ಶಾಲೆ ಎನ್ನುವುದು ಕೇವಲ ಪಾಠ ಕಲಿಯುವ ಸ್ಥಳವಲ್ಲ, ಅದು ಮಾನವೀಯತೆ ಮತ್ತು ಸಂಸ್ಕಾರವನ್ನು ಕಲಿಸುವ ದೇಗುಲ ಎಂಬ ಮಾತಿಗೆ ಸಾಕ್ಷಿಯಾದ ವಿಡಿಯೋವೊಂದು ಈಗ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ. ವಿದ್ಯಾರ್ಥಿಯೊಬ್ಬನ ಊಟದ ಡಬ್ಬಿಯನ್ನು ನೋಡಿ ಶಿಕ್ಷಕಿ ತೋರಿದ ಪ್ರಬುದ್ಧತೆ ಮತ್ತು ಪ್ರೀತಿಯ ನಡೆ ಕೋಟ್ಯಂತರ ಜನರ ಕಣ್ಣಾಲಿಗಳನ್ನು ತೇವಗೊಳಿಸಿದೆ.
ವೈರಲ್ ಆಗಿರುವ ದೃಶ್ಯದಲ್ಲಿ ಶಿಕ್ಷಕಿಯೊಬ್ಬರು ಮಧ್ಯಾಹ್ನದ ಊಟದ ಸಮಯದಲ್ಲಿ ತರಗತಿಯ ಸುತ್ತ ಓಡಾಡುತ್ತಾ ಮಕ್ಕಳ ಡಬ್ಬಿಗಳನ್ನು ಗಮನಿಸುತ್ತಿರುತ್ತಾರೆ. ಈ ವೇಳೆ ವಿದ್ಯಾರ್ಥಿಯೊಬ್ಬ ತನ್ನ ಡಬ್ಬಿಯಲ್ಲಿ ಕೇವಲ ರೊಟ್ಟಿ ಮತ್ತು ಸಕ್ಕರೆಯನ್ನು ಇಟ್ಟುಕೊಂಡು ತಿನ್ನುತ್ತಿರುವುದು ಅವರ ಗಮನಕ್ಕೆ ಬರುತ್ತದೆ. ಸಾಮಾನ್ಯವಾಗಿ ಇಂತಹ ಸಂದರ್ಭದಲ್ಲಿ ಮಗುವಿನ ಬಡತನದ ಬಗ್ಗೆ ಪ್ರಶ್ನಿಸುವ ಅಥವಾ ಅನುಕಂಪ ತೋರುವ ಸಾಧ್ಯತೆ ಇರುತ್ತದೆ. ಆದರೆ ಈ ಶಿಕ್ಷಕಿ ಮಾಡಿದ್ದೇ ಬೇರೆ.
ಮಗುವಿನ ಸ್ವಾಭಿಮಾನಕ್ಕೆ ಧಕ್ಕೆ ತರದ ನಡವಳಿಕೆ ಆ ಪುಟ್ಟ ಬಾಲಕನಿಗೆ ಸಂಕೋಚ ಅಥವಾ ಮುಜುಗರ ಆಗದಂತೆ ಅತ್ಯಂತ ಶಾಂತ ರೀತಿಯಲ್ಲಿ ಶಿಕ್ಷಕಿ ಸ್ಪಂದಿಸಿದ್ದಾರೆ. ಮಗುವನ್ನು ಪ್ರಶ್ನಿಸಿ ಅಂಜಿಸುವ ಬದಲು ಅಥವಾ ಇತರರ ಮುಂದೆ ಅವನ ಸ್ಥಿತಿಯನ್ನು ಎತ್ತಿ ತೋರಿಸುವ ಬದಲು, ಅತ್ಯಂತ ಪ್ರೀತಿಯಿಂದ ಮಾತನಾಡಿಸಿ ಆ ಮಗು ಖುಷಿಯಿಂದ ಊಟ ಮಾಡುವಂತೆ ಪ್ರೋತ್ಸಾಹಿಸಿದ್ದಾರೆ. ಶಿಕ್ಷಕಿಯ ಈ ಸೂಕ್ಷ್ಮ ಸಂವೇದನೆಯು ಮಗುವಿನ ಆತ್ಮಗೌರವವನ್ನು ಎತ್ತಿ ಹಿಡಿಯುವುದಲ್ಲದೆ, ಸಹಪಾಠಿಗಳ ನಡುವೆ ಅವನು ಕೀಳರಿಮೆ ಅನುಭವಿಸದಂತೆ ನೋಡಿಕೊಂಡಿದೆ.
ನೆಟ್ಟಿಗರ ಭಾವುಕ ಪ್ರತಿಕ್ರಿಯೆ ಈ ವಿಡಿಯೋ ನೋಡಿದ ಸಾವಿರಾರು ಜನರು ಶಿಕ್ಷಕಿಯ ಗುಣಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಈ ಪೈಕಿ ಒಬ್ಬ ಬಳಕೆದಾರರು ಹಂಚಿಕೊಂಡಿರುವ ಕಾಮೆಂಟ್ ಎಲ್ಲರ ಗಮನ ಸೆಳೆಯುತ್ತಿದೆ. “ನನ್ನ ತಾಯಿ ಕೂಡ ನನಗೆ ಬಾಲ್ಯದಲ್ಲಿ ರೊಟ್ಟಿ ಮತ್ತು ಸಕ್ಕರೆಯನ್ನು ಕೊಡುತ್ತಿದ್ದರು. ಇಂದು ನಾನು ಪದವೀಧರನಾಗಿ ಎಐ ಇಂಜಿನಿಯರ್ ಆಗಿ ಒಳ್ಳೆಯ ಸಂಪಾದನೆ ಮಾಡುತ್ತಿದ್ದೇನೆ. ಆದರೆ ಈ ವಿಡಿಯೋ ನೋಡಿ ಹಳೆಯ ನೆನಪಾಗಿ ಕಣ್ಣೀರು ಬಂತು” ಎಂದು ಭಾವುಕರಾಗಿ ಬರೆದುಕೊಂಡಿದ್ದಾರೆ.
ಜಗತ್ತಿಗೆ ಇಂದು ಬೇಕಿರುವುದು ಕೇವಲ ಪಠ್ಯದ ಜ್ಞಾನವಲ್ಲ, ಇಂತಹ ಸಹಾನುಭೂತಿ ಇರುವ ಶಿಕ್ಷಕರು ಎಂದು ನೆಟ್ಟಿಗರು ಕೊಂಡಾಡುತ್ತಿದ್ದಾರೆ. ಮಗುವಿನ ಮನಸ್ಸಿನ ಮೇಲೆ ಗಾಯವಾಗದಂತೆ ಪರಿಸ್ಥಿತಿಯನ್ನು ನಿಭಾಯಿಸಿದ ಈ ಶಿಕ್ಷಕಿ ಈಗ ಇಂಟರ್ನೆಟ್ ಸ್ಟಾರ್ ಆಗಿ ಹೊರಹೊಮ್ಮಿದ್ದಾರೆ.
