ಬೆಂಗಳೂರು: ವರ್ಷಕ್ಕೆ ಬರೋಬ್ಬರಿ ₹38 ಲಕ್ಷ ಸಂಬಳ ಗಳಿಸುವ ಬೆಂಗಳೂರಿನ ಸಾಫ್ಟ್ವೇರ್ ಇಂಜಿನಿಯರ್ (SDE-2) ಒಬ್ಬರು ತಮಗಾದ ಕಹಿ ಮತ್ತು ವಿಚಿತ್ರ ಅನುಭವವನ್ನು ಹಂಚಿಕೊಂಡಿದ್ದು, ಸದ್ಯ ಇಂಟರ್ನೆಟ್ನಲ್ಲಿ ಈ ಪೋಸ್ಟ್ ಭಾರಿ ಸದ್ದು ಮಾಡುತ್ತಿದೆ. ಅರೇಂಜ್ಡ್ ಮ್ಯಾರೇಜ್ ಪ್ರಕ್ರಿಯೆಯಲ್ಲಿ ಹೆಣ್ಣಿನ ಕಡೆಯವರು ಮಾಡುವ ತಪಾಸಣೆ (Background verification) ಮತ್ತು ಪ್ರಶ್ನೆಗಳು ಕಾರ್ಪೊರೇಟ್ ಕಂಪನಿಗಳ ಹೆಚ್ಆರ್ (HR) ಮಾಡುವ ಇಂಟರ್ವ್ಯೂಗಿಂತಲೂ ಭಯಾನಕವಾಗಿರುತ್ತದೆ ಎಂದು ಈ ಟೆಕ್ಕಿ ಅಳಲು ತೋಡಿಕೊಂಡಿದ್ದಾರೆ.
ಉದ್ಯೋಗಿಗಳಿಗೆಂದೇ ಇರುವ ಪ್ರಸಿದ್ಧ ಸೋಷಿಯಲ್ ಮೀಡಿಯಾ ಪ್ಲಾಟ್ಫಾರ್ಮ್ ‘ಗ್ರೇಪ್ವೈನ್’ (Grapevine) ನಲ್ಲಿ ಟೆಕ್ಕಿ ಹಂಚಿಕೊಂಡಿರುವ ಈ ಪೋಸ್ಟ್ ಸದ್ಯ ಇಂಟರ್ನೆಟ್ನಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
ಇಂದಿರಾನಗರದ ಕೆಫೆಯಲ್ಲಿ ನಡೆದ ಆರ್ಥಿಕ ತನಿಖೆ
“ನಾನು ಕಳೆದ ಆರು ತಿಂಗಳಿನಿಂದ ಮದುವೆಗಾಗಿ ಹುಡುಗಿ ಹುಡುಕುತ್ತಿದ್ದೇನೆ. ಆದರೆ ಹುಡುಗಿಯರ ಕುಟುಂಬಸ್ಥರು ಮಾಡುವ ಬ್ಯಾಕ್ಗ್ರೌಂಡ್ ವೆರಿಫಿಕೇಶನ್ ನೋಡಿದರೆ ನಮ್ಮ ಆಫೀಸ್ ಹೆಚ್ಆರ್ ಮಾಡೋದು ಒಂದು ಜೋಕ್ ಅನಿಸುತ್ತದೆ,” ಎಂದು ಪೋಸ್ಟ್ನಲ್ಲಿ ಬರೆದುಕೊಂಡಿದ್ದಾರೆ.
