ಚ್ ಬೇರರ್’ ಹೆಸರಿನ ನಾಲ್ಕು ಭಾಗಗಳ ಡಾಕ್ಯುಮೆಂಟರಿ ಸರಣಿ ನೆಟ್‌ಫ್ಲಿಕ್ಸ್‌ನಲ್ಲಿ ಸ್ಟ್ರೀಮಿಂಗ್ ಆರಂಭವಾಗಿದ್ದು, ಇದರಲ್ಲಿನ ರಾಣಾ ದಗ್ಗುಬಾಟಿ ಹೇಳಿಕೆ ‘ಬಾಹುಬಲಿ-3’ ಬಗ್ಗೆ ಹೊಸ ನಿರೀಕ್ಷೆ ಮೂಡಿಸಿದೆ. ಆದರೆ ಚಿತ್ರದ ಮೂರನೇ ಭಾಗದ ಕುರಿತು ಚಿತ್ರತಂಡದಿಂದ ಇನ್ನೂ ಯಾವುದೇ ಅಧಿಕೃತ ಘೋಷಣೆ ಹೊರಬಿದ್ದಿಲ್ಲ.
“ಬಾಹುಬಲಿಗೂ ಮೊದಲು – ಬಾಹುಬಲಿಯ ನಂತರ” ಎನ್ನುವಷ್ಟು ದೊಡ್ಡ ಪ್ರಭಾವವನ್ನು ಈ ಸಿನಿಮಾ ಬೀರಿತ್ತು. ‘ಬಾಹುಬಲಿ’ಯ ಎರಡು ಭಾಗಗಳು ಭಾರತೀಯ ಸಿನಿರಂಗಕ್ಕೆ ಹೊಸ ದಿಕ್ಕನ್ನು ತೋರಿಸಿವೆ. ಈ ಸಿನಿಮಾದ ಮೂಲಕ ಪ್ರಭಾಸ್, ರಾಣಾ ದಗ್ಗುಬಾಟಿ, ಅನುಷ್ಕ ಶೆಟ್ಟಿ, ಎಸ್.ಎಸ್. ರಾಜಮೌಳಿ ಸೇರಿದಂತೆ ಚಿತ್ರತಂಡದ ಅನೇಕರು ಪ್ಯಾನ್ ಇಂಡಿಯಾ ಖ್ಯಾತಿ ಗಳಿಸಿದರು.
ಈ ಹಿಂದೆ ಬಾಹುಬಲಿ: The Eternal War’ ಎಂಬ ಅನಿಮೇಷನ್ ಸರಣಿಯನ್ನು ಘೋಷಿಸಿ ಅದರ ಟೀಸರ್ ಬಿಡುಗಡೆ ಮಾಡಲಾಗಿತ್ತು. ಜೊತೆಗೆ ‘ ಬಾಹುಬಲಿ Epic’ ಹೆಸರಿನಲ್ಲಿ ಮೊದಲ ಮತ್ತು ಎರಡನೇ ಭಾಗಗಳನ್ನು ಒಂದೇ ಚಿತ್ರವಾಗಿ ಮರುಬಿಡುಗಡೆ ಮಾಡಲಾಗಿತ್ತು. ಇದೇ ವೇಳೆ ‘ಬಾಹುಬಲಿ-3’ ಬರಲಿದೆ ಎಂಬ ಸುದ್ದಿಗಳು ಹರಿದಾಡುತ್ತಿದ್ದವು. ಈಗ ‘Baahubali: The Torch Bearer’ ಎಂಬ ಡಾಕ್ಯುಮೆಂಟರಿ ಸರಣಿ ಬಿಡುಗಡೆಯಾಗಿದೆ.
ನೆಟ್‌ಫ್ಲಿಕ್ಸ್ ನಿರ್ಮಿಸಿರುವ ಈ ಸರಣಿ ಈಗ ಅದೇ ಓಟಿಟಿ ವೇದಿಕೆಯಲ್ಲಿ ಸ್ಟ್ರೀಮಿಂಗ್ ಆಗುತ್ತಿದೆ. ಈ ಡಾಕ್ಯುಮೆಂಟರಿ ಒಟ್ಟು ನಾಲ್ಕು ಎಪಿಸೋಡ್‌ಗಳಲ್ಲಿ ಬಿಡುಗಡೆಯಾಗಿದೆ. ಇದರಲ್ಲಿ ಪ್ರಭಾಸ್, ರಾಜಮೌಳಿ, ರಾಣಾ, ಅನುಷ್ಕ ಶೆಟ್ಟಿ, ರಮ್ಯಕೃಷ್ಣ, ಸೆಂಥಿಲ್ ಕುಮಾರ್ ಸೇರಿದಂತೆ ಹಲವು ಕಲಾವಿದರು ಮತ್ತು ತಾಂತ್ರಿಕ ತಜ್ಞರು ‘ಬಾಹುಬಲಿ’ ಚಿತ್ರದ ನಿರ್ಮಾಣದ ಅನುಭವಗಳನ್ನು ಹಂಚಿಕೊಂಡಿದ್ದಾರೆ. ಜೊತೆಗೆ ಚಿತ್ರದ ಮೇಕಿಂಗ್ ದೃಶ್ಯಗಳನ್ನೂ ಒಳಗೊಂಡಿದ್ದು, ಈ ಸರಣಿ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಡಾಕ್ಯುಮೆಂಟರಿಯೊಂದರಲ್ಲಿ ಮಾತನಾಡಿರುವ ರಾಣಾ ದಗ್ಗುಬಾಟಿ, “ಈ ಘೋಷಣೆಗೆ ಜಗತ್ತು ಇನ್ನೂ ಸಿದ್ಧವಾಗಿಲ್ಲ. ಆದರೆ ನಿಮ್ಮೆಲ್ಲರಿಗಾಗಿ ‘ಬಾಹುಬಲಿ-3’ ಬರಲಿದೆ” ಎಂದು ಹೇಳಿರುವುದು ಅಭಿಮಾನಿಗಳಲ್ಲಿ ಭಾರೀ ಕುತೂಹಲ ಮೂಡಿಸಿದೆ. ಆದರೆ ಚಿತ್ರತಂಡದಿಂದ ‘ಬಾಹುಬಲಿ-3’ ಬಗ್ಗೆ ಇನ್ನೂ ಯಾವುದೇ ಅಧಿಕೃತ ಘೋಷಣೆ ಹೊರಬಿದ್ದಿಲ್ಲ. ರಾಣಾ ಹೇಳಿರುವ ಮಾತು ಚಿತ್ರದ ಅಧಿಕೃತ ಪ್ರಕಟಣೆಯೇ ಅಥವಾ ಪ್ರಚಾರದ ಭಾಗವೇ ಎಂಬುದು ಇನ್ನಷ್ಟೇ ಸ್ಪಷ್ಟವಾಗಬೇಕಿದೆ. ಆದರೂ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದ್ದು, ಪ್ರಭಾಸ್ ಅಭಿಮಾನಿಗಳು ಸಂತಸ ವ್ಯಕ್ತಪಡಿಸುತ್ತಿದ್ದಾರೆ.
