ಪೋಷಕರೇ ಎಚ್ಚರ.! ಚಾರ್ಜ್’ಗೆ ಹಾಕಿದ್ದ ಎಲೆಕ್ಟ್ರಿಕ್ ತೂಕದ ಯಂತ್ರ ಮುಟ್ಟಿ 10 ತಿಂಗಳ ಮಗು ಸಾವು

ತೆಲಂಗಾಣ: ಮನೆಯ ತುಂಬಾ ಅಂಬೆಗಾಲಿಡುತ್ತಾ ಆಟವಾಡಬೇಕಿದ್ದ ಪುಟ್ಟ ಕಂದಮ್ಮನ ಬದುಕು ಕ್ಷಣಾರ್ಧದಲ್ಲಿ ದುರಂತ ಅಂತ್ಯ ಕಂಡಿದೆ. ಇನ್ನೂ ಜಗತ್ತಿನ ಅರಿವೇ ಇಲ್ಲದ ಕೇವಲ 10 ತಿಂಗಳ ಮಗು ಮನೆಯಲ್ಲಿದ್ದ ಚಾರ್ಜಿಂಗ್ ಎಲೆಕ್ಟ್ರಾನಿಕ್ ತೂಕದ ಯಂತ್ರವನ್ನು ಮುಟ್ಟಿದ್ದೇ ಪ್ರಾಣಕ್ಕೆ ಕುತ್ತು ತಂದಿದೆ. ಮಗುವಿಗೆ ವಿದ್ಯುತ್ ಶಾಕ್ ಹೊಡೆಯುತ್ತಿದ್ದಂತೆ ಗಾಬರಿಗೊಂಡ ತಂದೆ ತನ್ನ ಕರುಳ ಕುಡಿಯನ್ನು ಉಳಿಸಿಕೊಳ್ಳಲು ಧಾವಿಸಿದ್ದಾರೆ. ಆದರೆ ಮಗಳನ್ನು ರಕ್ಷಿಸಲು ಹೋದ ಅವರಿಗೂ ವಿದ್ಯುತ್ ಆಘಾತ ತಗುಲಿದೆ. ಕುಟುಂಬದವರು ತಕ್ಷಣ ನೆರವಿಗೆ ಧಾವಿಸಿದರೂ ಪುಟ್ಟ ಕಂದಮ್ಮನ ಜೀವ ಉಳಿಸಲಾಗಲಿಲ್ಲ.

ತೆಲಂಗಾಣದ ಜಗಿತ್ಯಾಲ್ ಜಿಲ್ಲೆಯ ರಾಜಾರಾಂಪಲ್ಲಿ ಗ್ರಾಮದಲ್ಲಿ ಶುಕ್ರವಾರ ಬೆಳಗಿನ ಜಾವ ಸುಮಾರು 5 ಗಂಟೆಗೆ ಈ ಘಟನೆ ನಡೆದಿದೆ. ತಿರುಪತಿ ಮತ್ತು ಲಲಿತಾ ದಂಪತಿಯ ಮುದ್ದಿನ ಮಗಳನ್ನು ವಿಭೂದಿ ಆದ್ಯ ಅಲಿಯಾಸ್ ಅಮ್ಮುಲು ಎಂದು ಗುರುತಿಸಲಾಗಿದೆ.

ಮನೆಯೊಳಗೆ ಪುಟ್ಟ ಮಗು ತನ್ನಷ್ಟಕ್ಕೆ ತಾನೇ ಆಟವಾಡುತ್ತಿತ್ತು. ಇದೇ ವೇಳೆ ಮನೆಯಲ್ಲಿದ್ದ ಎಲೆಕ್ಟ್ರಾನಿಕ್ ತೂಕದ ಯಂತ್ರ ಚಾರ್ಜಿಂಗ್‌ಗೆ ಸಂಪರ್ಕಗೊಂಡಿತ್ತು. ಆಟವಾಡುತ್ತಾ ಮಗು ಆ ಯಂತ್ರದ ಸಂಪರ್ಕಕ್ಕೆ ಬಂದಿದ್ದೇ ತಡ, ದುರಂತ ಸಂಭವಿಸಿದೆ. ಯಂತ್ರದಲ್ಲಿದ್ದ ದೋಷಪೂರಿತ ವೈರಿಂಗ್‌ನಿಂದ ವಿದ್ಯುತ್ ಪ್ರವಹಿಸಿ ಮಗುವಿಗೆ ತೀವ್ರ ಆಘಾತ ಉಂಟಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಮಗಳನ್ನು ಉಳಿಸಲು ಧಾವಿಸಿದ ತಂದೆಗೂ ವಿದ್ಯುತ್ ಶಾಕ್!

ತನ್ನ ಕಣ್ಣೆದುರೇ ಮಗು ವಿದ್ಯುತ್ ಆಘಾತಕ್ಕೆ ಒಳಗಾಗಿರುವುದನ್ನು ಕಂಡ ತಂದೆ ತಿರುಪತಿ ಕ್ಷಣವೂ ತಡಮಾಡದೆ ಮಗುವನ್ನು ಯಂತ್ರದಿಂದ ದೂರ ಎಳೆಯಲು ಮುಂದಾಗಿದ್ದಾರೆ. ಆದರೆ ಮಗಳನ್ನು ರಕ್ಷಿಸುವ ಪ್ರಯತ್ನದಲ್ಲಿ ಅವರಿಗೂ ವಿದ್ಯುತ್ ಶಾಕ್ ತಗುಲಿದೆ.