ಘಟನೆಯ ವಿವರ ನೀಡಿದ ಅವರು, ಇತ್ತೀಚೆಗೆ ಬೆಂಗಳೂರಿನ ಇಂದಿರಾನಗರದ ಕೆಫೆಯೊಂದರಲ್ಲಿ ಹುಡುಗಿಯ ತಂದೆಯನ್ನು ಭೇಟಿಯಾಗಿದ್ದರು. ಆರಂಭದಲ್ಲಿ ಮಾತುಕತೆ ಮಾಮೂಲಿಯಾಗಿಯೇ ಇತ್ತು. ಆದರೆ ಸ್ವಲ್ಪ ಸಮಯದ ನಂತರ ಅದು ಮದುವೆಯ ಮಾತುಕತೆಯಾಗಿ ಉಳಿಯದೆ ಆರ್ಥಿಕ ತನಿಖೆಯಾಗಿ ಬದಲಾಯಿತು
ಅವರು ನನ್ನನ್ನು ನೇರವಾಗಿ ಮೊಬೈಲ್ ಓಪನ್ ಮಾಡಿ ನಿಮ್ಮ ಸಿಬಿಲ್ ಸ್ಕೋರ್ (CIBIL Score) ತೋರಿಸಿ ಎಂದು ಕೇಳಿದರು. ಮೊದಲು ನಾನು ಇದನ್ನು ಜೋಕ್ ಇರಬಹುದು ಅಂದುಕೊಂಡು ನಕ್ಕೆ. ಆದರೆ ಅವರು ಮುಖ ಗಂಭೀರವಾಗಿಟ್ಟುಕೊಂಡು, ‘ನಿಮ್ಮ ಮೇಲೆ ಯಾವುದೇ ಗುಪ್ತ ವೈಯಕ್ತಿಕ ಸಾಲಗಳು (Personal Loans) ಅಥವಾ ಕ್ರೆಡಿಟ್ ಕಾರ್ಡ್ ಸಾಲ ಇಲ್ಲ ಎಂಬುದನ್ನು ನಾವು ಖಚಿತಪಡಿಸಿಕೊಳ್ಳಬೇಕು’ ಎಂದರು,” ಎಂದು ಟೆಕ್ಕಿ ಬರೆದಿದ್ದಾರೆ.
ಲೇ-ಆಫ್ ಭೀತಿ: ಆಫೀಸ್ ಅಪರೈಸಲ್ ಮೇಲೂ ಕಣ್ಣು
ಹುಡುಗಿಯ ತಂದೆಯ ಪ್ರಶ್ನೆಗಳು ಅಷ್ಟಕ್ಕೇ ನಿಲ್ಲಲಿಲ್ಲ. ಐಟಿ ವಲಯದಲ್ಲಿ ಸದ್ಯ ನಡೆಯುತ್ತಿರುವ ಲೇ-ಆಫ್ಗಳನ್ನು (Layoffs) ಗಮನದಲ್ಲಿಟ್ಟುಕೊಂಡು, ಮಗಳ ಭವಿಷ್ಯದ ಭದ್ರತೆಗಾಗಿ ಅವರು ಇಂಜಿನಿಯರ್ನ ಕೆಲಸದ ಪರ್ಫಾರ್ಮೆನ್ಸ್ ಬಗ್ಗೆಯೂ ತನಿಖೆ ನಡೆಸಿದ್ದಾರೆ. ನಿಮ್ಮ ಇತ್ತೀಚಿನ ಆಫೀಸ್ ಅಪರೈಸಲ್ನಲ್ಲಿ ಯಾವ ರೇಟಿಂಗ್ ಬಂದಿದೆ? ನಿಮ್ಮ ಟೀಮ್ನಲ್ಲಿ ನೀವು ಟಾಪ್ ಲೇಯರ್ನಲ್ಲಿ ಇದ್ದೀರಾ? ಇಲ್ಲವೇ? ಎಂದು ಪ್ರಶ್ನಿಸಿದ್ದಾರೆ.