ತಕ್ಷಣ ಸ್ಥಳದಲ್ಲಿದ್ದ ಕುಟುಂಬದ ಇತರ ಸದಸ್ಯರು ಮಧ್ಯಪ್ರವೇಶಿಸಿ ತಂದೆಯನ್ನು ರಕ್ಷಿಸಿದ್ದಾರೆ. ಬಳಿಕ ಮಗುವನ್ನು ಉಳಿಸುವ ಆಶಯದಿಂದ ಕುಟುಂಬಸ್ಥರು ಧರ್ಮಾರಂನ ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ. ಆದರೆ ದುರದೃಷ್ಟವಶಾತ್ ಮಗು ಬದುಕುಳಿಯಲಿಲ್ಲ. ಪರೀಕ್ಷಿಸಿದ ವೈದ್ಯರು ಮಗು ಮೃತಪಟ್ಟಿರುವುದಾಗಿ ಘೋಷಿಸಿದ್ದಾರೆ.

ಕರುಳ ಕುಡಿಯನ್ನು ಕಳೆದುಕೊಂಡ ಕುಟುಂಬದಲ್ಲಿ ಆಕ್ರಂದನ

ನಿನ್ನೆ ಮೊನ್ನೆಯಷ್ಟೇ ಮನೆಯಲ್ಲಿ ಅಂಬೆಗಾಲಿಡುತ್ತಾ ಆಟವಾಡಬೇಕಿದ್ದ ಪುಟ್ಟ ಕಂದಮ್ಮ ಇಂದು ಶವವಾಗಿ ಮಲಗಿರುವುದನ್ನು ಕಂಡು ಕುಟುಂಬಸ್ಥರ ಆಕ್ರಂದನ ಮುಗಿಲುಮುಟ್ಟಿದೆ. ಮಗುವಿನ ಸಾವು ಸಂಬಂಧಿಕರು ಹಾಗೂ ಗ್ರಾಮಸ್ಥರಲ್ಲೂ ತೀವ್ರ ದುಃಖ ಮೂಡಿಸಿದೆ.

ಘಟನೆಗೆ ಸಂಬಂಧಿಸಿದಂತೆ ಮಗುವಿನ ತಂದೆ ನೀಡಿದ ದೂರಿನ ಆಧಾರದ ಮೇಲೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಚಾರ್ಜಿಂಗ್‌ಗೆ ಹಾಕಿದ್ದ ಎಲೆಕ್ಟ್ರಾನಿಕ್ ತೂಕದ ಯಂತ್ರದಲ್ಲಿ ವಿದ್ಯುತ್ ಸೋರಿಕೆಯಾಗಲು ಕಾರಣವೇನು ಎಂಬುದರ ಕುರಿತು ತನಿಖೆ ನಡೆಸುತ್ತಿದ್ದಾರೆ.

ಪೋಷಕರೇ ಎಚ್ಚರ: ಈ ಮುನ್ನೆಚ್ಚರಿಕೆ ಮರೆಯಬೇಡಿ!

ಮಕ್ಕಳಿರುವ ಮನೆಗಳಲ್ಲಿ ಚಾರ್ಜಿಂಗ್‌ಗೆ ಹಾಕಿರುವ ಎಲೆಕ್ಟ್ರಾನಿಕ್ ಉಪಕರಣಗಳ ಬಗ್ಗೆ ಹೆಚ್ಚಿನ ಜಾಗ್ರತೆ ವಹಿಸುವುದು ಅತ್ಯಗತ್ಯ.

• ಚಾರ್ಜಿಂಗ್‌ನಲ್ಲಿರುವ ಎಲೆಕ್ಟ್ರಾನಿಕ್ ಉಪಕರಣಗಳನ್ನು ಮಕ್ಕಳ ಕೈಗೆಟುಕದಂತೆ ಇರಿಸಿ.

• ಹಾಳಾದ ಚಾರ್ಜರ್, ವೈರ್ ಮತ್ತು ಪ್ಲಗ್‌ಗಳನ್ನು ಬಳಸಬೇಡಿ.

• ವಿದ್ಯುತ್ ಉಪಕರಣಗಳಲ್ಲಿ ದೋಷ ಕಂಡುಬಂದರೆ ತಕ್ಷಣ ಬಳಕೆ ನಿಲ್ಲಿಸಿ.

• ಮಕ್ಕಳ ಆಟದ ಸ್ಥಳದಿಂದ ವಿದ್ಯುತ್ ಸಂಪರ್ಕ ಹೊಂದಿರುವ ಉಪಕರಣಗಳನ್ನು ದೂರವಿಡಿ.

• ಉಪಕರಣಗಳನ್ನು ಸ್ವಚ್ಛಗೊಳಿಸುವಾಗ ಅಥವಾ ಸ್ಥಳಾಂತರಿಸುವಾಗ ವಿದ್ಯುತ್ ಸಂಪರ್ಕ ಕಡಿತಗೊಳಿಸಿ.