ಹುಡುಗಿಯ ತಂದೆಯ ಪರ ನಿಂತವರು (ಬ್ಯಾಕ್ಗ್ರೌಂಡ್ ಚೆಕ್ ಸರಿ ಎಂದವರು):
ಮೊದಲನೇ ಬಳಕೆದಾರರು: “ಸಿಬಿಲ್ ಸ್ಕೋರ್ ಚೆಕ್ ಮಾಡುವುದರಲ್ಲಿ ತಪ್ಪೇನಿಲ್ಲ. ಒಂದು ವೇಳೆ ಹುಡುಗ ಸಾಲದ ಸುಳಿಯಲ್ಲಿ ಸಿಲುಕಿದ್ದರೆ, ಮದುವೆಯಾದ ಮೇಲೆ ಹುಡುಗಿಯನ್ನು ಬ್ಲ್ಯಾಕ್ಮೇಲ್ ಮಾಡಿ ಆಕೆಯ ಪೋಷಕರಿಂದ ಹಣ ತರಲು ಪೀಡಿಸುವ ಸಾಧ್ಯತೆ ಇರುತ್ತದೆ. ನೀವು ಆ ರೀತಿಯ ವ್ಯಕ್ತಿ ಅಲ್ಲದೇ ಇರಬಹುದು, ಆದರೆ ಸಮಾಜದಲ್ಲಿ ಇಂತಹ ಘಟನೆಗಳು ನಡೆಯುತ್ತಿರುತ್ತವೆ.”
ಮೂರನೇ ಬಳಕೆದಾರರು: “ಭಾರೀ ಸಾಲದಲ್ಲಿರುವ, ಆಫೀಸ್ನಲ್ಲಿ ಸರಿಯಾಗಿ ಪರ್ಫಾರ್ಮ್ ಮಾಡದ ವ್ಯಕ್ತಿಗೆ ತಂದೆಯಾದವನು ತನ್ನ ಮಗಳನ್ನು ಹೇಗೆ ತಾನೇ ಮದುವೆ ಮಾಡಿಕೊಡಲು ಸಾಧ್ಯ? ಮದುವೆ ಎಂಬುದು ಒಂದು ರೀತಿಯ ಗಂಭೀರವಾದ ಜೂಜಾಟ ಇದ್ದಂತೆ. ಪೋಷಕರು ಯೋಚಿಸುವುದು ಸಹಜ.”
ಐದನೇ ಬಳಕೆದಾರರು: “ಮದುವೆಯಲ್ಲಿ ಸಂಪೂರ್ಣ ಪಾರದರ್ಶಕತೆ ಇರಬೇಕು. ನಿಮ್ಮ ಸಿಬಿಲ್ ಸ್ಕೋರ್ ಚೆನ್ನಾಗಿದ್ದು, ನಿಮ್ಮ ಉದ್ದೇಶಗಳು ಶುದ್ಧವಾಗಿದ್ದರೆ, ಒಬ್ಬ ತಂದೆಯ ದೃಷ್ಟಿಕೋನವನ್ನು ಅರ್ಥಮಾಡಿಕೊಂಡು ಸಹಕರಿಸಿ. ಇಲ್ಲದಿದ್ದರೆ ನೀವೇ ಒಂದು ‘ರೆಡ್ ಫ್ಲಾಗ್’ (Red flag – ಅಪಾಯದ ಮುನ್ಸೂಚನೆ) ತರಹ ಕಾಣಿಸುತ್ತೀರಿ.”
ಇಂಜಿನಿಯರ್ ಪರ ನಿಂತವರು (ಪ್ರಶ್ನೆ ಕೇಳಿದ ಶೈಲಿ ತಪ್ಪು ಎಂದವರು):
ಎರಡನೇ ಬಳಕೆದಾರರು: “ಬಹಳ ಬೇಸರದ ಸಂಗತಿ. ಇದು ಖಂಡಿತವಾಗಿಯೂ ತುಂಬಾ ಕೆಟ್ಟ ಅನುಭವ. ನೀವು ಇಂತಹ ಪರಿಸ್ಥಿತಿಯನ್ನು ಎದುರಿಸಬೇಕಾಗಿ ಬಂದಿದ್ದಕ್ಕೆ ವಿಷಾದವಿದೆ.”
ನಾಲ್ಕನೇ ಬಳಕೆದಾರರು: “ನಮ್ಮ ಮಧ್ಯೆ ಇಂತಹ ವಿಚಿತ್ರ ಮನುಷ್ಯರು (Specimens) ಕೂಡ ಬದುಕುತ್ತಿದ್ದಾರಾ? ಇದನ್ನು ಕೇಳಿದಾಗ ನೀವು ಅವನ ಮುಖಕ್ಕೆ ಒಂದೇ ಏಟು ಕೊಡಬೇಕಿತ್ತು” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ
